Ambaran’ny Baiboly mazava fa Jehovah mahavita man̈ambara raha mbala ho avy. (Isaia 45:21) Fa tsy ambarany ao tsiaraikiaraiky akôry na ombian̈a izy man̈ano zen̈y, aviô ino raha fidiny ho hay. Safe tsy ten̈a haintsika raha momba fahaizan’i Jehovah man̈ambara raha mbala ho avy. Fa ty misy raha vitsivitsy mba tsara mazava amintsika.

Tsisy erany raha vitan’i Jehovah fa izy fo ndraikindraiky mifidy tsy man̈ano raha. Tsisy erany fahendrenanany, ke izy mahavita man̈ambara zay raha fidiny hambara. (Rom. 11:33) Aviô izy faran’ny mahavita mifehy ten̈a, ke izy afaka misafidy tsy hahay raha mbala handalo.​—Ampiràn̈a amin’ny Isaia 42:14.

Jehovah man̈ano raha hampatanteraka sitrapônany. Nan̈ino ma raha zen̈y mahavy atsika hatoky fa izy mahavita man̈ambara tsialohaloha raha mbala ho avy? Man̈azava karaha ty Isaia 46:10: “Araiky man̈ambara rango tamy voanalohany tan̈y raha hiboaka amy farany an̈y ndreky man̈ambara raha mbala tsiary natao. Araiky mivolan̈a karaha ty: ‘Fikasan̈anaka tsy hiova, zay raha sitraka fônaka hataoko.’”

Ke antony araiky mahavy Jehovah mahavita man̈ambara raha mbala ho avy, izy manan̈a angôvo han̈anaovan̈a zen̈y. Izy tsy karaha atsika, ke mila mamaky amy farany boky vo hahay karakôry faran’izio. Fa Jehovah mahavita hahavy raha araiky handalo amy fotoan̈a voafaritry tsarabe, aviô man̈atanteraka izin̈y, amy fotoan̈a nikindren̈a io.​—Eks. 9:5, 6; Mat. 24:36; Asa. 17:31.

Baka amy zen̈y mahavy Baiboly mampiasa volan̈a “nan̈oman̈a” ndreky “nikasa han̈ano” aviô “nikasaiko” ivolan̈ana raha ataon’i Jehovah momba raha sasany mbala ho avy. (2 Mpanj. 19:25; l.p.a.; Isaia 46:11) Irô volan̈a aby io misy ifandraisany amy volan̈a tam-boanalohany tan̈y, ivolan̈ana olo “mpanefy tanimanga.” (Jer. 18:4) Karaha ataon’ny mpanefy tanimanga mahavita man̈amboatra godra manjary vazy tsara in̈y koa ataon’i Jehovah mahavita man̈ano raha han̈atantirahany sitrapônany.​—Efes. 1:11.

Ambelan’i Jehovah olo hifidy han̈ano zay raha tiandrô: Jehovah tsy mandahatra fiain̈anan’olo tsiaraikiaraiky. Tsy ataony raha hahavy olo tsara fan̈ahy han̈ano raha handrobaka irô. Ambelany olo tsiaraikiaraiky hifidy han̈ano zay raha tiany hatao. Ndray izy man̈ano zen̈y, izy mandrisiky olo hifidy han̈ano ny tsara.

Diniha baka ohatra aroe ty. Araiky voanalohany, irô olo nipetraka ta Ninive tan̈y. Jehovah nivolan̈a fa hiravan̈iny tanàna io, noho ny raha ratsy nataondrô tao. Fa irô ndraiky koa fa nibebaka in̈y, Jehovah ‘niova hevitry, ke tsy nataony tamindrô sazy tseky nataony tamindrô in̈y.’ (Jona 3:1-10) Tsy nataon’i Jehovah raha niritriretiny tseky hataony, nata raha io efa nivolan̈iny tsialohaloha. Nan̈ino? Fôtony irô olo ta Ninive tao nampiasa tsarabe safidy namezan’i Jehovah irô. Irô koa fa naharen̈y fampitandreman̈a baka tamy Jehovah, irô nibebaka.

Ohatra faharoe ndraiky, faminanian̈a momba fandrisian̈an’i Kyrosy. Izy hankafaka irô Jiosy aby natao sesitany ta Babylony tan̈y, baka iô han̈amia beko han̈amboaran̈a ndraiky tempolin’i Jehovah. (Isaia 44:26–45:4) Kyrosy mpanjakan’i Persy nan̈atanteraka faminanian̈a io. (Ezra 1:1-4) Fa Kyrosy io ndraiky tsy olo nanompo Jehovah. Ke Jehovah nata nampiasa izy han̈atanteraka faminanian̈a io, Jehovah tsy nanery Kyrosy hanompo izy.​—Ohab. 21:1.

Mbala sasany amy raha dinihin’i Jehovah alohan’izy han̈ambara tsialohaloha raha mbala ho avy fo hitantsika tiô in̈y. Aviô, tsisy olo ten̈a mahay raha an̈aty jerin’i Jehovah ndreky raha ataony. (Isaia 55:8, 9) Fa raha haintsika momba Jehovah ndraiky mankafatatra fatokisantsika fa mety aby zay raha ataony, an̈atin’izen̈y lera izy man̈ambara tsialohaloha raha mbala ho avy.