Asa nivakianao tsarabe Tilikambo Fiambesan̈a tamy taon̈o ty? Izikoa zen̈y, zahava asa hainao valin’ny fan̈ontanian̈a aby ty:

Ino modely nambelan’i Jehovah momba fitondrasan̈a man̈angy?

Izy tsy man̈avakavaka fa mira fo fitondrasany lelahy ndreky man̈angy. Zan̈ahary mitandren̈y man̈angy, ke ten̈a raha maventy aminany fihetseham-pôndrô ndreky raha mampiasaloha irô. Izy matoky irô, ke irô ampan̈anaoviny asanany.​—w24.01, p. 15-16.

Akôry mety han̈arehantsika raha koran̈in’ny Efesianina 5:7 ty: “Aza man̈ano karaha irô io”?

Apostoly Paoly iô mampitandrin̈y atsika tsy hinaman̈a amin’olo mety hahavy atsika tsy han̈araka fitsipikin’ny Zan̈ahary, na izio olo ifandraisantsika mivantan̈a na amy tranonkala fifaneraseran̈a.​—w24.03, p. 22-23.

Ino aby tantara tsy marin̈y mila tandremantsika?

Tantara tsy hay fahamarin̈any baka amy kamaradintsika, e-mail baka amin’olo tsy haintsika, aviô koran̈a ataon’ny mpivadi-pinoan̈a.​—w24.04, p. 12.

Ino raha haintsika ndreky raha mbala tsy haintsika momba fomba hitsaran’i Jehovah Mpanjaka Solomona ndreky irô naty ta Sodoma ndreky Gomora in̈y, aviô irô naty tamy Safodrano in̈y?

Atsika tsy ten̈a mahay asa irô in̈y ripaka mandrakizay. Fa haintsika fo fa Jehovah mahay raha jiaby tafiditry amy zen̈y, aviô izy ten̈a mamindra fô.​—w24.05, p. 3-4.

Ino toky anan̈antsika baka amy fahaizantsika fa Jehovah io “Lampimbato”? (Deot. 32:4)

Atsika mety mitady fialofan̈a amy Jehovah. Izy atokisan̈a, ke izy tsy maintsy man̈atanteraka fampan̈antinan̈anany. Aviô izy tsy miovaova, tsy miova toetrinany ndreky fikasan̈anany.​—w24.06, p. 26-28.

Izikoa anao vo nifindra fiangonan̈a, ino raha han̈ampy anao ho tamana?

Milampia amy Jehovah, fôtony izy han̈ampy anao, karaha nataony tamy mpanomponany aby taloha tan̈y. Aza ampiran̈iny fiangonan̈a nisy anao taloha ndreky iziôty. Man̈anaova raha miaraka amy fiangonan̈a misy anao iziôty io, aviô mifen̈a mikamarady amin’olo ao.​—w24.07, p. 26-28.

Ino raha ianarantsika baka amy fan̈oharan̈a telo amy Matio toko faha-​25?

Fan̈oharan̈a momba ôndrikôndriky ndreky bengy in̈y mankamafy fa ilain̈a manan̈a finoan̈a ndreky tsy mivadiky. Fan̈oharan̈a momba virijiny misy jery ndreky tsy misain̈y in̈y ndraiky man̈ambara fa mila mioman̈a fo ndreky tsy rikian̈a. Aviô fan̈oharan̈a momba talenta in̈y ahitan̈a fa ten̈a raha maventy mazoto miasa mare.​—w24.09, p. 20-24.

Firy halavasan’ny tilikambo fidiran̈a tamy tempolin’i Solomona?

Amy 2 Tantara 3:4, misy sora-tan̈ana taloha tan̈y mivolan̈a fa izio “120 hakiho,” dikan’izen̈y 53 metara habosany. Fa misy sora-tan̈ana hafa azo atokisan̈a ndraiky mivolan̈a fa izio “20 hakiho,” na 9 metara. Araiky farany io mifandanja tsara amin’ny hativen̈an’ny riban’ny tempoly io.​—w24.10, p. 31.

Mpikarakara fiangonan̈a tôkony “hanambady tokana.” Ino ma dikan’izen̈y? (1 Tim. 3:12)

Dikan’izen̈y, tôkony man̈angy araiky fo vadiny, aviô izy tsy tôkony hijangajanga. Aviô izy koa tsy tôkony hankadala man̈angy hafa.​—w24.11, p. 19.

Nan̈ino atsika mivolan̈a fa Jaona 6:53 io tsy mikoran̈a momba Sakafo Harivan’ny Tompo?

Jaona 6:53 mikoran̈a fa ilain̈a mihina vatan̈an’i Jesosy ndreky migiaka lionany. Tamy taon̈o 32 Jesosy nivolan̈a izio, ta Galilia tan̈y. Irô Jiosy mbala nila nino izy aby io nivolan̈any izio. Fa taon̈o araiky tafaran’ny zen̈y izy vo nan̈ano Sakafo Harivan’ny Tompo io voanalohany ta Jerosalema tan̈y. Jesosy tamin’io nikoran̈a tamin’olo aby hiaraka hanjaka aminany an-dan̈itry an̈y.​—w24.12, p. 10-11.