1. Nan̈ino ma atsika tôkony han̈araka tari-dalan̈an’i Jehovah Mpitariky atsika io? Hazavà amin’ny ohatra.

 MINIMINIA hely baka anao ziôty very an̈atiala. Feno raha mampavozo ao: Biby dỳ, biby madiniky maro mamitiky, kakazo misy poazon, aviô tany feno vato. Misaora ravoravo anao izikoa mahita mpitariky lalan̈a efa mahay atiala io, ke mitariky anao amy tany tôkony himboanao. Tsisy ny hafa amy zen̈y koa fiain̈ana amy donia ty. Feno raha hatahoran̈a handrobaka fihavan̈antsika amy Jehovah izio. Fa atsika ndraiky manan̈a Jehovah. Izy Pitariky lavorary. Izy mitariky atsika amy lalan̈a mandeha amy fiain̈ana tsisy farany amy donia vaovao, aviô miaro atsika tsy ho azon’ny raha jiaby mety handrobaka fifandraisantsika aminany.

2. Akôry ma ataon’i Jehovah mitariky atsika?

² Akôry ma ataon’ i Jehovah mitariky atsika? Voanalohany, izy mampiasa Volan̈anany, Baiboly. Fa kanefa, izy koa mampiasa olombelon̈o hisolo ten̈a izy. Ohatra iziô, izy mampiasa “mpanompo atokisan̈a ndreky mahadiniky raha” man̈amia atsika hanin̈y ara-pan̈ahy han̈ampy atsika han̈ano fanapahan-kevitry feno fahendrena. (Mat. 24:45) Jehovah mampiasa lelahy maro mahay mitariky atsika. Ohatra, iô irô mpiandraikitrin’ny faritry, ndreky irô anti-pan̈ahy amy fiangonan̈a, mankahery atsika ndreky man̈amia tari-dalan̈a man̈ampy atsika hiatriky raha sarotro. Ten̈a ravoravo atsika fôtony irô man̈amia tari-dalan̈a atokisan̈a tsarabe an̈atin’ny andra farany ty. Tari-dalan̈a amezandrô atsika io han̈ampy atsika hikamarady amy Jehovah fo, baka atsika ho afaka hankafy fiain̈ana rango iziôty ndreky mandrakizay.

3. Ino aby ma raha hidinihintsika amy lahatsoratra ty?

³ Fa ndraikindraiky, mety ho sarotro amintsika han̈araka tari-dalan̈an’i Jehovah, sirto izikoa lelahy tsy lavorary man̈amia izio atsika. Na koa, atsika mety mieritreritry fa tsy fahendrena torohevitry nazontsika io, ke atsika mety hieritreritry fa izio tsy baka amy Jehovah foeky. Amy fotoan̈a karaha zen̈y atsika mila mieritreritry fa Jehovah mitariky vahoakanany, aviô mahatsara atsika fo man̈araka tari-dalan̈anany. Ke baka atsika matoky tsarabe fa  Jehovah mitariky atsika, misy raha telo hidinihintsika amy lahatsoratra ty: 1) Akôry nataon’i Jehovah nitariky vahoakanany, tamin’ny andran’ny Baiboly tan̈y? 2) Akôry ataon’i Jehovah mitariky atsika amin’ny andra iziôty? Baka iô, 3) Ino aby hatsaran̈a ho azontsika, izikoa atsika man̈araka tari-dalan̈anany?

AKÔRY NATAON’I JEHOVAH NITARIKY IRÔ ISRAELITA ABY IO?

4-5. Akôry nan̈aboahan’i Jehovah fa izy nampiasa Mosesy hitariky irô vahoaka aby io? (Zahava sary amy fôn̈on’ny gazety ty.)

⁴ Jehovah nifidy Mosesy nitariky irô Israelita aby io niala ta Ezipty tan̈y. Ke irô Israelita aby io tamy zen̈y namiany porofo mazava fa izy ankitin̈y mitariky irô fa nampiasa Mosesy fo. Ohatra, izy nan̈ano rôndro izikoa fa matsan̈a nitariky irô, aviô môtro izikoa fa alin̈y andra, nitariky irô. (Eks. 13:21) Nan̈araka tany nimboan’ny rondro io fo Mosesy, fôtony izio nitariky irô nandeha tamy lalan̈a mengo tamy Ranomasin̈y Mena tan̈y. Fa izikoa irô Israelita aby io fa navy tamy Ranomasin̈y Mena, aviô tafikin’ny Ezipsianin̈y aby io nan̈ian̈a irô baka afara, navozo mare irô. Nieritreritry baka irô fa tsy nety raha nataon’i Mosesy nitariky irô nandeha tamy Ranomasin̈y Mena io. Fa kanefa nety tsarabe fitaritan’i Mosesy irô, fôtony efa kinian’i Jehovah nampiasa Mosesy hitariky irô vahoaka aby io handeha tamy Ranomasin̈y Mena tan̈y. (Eks. 14:2) Ke Jehovah baka tiô nan̈ano fahagagan̈a namonjiany vahoakanany aby io.​—Eks. 14:26-28.

⁵ Efapolo taon̈o tafaran’izin̈y, Mosesy mbala natoky fo fa Jehovah mbala mampiasa rôndro in̈y nitaritan̈a vahoakanany tamy tany paiky tan̈y. a Fa tandraraiky rôndro io najanon’i Jehovah tan̈abon’ny tran̈olain’i Mosesy tiô, ke Israelita jiaby nahita raha io. (Eks. 33:7, 9-10) Baka tan̈atin’ny rôndro io tao Jehovah nivolan̈a tamy Mosesy. Fa Mosesy amy zay nivolan̈a tamy vahoaka aby io toromariky nivolan̈in’i Jehovah taminany. (Sal. 99:7) Hitandrô Israelita aby io tsarabe tamy zen̈y fa Jehovah ankitin̈y nampiasa Mosesy hitariky irô.

6. Narehandrô Israelita aby io ma tari-dalan̈an’i Jehovah? (Nomery 14:2, 10, 11)

⁶ Ny raha mampalahelo, ankamarozandrô Israelita aby io tsy nan̈eky irô porofo mazava man̈ambara fa Jehovah nampiasa Mosesy hisolo ten̈a izy. (Vakia Nomery 14:2, 10, 11.) Natetiky irô tsy nan̈eky fa Mosesy nampiasain’i Jehovah hitariky irô. Ke vokany, tsy nimboan’i Jehovah niditry tamy tany Nampan̈antinain̈y taranakan’Israely aby io.​—Nom. 14:30.

7. Azôvy aby ma nan̈araka tari-dalan̈an’i Jehovah? (Nomery 14:24) (Zahava koa sary.)

⁷ Fa nisy Israelita sasany ndraiky nan̈araka tari-dalan̈an’i Jehovah. Ohatra, karaha ty raha nivolan̈in’i Jehovah: “Kaleba nan̈araka zaho tamy fônany jiaby. (Vakia Nomery 14:24.) Zan̈ahary nitahy Kaleba, ke izy nimboany nifidy tany tiany nipitrahan̈a tamy tany Kanana tao. (Jos. 14:12-14) Aviô nisy Israelita sasany koa modely tsara tamy fan̈arahan̈a tari-dalan̈an’i Jehovah. Josoa koa fa nandimby Mosesy natao mpitarikin’ny Israelita aby io, najaindrô mare Josoa tamy fiain̈ananany jiaby. (Jos. 4:14) Ke zen̈y nahavy Jehovah nitahy irô, ke nambelany niditry tamy Tany Nampan̈antinain̈y irô.​—Jos. 21:43, 44.

8. Hazavà karakôry nataon’i Jehovah nitariky vahoakanany, tamy fotoan̈a nisian’ny mpanjaka? (Zahava koa sary.)

⁸ Taon̈o maro tafaran’izin̈y, Jehovah nifidy mpitsara hitariky vahoakanany. Aviô tafaran’izin̈y tamy faha mpanjaka aby io, Jehovah nifidy mpaminan̈y hitariky vahoakanany. Irô mpanjaka tsy nivadiky taminany aby io nan̈araka torohevitry namezandrô mpaminan̈y aby io. Ohatra, nanetry ten̈a Mpanjaka Davida,  ke nan̈eky nivolan̈in’ny mpaminan̈y Natana. (2 Sam. 12:7, 13; 1 Tan. 17:3, 4) Mpanjaka Josafata koa nitady tari-dalan̈a tamy Jehovah, tamy mpaminan̈y Jahaziela tan̈y, aviô nandrisiky vahoakan’i Joda ‘hatoky irô mpaminan̈in’ny Zan̈ahary aby io.’ (2 Tan. 20:14, 15, 20) Karaha zen̈y koa Mpanjaka Hezekia. Izy koa fa kivy mare, izy nandeha tamy mpaminan̈y Isaia nangataka fan̈ampian̈a. (Isaia 37:1-6) Isaka irô mpanjaka aby io nan̈araka tari-dalan̈an’i Jehovah, nitahy irô fo Jehovah, aviô narovan’i Jehovah firenena io. Ke olo jiaby tamy zen̈y nahita fa, Jehovah nampiasa irô mpaminan̈y aby io hitariky vahoakanany. (2 Tan. 20:29, 30; 32:22) Ndray tiô raha zen̈y, ankamarozandrô mpanjaka aby io ndreky irô vahoaka aby io tsy nitandren̈y raha nivolan̈indrô mpaminan̈y aby io.​—Jer. 35:12-15.

KARAKÔRY NATAON’I JEHOVAH NITARIKY VAHOAKANANY ABY IO TAMY TAONJATO VOANALOHANY?

9. Azôvy ma nampiasain’i Jehovah hitariky irô Kristianin̈y tamy taonjato voanalohany? (Zahava koa sary.)

⁹ Tamy taonjato voanalohany, Jehovah nanangana fiangonan̈a kristianin̈y. Karakôry nataony nitariky irô Kristianin̈y aby io? Jesosy nataony lohan’ny fiangonan̈a. (Efes. 5:23) Fa Jesosy tamy zen̈y koa fa nan̈amia tari-dalan̈a, izy tsy nivolan̈a tamindrô tsiaraikiaraiky. Izy nampiasa irô apostoly aby io, ndreky irô anti-pan̈ahy ta Jerosalema tan̈y nitariky irô. (Asa. 15:1, 2) Aviô nisy anti-pan̈ahy maro koa tamy zen̈y, nitindren̈y hitariky irô fiangonan̈aa aby io.​—1 Tes. 5:12; Tit. 1:5.

10. a) Akôry nandraisan’ny ankamarozan’ny Kristianin̈y tamy taonjato voanalohany tari-dalan̈a namian̈a irô? (Asan’ny Apostoly 15:30, 31) b) Nan̈ino olo sasany tamin’ny andran’ny Baiboly tsy nan̈eky irô solonten̈an’i Jehovah aby io? (Zahava efajoro “ Nan̈ino Olo Sasany Tsy Nan̈eky Porofo Mazava?”)

¹⁰ Izio ma irô Kristianin̈y tamy voanalohany tan̈y nan̈eky olo nirahin’i Jesosy hitariky irô? Ankamarozandrô ravoravo nan̈araka irô toromariky nazondrô. Ravoravo mare irô, fôtony nankahery irô tari-dalan̈a nazondrô. (Vakia Asan’ny Apostoly 15:30, 31.) Fa, karakôry fo ataon’i Jehovah mitariky atsika amin’ny andra iziôty?

AKÔRY ATAON’I JEHOVAH MITARIKY ATSIKA IZIÔTY?

11. Man̈ameza ohatra han̈azavan̈a fa Jehovah mampiasa olo hitariky atsika amin’ny andra iziôty.

¹¹ Jehovah mbala mitariky vahoakanany fo firaka iziôty. Mampiasa Volan̈anany izy, ndreky  Zanany nataony lohan’ny fiangonan̈a. Misy porofo ma ivolan̈ana fa Jehovah mbala mampiasa solonten̈anany fo mitariky atsika amin’ny andra iziôty? Ia! Diniha baka raha nisy nanomboko tamy taon̈o 1800 tan̈y. Ohatra, nazava tamy Charles Taze Russell ndreky irô namany aby io fa hiavaka taon̈o 1914, fôtony hiorin̈y amy taon̈o io Fanjakan̈an’ny Zan̈ahary. (Dan. 4:25, 26) Taia ma nahaizandrô raha zen̈y? Irô nan̈ano fikarohan̈a tamy Baiboly, aviô irô natoky fa ho tanteraka ankitin̈y faminanian̈a nambaran’ny Baiboly. Jehovah ankitin̈y ma nitariky irô tamy fikarohan̈a nataondrô tamy Baiboly io? Ia izy marin̈y! Mankamarin̈y zen̈y raha nandalo tamy taon̈o 1914. Nanomboko nitondra Fanjakan̈an’ny Zan̈ahary tamin’io. Nipoaka Ady Lehibe I, aviô nisy valan̈aretin̈y, hôrohôron-tany, ndreky mosary. (Lioka 21:10, 11) Ten̈a nampiasa irô lelahy Kristianin̈y tsotra aby io ankitin̈y Jehovah tamy zen̈y, han̈ampy vahoakanany.

12-13. Tamin’ny Ady Lehibe II, ino aby fandaharan̈a natao, baka nahavitan̈a nitory ndreky nampianatra olo faran’ny maro?

¹² Diniha koa baka raha nandalo tan̈atin’ny Ady Lehibe II. Irô rahalahy aby manan̈a andraikitry tamy foibe tan̈y koa fa nandiniky Apokalypsy 17:8, nanjary takatrandrô fa ady io tsy hitondra handeha amin’ny Aramagedona fa hitondra amy fotoan̈a araiky hisian’ny filaminan̈a. Ke fotoan̈a io hahavitan̈a man̈araraotro hitorian̈a vaovao tsara aminolo faran’ny maro. Ke ndray mbala tiô ady io, irô mbala nahavita nanangana Kolejy Ara-baibolin’i Gileada nin’ny Tilikambo Fiambesan̈a fo nampiofan̈ana misionera hitory ndreky hampianatra amy tany isan-karazany. Mbala maro fo misionera nalefa tamy tany isan-karazany, ndray tan̈atin’ny ady io. Fan̈ampin’izen̈y koa, mpanompo atokisan̈a nandamin̈y Fianarana ny Fanompoana Kristianina b, nampiofan̈ana olo jiaby tan̈atin’ny fiangonan̈a baka hahay hitory ndreky hampianatra. Ke naboakan’ny Vavolombelon̈on’i Jehovah tsarabe tamy zen̈y fa irô vôn̈ono mare han̈ano asa fitorian̈a mbala mila hankifain̈a io.

¹³ Izikoa atsika mandiniky raha nandalo taloha tan̈y io, hita tsarabe fa Jehovah mbala nitariky vahoakanany ankitin̈y, tan̈atin’ny fotoan̈a sarotro. Rango tamin’ny Ady Lehibe II in̈y, ravoravo vahoakan’i Jehovah nankafy fotoan̈a nilamin̈y, nahavitan̈a nan̈ano asa fitorian̈a nalalaka tsarabe. Ke vokany, naro olo nanjary nahay  Jehovah, aviô mpanompon’i Jehovah koa nahavita nitory tamy tany jiaby.

14. Nan̈ino atsika mila matoky tari-dalan̈a baka amy fandaminan̈an’i Jehovah ndreky irô anti-pan̈ahy voatendry aby io? (Apokalypsy 2:1) (Zahava koa sary.)

¹⁴ Irô an̈isan’ny Filan-kevi-pitantan̈ana amin’ny andra iziôty koa mbala mitady tari-dalan̈an’i Kristy fo. Tian’ny Filan-kevi-pitantan̈ana baka izikoa toromariky amiandrô irô rahalahy aby io hifan̈araka tsarabe amin’ny tari-dalan̈an’i Jehovah. Aviô irô an̈isan’ny Filan-kevi-pitantan̈ana io koa mampiasa mpiandrakitrin’ny faritry ndreky irô anti-pan̈ahy aby io han̈amezan̈a toromariky irô fiangonan̈a aby io. c Irô anti-pan̈ahy voahosotro aby io “amy tan̈ana ankavan̈anan’i Kristy.” (Vakia Apokalypsy 2:1.) Ndray zen̈y, irô anti-pan̈ahy jiaby io mbala tsy lavorary, ke mety han̈ano hadisovan̈a aby. Ndraikindraiky koa Mosesy ndreky Josoa, aviô irô apostolin’i Jesosy aby io mba nan̈ano raha tsy mety koa. (Nom. 20:12; Jos. 9:14, 15; Rom. 3:23) Ndray zen̈y, matoky atsika fa Jesosy mbala mampiasa mpanompo atokisan̈a io, ndreky irô anti-pan̈ahy voatendry aby io, aviô mbala hampiasa irô io fo koa “isan’andra, firaka amy faran’ny donia ty.” (Mat. 28:20) Hitantsika amy zen̈y fa, maro antony tôkony hatokisantsika irô tari-dalan̈a baka amindrô rahalahy voatendry hitariky atsika aby io.

MARO HATSARAN̈A HO AZONTSIKA IZIKOA ATSIKA MAN̈ARAKA TARI-DALAN̈AN’I JEHOVAH FO

15-16. Ino raha ianaranao baka amy tantarandrô olo aby nan̈araka tari-dalan̈an’i Jehovah aby io?

¹⁵ Atsika koa tsy vôly man̈araka tari-dalan̈an’i Jehovah, maro hatsaran̈a ho azontsika, rango iziôty. Karaha zen̈y nataon’i Andy ndreky Robyn. Irô nan̈araka torohevitry namezan’ny mpanompo atokisan̈a momba fanan̈ana fiain̈ana tsotra in̈y. Ke vokany, irô nahavita nan̈ano asa an-tsitrapô amy fan̈oren̈ana. Karaha ty nambaran’i Robyn: “Zahay nipetraka tamy tran̈o hely, ndray izy tsisy lakoziny aby. Aviô zaho olo faran’ny tia mangala sary eky. Kanefa maro fitaovan̈a fangalako sary tsy maintsy nalafoko. Tafitomoan̈y aby zaho tamy zen̈y. Fa zaho nan̈ano karaha nataon’i Abrahama ndreky Saraha, ke zaho tapa-kevitry fo tsy himpody afara.” (Heb. 11:15) Ino hatsaran̈a nazondrô rahalahy ndreky ranabavy aby io, nohon’irô nan̈atsotra fiain̈ana? Karaha ty nivolan̈in’i Robyn: “Ten̈a ravoravo zahay mahay fa raha jiaby nanan̈anay namianay Jehovah. Isaka zahay man̈ano asa ampan̈anovin’i Jehovah zahay, karaha fa hitahitanay karakôry fiain̈ananay amy donia vaovao. Karaha zen̈y koa raha nivolan̈in’i Andy. Ho izy: “Ravoravo mare zahay, fôtony mampiasa fotoan̈anay jiaby, han̈anaovan̈a asan’ny Fanjakan̈an’ny Zan̈ahary.”

 ¹⁶ Ino koa ma hatsaran̈a hafa ho azontsika, izikoa atsika man̈araka tari-dalan̈an’i Jehovah fo? Misy ranabavy araiky zay, Marcia an̈arany. Izy koa fa nahavita fianaran̈a tamy lise, narehany fampirisihan̈a han̈ano mpisava lalan̈a in̈y. (Mat. 6:33; Rom. 12:11) Karaha ty nivolan̈iny: “Zaho afaka nan̈ano fianaran̈a tamin’ny iniversite tan̈atin’ny efatra taon̈o, tsisy raha ifain̈a. Fa kanefa, nisy tanjon̈o ara-pan̈ahy maro koa tiako hitakarin̈y. Ke zaho nifidy lekoly mampianatra asa, baka hahavitako man̈ano fanompoan̈anaka. Zen̈y an̈isan’ny fanapahan-kevitry ten̈a tsara nataoko. Ravoravo zaho iziôty afaka man̈ano mpisava lalan̈a maharitry, aviô fotoan̈anaka koa ahavitako man̈ano asa an-tsitrapô amy Betela, aviô mbala hahavitan̈a man̈ano raha maro tsara koa nin’i Jehovah.

17. Ino koa hatsaran̈a hafa ho azontsika, izikoa atsika man̈araka tari-dalan̈an’i Jehovah fo? (Isaia 48:17, 18)

¹⁷ Fa mbala misy hatsaran̈a hafa koa ho azontsika izikoa atsika man̈araka tari-dalan̈an’i Jehovah. Tatoato zay atsika nahazo torohevitry mamonjy fahin̈anantsika. An̈isan’izen̈y fampitandreman̈a momba fitiavan̈a vola ndreky raha hafa mety hahavy atsika tsy han̈araka fitsipikin’ny Zan̈ahary. Manjary madio eritreritrintsika izikoa man̈araka fampitandreman̈a io atsika, ke raha zen̈y miaro atsika tsy ho azon’ny prôblemo maro. (1 Tim. 6:9, 10) Baka iô koa, atsika mahavita man̈ano fanompoan̈a Jehovah amy fôntsika jiaby. Raha zen̈y mitondra haravoan̈a, ndreky fiadan̈ana, aviô fahafaham-pô.​—Vakia Isaia 48:17, 18.

18. Nan̈ino ma anao tapa-kevitry han̈araka tari-dalan̈an’i Jehovah fo?

¹⁸ Matoky atsika fa Jehovah mbala hampiasa solonten̈anany aby io fo lera efa an̈atin’ny fahorian̈a be an̈y, ndreky lera fa an̈atin’ny Fanjakan̈a Arivo Taon̈o an̈y. (Sal. 45:16) Asa atsika mbala han̈araka tari-dalan̈an’i Jehovah fo, nata izio tsy mifan̈araka amy raha tiantsika? Miankin̈y amy fan̈arahantsika tari-dalan̈an’i Jehovah amy ziôty valin’ny fan̈ontanian̈a zen̈y. Fa kanefa, irarian̈a atsika jiaby han̈araka tari-dalan̈an’i Jehovah fo, an̈isan’izen̈y tari-dalan̈a amezany baka amindrô lelahy voatendry hiandraikitry atsika aby io. (Isaia 32:1, 2; Heb. 13:17) Atsika koa man̈ano zen̈y, ho hita fa atsika matoky tsarabe Jehovah Mpitariky atsika io, fôtony izy mitariky atsika tsy ho azon’ny raha mety handrobaka fihavan̈antsika aminany ndreky hitariky atsika amy tanjon̈o tiantsika havian̈a, tsy ino zen̈y fa fiain̈ana tsisy farany, amy donia vaovao.