Papako ndreky Mamako taloha Katolika nafana fô. Fa irô koa fa nianatra Baiboly, ke nahay fa Jehovah an̈aran’ny Zan̈ahary, irô nanjary Vavolombelon̈on’i Jehovah nazoto mare. Papako mpandrafitry, fa izy efa tsy niasa sarin’i Jesosy eky. Fahaizan̈anany nampiasainy nan̈amboaran̈a tran̈onay tamy faran’ny ambany, nivoan̈a tran̈o nivorian̈a. Izio Tran̈o Fivorian̈a voanalohany ta San Juan del Monte, tambanivolon’i Manille, renivohitrin’i Philippines.

Zaho teraka tamin’ny 1952. Raimandreniko nampianatra zaho raha momba Jehovah, karaha nataondrô tamy zokiko lelahy efatra ndreky anabaviko telo aby io fo. Zaho koa fa nahaibe, papako nandrisiky zaho hamaky toko araiky amy Baiboly isan’andra, aviô koa zahay roe niaraka nianatra boky ndreky gazetintsika aby io. Raimandreniko nazoto nampiantran̈o mpiandrakitrin’ny faritry ndreky solonten̈an’ny sampan̈a. Namparavoravo zahay jiaby ndreky nandrisiky zahay han̈ano voalohan-toeran̈a fanompoan̈a, irô rahalahy aby io koa fa nitantara raha niain̈andrô.

Maro raha nianarako baka tamin’ny ohatran’iry olobeko in̈y. Irô tsy nivadiky tamy Jehovah foeky. Fa mamako koa fa narary, ke naty, zahay roen’ny papako nan̈ano mpisava lalan̈a tamin’ny 1971. Aviô tamin’ny 1973, zaho tamy zen̈y 20 taon̈o, naty koa papako in̈y. Nahatsiaro nisy raha manky ndreky latsatokana mare zaho, koa fa samy naty ry olobeko. Fanan̈ana fan̈antinan̈a “azo antoko ndreky miôrin̈y tsara” baka amy Baiboly, nan̈ampy zaho hanan̈a korazy fo ke tsy ho kivy mare ndreky nifandray marikitry tamy Jehovah fo. (Heb. 6:19) Fa tsy ela tafaran’ny nifatesan’ny papako in̈y, zaho voatendry mpisava lalan̈a manokan̈a ta Nosy Coron. Izio nosy mitokana, amy faritrin’i Palawan.

Tamy zaho navy ta Coron, zaho 21 taon̈o. Zaho baka tombo tamy tanambe, ke gaga mare zaho koa fa nahita fa tsy naro tran̈o nisy rano ndreky jiro, aviô vitsy fo koa tomabily ndreky môtô. Baka iô koa, nisy rahalahy vitsivitsy tan̈y, fa tsisy mpisava  lalan̈a karaha zaho. Ke natetiky nandeha nanokan̈a fo zaho koa fa nandeha nitory. Koa baka tamy fanjava voanalohany naviako tan̈y, zaho ngoma mare fianakavian̈anaka ndreky irô namako aby io. Alin̈y andra, zaho koa fa nizaha lakintan̈a in̈y, ranomasonaka raha fa nirabaraba fo. Ndray zaho efa tseky niala foeky tamy fanendrena io ke fa tseky nody taminay tan̈y.

Tan̈atin’ny fotoan̈a aby zen̈y, nikoran̈iko tamy Jehovah raha jiaby tan̈atin’ny fônaka ndreky tan̈atin’ny sain̈inaka tan̈y. Nazoko onon̈o irô hevitry naro nankahery nivakiko tamy Baiboly ndreky tamy boky ndreky gazety aby io. Natetiky navy tan̈aty jeriko Salamo 19:14. Haiko fa Jehovah ho “Lampimbatonaka ndreky Mpan̈avotro zaho” izikoa zaho misaintsain̈y raha mamparavoravo izy fo, karaha ataon’ny asanany ndreky toetrinany. Nisy lahatsoratra tamy Tilikambo Fiambesan̈a zay ten̈a nan̈ampy zaho, titranany “Anao Tsy Latsatokana Foeky” a (fransay). Impirimpiriy izio nivakiko. Ny marin̈y aminany, zaho koa fa latsatokana, zaho mahatsapa fa Jehovah marikitry zaho iô fo. Fotoan̈a aby io baka nahavitako nivavaka, nianatra ndreky nisaintsain̈y tsarabe.

Tsy ela tafaran’ny naviako ta Coron, zaho voatendry anti-pan̈ahy. Efa zaho zaraiky fo anti-pan̈ahy tan̈y, ke zaho fo nitariky Sekolin’ny Fanompoana, Fivoriana Momba ny Fanompoana, Fianarana Boky, aviô Fianaran̈a Tilikambo Fiambesan̈a. Baka iô koa zaho nan̈ano kabaro natao nin’olo jiaby isaka herin̈iandra. Ke zaho tsy nahatsiaro latsatokana, fôtony zaho ten̈a naro raha natao!

Namparavoravo zaho mare vokatran’ny fanompoan̈a nataoko ta Coron. Sasany tamin’olo nampianariko Baiboly natao batisa. Fa ndray tiô raha zen̈y, nisy raha sarotro koa. Natetiky zaho nandeha vity tan̈atin’ny tsiota lera vo navy tamy faritany araiky, kanefa ndray tany handrian̈a mbala tsy haiko izikoa zaho fa avy an̈y. Faritanin’ny fiangonan̈a io koa feno nosy maro madiniky. Ke natetiky zaho nandeha sambo tamy ranomasin̈y nihetsiky mare, kanefa ndray nilomaon̈o fo tsy haiko! Fa tamy raha maro sarotro zen̈y, Jehovah niaro zaho fo ndreky nanohan̈a zaho. Hitako tamizin̈y fa Jehovah in̈y nampiofan̈a zaho tamy raha mbala sarosarotron’izin̈y ho hitako tamy fanendrena nazoko tafaran’izin̈y.

Voatendry ta Papouasie-Nouvelle-Guinée, tavaratran’i Australie zaho, tamin’ny 1978. Papouasie-Nouvelle-Guinée io tany maro bongo. Hely tsy ho mira habezan’i Espagne izio. Gaga zaho izikoa fa nahay fa olo kadiriny telo tapitrisa amy tany io, kanefa fivolan̈anan’olo an̈y mandilatra 800 karazany. Nakiry izy, ankamarozan’olo mahay teny Pidgin Melanésien, na Tok Pisin koa fivolan̈an’olo izy.

Zaho voatendry tsy maharitry tamy fiangonan̈a niteny Angiley, tamy Port Moresby renivohitry. Fa zaho baka tiô nifindra tamy fiangonan̈a nampiasa volan̈a Tok Pisin, ke zaho nianatra volan̈a io. Ke raha baka nianarako nampiasaiko zaho koa fa nitory. Raha zen̈y nalaky nahaizako volan̈a io. Ke tsy ela, zaho efa nahavita nan̈ano kabaro tamy volan̈a Tok Pisin edy. Mbala tsy ela naviako ta Papouasie-Nouvelle-Guinée, zaho voatendry mpiandraikitrin’ny faritry tamy fiangonan̈a Tok Pisin, amy toeran̈a maromaro. Zay raha tsy nampoiziko foeky.

Nifankalavitry mare tany nisy fiangonan̈a tamy zen̈y, ke zaho tsy maintsy nandamin̈y fivoriamben’ ny faritry maromaro ndreky natetiky nandeha. Tamy voanalohany, zaho nahatsiaro latsatokana hely, fôtony vaovao taminaka tany io ndreky volan̈andrô, aviô kolontsain̈indrô. Tsy nafaka tomabily lalan̈a fôtony feno bongo ndreky vato, ke zaho izikoa fa nitsidiky fiangonan̈a, tsy maintsy nandeha avion fo, tsy ela isaka herin̈iandra. Natetiky zaho zaraiky fo pasazy. Izio koa avion nadiniky sady efa ratsy nare. Ke zaho navozo mare karaha zaho nitenginy sambo in̈y fo, izikoa fa niondran̈a izio!

Mbala vitsy olo nanan̈a telefony, ke taratasy fo nifandraisako tamy fiangonan̈a. Fa matetiky zaho navy tan̈y taloha tozay taratasy nalefako tamindrô. Ke zaho koa fa navy, zaho tsy maintsy nan̈ontany olo aia tany misy Vavolombelon̈on’i Jehovah. Ravoravo mare irô rahalahy aby io zaho koa fa nahita irô, isaka zaho navy. Ke lôso nazoko onon̈o antony nahavy zaho nan̈ano ezaka aby io. Naro fomba nan̈ampian’i Jehovah zaho, ke nahainatanjaka fo fifandraisako taminany.

Tamy fivorian̈a voanalohany natôn̈iko ta Nosy Bougainville, nisy olo fivadiany zay nitokitokiky nan̈aton̈o zaho, aviô nan̈ontany: “Azonao onon̈o zahay?” Tsaroako amy zay fa irô io olo nitoriako, tamy somilan’ny naviako ta Port Moresby. Aviô zaho nanomboko fampianaran̈a Baiboly tamindrô, talohan’ny irô nafindrako tamy rahalahy baka amy tanàna io. Fa irô fanôjy zaho io efa vita batisa! Zen̈y araiky tamindrô hatsaran̈a maro nazoko tan̈atin’ny telo taon̈o nanompoako ta Papouasie-Nouvelle-Guinée.

Talohan’ny nialako ta Coron tamin’ny 1978, zaho nifanôjy tamy ranabavy araiky zatôvo sady nahafoe ten̈a, Adel an̈arany. Izy mpisava lalan̈a maharitry sady nitarimy zanany aroe mianadahy, i Samuel ndreky Shirley. Nikarakara mamany efa natoe koa izy. Tamy May 1981, zaho nimpody ta Philippines, nan̈ano mariazy tamin’i Adel. Tafaran’izen̈y, zahay nan̈ano mpisava lalan̈a maharitry sady niaraka nikarakara fianakavian̈anay.

Zaho ndray efa nanan̈a fianakavian̈a tamin’ny 1983, zaho mbala navoatendry mpisava lalan̈a manokan̈a ndraiky koa ta Nosy Linapacan, amy faritrin’i Palawan. Zahay jiaby nifindra tamy tany mitokana io. Tsisy Vavolombelon̈on’i Jehovah foeky tan̈y. Taon̈o araikin’ny navianay tan̈y, naty maman’i Adel. Fa zahay mbala naro raha natao fo tamy fanompoan̈a, ke raha zen̈y nampakirikiry alahelonay. Naro olo nianatra Baiboly taminay ta Linapacan, safe zahay nila Tran̈o Fivorian̈a hely. Ke zahay fo nan̈amboatra izio. Telo taon̈o tafaran’ny navianay tan̈y fo, ravoravo zahay nahita olo 110 nan̈aton̈o Fahatsiarovan̈a. Naro tamindrô io nandroso firaka tamy batisa, tafaranay niala tan̈y.

Tamin’ny 1986, zaho navoatendry ta Nosy Culion. Izio tanànan’olo boka. Navoatendry mpisava lalan̈a manokan̈a koa Adel tafaran’izin̈y. Tamy voanalohany, niasaloha mare zahay hitory tamin’olo boka zen̈y. Fa irô mpitory tamy tany io nan̈amia toky zahay fa irô olo aby io efa mihina aody, ke efa tsy atahoran̈a hamindra aretin̈y eky. Sasany tamindrô aby navy nivory tamy tran̈on’ny ranabavy araiky zay. Ke tsy ela zahay efa zatra irô olo aby io edy. Ravoravo zahay nikoran̈a tamindrô fampan̈antinan̈an’ ny Baiboly momba irô olo mahatsapa karaha narian’ny Zan̈ahary ndreky nailikilikin’olo aby io. Namparavoravo mare koa nahita olo nijalin’ny aretin̈y lôso ravoravo, fôtony man̈anten̈a fa andra araiky an̈y irô ho lavorary, fa tsy harary eky.​—Lioka 5:12, 13.

Karakôry fo fiain̈anan’ny zanakanay ta Culion? Zahay roen’i Adel nitondra ranabavy tanora aroe baka ta Coron, baka zanakanay nanan̈a naman̈a tsara fo. Samuel ndreky Shirley, aviô ranabavy aroe io ravoravo mare nampianatra fahamarin̈ana. Ke zahay ndreky Adel nampianatra raimandreny, fa irô ndraiky nampianatra zanakandrô olo aby io. Ke zahay nahavita nampianatra fianakavian̈a mandeha 11. Betibetiky fo, naro olo nampianarinay Baiboly nandroso, ke zahay nanjary fiangonan̈a!

Tamy voanalohany, zaho zaraiky fo anti-pan̈ahy tamy faritry io. Ke birôn’ny sampan̈a nan̈iraka zaho nitariky fivorian̈a isaka faran’ny herin̈iandra, tamy mpitory valo ta Culion ndreky tamy mpitory sivy ta Marily. Nandeha sambo kadiriny telo lera baka ta Culion vo navy tan̈y. Izikoa fa vita fivorian̈a io, zahay nandeha vity namakivaky bongo tan̈atin’ny lera maromaro, nandeha nampianatra Baiboly olo ta Halsey.

Koa fa hitanay fa nahainaro fo olo tia fahamarin̈ana ta Marily ndreky Halsey, samy nan̈amboaran̈a Tran̈o Fivorian̈a tan̈y. Karaha ta Linapacan, irô rahalahy ndreky ranabavy aby io ndreky irô olo lian̈a aby io fo niantoko ankamarozan’ny raha nan̈amboaran̈a izio ndreky nan̈amboatra izio. Tran̈o fivorian̈a ta Marily io tandry olo mandeha 200 sady mbala nety nankabiazin̈y, ke zahay afaka nampiasa izio nan̈anaovan̈a fivoriambe.

Zanakanay koa fa be tamin’ny 1993, zahay roen’i Adel nan̈ano asan’ny faritry ta Philippines. Aviô tamy taon̈o 2000, zaho nan̈ano Sekolin’ny Fampiofanana ho an’ny Fanompoana, ke zaho niofan̈a ho mpampianatra tamy sekoly io. Zaho nahatsapa tsy nahay tamy voanalohany, fa Adel nankahery zaho. Nampatsiarôviny zaho fa Jehovah han̈amia zaho angôvo ilaiko, baka hahavitako izio. (Fil. 4:13) Hain’i Adel tsarabe baka fahamarin̈an’ny raha zen̈y, fôtony izy ndray narary, vitany fo nan̈ano fanendrena nazony.

 Tamin’ny 2006 zaho tamin’io efa mpampianatra, Adel nazon’ny aretin̈y Parkinson. Ten̈a tsy nora taminay nahay raha zen̈y! Ke zaho nivolan̈a tamin’i Adel fa zahay hijanon̈o antsendriky tamy fanendrenanay fa hikarakara izy. Fa karaha ty nivolan̈in’i Adel: “Zaho fo itadiava dokotera, fa haiko tsarabe fa Jehovah han̈ampy atsika hanohy fanendrenantsika io.” Fa tan̈atin’ny tsiota taon̈o fan̈araka izin̈y, Adel mbala nahavita nanohy fanompoany Jehovah fo, aviô izy tsy nitarain̈y foeky. Aviô izikoa fa sarotro taminany nivolan̈a, isaka fivorian̈a, volan̈a araiky na aroe fo valin-teninany. Naro rahalahy ndreky ranabavy nandefa mesazy fankasitrahan̈a taminany, fôtony izy ohatra tsara tamy fiaretan̈a, firaka izy naty, tamin’ny 2013. Fa zaho nanjary nahatsapa nahahelo ndreky latsatokana ndraiky koa, izy koa fa tsy nisy. Nahadin̈y 30 taon̈o mahery baka vadian̈anay, aviô izy tsy nivadiky ndreky ten̈a tia zaho mare.

Tian’i Adel baka zaho tsy hiala tamy fanendrena nazoko io, ke nataoko raha zen̈y. Zaho naro raha natao fo, ke tsy dia nahatsiaro latsatokana eky. Tamin’ny 2014 firaka 2017, zaho navoatendry nitsidiky fiangonan̈a mampiasa volan̈a Tagalog, tamy firenena aby nanakantsakana asantsika. Tafaran’izen̈y, zaho nitsidiky fiangonan̈a nampiasa volan̈a Tagalog ta Taiwan, Etazonỳ ndreky Kanada. Tamin’ny 2019, zaho nitariky tamy Sekolin’ny Mpitory Ilay Fanjakana tamy teny angiley, tan Inde ndreky ta Tailandy. Ten̈a namparavoravo zaho mare fanendrena nazoko aby io. Ke nahatsiaro sambatra mare zaho, izikoa fa nifantoko tamy fanompoan̈a Jehovah.

Isaka fanendrena vaovao nazoko, zaho lôso nahainifandray tamindrô rahalahy ndreky ranabavy aby io fo, ke tsiary ndraiky nora taminaka niala irô. Fa tan̈atin’ny fotoan̈a aby zen̈y, zaho nianatra natoky Jehovah mare. Aviô koa hitako fa izy nanohan̈a zaho fo, ke raha zen̈y nan̈ampy zaho ho vôn̈ono fo nan̈eky zay fanendrena nazoko. Zaho iziôty mpisava lalan̈a manokan̈a a Philippines atỳ. Mahatamana zaho tsara fiangonan̈a misy zaho io, fôtony zaho manan̈a fianakavian̈a manohan̈a ndreky mikarakara zaho. Mirehareha koa zaho mahita Samuel ndreky Shirley mangala tahaka finoan̈an’ny mamandrô.​—3 Jaona 4.

Naro raha sarotro hitako tamy fiain̈ananaka, an̈atin’izen̈y nahita vadiko tiako mare nijaly fôtony narary, ndraiky firaka izy naty, tamin’ny aretin̈y sarotro navoa izy in̈y. Aviô koa zaho natetiky nila nizatra fiain̈ana vaovao. Hitako tsarabe fa Jehovah “tsy lavitry atsika tsiaraikiaraiky.” (Asa. 17:27) Tan̈anany ‘tsy fôhiky’ manohan̈a ndreky mankafatatra mpanomponany, nata amy tany faran’ny mitokana an̈y. (Isaia 59:1) Jehovah Lampimbatonaka. Izy miaraka aminaka fo amy fiain̈ananaka jiaby. Ke zaho ten̈a mankasitraka izy. Zaho tsiary latsatokana zen̈y foeky.