1-2. Ino mampiran̈a raha nahazo atsika olombelon̈o amy raha nahazo manafolahy koran̈in’ny fehintsoratra 1?

 MINIMINIA hely baka misy manafolahy araiky manan̈a raimandreny mpan̈arivo mare. Fa tandraraiky raimandreninany io tatran’i aksidan, ke naty. Nampakivy mare manafolahy io raha zen̈y. Fa mbala lombolombon’izen̈y koa vaovao ren̈iny baka tiô. Nanjary veta irô baka tamy raha nataon’ny raimandreniny, aviô irô dobon-trosa. Ke lôso trosandrô io raha nilovainy fa tsy fanan̈anandrô. Tsy vitan’izen̈y fo fa nitaky trosa tamy manafolahy io irô tômpin’ny vola io, kanefa izy tsy honohono hahavoahefa izio foeky.

² Miramira raha nahazo manafolahy io fo raha navoa atsika. Adama ndreky Eva raimandrenintsika taloha tan̈y olo lavorary, niain̈y tamy Paradisa tsara. (Gen. 1:27; 2:7-9) Irô koa tôkony ho niain̈y mandrakizay, fa tampoko tiô, niova fiain̈anandrô. Irô tsy nahazo nipetraka tamy Paradisa eky, baka iô tsy afaka hiain̈y mandrakizay eky. Ke ino lova napetrakandrô tamy taranakandrô? Karaha ty volan̈in’ny Baiboly: “Baka tamin’olo araiky [Adama] nidiran’ny fahotan̈a tamy zao tontolo zao. Baka tamy fahotan̈a io nidiran’ny fahafatesan̈a, ke fahafatesan̈a io nahazo olo jiaby, fôtony irô jiaby samy efa nanota aby.” (Rom. 5:12) Ke fahotan̈a io lova nambelan’i Adama tamintsika. Raha zen̈y amy zay mahavy atsika maty. Fahotan̈a nilovaintsika io mira trosa be in̈y, ke tsisy olo mahavoahefa izy.​—Sal. 49:8.

 3. Nan̈ino fahotan̈antsika io ampiran̈iny amy “trosa”?

³ Nampiran̈in’i Jesosy tamy “trosa” fahotan̈a io. (Mat. 6:12; Lioka 11:4) Izikoa atsika manota, atsika mira anan̈an’i Jehovah trosa in̈y. Ke atsika tsy maintsy man̈efa sazin’ny fahotan̈antsika  io. Izio tsy mety izikoa tsy ifain̈a, aviô lera atsika maty edy izio vo foan̈a.​—Rom. 6:7, 23.

 4. a) Izikoa tsisy mpan̈ampy, nety ho karakôry olo mpanota jiaby? (Salamo 49:7-9) b) Izikoa Baiboly zahan̈a, ino ma dikan’ny “fahotan̈a” zen̈y? (Zahava efajoro “ Fahotan̈a.”)

⁴ Mbala mety ho azontsika ndraiky ma raha jiaby narian’i Adama ndreky Eva in̈y? Izikoa mbala angôvontsika fo, tsy mahazo zen̈y. (Vakia Salamo 49:7-9.) Izikoa atsika tsisy mpan̈ampy, tsy afaka han̈anten̈a fiain̈ana tsisy farany ndreky fitsanganan̈a amy maty. Ke atsika koa maty, ho mira biby maty in̈y fo.​—Mpito. 3:19; 2 Pet. 2:12.

 5. Akôry nan̈ampian’ny Babantsika be fitiavan̈a io atsika, nan̈ifan̈a fahotan̈antsika? (Zahava amy fôn̈ony.)

⁵ Iritrireta ndraiky baka manafolahy nikoran̈intsika taloha tarỳ in̈y. Ino raha mety ho tsapany, izikoa misy lelahy araiky mpan̈arivo man̈efa trosanany jiaby? Azo antoko fa ravoravo mare izy han̈eky ndreky hankasitraka fan̈ampian̈a io. Karaha zen̈y koa Jehovah, mira lelahy tsara fan̈ahy io. Izy Babantsika be fitiavan̈a, ke izy nan̈amia atsika kadô han̈ifan̈a trosa na fahotan̈a nilovaintsika tamin’i Adama io. Karaha ty nan̈azavan’i Jesosy raha zen̈y: “Be ankitin̈y fitiavan’ny Zan̈ahary zao tontolo zao, ke namiany Zanany lahitokana baka tsy hofoaty olo jiaby man̈aboaka finoan̈a izy fa hahazo fiain̈ana tsisy farany.” (Jaona 3:16) Baka iô, mbala kadô io fo mahavy atsika afaka mifandray tsara amy Jehovah.

 6. Ino aby volan̈a fampiasain’ny Baiboly hidinihintsika amy lahatsoratra ty, aviô nan̈ino?

⁶ Karakôry hahavy atsika hahazo hatsaran̈a baka amy kadô tsara be io? Valin’ny fan̈ontanian̈a io hita amy fampiasan’ny Baiboly irô volan̈a aby ty: Fampihavan̈ana, fandrakofan̈a fahotan̈a, vidim-pan̈avotan̈a, fan̈avotan̈a aviô ambara ho olo marin̈y. Amy lahatsoratra ty, atsika hizaha dikan’ny volan̈a aby io tsiaraikiaraiky. Atsika koa fa misaintsain̈y raha nataon’i Jehovah han̈ambilan̈a fahotan̈antsika, hahaihankasitraka izy fo atsika.

TANJON̈O: FAMPIHAVAN̈ANA

 7. a) Ino koa raha narian’i Adama ndreky Eva? b) Atsika io taranakan’i Adama ndreky Eva, ke mila atao karakôry atsika? (Romanina 5:10, 11)

⁷ Tsy fiain̈ana tsisy farany io fo raha narian’i Adama ndreky Eva, fa fifandraisandrô tamy Jehovah Babandrô koa. Tamy voanalohany, Adama ndreky Eva an̈isan’ny fianakavian̈an’ny Zan̈ahary. (Lioka 3:38) Fa kanefa irô koa fa tsy nan̈araka volan̈an’i Jehovah, irô niroasin̈y tsy an̈isan’ny fianakavian̈anany. Irô tamy zen̈y mbala tsendriky niteraka. (Gen. 3:23, 24; 4:1) Atsika io taranakandrô, ke mila  hampihavanin̈y amy Jehovah. (Vakia Romanina 5:10, 11.) Dikan’izen̈y, atsika mila manan̈a fifandraisan̈a tsara aminany. Misy boky araiky mivolan̈a fa dikan’ny volan̈a griky nadika “fampihavan̈ana” io, “man̈ano raha hihavan̈ana amy fahavalo.” Mahavarian̈a fa Jehovah nan̈ano raha voanalohany, hahavy atsika hihavan̈a aminany ndraiky. Ino raha nataony?

FANDAHARAN̈A NATAO: FANDRAKOFAN̈A FAHOTAN̈A

 8. Ino ma fandrakofan̈a fahotan̈a zen̈y?

⁸ Fandrakofan̈a fahotan̈a io fandaharan̈a nataon’i Jehovah, baka hahavy olombelon̈o mpanota hahavita hifandray tsara aminany. Izio namandraha manolo raha araiky amy raha mitovy valera aminany. Jehovah nan̈ano raha han̈ampodianan̈a ndraiky raha narian’i Adama, ke nan̈amia raha mitovy valera amizin̈y. Soratra Griky Kristianin̈y koa mikoran̈a fomba nataon’i Jehovah, baka olo tsiaraikiaraiky hihavan̈a ndreky hanan̈a fifandraisan̈a tsara aminany.​—Rom. 3:25.

 9. Ino ma fandaharan̈a tsy maharitry nataon’i Jehovah, baka nan̈ambilan̈a fahotan̈andrô Israelita aby io?

⁹ Jehovah nan̈ano fandaharan̈a tsy maharitry baka nahavitan̈a nan̈ambela fahotan̈andrô Israelita aby io, amy zen̈y irô hahavita hifandray tsara aminany. Irô tsy maintsy nankalaza Andra Fandrakofan̈a Fahotan̈a, isaka taon̈o. Tamin’ny andra io mpisôron̈obe nan̈ano sôron̈o biby nohon’ny fahotan̈an’ny vahoaka. Marin̈y ndraiky fa tsisy biby ten̈a mahavita mandrakotro fahotan̈an’olombelon̈o, fôtony biby ambany tozay olombelon̈o. (Heb. 10:1-4) Kanefa isaka nisy Israelita araiky nibebaka ke nan̈ano sôron̈o nitakin’i Jehovah io, Jehovah nan̈ambela fahotan̈anany. Ankoatran’izen̈y, fandaharan̈a io ndreky sôron̈o tsy tapaka nataondrô nohon’ny fahotan̈andrô io, nahavy irô Israelita aby io nahatsiaro fa irô ten̈a olombelon̈o mpanota, baka iô irô ten̈a nila raha mahavita tsarabe mandrakotro fahotan̈andrô.

10. Ino fandaharan̈a maharitry nataon’i Jehovah, an̈ambilan̈a fahotan̈an’olombelon̈o?

¹⁰ Ino fo fandaharan̈a maharitry nataon’i Jehovah baka han̈ambilan̈a fahotan̈an’olombelon̈o? Nataony raha nahavy Zanany ten̈a tiany “natolotro indraiky fo, baka hitondra fahotan̈an’olo maro.” (Heb. 9:28) Jesosy nan̈amia “ain̈inany natao vidim-pan̈avotan̈a, baka hatao takalon’olo maro.” (Mat. 20:28) Ino ma vidim-pan̈avotan̈a zen̈y?

RAHA NIFAIN̈A: VIDIM-PAN̈AVOTAN̈A

11. a) Izikoa Baiboly zahan̈a, ino ma vidim-pan̈avotan̈a zen̈y? b) Nila olo karakôry mahavita man̈efa vidim-pan̈avotan̈a io?

¹¹ Izikoa Baiboly zahan̈a, vidim-pan̈avotan̈a io raha ifain̈a handrakofan̈a fahotan̈a, ndreky fampihavan̈ana. a Amy Jehovah, izio fomba hahavitan̈a man̈ampody ndraiky raha araiky very. Amy fomba karakôry? Aleva onon̈o fa Adama ndreky Eva lôso tsy lavorary, ke tsy afaka hiain̈y tsisy farany eky. Ke vidim-pan̈avotan̈a nilain̈a io mila mitovy valera amy raha very io. (1 Tim. 2:6) Olo mahavita man̈efa izio tsy maintsy lelahy araiky efa be, baka iô mahafeno raha telo ty: 1) Lavorary; 2) olo afaka hiain̈y tsisy farany ambony tany eto; aviô 3) vôn̈ono hofoaty, ke han̈amia ain̈inany atsika. Tsy maintsy ain̈y karaha zen̈y fo mahavita misolo na mandrakotro ain̈y narian’i Adama in̈y.

12. Nan̈ino Jesosy nahavita nan̈efa vidim-pan̈avotan̈a nitakin̈y io?

¹² Alô baka hidinihintsika irô antony telo nahavy Jesosy nahavita nan̈efa vidim-pan̈avotan̈a io. 1) Izy lavorary ndreky “tsy nanota  foeky.” (1 Pet. 2:22) 2) Baka amy zen̈y, izy afaka niain̈y tsisy farany tambony tany teto. 3) Izy vôn̈ono hofoaty, ke han̈amia ain̈inany han̈avotan̈a atsika. (Heb. 10:9, 10) Jesosy lavorary, karaha Adama tamin’izy mbala tsendriky nanota in̈y. (1 Kor. 15:45) Ke izikoa Jesosy fa naty, izy nahavita nandrakotro fahotan̈an’i Adama. Ke raha zen̈y nahavita nanolo raha narian’i Adama. (Rom. 5:19) Jesosy aminjay nanjary “Adama farany.” Ke efa tsy nila olo lavorary hafa eky navy ndreky nan̈efa raha narian’i Adama in̈y. “Indraiky fo” Jesosy naty ndreky nan̈efa izio.​—Heb. 7:27; 10:12.

13. Ino raha tsy mampiran̈a fandrakofan̈a fahotan̈a ndreky vidim-pan̈avotan̈a?

¹³ Ino fo basy raha tsy mampitovy fandrakofan̈a fahotan̈a ndreky vidim-pan̈avotan̈a io? Fandrakofan̈a fahotan̈a io fandaharan̈a nataon’ny Zan̈ahary, baka hahavy olombelon̈o ho tsara fifandraisan̈a aminany. Fa vidim-pan̈avotan̈a io ndraiky raha nifain̈a baka handrakofan̈a fahotan̈an’olombelon̈o. Voahefa izio, Jesosy koa fa nan̈ano sôron̈o ain̈inany lavorary, nan̈avotan̈a atsika.​—Efes. 1:7; Heb. 9:14.

VOKANY: NAVÔTIN̈Y AVIÔ AMBARA HO OLO MARIN̈Y

14. Ino raha handeha hidinihintsika iziôty, aviô nan̈ino?

¹⁴ Ino ma vokatran’ny fandaharan̈a natao handrakofan̈a fahotan̈a io? Baka hamalian̈a zen̈y, atsika handiniky volan̈a aroe ampiasain’ny Baiboly ao. Irô io han̈ampy atsika hahay ino aby hatsaran̈a azontsika baka amy familan-kelokon’i Jehovah.

15-16. a) Izikoa Baiboly zahan̈a, ino ma dikan’ny “fan̈avotan̈a” zen̈y? b) Ino vokatran’izen̈y amintsika?

¹⁵ Amy Baiboly, fan̈avotan̈a zen̈y fan̈afahan̈a olo araiky baka tsy ho voasazy eky, fôtony vidim-pan̈avotan̈a efa navoahefa. Karaha ty nivolan̈an’ny apostoly Petera raha zen̈y: “Hainarô fa tsy tamy raha mora robaka karaha ataon’ny volafotsy na volamena nan̈afahan̈a [abt.: “nan̈avotan̈a, nan̈anaovan̈a vidim-pan̈avotan̈a”] ninarô tamy fomba fiain̈ana tsy mahatsara nilovainarô tamy razambenarô, fa tamy lio valera, lion’i Kristy zen̈y. Izio karaha lion’ny zanaka ôndrikôndriky tsisy tsin̈iny ndreky tsisy tasy in̈y.”​—1 Pet. 1:18, 19; l.p.a.

¹⁶ Baka amy vidim-pan̈avotan̈a io, atsika mety ho afaka amy fahotan̈a ndreky fahafatesan̈a. Raha aby io mampijaly atsika mare. (Rom. 5:21) Ten̈a mankasitraka Jehovah ndreky Jesosy mare atsika, nohon’ny fan̈avotan̈a atsika baka tamy lion’i Jesosy, lio ten̈a valera io.​—1 Kor. 15:22.

17-18. a) Ino ma dikan’ny ambara ho marin̈y zen̈y? b) Ino ma hatsaran̈a azontsika baka amy zen̈y?

¹⁷ Ambara ho olo marin̈y. Baiboly mivolan̈a fa mpanompon’i Jehovah, ambara ho olo marin̈y. Ino ma dikan’izen̈y? Atsika tsy takin’i Jehovah han̈efa fahotan̈a nataontsika. Fa Jehovah ndray man̈ano zen̈y, izy mbala man̈araka fitsipikinany momba ny rariny fo. Jehovah ndray mikaiky atsika ho olo marin̈y, zen̈y tsy mivolan̈a fa atsika man̈eva zen̈y, aviô zen̈y tsy midika fa Jehovah milefitry amy fahotan̈antsika. Fa Jehovah man̈ambela fahotan̈antsika, nohon’ny atsika man̈aboaka fa ten̈a mino raha nataondrô roen’i Jesosy nan̈amezan̈a vidim-pan̈avotan̈a in̈y.​—Rom. 3:24; Gal. 2:16.

¹⁸ Ino ma hatsaran̈a azontsika tsiaraikiaraiky baka amy zen̈y? Olo sasany nifidin̈y hiaraka hanjaka amy Jesosy Kristy an-dan̈itry an̈y, ke irô lôso zanakan’ny Zan̈ahary. (Tit. 3:7; 1 Jaona 3:1) Nambelan’ny Zan̈ahary helokondrô. Irô mira tsiary nan̈ano fahotan̈a, ke zen̈y nahavy irô nahafeno raha takin̈a amin’olo an̈isan’ny hitondra amy Fanjakan̈an’ny Zan̈ahary. (Rom. 8:1, 2, 30)  Fa lan̈iany man̈anten̈a hiain̈y ambony tany eto koa ambara ho marin̈y ke lôso kamaradin’ny Zan̈ahary, baka iô fahotan̈andrô koa nambelany. (Jak. 2:21-23) Afaka hiain̈y tsisy farany irô vahoaka be ho tafitsaka amin’ny Aramagedona. (Jaona 11:26) Irô olo maty, “olo marin̈y” ndreky “tsy marin̈y”, mbala hivilômin̈y ndraiky. (Asa. 24:15; Jaona 5:28, 29) Baka iô amy zay, irô mpanompon’i Jehovah jiaby ambony tany eto, hahazo “fahafahan̈a miavaka anan̈an’ny zanakan’ny Zan̈ahary.” (Rom. 8:21) Efa tsy din̈intsika mare fotoan̈a hahafahantsika hanan̈a fifandraisan̈a karaha zen̈y amy Jehovah Babantsika!

19. Karakôry nahavy atsika nanjary nisy fan̈antinan̈a? (Zahava koa efajoro “ Ino ma Dikan’izio Amintsika?”)

¹⁹ Raha nahazo atsika olombelon̈o, mira raha nahazo manafolahy very fanan̈ana ndreky nandova trosa be tsy voahefany in̈y fo. Fa nakiry izy Jehovah nan̈ampy atsika. Mbala misy fan̈antinan̈a atsika, fôtony nisy fandaharan̈a fandrakofan̈a fahotan̈a ndreky fan̈ifan̈a vidim-pan̈avotan̈a. Atsika mino Jesosy Kristy, ke zen̈y mahavy atsika ho avotro na ho afaka amy fahotan̈a ndreky fahafatesan̈a. Mety foan̈ana na fafan̈a koa fahotan̈antsika, ke mira tsiary nisy in̈y. Fa ny faran’ny maventy, atsika iziôty afaka mifandray tsara amy Jehovah, Babantsika be fitiavan̈a an-dan̈itry an̈y.

20. Ino raha hidinihintsika amy lahatsoratra fan̈araka?

²⁰ Atsika koa mangala onon̈o raha nataon’i Jehovah ndreky Jesosy tamintsika, atsika ten̈a mankasitraka irô. (2 Kor. 5:15) Koa tsy irô nan̈ampy, atsika tsisy fan̈antinan̈a foeky! Fa ino ma hatsaran̈a azontsika tsiaraikiaraiky baka amy familan-kelokon’i Jehovah? Zen̈y raha hidinihintsika amy lahatsoratra fan̈araka.