Karaha ty nisoratin’ny apostoly Paoly tamy Timoty, anti-pan̈ahy namany: “Mandrisiky anao mare zaho manoloan̈a Zan̈ahary ndreky Kristy Jesosy aviô anjely voafidy, han̈araka irô toromariky aby io, baka iô tsy hitsara an-tendrony ndreky tsy han̈avakavaka foeky izikoa fa man̈ano zen̈y.”​—1 Tim. 5:21.

Baka hahaizantsika azôvy irô io, hikoran̈intsika antsendriky irô anjely tsy tafiditry an̈atin’izen̈y. Irô io tsy an̈isan’ny 144 000. Tamy Paoly nanoratra tamy Timoty io, mbala tsendriky nanomboko fananganan̈a irô Kristianin̈y voahosotro handeha an-dan̈itry an̈y. Aviô, irô apostoly ndreky irô olo hafa voahosotro mbala tsendriky nanjary anjely. Ke “anjely voafidy” io dikan’izen̈y tsy irô voahosotro aby io foeky.​—1 Kor. 15:50-54; 1 Tes. 4:13-17; 1 Jaona 3:2.

“Anjely voafidy” aby io koa tsy irô anjely nanohitry Zan̈ahary tamy Safodrano in̈y. Irô anjely aby zen̈y baka nilan̈y tamy Satana ke nanjary demony, fahavalon’i Jesosy. (Gen. 6:2; Lioka 8:30, 31; 2 Pet. 2:4) Amin’ny hoavy, irô higadrain̈y an̈atin’ny lavaka tsy hita farany an̈atin’ny 1 000 taon̈o, baka iô amy zay haripaka miaraka amy Devoly.​—Joda 6; Apok. 20:1-3, 10.

Ke tsy maintsy anjely an-dan̈itry an̈y tsy mivadiky amy “Zan̈ahary ndreky Kristy Jesosy” irô “anjely voafidy” aby io.

Andrivony andrivony anjely tsy mivadiky aby io. (Heb. 12:22, 23) Mety tsy miran̈a asa ampan̈anaovin’i Jehovah irô anjely aby io. (Apok. 14:17, 18) Aleva onon̈o fa anjely araiky fo nirahin’i Jehovah nandripaka maramila asyrianin̈y 185 000. (2 Mpanj. 19:35) Kanefa mety misy anjely maromaro hirahin’i Jesosy “hamory zay olo mampanota olo ndreky lan̈iany olo zatra mandika lalàn̈a. Irô io hadosondrô anjely aby io tsy ho an̈isan’ny Fanjakan̈anany.” (Mat. 13:39-41) Sasany ndraiky mety ‘hamory irô olo voafidiny aby io’ handeha an-dan̈itry an̈y. (Mat. 24:31) Fa sasany ndraiky irahan̈a ‘miaro atsika amy zay tany himboantsika.’​—Sal. 91:11; Mat. 18:10; ampiràn̈a amy Matio 4:11; Lioka 22:43.

Irô “anjely voafidy” koran̈in’ny 1 Timoty 5:21 io mety anjely irahan̈a mikarakara vahoakan’ny Zan̈ahary. Amin’ny andininy man̈odidin̈y, Paoly man̈amia torohevitry momba irô anti-pan̈ahy aby io. Irô io vain̈y hahazo fan̈ajan̈a baka amy fiangonan̈a. Fa irô anti-pan̈ahy aby io ndraiky tôkony han̈ano andraikitrindrô ke “tsy hitsara an-tendrony ndreky tsy han̈avakavaka.” Irô koa tsy tôkony hanapa-kevitry mekimeky fo. Irô ten̈a tôkony han̈araka torohevitry namezan’i Paoly io fôtony irô mikarakara rahalahindrô aby io “manoloan̈a Zan̈ahary ndreky Kristy Jesosy aviô anjely voafidy.” Mazava baka amy zen̈y fa misy anjely sasany irahin̈y man̈ano andraikitry misy ifandraisany amy fiangonan̈a, karaha ataon’ny miaro, man̈ara-maso asa fitorian̈a ndreky man̈ano tatitry amy Jehovah.​—Mat. 18:10; Apok. 14:6.