1-2. Ino hatsaran̈a azon’olo vita batisa?

 RAVORAVO atsika koa fa vita batisa, aviô lôso an̈isan’ny fianakavian̈an’i Jehovah. Voninahitry tsisy ambaka izy mifandray marikitry amy Jehovah. Ke atsika man̈eky tsarabe raha nivolan̈in’i Davida mpan̈ano salamo ty: ‘Sambatra lan̈iany olo fidinao [Jehovah] ndreky kahinao han̈aton̈o anao, baka hipetraka amin’ny haramanjanao.’​—Sal. 65:4.

² Tsy kila olo jiaby fidin’i Jehovah handeha amin’ny haramanjanany. Hitantsika tamy lahatsoratra taloha tiô fa lan̈iany olo tihanan̈a fifandraisan̈a manokan̈a aminany fo fidin’i Jehovah hiditry amizio. (Jak. 4:8) Lera anao manokan-ten̈a amy Jehovah ndreky atao batisa, anao mahaimifandray marikitry amy Jehovah fo. Anao mety matoky fa izy ‘han̈idin̈y hatsaran̈a maro mandilatran’ny ilainao.’​—Mal. 3:10; Jer. 17:7, 8.

3. Ino andraikitry maventy nin’ny Kristianin̈y vita fanokan̈an-ten̈a ndreky batisa? (Mpitoriteny 5:4, 5)

³ Mbala vo fanombohany fo batisa io. Afaran’ny batisanao, ho tianao han̈ano erakan’ny vitanao, hiain̈y mifan̈araka amy voady nataonao tamin’ny anao nanokan-ten̈a. (Vakia Mpitoriteny 5:4, 5.) Anao iziôty efa mpianatran’i Jesosy, ke anao ho vôn̈ono han̈araka marikitry môdelinany ndreky didinany. (Mat. 28:19, 20; 1 Pet. 2:21) Han̈ampy anao han̈ano zen̈y lahatsoratra ty.

‘AREVA FO’ JESOSY NATA ANAO TÔJY RAHA SAROTRO NDREKY FAKAM-PAN̈AHY

4. Ino raha tian’i Jesosy havian̈a tamin’izy nivolan̈a fa mpianatranany hitondra “hazofijalian̈a”? (Lioka 9:23)

⁴ Aza mieritreritry fa hilamin̈y aby raha jiaby anao koa fa vita batisa. Jesosy efa nan̈ambara mazava fa mpianatranany tsy  maintsy hitondra “hazofijalian̈a.” Tsy an̈atin’ny andra araiky fo irô han̈ano zen̈y, fa “isan’andra isan’andra.” (Vakia Lioka 9:23.) Ke dikan’ny volan̈an’i Jesosy zen̈y ma amy fiain̈anandrô jiaby irô hijaly fo? Ehe. Izy raha zisty nivolan̈a fo fa, ankoatran’ny fitahian̈a maro ho azon’ny mpianatranany aby io, irô ho tôjy raha sarotro.​—2 Tim. 3:12.

5. Ino aby hatsaran̈a nampan̈antinain’i Jesosy lan̈iany olo man̈ano sôron̈o hanompoan̈a Jehovah?

⁵ Fianakavian̈anao mety efa nanohitry anao, na koa anao nifidy nan̈ano voalohan-toeran̈a Fanjakan̈an’ny Zan̈ahary tozay hahazo volabe na hahazo raha maro tsara amy donia ty. (Mat. 6:33) Izikoa zen̈y raha nataonao, matokisa fa hitan’i Jehovah raha jiaby ataonao ninany. (Heb. 6:10) Mety ho hitanao fa marin̈y tsarabe amy fiain̈ananao raha nivolan̈in’i Jesosy ty: “Tsisy olo efa nahatindry tran̈o na rahalahy na anabavy na reny na baba na zanaka na vilo baka aminaka ndreky vaovao tsara, ke tsy hahazo injatony nanan̈any taloha amin’ny andra iziôty, hahazo tran̈o ndreky rahalahy ndreky anabavy ndreky reny ndreky zanaka ndreky vilo ndreky fan̈injehan̈a, baka iô fiain̈ana tsisy farany amy donia ho avy.” (Mar. 10:29, 30) Ke hatsaran̈a azonao iziôty mbala maro mandilatra raha jiaby nafoenao.​—Sal. 37:4.

6. Nan̈ino ma anao mbala mila miady amy “fan̈irian̈an’ny nôfotro” fo nata anao efa vita batisa?

⁶ Fa nata anao efa vita batisa, anao mbala mila miady mare amy “fan̈irian̈an’ny nôfotro.” (1 Jaona 2:16) Anao baka mbala tsy lavorary. Mety misy fotoan̈a anao mahatsapa karaha raha tsapan’ny apostoly Paoly ty: “Izikoa zahan̈a raha an̈aty fônaka ato, ten̈a tiako mare lalàn̈an’ny Zan̈ahary. Fa misy lalàn̈a hafa miady amy lalàn̈a mifehy jerinaka ndraiky amy vatan̈anaka ato, sady mitariky zaho ho andevon’ny lalàn̈an’ny ota amy vatan̈anaka.” (Rom. 7:22, 23) Mety ho kivy mare anao fôtony tsy maintsy miady mare baka tsy ho resin’ny fan̈irian̈a ratsy. Fa ndray zen̈y, saintsain̈a raha nampan̈antinainao Jehovah tamin’ny anao nanokan-ten̈a taminany, fa zen̈y han̈amia angôvo anao hahavitanao handresy fakam-pan̈ahy. Ny marin̈y aminany, voady nataonao in̈y han̈ampy anao, lera anao tôjy fakam-pan̈ahy. Amy fomba akôry?

7. Nan̈ino ma fanokan̈an-ten̈a nataonao amy Jehovah in̈y han̈ampy anao tsy hivadiky aminany?

⁷ Anao koa fa nanokan-ten̈a tamy Jehovah, anao nivolan̈a fa tsy han̈eky ain̈inao eky. Ke dikan’izen̈y, anao tsy man̈eky ho resin’ny fan̈irian̈a ratsy, aviô anao tsy hanakatra tanjon̈o tsy mamparavoravo Jehovah. (Mat. 16:24) Ke izikoa anao fa tôjy raha sarotro ndreky fakam-pan̈ahy, anao efa tsy hisalasala eky amy raha tôkony hataonao. Efa hainao baka raha ten̈a maventy aminao: Tsy hivadiky amy Jehovah. Anao efa tapa-kevitry fa han̈ano raha hamparavoravo Jehovah fo. Ke karaha raha nataon’i Joba fo raha handeha hataonao. Izy ndray tôjy raha faran’ny sarotro, izy tapa-kevitry nivolan̈a karaha ty: “Zaho tsy han̈eky hivadiky zen̈y foeky!”​—Joba 27:5.

8. Nan̈ino ma firitriretanao vavaka nataonao tamin’ny anao nanokan-ten̈a tamy Jehovah in̈y han̈ampy anao hahavita hanohitry fakam-pan̈ahy?

⁸ Hahazo angôvo hahavitanao handresy karazan̈a fakam-pan̈ahy jiaby anao, izikoa mandiniky vavaka nataonao tamin’ny anao nanokan-ten̈a tamy Jehovah in̈y. Ohatra iziô, anao iziôty han̈eky handeha hankadala vadin’olo? Aha, anao tsy han̈ano zen̈y! Anao baka efa nampan̈anten̈a Jehovah fa anao efa tsy han̈ano raha karaha zen̈y foeky. Izikoa anao tsy man̈ambela eritreritry ratsy hitombo an̈atin’ny jerinao ao, ho moramora aminao halaky han̈adoso izio. Anao ‘hivily, fa tsy han̈araka lalan̈an’ny ratsy fan̈ahy.’​—Ohab. 4:14, 15.

9. Nan̈ino firitriretanao vavaka nataonao tamin’ny anao nanokan-ten̈a, han̈ampy anao han̈ano fanompoan̈a Jehovah ho voalohan-toeran̈a fo?

 ⁹ Karakôry izikoa anao mahita asa tsy hahavitanao han̈aton̈o fivorian̈a? Efa mazava aminao raha tôkony hatao. Anao mbala tsendriky honohono hahita asa karaha zen̈y, anao efa nivolan̈a tamy Jehovah fa anao tsy han̈eky han̈ano asa karaha zen̈y. Anao tsy hivolan̈a karaha ty: ‘Sitrany ataoko fo asa io, fa iô koa zaho mizaha fomba han̈anaovako voalohan-toeran̈a fanompoan̈a Jehovah.’ Anao koa mangala onon̈o fanapahan-kevitrin’i Jesosy han̈ano raha mamparavoravo Babany fo, anao direkty tsy han̈eky han̈ano raha efa hainao fa tsy hamparavoravo Zan̈ahary nan̈anaovanao fanokan̈an-ten̈a io.​—Mat. 4:10; Jaona 8:29.

10. Anao koa efa vita batisa, akôry hataon’i Jehovah han̈ampy anao hahavita ‘han̈ara-dia Jesosy fo’?

¹⁰ Raha sarotro tôjy anao ndreky fakam-pan̈ahy aby io ahafahanao man̈aboaka fa anao tapa-kevitry ‘han̈araka Jesosy fo.’ Anao koa man̈ano zen̈y, matokisa fa Jehovah han̈ampy anao. Baiboly mivolan̈a: “Zan̈ahary tsy mivadiky amy raha efa nivolan̈iny, ke izy tsy mety han̈ambela anarô hitsapain̈y mandilatra raha tondranarô, fa izikoa fa misy fitsapan̈a, mbala hasiany lalan̈a koa hiboahanarô, baka anarô mahatondra izio.”​—1 Kor. 10:13.

RAHA METY HATAONAO BAKA ANAO HAN̈ARA-DIA JESOSY FO

11. Ino fomba araiky ten̈a tsara hahavitanao man̈ara-dia Jesosy fo? (Zahava koa sary.)

¹¹ Jesosy nanompo Jehovah tamy fônany jiaby. Izy tsy vôly nivavaka baka hahaiharikitry Jehovah fo. (Lioka 6:12) An̈isan’ny fomba ten̈a tsara hahavitanao han̈ara-dia Jesosy fo koa izikoa anao fa vita batisa, man̈ano raha fo hahavy anao hahaiharikitry Jehovah. Baiboly mivolan̈a: “Ke na ino na ino fandrosoan̈a efa vitantsika, atsika mbala mila miezaka mandroso  karaha zen̈y fo.” (Fil. 3:16) Matetiky anao mety haharen̈y tantaran’ny rahalahy ndreky ranabavy nanakatra tanjon̈o hampitombo fanompoan̈a. Mety nan̈ano Sekolin’ny Mpitory Ilay Fanjakana irô io na nandeha nifindra amy tany mbala vitsy mpitory. Ke izikoa anao mahavita man̈ano karaha zen̈y, zen̈y iziôty an̈isan’ny tanjon̈o ten̈a tsara mety hitakarinao koa. Vahoakan’i Jehovah vôn̈ono fo, hizaha fomba hahavitan̈a mampitombo fanompoan̈a. (Asa. 16:9) Ke karakôry fo basy, izikoa anao iziôty mbala tsendriky afaka man̈ano zen̈y? Aza mampitaha anao amin’olo afaka man̈ano zen̈y. Ny raha ten̈a maventy, anao mifen̈y fo miaritry. (Mat. 10:22) Aza adin̈a fa mamparavoravo Jehovah mare fo anao izikoa fa man̈ano erakany vitanao amy fanompoan̈a izy, mifan̈araka amy fahaizan̈a anan̈anao iziôty ndreky raha misy anao. Zen̈y an̈isan’ny fomba araiky ten̈a maventy, hahavitanao man̈ara-dia Jesosy fo, anao koa fa vita batisa.​—Sal. 26:1.

12-13. Ino raha mety hataonao, izikoa hitanao fa tsy mamparavoravo anao karaha taloha fanompoanao Jehovah? (1 Korintianina 9:16, 17) (Zahava koa efajoro “ Milomahiza Fo.”)

¹² Ino raha tôkony hataonao, izikoa ndraikindraiky anao mahatsapa fa vavakanao efa nanjary tsy amy fô eky, baka iô koa fanompoan̈anao efa nanjary fahazaran̈a fo? Ino koa raha hataonao, izikoa famakian̈a Baibolinao efa tsy mamparavoravo anao karaha taloha eky? Izikoa zen̈y raha miboaka, afaran’ny anao vita batisa, aza mivolan̈a fa fan̈ahin’i Jehovah efa tsy miasa aminao eky. Anao mbala olombelon̈o tsy lavorary, ke mety hiovaova fihetseham-pônao ndraikindraiky. Ke izikoa zen̈y raha mahazo anao, aleva onon̈o apostoly Paoly. Izy ndray nifen̈y mare nangala tahaka Jesosy, hainy fa ndraikindraiky izy nahatsapa fa tsy ten̈a nazoto nan̈ano raha nila nataony. (Vakia  1 Korintianina 9:16, 17.) Izy nivolan̈a: ‘Na tsy sitraka fônaka han̈anaovako raha zen̈y, mbala misy asa fo nampan̈anôvin̈y zaho.’ Izikoa atao amy volan̈a hafa, Paoly tapa-kevitry fa han̈ano fanompoan̈anany fo, nata niovaova fihetseham-pônany.

¹³ Karaha zen̈y koa anao. Aza ambela hikômandy anao amy fanapahan-kevitry ataonao fihetseham-pônao. Mifen̈a ho tapa-kevitry han̈ano ny tsara fo, na ino na ino raha tsapanao. Izikoa fa mandeha fotoan̈a, mbala hiova ho tsara fo fihetseham-pônao. Fa mandra-pavian’izen̈y, fahazaranao man̈ano fianaran̈a manokan̈a, mivavaka, man̈aton̈o fivorian̈a ndreky mitory, han̈ampy anao han̈ara-dia Jesosy fo, ndray anao efa vita batisa. Izikoa anao mifen̈y miaritry fo manompo Jehovah, hankahery irô rahalahy ndreky ranabavinao aby io koa raha zen̈y.​—1 Tes. 5:11.

‘MANDINIHA TEN̈A FO’ AVIÔ ‘MIVON̈OSA FO KOA HAN̈OVA’

14. Ino raha tôkony hidinihinao matetiky, aviô nan̈ino? (2 Korintianina 13:5)

¹⁴ Anao koa fa vita batisa, an̈isan’ny raha ten̈a ilainao koa, tsy vôly mandini-ten̈a. (Vakia 2 Korintianina 13:5.) Diniha matetiky: Asa anao mbala zatra mivavaka isan’andra, aviô mamaky ndreky mianatra Baiboly, man̈aton̈o fivorian̈a, aviô man̈ano fanompoan̈a? Mizahava hevitry baka anao hahaihahita ndreky hahazo hatsaran̈a maro baka amy fan̈anaovan̈a raha aby io. Ohatra iziôty, man̈ontania ten̈a karaha ty: ‘Asa zaho mahavita man̈azava amin’olo irô fampianaran̈a fôtotro amy Baiboly? Ino aby raha mety hataoko, baka zaho hahaihahita haravoan̈a fo amy fanompoan̈a ataoko? Voafaritry tsarabe ma vavaka ataoko, aviô hita baka amizio ma fa zaho ten̈a matoky Jehovah tsarabe? Zaho ma man̈aton̈o fivorian̈a tsy tapaka? Ino ma raha mety hataoko, baka zaho hahaihahavita hifantoko fo amy fivorian̈a ndreky hankatsara valin-teninaka?’

15-16. Ino raha ianaranao baka amy tantaran’i Robert, izikoa anao tihanohitry fakam-pan̈ahy?

¹⁵ Tsara koa anao izikoa mandiniky tsarabe, ino fahalimian̈anao. Misy rahalahy araiky, Robert an̈arany, mitantara raha nandalovany. Karaha ty nivolan̈iny: “Tamy zaho kadiriny 20 taon̈o tiô, zaho niasa tapa-potoan̈a. Ke tandraraiky zay, zaho baka niasa, nisy man̈angy fiasan̈a araiky taminaka zay, nitaon̈o zaho handeha tan-tran̈onany tan̈y. Izy nivolan̈a fa zahay roe fo zen̈y an̈y, ke han̈ano firaisan̈a zahay koa fa avy an̈y. Tamy voanalohany zaho nivadibadiky antsendriky nitady fialan-tsin̈y. Fa baka tiô zaho vo tsy nan̈eky ndreky nan̈azava ino ten̈a antony.” Efa tsara ndraiky raha nataon’i Robert zen̈y, fôtony izy nahavita nanohitry  fakam-pan̈ahy. Fa tafaran’izin̈y, izy koa fa nandiniky raha nandalo in̈y, hitany fa tsy tôkony karaha in̈y namaliany izy. Ho izy: “Zaho tsy direkty tsy nan̈eky karaha nataon’i Josefa tamy vadin’i Potifara, fa zaho niolakolaka antsendriky. Karaha tsy ten̈a tapa-kevitry in̈y zaho. (Gen. 39:7-9) Lany fan̈ahy zaho tafara tatỳ izikoa fa nandiniky fa kaiky sarotro taminaka tsy nan̈eky izin̈y. Ke raha nandalo in̈y nahitako tsarabe fa zaho mila tsy vôly mankafatatra fifandraisako amy Jehovah.”

¹⁶ Tsara koa anao izikoa mandini-ten̈a karaha nataon’i Robert in̈y. Ndray anao efa nahavita nanohitry fakam-pan̈ahy araiky, man̈ontania ten̈a fo: ‘Lera karakôry ma zaho vo nahavita nan̈ano ehe?’ Izikoa hitanao fa misy raha mbala mila hankatsarainao, aza man̈amelo-ten̈a. Afaka ho ravoravo fo anao, fôtony nanjary hainao ino fahalimian̈anao, baka amin’ny anao nandini-ten̈a. Ampidira amy vavaka ataonao izio, aviô man̈anaova raha hankafataran̈a fahatapahan-kevitrinao, hiain̈y mifan̈araka amy fitsipikin’i Jehovah momba fitondran-ten̈a.​—Sal. 139:23, 24.

17. Nan̈ino ma nisy vokany amy lazan’i Jehovah tantaran’i Robert in̈y?

¹⁷ Fa mbala misy raha hafa koa ianarantsika baka amy tantaran’i Robert. Karaha ty tohin’ny koran̈anany: “Zaho koa fa tsy nan̈eky raha nivolan̈in’ny man̈angy in̈y, izy nivolan̈a: ‘Nafaka egzamen anao!’ Zaho nan̈ontany izy ino ma raha tiany hikoran̈iny amy zen̈y. Nazavainy taminaka fa nisy kamaradiny zen̈y efa navy Vavolombelon̈on’i Jehovah nivolan̈a taminany fa tanora Vavolombelon̈on’i Jehovah zen̈y man̈ano hadalan̈a fo izikoa fa ambadimbadiky an̈y. Aviô irô zen̈y koa fa mahita hiriky han̈anaovan̈a fahalotoam-pitondran-ten̈a, irô efa rodon̈o edy zen̈y. Ke izy nivolan̈a tamy man̈angy kamaradiny io fa izy handeha hitsapa jery zaho, misy hahitavany asa marin̈y raha zen̈y. Zaho koa fa naharen̈y zen̈y, ravoravo zaho, fôtony zaho nahavita nan̈amia voninahitry an̈aran̈a Jehovah.”

18. Tapa-kevitry han̈ino anao ndray efa vita batisa? (Zahava koa efajoro “ Lahatsoratra Aroe Mety Han̈ampy Anao.”)

¹⁸ Anao koa manokan-ten̈a amy Jehovah ndreky vita batisa, aboakanao amy zen̈y fa anao tihankamasin̈y an̈aranany, na ino na ino raha mbala handalo. Aviô matokisa fa hain’i Jehovah fitsapan̈a atrefinao ndreky fakam-pan̈ahy tôjy anao. Izy hitahy anao fôtony anao mifen̈y tsy mivadiky aminany. Matokisa fa, izy mahavita man̈amia angôvo anao, baka amy fan̈ahy masin̈inany. (Lioka 11:11-13) Ke hahavita han̈ara-dia Jesosy fo anao, izikoa fa vita batisa, fôtony Jehovah han̈ampy anao.