Mary ndreky John fivadiany a mipetraka amy tany feno olo vahiny baka a Philippines, fa miasa na mifindra an̈y. Irô ravoravo mitory vaovao tsara amindrô olo aby io. Tamy valan̈aretin̈y COVID-19 in̈y, tsy tamy tany nisy izy fo nahavitan’i Mary nanomboko fampianaran̈a Baiboly fa tamin’olo tamy firenena hafa tan̈y koa. Akôry nan̈anaovany zen̈y?

Mary nan̈ontany olo ampianariny Baiboly karaha ty: “Tsao mba misy olo hainao an̈y mba tihianatra Baiboly koa?” Mpianatra io koa mamaly ia, angatahiny izy han̈ampy izy hifandray amindrô. Fan̈ontanian̈a tsotra karaha zen̈y mety hahitan̈a vokatra tsara. Nan̈ino? Fôtony matetiky baka olo koa tia Volan̈a Zan̈ahary, izy tihikoran̈a raha nianarany io amin’ny havany, na amy kamaradiny. Ke akôry nataon’olo nampianarin’i Mary, izy koa fa nan̈apetraka fan̈ontanian̈a io tamindrô?

Mary koa fa nan̈ontany Jasmin, man̈angy nampianariny Baiboly, izy nan̈amia Mary olo efatra tihianatra Baiboly. Kristine an̈aran’ny araiky amindrô olo aby io. Izy nangataka tamy Mary fa hianatra indroe isaka herin̈iandra. Fa Mary nan̈ontany izy tsao misy olo hafa koa tihianatra. Ho Kristine: “Ia, misy irô man̈angy kamaradiko aby zay tihianatra.” Tan̈atin’ny herin̈iandra vitsivitsy fo efa nisy olo efatra kamaradin’i Kristine tihianatra koa. Tafaran’izin̈y, Kristine nivolan̈a tamy kamaradiny hafa koa fa Mary mampianatra Baiboly, aviô sasany tamindrô io koa nan̈amia an̈aran’olo hafa nety ho tihianatra Baiboly.

Tian’i Kristine hianatra Baiboly koa iry havany ta Philippines tan̈y. Izy nikoran̈a tamin’i Andrea zanany man̈angy nipetraka tan̈y. Tan̈aty jerin’i Andrea tan̈y: ‘Vavolombelon̈on’i Jehovah io sekty. Irô tsy mino Jesosy, aviô Testamenta Taloha fo miasa amindrô.’ Fa mbala vo indraiky nianatra fo irô, efa nafaka edy hevitry disonany zen̈y. Isaka izy mianatra raha vaovao aminany baka amy Baiboly, izy nivolan̈a: “Marin̈y izity, fôtony Baiboly mivolan̈a zen̈y!”

Tafaran’izin̈y koa, Andrea nangataka Mary hampianatra man̈angy aroe kamaradinany ndreky man̈angy araiky miaraka miasa aminany. Baka iô koa, tsy hain’i Mary fa nisy man̈angy jamba, angovavin’i Andrea nitandren̈y fianaran̈andrô io koa tao. An̈aranany io Angela. Tandraraiky Angela nan̈iraka Andrea hivolan̈a tamy Mary fa izy koa mba tiany hampianarin̈y manokan̈a. Tian’i Angela raha nianarany. Ke tan̈atin’ny fanjava araiky fo izy efa nahazo onon̈o andinin-teny maro, ke izy nangataka hianatra inefatra isaka herin̈iandra! Andrea nan̈ampy izy, ke izy nanomboko nivory tsy tapaka tamy vidéoconférence.

 Izikoa fa hain’i Mary fa Joshua vadin’i Kristine nidôko narikidrikitry tiô fo nitandren̈y fianaran̈an’i Kristine, nan̈ontanian’i Mary izy tsao mba tihianatra koa. Ho Joshua: “Zaho hitandren̈y fo fa zaho tsy tiako han̈apitrahan̈a fan̈ontanian̈a. Anao koa man̈ontany zaho, zaho efa lôso edy.” Fa baka tiô, mbala dimy minity fo nianarandrô, izy efa nan̈ontany raha maro edy mandilatra Kristine. Nanjary tihianatra Baiboly fo koa izy.

Naro olo nanjary nianatra Baiboly baka tamy fan̈ontanian̈a tsotra napetrakan’i Mary in̈y. Naro mare olo tihianatra, ke sasany tamindrô io nafindrany tamy mpiara-manompo. Izikoa atao kônty, Mary nahavita nanomboko fampianaran̈a Baiboly tamin’olo 28 baka tamy firenena efatra aby.

Jasmin olo avoakoran̈a voanalohany tamy tantara ty natao batisa, tamin’ny Avrily 2021. Kristine natao batisa tamy May 2022, baka iô izy nody ta Philippines niaraka tamy fianakavian̈anany. Nisy aroe tamindrô man̈angy nikoran̈in’i Kristine tamy Mary in̈y koa natao batisa. Fanjava vitsivitsy tafaran’izin̈y koa natao batisa Angela, aviô efa mpisava lalan̈a maharitry izy iziôty. Efa mandroso tsara koa Joshua vadin’i Kristine ndreky Andrea zanakandrô in̈y, aviô mpianatra Baiboly maro hafa koa.

Tamy taonjato voanalohany, naro olo nivolan̈a tamin’ny havandrô ndreky kamaradindrô raha nianarandrô momba Jesosy. (Jaona 1:41, 42a; Asa. 10:24, 27, 48; 16:25-33) Ke aza adin̈a man̈ontany karaha ty olo ampianarinao Baiboly na olo hitanao fa tia mikoran̈a raha momba Baiboly: “Tsao mba misy olo hainao an̈y mba tihianatra Baiboly koa?” Mety ho maro olo hianatra Baiboly baka amy fan̈apitrahantsika fan̈ontanian̈a tsotra hely karaha zen̈y. Azôvy mahay?