LAHATSORATRA FIANARAN̈A 7
HIRA 15 Derao ny Lahimatoan’i Jehovah!
Ino Hatsaran̈a Azonao Baka amy Familan-kelokon’i Jehovah?
“Aminao ao misy ten̈a familan-keloko.”—SAL. 130:4.
HEVITRY HIDINIHIN̈Y
Handiniky sarin-teny sasany amy Baiboly atsika, ahitan̈a fa ten̈a miavaka familan-kelokon’i Jehovah. Lahatsoratra ty han̈ampy atsika hampitombo fankasitrahantsika familan-kelokon’i Jehovah.
1. Nan̈ino sarotro hay raha tian’olo volan̈iny, izikoa fa mivolan̈a fa “zaho mamela helokonao” zen̈y?
“ZAHO MAMELA HELOKONAO.” Misaora ravoravo anao koa maharen̈y zen̈y, intsaka eky izikoa raha nivolan̈inao na nataonao ke nampalahelo olo io mare. Fa ino tsarabe ma dikan’ny “zaho mamela helokonao” zen̈y? Izio ma fihavan̈anao ndreky olo io manomboko amy zen̈y tafimpody tsarabe ndraiky? Sa izy zisty efa tsy tihikoran̈a problemo io eky? Mety ho samy hafa raha an̈aty jerin’olo izikoa fa mivolan̈a: “Zaho mamela helokonao.”
2. Karakôry fivolan̈an’ny Soratra Masin̈y familan-kelokon’i Jehovah? (Zahava koa lamariky amy pazy ambany.)
2 Tsy mira amy fomba familantsika helokon’olo, fomba familan’i Jehovah helokon’olo tsy lavorary. Miavaka mare fomba familan’i Jehovah helokon’olo. Karaha ty nivolan̈in’ny mpan̈ano salamo momba Jehovah: “Aminao ao misy ten̈a familan-keloko, amy zen̈y olo han̈aja anao.” a (Sal. 130:4) Familan-kelokon’i Jehovah “ten̈a familan-keloko” amin’ny ankitin̈y. Aboakany atsika ino ten̈a dikan’ny mamela heloko zen̈y. Amy Soratra Hebreo ao, irô mpanoratra Baiboly aby io koa fa mikoran̈a fomba familan’i Jehovah helokon’olo, irô mampiasa volan̈a tsiary fampiasaindrô foeky, izikoa fa mikoran̈a fomba fataon’olo mamela heloko.
3. Nan̈ino tsy mira amy nintsika fomba familan’i Jehovah heloko? (Isaia 55:6, 7)
3 Jehovah koa fa mamela helokon’olo, fafany an̈y jiaby. Aviô izy mihavan̈a amin’olo in̈y tsarabe ndraiky koa. Ravoravo atsika, fôtony Jehovah ten̈a mamela helokontsika, ary tsy indraiky fo fa impirimpiry.—Vakia Isaia 55:6, 7.
4. Akôry an̈ampian’i Jehovah atsika hahay ten̈a dikan’ny familan-keloko zen̈y?
4 Izikoa tsy mira amy nintsika fomba familan’i Jehovah helokontsika, akôry hahaizantsika olombelon̈o tsy lavorary ten̈a dikan’ny familan-keloko zen̈y? Jehovah man̈ampy atsika, ke izy mampiasa sarin-teny han̈azavan̈a familan-kelokonany. Amy lahatsoratra ty atsika handiniky sasany amy zen̈y. Irô io man̈aboaka akôry ataon’i Jehovah mamafa fahotan̈antsika, aviô man̈ano raha han̈ampodianan̈a fihavan̈ana nirobatin’ny fahotan̈a io. Izikoa atsika mandiniky irô sarin-teny aby io, atsika hahaiho tia ndreky hankasitraka Babantsika tsara fan̈ahy io fo, fôtony maro fomba hamilany helokontsika.
JEHOVAH MAN̈ADOSO FAHOTAN̈ANTSIKA
5. Akôry ataon’i Jehovah, izikoa fa man̈ambela fahotan̈antsika?
5 Amy Baiboly ao, matetiky fahotan̈a io ampiran̈iny amin’ny entan̈a mavesatra. Karaha ty nivolan̈an’ny Mpanjaka Davida fahotan̈anany: “Efa mihoatra lohanaka hadisovan̈anaka; mira entan̈a mavesatra aby in̈y raha io ke tsy tondrako foeky.” (Sal. 38:4) Fa Jehovah man̈ambela fahotan̈an’olo nan̈ano raha ratsy ke mibebaka. (Sal. 25:18; 32:5) Volan̈a hebreo nadika “man̈ambela” io, dikan’izio “mangala” na “mitondra.” Ke Jehovah koa fa mamela helokontsika, izy mira lelahy araiky matanjaka mangala entan̈a mavesatra amy sôrokontsika in̈y, aviô mitondra izio lavitry atsika foeky.
“Namela” (Sal. 32:5)
6. Karakôry halaviran’ny tany itondrasan’i Jehovah fahotan̈antsika?
6 Misy sarin-teny hafa koa man̈aboaka fa ten̈a indesin’i Jehovah lavitry marin̈y fahotan̈antsika. Salamo 103:12 mivolan̈a karaha ty amintsika: “Mira halaviran’ny antin̈iana ndreky andrefa, an̈adosoany fahotan̈antsika ho lavitry atsika.” Antin̈iana io tsy honohono harikitry andrefa foeky. Irô io tsy mety hifanôjy foeky. Ke Jehovah izikoa fa man̈adoso fahotan̈antsika, izio indesiny lavitry mare, erakan’ny lavitry mety takatran’ny sain̈intsika. Man̈amia toky atsika zen̈y fa Jehovah ten̈a man̈ambela hadisovan̈a!
“Mira halaviran’ny antin̈iana ndreky andrefa” (Sal. 103:12)
7. Akôry fivolan̈an’ny Baiboly fan̈ambilan’i Jehovah helokontsika? (Mika 7:18, 19)
7 Ke Jehovah koa ma fa mitondra fahotan̈antsika io lavitry an̈y, izin̈y ma mbala tanany fo? Ehe. Ty raha nisoratin’ny Mpanjaka Hezekia momba Jehovah: “Narianao an-tahezan̈anao ao fahotan̈anaka jiaby.” Karaha ty ndraiky ivolan̈an’ny lamariky amy pazy ambany izio: “Nadosonao baka tsy ho hitanao.” (Isaia 38:9, 17; l.p.a.) Dikan’izen̈y, Jehovah koa fa man̈ary fahotan̈an’olo nibebaka, in̈y efa tsy jireny eky. Karaha ty koa mety ivolan̈ana izio: “[Fahotan̈anaka] in̈y nataonao karaha tsisy foeky.” Misy sarin-teny hafa koa ankamafisan’ny Baiboly fa izy ten̈a mamela heloko ankitin̈y. Izio amy Mika 7:18, 19. (Vakia.) Koran̈iny ao fa Jehovah man̈atsipy fahotan̈antsika io an̈atin’ny ranomasin̈y lalin̈y be. Taloha tan̈y, izikoa fa misy raha natsipy tan̈atin’ny ranomasin̈y lalin̈y be, in̈y fa tsy azon’olo eky.
“Narianao an-tahezan̈anao fahotan̈anaka jiaby” (Isaia 38:17)
“Hatsipinao an-dranomasin̈y lalin̈y an̈y fahotan̈anay jiaby” (Mika 7:19)
8. Ino raha haintsika firaka eto?
8 Aboakan’ny Baiboly tsarabe fa Jehovah koa fa man̈ambela helokontsika, adosony tsisy tavela fahotan̈antsika, ke atsika tsy mila man̈amelo-ten̈a eky. Marin̈y raha nivolan̈in’i Davida ty: “Sambatra olo voavela heloko ndreky voasaron̈o fahotan̈anany. Sambatra olo tsy konten’i Jehovah foeky fahotan̈anany.” (Rom. 4:7, 8) Zen̈y ten̈a familan-keloko!
JEHOVAH MAMAFA FAHOTAN̈A
9. Ino aby sarin-teny ampiasain’i Jehovah, ahitan̈a fa izy ten̈a mamela heloko?
9 Baka amy vidim-pan̈avotan̈a, Jehovah mahavita mamafa fahotan̈an’olo mibebaka aminany. Diniha baka fivolan̈an’ny Baiboly fomba han̈anaovan’i Jehovah zen̈y. Koran̈iny ao fa Jehovah manasa ndreky man̈adio irô fahotan̈a aby io. Vokany, madio mpanota io baka iô. (Sal. 51:7; Isaia 4:4; Jer. 33:8) Karaha ty fivolan̈an’i Jehovah raha zen̈y: “Ndray mena dà fahotan̈anarô, hataoko fotsy mangatsakatsaka karaha lanezy. Aviô ndray karaha ravin-damba mena matoe in̈y raha zen̈y, hataoko karaha volovolon’ôndrikôndriky malandy jiaka.” (Isaia 1:18) Sarotro mare man̈adoso tasy menabe karaha zen̈y amy lamba. Fa baka amy sarin-teny ampiasain’i Jehovah io, an̈amezany toky atsika fa fahotan̈antsika io mety ho voasasa madio, ke tsy ho hita foeky.
“Ndray mena dà fahotan̈anarô, ataoko fotsy mangatsakatsaka karaha lanezy” (Isaia 1:18)
10. Ino koa sarin-teny hafa ampiasain’i Jehovah, ahitan̈a fa izy ten̈a mamela heloko?
10 Efa nikoran̈intsika tamy lahatsoratra talohan’ity fa fahotan̈a io mira “trosa” fo. (Mat. 6:12; Lioka 11:4) Ke isaka atsika manota amy Jehovah, karaha mampitombo trosantsika io, ke mahaimaro fo trosanany amintsika. Jehovah koa fa mamela helokontsika, mira foan̈any an̈y trosa in̈y, ke efa tsy takiny amintsika eky. Fahotan̈a koa efa nambelany, efa tsy arehany eky. Ke karaha olo ravoravo izikoa fa nifoan̈ana trosanany in̈y atsika, izikoa fa ambelan’i Jehovah helokontsika!
“Ambilà kony trosanay” (Mat. 6:12; l.p.a.)
11. Baiboly koa fa mivolan̈a fa Jehovah “mamafa” fahotan̈antsika, ino ma raha tiany volan̈iny? (Asan’ny apostoly 3:19)
11 Jehovah tsy vitan’ny man̈afoan̈a trosantsika na fahotan̈antsika fo fa izio fafany foeky. (Vakia Asan’ny apostoly 3:19.) Izikoa fa man̈afoan̈a trosan’olo, asian̈a tsipiky be amy taratasy io. Fa trosa io ndray fa nasian̈a tsipiky, mbala hita fo ôtrino izio. Fa tsy karaha zen̈y ndraiky raha fafan̈a zen̈y. Baka hampazava sarin-teny io, mila tsaroantsika fa taloha tan̈y, lankra mora fafan̈a nampiasain̈y izikoa fa manoratra. Ke na eponzy limenan̈a rano efa mahafaka izy edy. Ke izikoa trosa araiky efa nifafan̈a tsarabe zen̈y, in̈y efa tsy hita eky. Tsisy pôtipôtin’ny soratra tavela iô, ke karaha tsiary nisy foeky trosa in̈y. Ten̈a mamparavoravo mahay fa Jehovah tsy vitan’ny man̈afoan̈a fahotan̈antsika fo, fa izio fafany foeky!—Sal. 51:9.
“Baka ho voafafa fahotan̈anarô” (Asa. 3:19)
12. Ino ma raha ianarantsika baka amy fampiasan̈a sarin-teny rôndro matevin̈y zen̈y?
12 Jehovah mampiasa sarin-teny miramira zen̈y koa han̈aboahany karakôry ataony mamafa fahotan̈antsika. Karaha ty nambarany: “Hirokotiko hadisovan̈anao, karaha raha hirakôfin̈y amy rôndro in̈y. Aviô hirokotiko fahotan̈anao, karaha raha hirakofin̈y amy rôndro matevin̈y in̈y.” (Isaia 44:22) Jehovah koa fa man̈ambela helokontsika, mira raha asitriny an̈atin’ny rôndro matevin̈y in̈y fahotan̈antsika, baka tsy ho hitany ndreky tsy ho hitantsika foeky.
“Hirokotiko hadisovan̈anarô ke karaha raha rakôfin’ny rôndro in̈y” (Isaia 44:22)
13. Ino raha tsapantsika Jehovah koa fa mamela helokontsika?
13 Ino ma raha ianarantsika baka amindrô sarin-teny aby io? Jehovah koa fa namela helokontsika, atsika tsy tôkony han̈amelo-ten̈a eky afaran’izin̈y. Baka amy sôron̈o nataon’i Jesosy Kristy in̈y, foan̈a tanteraka trosantsika ke mira raha tsiary nisy foeky. Karaha zen̈y ataon’i Jehovah mamela helokontsika, atsika koa mibebaka amy fahotan̈a nataontsika.
ATAON’I JEHOVAH RAHA IFANDRAISAN̈A TSARA NDRAIKY AMINTSIKA
Familan-kelokon’i Babantsika an-dan̈itry an̈y amintsika, mahavy atsika hifandray tsara aminany (Zahava fehintsoratra 14)
14. Nan̈ino atsika mety matoky fa Jehovah ten̈a han̈ambela hadisovan̈antsika amin’ny ankitin̈y? (Zahava koa sary.)
14 Jehovah koa fa mamela helokontsika, matoky atsika fa ambelany hifandray tsara aminany ndraiky koa atsika. Raha zen̈y han̈ampy atsika tsy han̈amelo-ten̈a dila loatra. Atsika tsy mila midaon̈o tsao Jehovah mbala meloko amintsika ke mbala mitady fomba han̈asazian̈a atsika fo. Izy tsy han̈ano zen̈y foeky. Jehovah koa fa mivolan̈a fa izy mamela helokontsika, atsika matoky izy. Nan̈ino? Jehovah nivolan̈a tamy mpaminan̈y Jeremia: “Hambelako hadisovan̈andrô, aviô tsy hitsarovako eky fahotan̈andrô.” (Jer. 31:34) Apostoly Paoly koa nivolan̈a raha miramira zen̈y. Ho izy: “Tsy hitsarovako eky fahotan̈andrô.” (Heb. 8:12) Ino ma ten̈a dikan’izen̈y?
“Tsy hitsarovako eky fahotan̈andrô” (Jer. 31:34)
15. Amy karakôry ma Jehovah tsy mahatsiaro fahotan̈antsika eky?
15 Amy Baiboly ao, dikan’ny “mahatsiaro” zen̈y, tsy voatery mahatsiaro na mieritreritry fo, fa man̈ano raha koa. Ohatra, lelahy dahalo araiky nahanton̈o tamin’ny hazofijalian̈a niaraka tamy Jesosy in̈y niangavy izy karaha ty: “Jesosy, tsaraova zaho lera anao avy amy Fanjakan̈anao.” (Lioka 23:42, 43) Tamy lelahy io nivolan̈a zen̈y, izy niangavy Jesosy han̈ano raha, fa tsy hahatsiaro izy karaha io fo. Hita tamy volan̈an’i Jesosy fa dahalo io mbala hivilôminy. Ke Jehovah koa mivolan̈a fa tsy hitsarovany eky fahotan̈antsika, dikan’izen̈y izin̈y efa tsisy arakaraka eky. Izy tsy han̈asazy atsika baka amizin̈y eky amin’ny afara an̈y.
16. Ampiran̈in’ny Baiboly amin’ino atsika?
16 Mampiasa sarin-teny hafa koa Baiboly han̈ampian̈a atsika hahay karakôry fahafahan̈a azontsika, izikoa atsika ten̈a voavela heloko. Atsika io mpanota ke mora man̈ano raha tsy mety, ke mira “andevon’ny fahotan̈a.” Fa man̈ano mersy Jehovah atsika fôtony izy mamela heloko, ke manjary mira andevo “nafahan̈a tamy fahotan̈a” in̈y atsika. (Rom. 6:17, 18; Apok. 1:5) Familan-kelokon’i Jehovah mahavy atsika ravoravo karaha andevo afaka in̈y.
‘Anarô nafahan̈a tamin’ny ota’ (Rom. 6:18)
17. Nan̈ino ma familan-keloko io mampajanga? (Isaia 53:5)
17 Vakia Isaia 53:5. Amy sarin-teny farany handeha hidinihintsika, atsika mira olo azon’ny aretin̈y mamono in̈y, fôtony atsika mpanota. Nakiry izy Jehovah nan̈amia Zanany natao vidim-pan̈avotan̈a. Sôron̈o nataon’ny Zanany io nitaha atsika, ke atsika janga. (1 Pet. 2:24) Atsika koa manota, robaka fifandraisantsika amy Jehovah. Fa baka amy vidim-pan̈avotan̈a io, atsika hahavita hihavan̈a tsara aminany ndraiky koa. Olo araiky koa fa narary fatatra mare, kanefa baka tiô janga, ravoravo mare izy. Karaha zen̈y koa atsika. Izikoa atsika mihavan̈a tsarabe ndraiky amy Jehovah ndreky mimpody mahazo sitraka aminany, atsika ravoravo mare.
“Ratranany nampajanga zahay” (Isaia 53:5)
INO HATSARAN̈A AZONTSIKA BAKA AMY FAMILAN-KELOKON’I JEHOVAH?
18. Atsika koa fa baka nandiniky sarin-teny aby ampiasain’ny Baiboly momba familan-kelokon’i Jehovah, ino aby raha nianarantsika? (Zahava koa efajoro “Akôry Ataon’i Jehovah Mamela Helokontsika?”)
18 Ino raha ianarantsika baka amindrô sarin-teny momba familan-kelokon’i Jehovah io? Jehovah koa fa man̈ambela fahotan̈antsika, karaha tsiary nisy foeky izio, aviô matoky atsika fa izy tsy han̈asazy atsika amizin̈y eky amin’ny afara an̈y. Ke manjary manan̈a fifandraisan̈a tsara amy Babantsika an-dan̈itry an̈y ndraiky koa atsika. Aviô koa, haintsika fa ten̈a familan-keloko io kadô. Fitiavan’i Jehovah atsika ndreky hatsaram-pan̈ahinany miavaka aboakany amin’olombelon̈o mpanota azahoantsika izio, fa tsy atsika man̈eva hahazo izio.—Rom. 3:24.
19. a) Tôkony hankasitraka ino atsika? (Romanina 4:8) b) Ino raha hianarantsika amy lahatsoratra fan̈araka?
19 Vakia Romanina 4:8. Ravoravo mare atsika tsiaraikiaraiky mahay fa Jehovah io Zan̈aharin’ny “ten̈a familan-keloko ankitin̈y”! (Sal. 130:4) Kanefa, izikoa tiantsika Jehovah han̈ambela helokontsika, misy raha maventy mila ataontsika. Karaha ty nivolan̈in’i Jesosy: “Fa izikoa ndraiky anarô tsy man̈ambela hadisovan̈an’olo, tsy han̈ambela hadisovan̈anarô koa Babanarô an-dan̈itry an̈y.” (Mat. 6:14, 15) Hita baka amy zen̈y fa atsika ten̈a mila mangala tahaka familan-kelokon’i Jehovah. Fa karakôry hahavitantsika zen̈y? Lahatsoratra fan̈araka han̈aboaka amintsika ino aby raha tafiditry amy zen̈y.
HIRA 46 Misaotra, Jehovah
a “Ten̈a familan-keloko” fo nampiasain’ny Soratra Hebreo taloha tan̈y, ndray misy karazan̈a familan-keloko hafa. Maro fandikan-tenin’ny Baiboly tsy man̈aboaka hevitry maventy be zen̈y. Fa Ny Soratra Masina—Fandikan-tenin’ny Tontolo Vaovao ndraiky tsy karaha zen̈y. Ataony miboaka tsara hevitry io amy Salamo 130:4.
