NISY filazan̈a manokan̈a naboaka tamy jw.org, tamy robia 18 Zanvie 2023 in̈y. Nikoran̈in’izio fa Rahalahy Gage Fleegle, ndreky Jeffrey Winder, voatendry an̈isan’ny Filan-kevi-pitantan̈an’ny Vavolombelon̈on’i Jehovah. Efa tan̈atin’ny taon̈o maro irô rahalahy aby io nanompo Jehovah sady tsy nivadiky taminany.

Rahalahy Fleegle io tombo tandrefan’ny Pennsylvanie, a Etazonỳ an̈y. Baka tamy babany ndreky reniny nahitany fahamarin̈ana. Tamin’izy tanora, irô nifindra tambanivolo, tamy tany mbala nila mpitory maro. Tsy ela tafaran’izen̈y, izy natao batisa, tamy 20 Novambra 1988.

Babany ndreky reniny nandrisiky izy han̈ano fanompoan̈a manontolo andra fo. Natetiky irô nangala mpiandraikitrin’ny faritry ndreky Betelita nitoby tamindrô tao, safe hitan’ny Rahalahy Fleegle fa irô rahalahy ndreky ranabavy aby io ravoravo oe. Ke tsy ela tafaran’ny nivitan’ny batisanany, izy nan̈ano mpisava lalan̈a maharitry, tamy 1 Septambra 1989. Aviô, rango izy 12 taon̈o baka izy efa tihanompo amy Betela. Ke taon̈o aroe tafaran’ny nan̈anaovany mpisava lalan̈a maharitry, tatrany tanjon̈onany io. Tamy Betelan’i Brooklyn nanamponoany niasa tamy Betela, tamin’ny Oktobra 1991.

Niasa tamy tany manambatra boky antsendriky izy tan̈atin’ny valo taon̈o. Izy baka tiô nafindra tamy Sampan-draharahan’ny Fanompoan̈a. Tamy fiangonan̈a miteny russe izy tamy zen̈y, tan̈atin’ny taon̈o vitsivitsy. Nanambady izy tamin’ny 2006, Nadia an̈aran’ny vadiny. Niaraka nanompo tamy Betela irô, aviô nitory tamy faritany nampiasa volan̈a portigey antsendriky. Nitory tamy faritany nampiasa volan̈a espan̈ioly irô baka tiô, tan̈atin’ny folo taon̈o mandilatra. Taon̈o maro Rahalahy Fleegle nanompo tamy Sampandraharahan’ny Fanompoan̈a. Fa tafaran’izen̈y, izy nafindra niasa tamy Birôn’ny Kômitin’ny Fampianaran̈a. Izy baka tiô nafindra tamy Birôn’ny Kômitin’ny Mpiasa. Tamy Marsy  2022 amy zay izy navoatendry mpan̈ampy amy Kômitin’ny Mpiasa amy Filan-kevi-pitantan̈ana.

Rahalahy Winder ndraiky tombo ta Murrieta, ta Etazonỳ tan̈y. Baka tamy babany ndreky reniny nahitany fahamarin̈ana. Tamy 29 Marsy 1986 izy natao batisa. Fanjava araiky tafaran’izin̈y fo izy efa nan̈ano mpisava lalan̈a mpan̈ampy edy. Tiany mare raha io ke izy mbala tihanohy fo. Tafaran’ny fanjava maromaro nan̈anaovany izio, izy nanomboko nan̈ano mpisava lalan̈a maharitry, tamin’ny 1 Oktobra 1986.

Tamin’izy tanora, izy nandeha namangy iry zôkiny aroe lahy nanompo tamy Betela tamy zen̈y. Raha hitany tan̈y nahavy izy tihanompo tamy Betela, izikoa izy efa be. Ke tamin’ny 1990 izy navoakaiky hanompo tamy Betelan’i Wallkill.

Niasa tamy sampan-draharaha isan-karazany Rahalahy Winder tamy Betela tao. Tamy Sampan-draharahan’ny Fan̈adiovan̈a antsendriky izy, avio tamy Sampan-draharahan’ny Fambolian̈a Ndreky Fitarimian̈a, avio tamy Birôn’ny Betela. Tamin’ny 1997 izy nanambady. Angela an̈aran’ny vadiny. Rango tamy zen̈y irô fivadiany niaraka nanompo tamy Betela. Nafindra ta Warwick irô tamin’ny 2014. Rahalahy Winder tamin’io nan̈ampy tamy fan̈oren̈ana foibe eran-tany io. Tamin’ny 2016 irô nifindra tamy Foiben’ny Fampianaran̈an’ny Vavolombelon̈on’i Jehovah ta Patterson. Tamy Sampan’asa Momba Feo Ndreky Video niasan’ny Rahalahy Winder tan̈y. Koa fa nafaka efatra taon̈o, irô nifindra ndraiky ta Warwick. Nirahin̈y niasa tamy Birôn’ny Kômitin’ny Mpiasa i Rahalahy Winder tan̈y. Aviô tamy Marsy 2022 amy zay, izy voatendry mpan̈ampy amy Kômitin’ny Mpiasa amy Filan-kevi-pitantan̈ana.

Mivavaka atsika baka Jehovah hitahy irô “lelahy nataony kadô” aby io, fôtony irô mifen̈y mare mampandeha asan’ny Fanjakan̈an’ny Zan̈ahary.​—Efes. 4:8.