1. Nan̈ino ma raha ten̈a maventy môfo zen̈y tamin’ny andran’ny Baiboly?

 MÔFO an̈isan’ny foto-tsakafon’olo tamin’ny andran’ny Baiboly tan̈y. (Gen. 14:18; Lioka 4:4) Ten̈a nahazatra olo tamy zen̈y izio, ke matetiky Baiboly mampiasa volan̈a môfo io ivolan̈ana hanin̈y. (Mat. 6:11; Asa. 20:7) Samy nisy môfo koa tamy fahagagan̈a aroe malaza nataon’i Jesosy. (Mat. 16:9, 10) Ahitantsika araiky amy tantara zen̈y amy Jaona toko faha-​6. Himpody hidinihintsika ndraiky tantara io, ke atsika hizaha ino aby leson mety halaintsika baka amizio, amy ziôty.

2. Nan̈ino ma irô olo aby io nila namian̈a hanin̈y?

² Irô apostolin’i Jesosy aby io koa fa baka nitory, irô kajo mare. Irô nandeha sambo niaraka tamy Jesosy tamy Ranomasin̈in’i Galilia, baka irô mahavita mangala kajo. (Mar. 6:7, 30-32; Lioka 9:10) Ke irô navy tamy tany mitokana tamy faritrin’i Betsaida. Fa tiô fo, nisy vahoaka andrivony vory nan̈odidin̈y irô tiô. Tsy nambelan’i Jesosy karaha io fo irô olo aby io. Izy tsara fan̈ahy nampianatra irô momba Fanjakan̈an’ny Zan̈ahary ndreky nitaha olo marary. Ke izikoa fa nahaihariva andra, irô mpianatra aby io niasaloha ino hanin̈y hamezan̈a olo aby io. Sasany tamindrô io nisy hanin̈y fa hely fo, fa ankamarozandrô ndraiky mbala nila nandeha tantànana tan̈y nivanga hanin̈y. (Mat. 14:15; Jaona 6:4, 5) Ke akôry nataon’i Jesosy?

FAHAGAGAN̈A MOMBA MÔFO

3. Karakôry nan̈amezan’i Jesosy raha nilain’olo marobe io? (Zahava koa sary amy fôn̈ony.)

³ Ho Jesosy tamindrô apostolinany aby io: “Irô tsy mila mandeha zen̈y. Amezanarô hanin̈y irô hoanindrô.” (Mat. 14:16) Karaha tsy ho vita foeky han̈amia hanin̈y olo aby io fôtony  baka nisy lelahy kadiriny 5 000. Aviô, izikoa konten̈a man̈angy ndreky tsaiky mety kadirin’ny 15 000 olo nila namian̈a hanin̈y. (Mat. 14:21) Ke karaha ty ho Andrea: “Ty misy tsaiky lelahy misy môfo dimy ndreky laoko aroe. Kanefa ino ma raha vitan’izen̈y amin’olo marobe ty?” (Jaona 6:9) Hanin̈in’olo tamy zen̈y môfo vita tamy vary orza. Baka iô koa, irô laoko madiniky aby io, mety laoko sira. Fa ndray zen̈y, tsy honohono hahampy olo marobe io foeky hanin̈y tamy tsaiky lelahy io, sa karakôry?

4. Ino raha ianarantsika baka amy Jaona 6:11-13? (Zahava koa sary.)

⁴ Jesosy tihan̈aboaka fa izy tsara fan̈ahy tamindrô vahoaka aby io. Izy nan̈iraka irô hipetraka mitsitokotoko amy bozaka. (Mar. 6:39, 40; vakia Jaona 6:11-13.) Baka iô amy zay Jesosy nan̈ano mersy Babany momba irô môfo ndreky laoko aby io. Ten̈a mety nan̈anaovany mersy Zan̈ahary zen̈y, fôtony baka taminany navian’ny hanin̈y aby io. Ke ten̈a raha maventy koa hangalantsika tahaka modely namezan’i Jesosy zen̈y. Ke atsika mila mivavaka alohan’ny mihina, na atsika zaraiky zen̈y na misy olo miaraka amintsika. Nirasain’i Jesosy amy zay hanin̈y in̈y baka tiô. Ke irô olo aby io nihina, ke voky. Ndray izy aby mbala nisy lambiny tavela. Ke tsy tian’i Jesosy ho verivery karaha io fo lambiny io. Nirahiny navory irô io, amy zen̈y mbala ho azo ampiasain̈a ndraiky. Jesosy tsy nan̈arin̈ary raha fo. Ohatra tsara mety halaintsika tahaka raha zen̈y. Raimandreny ma anao? Ampiasà tantara io hampianaran̈a zanakanao fa ten̈a raha maventy mivavaka alohan’ny hihina, mahay mandray vahiny, baka iô tsy matity.

5. Akôry nataondrô vahoaka aby io, irô koa fa nahita raha nataon’i Jesosy tamy zen̈y, baka iô karakôry nataon’i Jesosy?

 ⁵ Gaga irô vahoaka aby io tamy fomba fampianaran’i Jesosy ndreky tamy fahagagan̈a nataony. Haindrô baka fa Zan̈ahary nivolan̈a handefa mpaminan̈y araiky maventy, ke irô mety nieritreritry fa izio Jesosy. (Deot. 18:15-18) Irô baka mety nieritreritry fa Jesosy io ten̈a mpitondra mahay, ke mahavita man̈amia hanin̈y olo tsiaraikiaraiky an Israely. Ke Jesosy ‘nitirendrô olo aby hatao mpanjaka.’ (Jaona 6:14, 15) Ke izikoa Jesosy nan̈eky zen̈y, izy niditry tamy politikindrô Jiosy tambany fahifan̈an’ny Romanin̈y aby io. Fa zen̈y ankitin̈y ma raha nataony? Ehe, nialany tiô, ke ‘nimpody nandeha tamy bongo tan̈y’ ndraiky izy. Ndray izy nitiren’olo, izy tsy nety niditry tamy politiky foeky! Ino raha ianarantsika baka amy zen̈y?

6. Akôry han̈aboahantsika fa atsika tihangala tahaka modely nambelan’i Jesosy? (Zahava koa sary.)

⁶ Marin̈y ndraiky fa tsisy olo han̈iraka atsika han̈ano fahagagan̈a na hampajanga olo marary, na hangala atsika hatao mpanjakandrô na hitondra firenena. Fa irô mety handrisiky atsika hifidy na hanohan̈a olo araiky iritriretindrô fa han̈atsara raha. Fa mazava tsarabe ndraiky modely namezan’i Jesosy. Izy tsy nan̈eky niditry tamy politiky. Ndray izy aby nivolan̈a: “Fanjakan̈anaka tsy an̈isan’ny donia ty.” (Jaona 17:14; 18:36) Atsika io kristianin̈y, ke mila mangala tahaka fomba fieritreretan’ i Jesosy raha, ndreky raha nataony. Karaha izy, atsika manohan̈a Fanjakan̈an’ny Zan̈ahary, mikoran̈a izio amin’olo ndreky mivavaka havian’izio. (Mat. 6:10) Fa alô himpodianantsika ndraiky fahagagan̈a nataon’i Jesosy nan̈amia môfo olo in̈y, ke hidinihintsika ino koa raha ianarantsika baka amizio.

“DIKAN’NY MÔFO”

7. Ino raha nataon’i Jesosy ndreky apostoly aby io? (Jaona 6:16-20)

⁷ Jesosy koa fa baka nampihina olo marobe in̈y, izy ndreky apostolinany aby io niala tamy faritry tiô ke nandeha sambo nimpody ta Kapernaomy. Izy baka tiô mbala nimpody tamy bongo tan̈y baka tsy hitandrô vahoaka hangala izy hatao mpanjaka in̈y. (Vakia Jaona 6:16-20.) Irô apostoly aby io koa fa nampanonga lavoaly in̈y, tiô fo niova andra. Nisy tsiko naresaka, aviô naresaka mare daroba. Jesosy baka tiô nan̈aton̈o irô apostoly aby io, ke izy nandeha tan̈abon’ny rano. Aviô apostoly Petera nikahiny nan̈aton̈o izy, ke nandeha tan̈abon’ny rano koa. (Mat. 14:22-31) Fa Jesosy koa fa tafiditry tan̈aty sambo io, nangin̈y tsiko be in̈y. Lany fan̈ahy irô mpianatra aby io ke nivolan̈a: “Anao Zanakan’ny Zan̈ahary ankitin̈y.” a (Mat. 14:33) Kanefa, mbala tsy takatran’ny jerindrô foeky ino ifandraisan’ny fahagagan̈a io ndreky fahagagan̈a nataony talohan’izio tamindrô vahoaka aby in̈y. Aleva onon̈o baka raha nivolan̈in’i Marka momba raha nandalo io: “Gaga mare apostoly aby io. Tsy nazava tamindrô baka dikan’ny fahagagan̈a momba môfo aby io, fôtony fôndrô baka mbala donto, ke tsy takatran’ny jerindrô dikan’izin̈y.” (Mar. 6:50-52) Tsy takatrandrô mpianatra aby io foeky fa Jehovah nan̈amia angôvo Jesosy, hahavitan̈a raha mandilatran’ny fahagagan̈a nampamaro môfo in̈y. Tsy ela tafaran’izin̈y, Jesosy nikoran̈a ndraiky fahagagan̈a momba môfo in̈y, ke nampianatra atsika leson hafa koa.

8-9. Nan̈ino ma vahoaka aby io nitady Jesosy? (Jaona 6:26, 27)

⁸ Irô olo marobe namian’i Jesosy hanin̈y aby in̈y, varian̈a tamy raha nilain’ny vatan̈andrô ndreky raha nirindrô fo. Karakôry ma zen̈y? Amarain’izin̈y baka, hitandrô Jesosy ndreky irô apostolinany aby io niala tiô. Fa irô vahoaka aby io nangala sambo aby navy baka ta Tiberiasy, ke nandeha ta Kapernaomy nitady Jesosy. (Jaona 6:22-24) Tihaharen̈y raha momba Fanjakan̈an’ny Zan̈ahary ma antony nan̈anaovandrô raha zen̈y? Ehe. Antony ten̈a nan̈anaovandrô raha zen̈y momba raha ilain’ny vatan̈andrô fo. Ino mahavy atsika mivolan̈a zen̈y?

⁹ Aleva onon̈o baka raha nisy, vahoaka aby io koa fa nahita Jesosy narikitry ta Kapernaomy. Jesosy tsy nisalasala foeky nivolan̈a fa hanin̈y fo raha ten̈a nitadiavandrô vahoaka aby io izy. Ndray irô vahoaka aby io “nihina môfo ke voky”, nivolan̈in’i Jesosy fa hanin̈y nihoanindrô io “hanin̈y mety ho robaka.” Ke izy nandrisiky irô hifen̈y hiasa mare, baka hahazo “hanin̈y maharitry ke hazahoan̈a fiain̈ana tsisy farany.” (Vakia Jaona 6:26, 27.) Jesosy nivolan̈a fa Babany han̈amia hanin̈y zen̈y. Irô vahoaka aby io koa fa naharen̈y fa misy hanin̈y hazahoan̈a fiain̈ana tsisy farany, irô mety gaga mare! Hanin̈y karakôry ma hazahoan̈a zen̈y, baka iô karakôry hazahoan’olo mitandren̈y Jesosy izio?

10. Ino ma raha nila nataondrô vahoaka aby io izikoa irô tihahazo fiain̈ana tsisy farany?

¹⁰ Tiandrô Jiosy aby io hay ino raha mila ataondrô baka hazahoandrô hanin̈y io. Irô mety nieritreritry fa irô nila nan̈ano asa  nirahin’ny Lalàn̈an’i Mosesy fa tsy maintsy hataondrô. Fa Jesosy nivolan̈a karaha ty: “Anarô man̈ano asan’ny Zan̈ahary izikoa anarô man̈aboaka fa anarô mino araiky nirahiny.” (Jaona 6:28, 29) Izikoa olo araiky “tihahazo fiain̈ana tsisy farany”, izy mila man̈aboaka fa izy mino solonten̈an’ny Zan̈ahary. Efa nikoran̈a momba zen̈y Jesosy talohan’izio. (Jaona 3:16-18, 36) Tafaran’izen̈y koa Jesosy nikoran̈a tsarabe mikasiky fomba hazahoan̈a fiain̈ana tsisy farany.​—Jaona 17:3.

11. Karakôry nan̈aboahandrô Jiosy aby io fa hanin̈y nilain’ny vatan̈andrô fo raha ten̈a nahasetry irô? (Salamo 78:24, 25)

¹¹ Irô Jiosy aby io tsy nino fa irô nila nan̈aboaka finoan̈a Jesosy. Ke ho irô taminany: “Ino basy fahagagan̈a hataonao, ke hinoanay anao?” (Jaona 6:30) Irô nivolan̈a fa razambendrô tamy faha Mosesy tan̈y nahazo mana. Zen̈y hanin̈indrô isan’andra tamy zen̈y. (Neh. 9:15; vakia Salamo 78:24, 25.) Jerindrô mbala tamin’ny hanin̈y ara-bakiteny fo. Ke izikoa Jesosy fa nikoran̈a momba “ten̈a môfo baka an-dan̈itry” in̈y, irô tsy nan̈iraka Jesosy han̈azava momba zen̈y foeky, kanefa izio mira mana baka an-dan̈itry hazahoan̈a fiain̈ana. (Jaona 6:32) Raha nilain’ny vatan̈andrô fo nahasetry irô, ke tsy nijirendrô foeky raha tian’i Jesosy nampianarin̈y irô mikasiky raha mila ataondrô baka hazahoan̈a fiain̈ana tsisy farany. Ino raha ianarantsika baka amy tantara io?

INO RAHA TÔKONY HO FARAN’NY RAHA MAVENTY AMINTSIKA?

12. Izikoa raha nikoran̈in’i Jesosy zahan̈a, ino raha ten̈a maventy?

¹² Ty leson maventy baka amy Jaona toko faha-​6 io. Tôkony ho raha ara-pan̈ahy raha ten̈a maventy amintsika. Aleva onon̈o fa naboakan’i Jesosy tsarabe raha zen̈y, izikoa izy fa nanohitry fakam-pan̈ahy baka tamy Satana. (Mat. 4:3, 4) Baka iô tamy Toriteninany Tan̈abon’ny Bongo in̈y, izy nankamafy tsarabe fa ten̈a raha maventy mahatsapa fa mila Zan̈ahary. (Mat. 5:3) Ke tsara izikoa atsika man̈ontany ten̈a karaha ty: ‘Hita amy fomba fiain̈ananaka ma fa raha ara-pan̈ahy raha ten̈a maventy aminaka, tozay raha ilain’ny vatan̈anaka manokan̈a?’

13. a) Nan̈ino ma tsy diso atsika koa mankafy hanin̈y? b) Fa ino raha mila tandremantsika? (1 Korintianina 10:6, 7, 11)

¹³ Tsy diso atsika izikoa mivavaka momba raha ilaintsika, ndreky mankafy irô raha aby zen̈y. (Lioka 11:3) Baiboly mivolan̈a fa mahatsara atsika “mihina ndreky migiaka, baka iô mahita haravoan̈a baka amin’ny asa mare ataontsika. Baka amy tan̈an’ny Zan̈ahary marin̈y koa raha zen̈y.” (Mpito. 2:24; 8:15; Jak. 1:17) Kanefa raha zen̈y mila ambelantsika amy toeran̈a tôkony hisy izy. Haintsika raha zen̈y baka tamy raha nisoratin’ny apostoly Paoly tamindrô Kristianin̈y aby io. Izy nikoran̈a raha tamy faha Israelita taloha tan̈y, an̈isan’izen̈y raha nandalo narikitry Bongo Sinay. Izy nampitandrin̈y irô Kristianin̈y aby io baka “tsy han̈iry raha ratsy, karaha nataondrô Israelita aby io.” (Vakia 1 Korintianina 10:6, 7, 11.) Jehovah nan̈ano fahagagan̈a nan̈amezan̈a hanin̈y irô Israelita aby io. Fa nohon’irô tia hanin̈y dila loatra, nanjary “raha ratsy” tamindrô raha zen̈y. (Nom. 11:4-6, 31-34) Baka iô irô koa fa nivavaka tamy zanak’aomby volamena in̈y, fihinanan-kanin̈y ndreky figiahan̈a ndreky fetifety raha ten̈a nampiasaloha irô, fa tsy fan̈arahan̈a volan̈an’i Jehovah. (Eks. 32:4-6) Ke nikoran̈in’i Paoly raha aby zen̈y, baka nampitandreman̈a irô Kristianin̈y niain̈y talohan’ny nandravanan̈a Jerosalema ndreky tempolinany tamy taon̈o 70. Atsika iziôty miain̈y marikitry favian’ ny faran’ny donia ty, ke atsika ten̈a mila man̈araka tsarabe fampitandreman̈an’i Paoly io koa.

14. Ino raha volan̈in’ny Baiboly momba hanin̈y amy donia vaovao?

¹⁴ Jesosy koa fa nan̈iraka atsika hivavaka hangataka ‘hanin̈y ilaintsika niany’, izy koa nampianatra atsika hivavaka baka sitrapôn’ny Zan̈ahary hatao ambony tany eto karaha an-dan̈itry an̈y. (Mat. 6:9-11) Ino ma sary avy an̈atin’ny jerinao, izikoa fa mieritreritry zen̈y? Baiboly mivolan̈a fa an̈isan’ny sitrapôn’ny Zan̈ahary ambony tany ty hisian’ny hanin̈y tsara, karaha raha volan̈in’ny Isaia 25:6-8 ao. Ke ho hisy hanin̈y maro tsara sady treka, lera Fanjakan̈an’ny Zan̈ahary mitondra tany ty. Mivolan̈a karaha ty koa Salamo 72:16: “Hahavokatra be tany. Ho maro be vokatra na firaka an-tampon’ny bongo an̈y.” Efa tsy din̈inao ma handoky hanin̈y tianao mare, na hanin̈y mbala tsiary nihoaninao foeky? Ankoatran’izen̈y koa, anao mety hankafy mare voan’ny kakazo natsabonao. (Isaia 65:21, 22) Olo jiaby hankafy raha zen̈y aby.

15. Ino ma raha handeha hianarandrô olo hatsangana amy maty aby io? (Jaona 6:35)

¹⁵ Vakia Jaona 6:35. Diniha amy zay baka irô olo aby nihina môfo ndreky laoko namezan’i Jesosy aby in̈y. Lera amy fitsanganan̈a amy maty, anao mety hifanôjy sasany amindrô in̈y. Ndray tamy taloha tan̈y irô tsy nan̈aboaka fa mino Jesosy, irô mety mbala hatsangana amy maty fo. (Jaona 5:28, 29) Irô olo aby zen̈y tsy maintsy mbala hianatra dikan’ny raha nivolan̈in’i Jesosy ty: “Zaho môfon’ny fiain̈ana. Lan̈iany olo man̈aton̈o zaho efa tsy ho mosary eky.” Irô mila mino fa Jesosy nan̈ano sôron̈o ain̈inany baka han̈avaotan̈a irô. Amy fotoan̈a zen̈y, ho hisy fandaharan̈a maventy hampianaran̈a olo jiaby natsangana tamy maty ndreky irô tsaiky teraka, amy donia vaovao an̈y. Mamparavoravo mare han̈ano asa fampianaran̈a zen̈y. Man̈ampy olo hifandray marikitry amy Jehovah ten̈a hamparavoravo atsika mare amy zen̈y, mandilatra fihinanan̈a hanin̈y maro tsara.

16. Ino raha hidinihintsika amy lahatsoratra fan̈araka?

¹⁶ Tapany amy tantara amy Jaona toko faha-​6 fo raha nidinihintsika tato, fa mbala maro raha nampianarin’i Jesosy momba “fiain̈ana mandrakizay.” Irô Jiosy nikoran̈an’i Jesosy aby in̈y ten̈a nila nitandren̈y raha nivolan̈iny. Karaha zen̈y koa atsika. Ke atsika hanohy handiniky Jaona toko faha-​6 io amy lahatsoratra man̈araka.