ASA anao mba mahita fa maro olo amy ziôty mihevitry fa irô vain̈y hamian̈a tombontsoa, na ten̈a mila hajain̈y? Ndray karakôry hamarozan’ny raha azondrô, irô tsy mety afa-pô. Toe-tsain̈y karaha zen̈y vokatran’ny fitiavan-ten̈a ndreky tsy fahaizan̈a mankasitraka. Volan̈in’ny Baiboly fa han̈ano karaha zen̈y olo amin’ny andra farany.​—2 Tim. 3:2.

Marin̈y ndraiky fa tsy vo sambany nisy olo tia ten̈a loatra zen̈y. Adama ndreky Eva nanapa-kevitry fa irô fo hamaritry ny tsara ndreky ratsy, ke ratsy mare vokany. Taonjato maro tafara, Ozia Mpanjakan’i Joda nihevitry fa izy nahazo nanolotro emboko man̈itry tamy tempoly, kanefa hadisovan̈a be raha zen̈y. (2 Tan. 26:18, 19) Karaha zen̈y koa, irô Fariseo ndreky Sadoseo aby io nihevitry fa tôkony irô ten̈a karakarain’ny Zan̈ahary, fôtony zen̈y irô taranakan’i Abrahama.​—Mat. 3:9.

Atsika miain̈y miaraka amin’olo tia ten̈a mare, ke toe-tsain̈indrô io mety hifindra amintsika. (Gal. 5:26) Atsika mety hanomboko hieritreritry fa atsika vain̈y hahazo tombontsoa sasany, na ten̈a mila hajain̈y. Akôry hahavy atsika tsy hanan̈a toe-tsain̈y ambaka zen̈y? Voanalohany antsendriky, atsika mila mahay karakôry fahitan’i Jehovah raha zen̈y. Misy torolalan̈a aroe amy Baiboly han̈ampy atsika.

Jehovah fo tôkony hamaritry raha tôkony ho azontsika. Diniha baka ohatra aby ty.

• An̈atin’ny fianakavian̈a, lelahy mila mahatsapa hajain’ny vadiny, fa viavy io ndraiky mila mahatsapa  tian’ny lelahy io. (Efes. 5:33) Olo manambady tsy tôkony han̈iry han̈ano firaisan̈a amin’olo tsy vadiny. (1 Kor. 7:3) Zanaka tôkony han̈araka volan̈an’ny raimandreny, aviô raimandreny tôkony ho tia mare ndreky hanohan̈a zanakandrô.​—2 Kor. 12:14; Efes. 6:2.

• Amy fiangonan̈a, anti-pan̈ahy aby io miasa mafy, ke mendriky hajaintsika. (1 Tes. 5:12) Fa irô ndraiky tsy manan̈a zo hifehifehy raha ataon’ny rahalahy ndreky anabavindrô aby io.​—1 Pet. 5:2, 3.

• Fanjakan̈an’olombelon̈o nambelan’ny Zan̈ahary hitaky latety ndreky hahazo fan̈ajan̈a baka amy vahoaka indesindrô.​—Rom. 13:1, 6, 7.

Ten̈a tiantsika i Jehovah ke man̈amia atsika raha maro mandilatran’ny vain̈y atsika. Fôtony atsika olo mpanota, atsika vain̈y maty. (Rom. 6:23) Fa Jehovah mbala man̈amia atsika fitahian̈a maro, fôtony tsy miovaova fitiavany atsika. (Sal. 103:10, 11) Baka amin’ny hatsaparam-pan̈ahinany miavaka fo zay fitahian̈a na tombontsoa azontsika aminany.​—Rom. 12:6-8; Efes. 2:8.

Mitandrema amy toe-tsain̈in’ny donia ty. Atsika mety tsy ho tontohitry aby fa kaiky atsika io efa mieritreritry fa atsika vain̈y mahazo raha maro mandilatra olo hafa. Naboakan’i Jesosy fa mety ho mora hanan̈a toe-tsain̈y zen̈y atsika, ke izy nan̈ano fan̈oharan̈a momba irô mpiasa aby nikaramain̈y denaria araiky. Sasany tamindrô io bônera efa niasa, aviô niasa nan̈ariva andra sady niaritry taniandra. Fa sasany ndraiky tan̈atin’ny lera araiky fo niasa. Irô olo aby niaritry taniandra io nihevitry fa karamandrô tôkony ho beben’ny namandrô. (Mat. 20:1-16) Naboakan’i Jesosy baka tamy fan̈oharan̈a io fa irô mpan̈ara-dia izy aby io tôkony hahay ho afa-pô amy zay raha amezan’ny Zan̈ahary irô.

Mahaiza mankasitraka, fa aza sarôtiny loatra. (1 Tes. 5:18) Aleva tahaka apostoly Paoly fôtony izy tsy nangataka raha nilainy tamindrô rahalahy ta Korinto, nata izy nanan̈a zo han̈ano zen̈y. (1 Kor. 9:11-14) Atsika tôkony hankasitraka fitahian̈a tsiaraikiaraiky azontsika, aviô tsy hitaky be loatra amin’olo.

 Mahaiza manetry ten̈a. Olo araiky koa fa tia ten̈a loatra, izy mety hanomboko hieritreritry fa izy fo ny ten̈a raha. Ke fanetren-ten̈a fo aodin’ny toe-tsain̈y ratsy karaha zen̈y.

Mpaminan̈y Daniela ten̈a ohatra tsara tamy fan̈aboahan̈a fanetren-ten̈a zen̈y. Izy taranak’andriana, zatôvo, nahira-tsain̈y, aviô izy nahay raha maro. Ke raha aby zen̈y mety hahavy izy hieritreritry fa izy ten̈a mila hajain̈y, ndreky mendriky hahazo irô tombontsoa aby nazony. (Dan. 1:3, 4, 19, 20) Fa Daniela nanetry ten̈a fo, ke toetry io nahavy izy ten̈a valera tamy Jehovah.​—Dan. 2:30; 10:11, 12.

Irarian̈a atsika tsy ho tia ten̈a, nata maro olo karaha zen̈y amy donia ty. Fa irarian̈a koa atsika ho ravoravo fo amy zay hatsaran̈a amian’i Jehovah atsika, baka amin’ny hatsaram-pan̈ahinany miavaka.