1-2. Ino antsendriky raha tsy maintsy hataon’olo araiky, alohan’izy hatao batisa?

 TAN̈ATIN’NY dimy taon̈o farany tato, mandeha an-tapitrisany olo vita batisa ke nanjary Vavolombelon̈on’i Jehovah. Maro amindrô io nampianarin̈y fahamarin̈ana “rango irô mbala hely”, karaha i Timoty, mpianatra tamy taonjato voanalohany tan̈y. (2 Tim. 3:14, 15) Sasany ndraiky efa be vo nianatra momba Jehovah tamy Vavolombelon̈on’i Jehovah. Fa misy koa efa matoe, karaha ataon’ny man̈angy araiky efa matoe nianatra Baiboly tamy Vavolombelon̈on’i Jehovah, ke natao batisa, tamin’izy 97 taon̈o!

² Izikoa anao iziôty mpianatra Baiboly na anao tarimin’ny raimandreninao Vavolombelon̈on’i Jehovah, asa anao mba efa nieritreritry hatao batisa zen̈y? Ten̈a tanjon̈o tsara raha zen̈y! Fa kanefa, alohan’ny hatao batisa, anao mila manokan-ten̈a amy Jehovah antsendriky. Ke lahatsoratra ty han̈azava, ino ma dikan’ny manokan-ten̈a amy Jehovah zen̈y. Aviô izy ty koa han̈ampy anao hahita antony mahavy anao tsy tôkony hisalasala han̈ano dingana zen̈y, ndreky han̈ano batisa, izikoa anao efa pare han̈ano zen̈y.

INO MA DIKAN’NY MANOKAN-TEN̈A ZEN̈Y?

3. Man̈ameza ohatran’olo koran̈in’ny Baiboly fa nanokan-ten̈a tamy Jehovah taloha tan̈y.

³ Amy Baiboly ao, dikan’ny manokan-ten̈a zen̈y, voatokana han̈ano raha araiky masin̈y. Irô Israelita aby io firenena voatokana nin’i Jehovah. Fa sasany tamindrô ndraiky, voatokana nin’i Jehovah tamy fomba miavaka. Ohatra, tamy satroko fisikinin’i Arona, nisy takelaka volamena talohan’izio tiô. Izio nan̈ambara fa izy efa voatokana han̈ano fanompoan̈a masin̈y nin’i Jehovah, fôtony izy mpisôron̈obe. (Lev. 8:9) Irô Nazirita  aby io koa nanokan-ten̈a nin’i Jehovah tamy fomba niavaka. “Nazirita” zen̈y baka amy volan̈a hebreo nazir’, dikany “Tafasaraka” na “Nanokan-ten̈a.” Nazirita aby io nila nan̈araka lalàn̈a voasoratra natao nindrô, tamy Lalàn̈an’i Mosesy.​—Nom. 6:2-8.

4. a) Manjary karakôry ma anao koa fa manokan-ten̈a amy Jehovah? b) Ino ma dikan’ny “tsy man̈eky” ain̈inao zen̈y? (Zahava koa sary.)

⁴ Anao koa manokan-ten̈a amy Jehovah, anao mifidy hanjary mpianatran’i Jesosy Kristy, ke han̈ano sitrapôn’ny Zan̈ahary raha ten̈a maventy aminao, alohan’ny raha jiaby. Ke ino aby ma raha tafiditry amy fanokan̈an-ten̈a zen̈y? Jesosy nivolan̈a: “Izikoa misy olo mila han̈araka zaho, izy tsy mila man̈eky ain̈inany.” (Mat. 16:24) Dikan’ny volan̈a Griky “tsy mila man̈eky ain̈inany” zen̈y, tsy man̈eky han̈ano sitrapônany tômpiny. Ke izikoa anao efa nanokan-ten̈a amy Jehovah, anao mila tsy man̈eky foeky zay raha jiaby mifanohitry amy sitrapônany. (2 Kor. 5:14, 15) Dikan’izen̈y anao tsy tôkony han̈eky foeky han̈ano “asan’ny nôfotro”, karaha ataon’ny fijangajangan̈a. (Gal. 5:19-21; 1 Kor. 6:18) Ke hitanao sarotro ma fan̈aharahan̈a didy zen̈y? Tsy sarotro izio, izikoa anao tia Jehovah, ndreky resy lahatra tsarabe fa lalàn̈anany ten̈a mahatsara anao. (Sal. 119:97; Isaia 48:17, 18) Misy rahalahy araiky, i Nicholas, nivolan̈a karaha ty: “Fitsipikin’i Jehovah io tsy tôkony hataonao mira lakoron’ny prizon misakana anao tsy han̈ano raha tianao hatao in̈y, fa tôkony hataonao mira lakoro vy miaro anao baka anao tsy hivonen’ny lion.”

5. a) Akôry hataonao manokan-ten̈a amy Jehovah? b) Ino ma tsy mampiran̈a manokan-ten̈a ndreky atao batisa? (Zahava koa sary.)

⁵ Karakôry ma hataonao manokan-ten̈a amy Jehovah? Anao man̈ano vavaka ke mampan̈anten̈a izy fa izy zaraiky fo hitompoenao, aviô sitrapônany handeha hataonao voalohan-toeran̈a amy fiain̈ananao. Ke anao amy zen̈y  mampan̈anten̈a Jehovah fa ho tia izy fo “amy fônao jiaby ndreky vatan̈anao jiaby ndreky jerinao jiaby ndreky angôvonao jiaby.” (Mar. 12:30) Fanokan̈an-ten̈a ataonao amy Jehovah io, ninao ndreky Jehovah fo. Fa batisa ndraiky, hitan’olo jiaby. Izio man̈aboaka amin’olo jiaby mizaha anao atao batisa io fa anao efa nanokan-ten̈a tamy Jehovah. Fanokan̈an-ten̈a ataonao io voady masin̈y, ke Jehovah man̈anten̈a fa anao hiain̈y mifan̈araka amizio, karaha ataonao man̈anten̈a fa anao tsy hivadiky amy voady nataonao tamy Jehovah io.​—Mpito. 5:4, 5.

NAN̈INO MA ANAO TÔKONY HANOKAN-TEN̈A AMY JEHOVAH?

6. Ino mandrisiky olo araiky hanapa-kevitry hanokan-ten̈a amy Jehovah?

⁶ Fitiavanao Jehovah antony ten̈a maventy tôkony hahavy anao hanokan-ten̈a aminany. Izio tsy raha fitiavan̈a mandalo fo, fa izio fitiavan̈a “miôrin̈y amy fahaizan̈a ny marin̈y” momba Jehovah ndreky fikasan̈anany. (Kol. 1:9) Fianaranao Soratra Masin̈y nahavy anao nan̈eky marin̈y fa 1) Jehovah io ten̈a misy ankitin̈y, 2) Baiboly io baka amy fan̈ahy masin̈inany, aviô 3) izy mampiasa fandaminan̈anany han̈atantirahany fikasan̈anany.

7. Ino raha tôkony hataonao antsendriky, alohan’ny anao hanokan-ten̈a amy Jehovah?

⁷ Lan̈iany olo manokan-ten̈a amy Jehovah tôkony hahay fampianaran̈a fôtotro amy Baiboly ao, ndreky efa miain̈y mifan̈araka amy fitsipikin’i Jehovah. Irô koa efa mikoran̈a amin’olo hafa raha nianarandrô tamy Baiboly, erakany mety ho vitandrô. (Mat. 28:19, 20) Nahaibe fitiavandrô Jehovah, ke zen̈y mahavy irô man̈iry hanompo Jehovah zaraiky fo. Karaha zen̈y koa ma ninao? Anao koa manan̈a fitiavan̈a  karaha zen̈y, anao tsy hieritreritry foeky fa manokan-ten̈a ndreky atao batisa anao, fôtony anao raha zisty tihamparavoravo olo mampianatra Baiboly anao ndreky raimandreninao, aviô kamaradinao fo, fa nohon’ny anao ten̈a tia Jehovah.

8. Nan̈ino ma fankasitrahanao Jehovah han̈ampy anao ho tapa-kevitry hanokan-ten̈a aminany? (Salamo 116:12-14)

⁸ Anao koa mieritreritry raha jiaby nataon’i Jehovah taminao, anao tôkony han̈ano raha koa hankasitrahanao izy, ke anao manjary tapa-kevitry hanokan̈a fiain̈ananao aminany. (Vakia Salamo 116:12-14.) Baiboly mivolan̈a mazava fa Jehovah io “Mpan̈amia raha tsara jiaby ndreky fan̈amezan̈a lavorary jiaby.” (Jak. 1:17) An̈isan’ny kadô faran’ny maventy namezan’i Jehovah atsika, Zanany namiany atsika natao sôron̈o. Diniha baka! Baka amy sôron̈o nataon’i Jesosy io hahavy anao hifandray marikitry amy Jehovah. Ke zen̈y mahavy anao mety hahazo fiain̈ana tsisy farany amin’ny amaray an̈y. (1 Jaona 4:9, 10, 19) Fanokan̈an-ten̈anao amy Jehovah io koa an̈isan’ny fomba han̈aboahanao amy Jehovah fa anao mankasitraka fitiavan̈a maventy nataon’i Jehovah, ndreky irô hatsaran̈a maro efa nazonao taminany. (Deot. 16:17; 2 Kor. 5:15) Mikoran̈a fomba han̈aboahan̈a fankasitrahan̈a raha tsara jiaby nataon’i Jehovah io, amy leson 46, hevitry 4, amy boky Mankafiza Fiain̈ana Tsisy Farany!, an̈atin’izen̈y video mahadin̈y telo minity “Amia Zan̈ahary Fan̈amezan̈anaro.”

EFA PARE HANOKAN-TEN̈A NDREKY HATAO BATISA MA ANAO?

9. Nan̈ino ma olo araiky tsy tôkony hahatsapa ho voatery hanokan-ten̈a amy Jehovah?

⁹ Anao mety hieritreritry fa anao mbala tsendriky pare hanokan-ten̈a amy Jehovah ndreky hatao batisa. Mety mbala misy raha mila hivoanao donko amy fiain̈ananao, baka hifan̈araka amy fitsipikin’i Jehovah, na koa, anao mety mbala mila fotoan̈a elaela hankafataran̈a finoan̈anao. (Kol. 2:6, 7) Fa kanefa ny raha misy, tsy olo jiaby mianatra Baiboly miaraka ho tia Jehovah aby. Aviô tsy voatery tanora jiaby miran̈a taon̈o zay ke hiaraka hanokan-ten̈a ndreky hatao batisa. Diniha ino fandrosoan̈a mila ataonao amin’ny ara-pan̈ahy, fa aza ampiran̈inao amin’olo hafa ain̈inao.​—Gal. 6:4, 5.

10. Izikoa anao tsendriky pare hanokan-ten̈a amy Jehovah ndreky hatao batisa, ino raha mety hataonao? (Zahava koa efajoro “ Natao Nin’olo Tarimin’ny Raimandreniny amy Fahamarin̈ana.”)

¹⁰ Anao ndray mieritreritry fa anao mbala tsendriky tôkony hanokan-ten̈a amy Jehovah, ataova tanjon̈o fo izio. Mivavaha amy Jehovah baka izy hitahy ezakanao amy raha mbala mila hivoanao amy fiain̈ananao. (Fil. 2:13; 3:16) Matokisa fa ren̈in’i Jehovah vavakanao, aviô hivaliny.​—1 Jaona 5:14.

NAN̈INO MA OLO SASANY MISALASALA?

11. Akôry hataon’i Jehovah man̈ampy atsika, baka atsika hahavita tsy hivadiky aminany?

¹¹ Misy olo sasany efa vôn̈ono hanokan-ten̈a ndreky hatao batisa, fa irô fo mbala misalasala. Irô mety hivolan̈a karaha ty: ‘Akôry izikoa zaho lera vita batisa, man̈ano fahotan̈a maventy ke voaroaka?’ Izikoa anao mavozo karaha zen̈y, matokisa fa Jehovah han̈amia raha jiaby ilainao, baka anao hahavita ‘han̈ano raha mamparavoravo izy tsarabe.’ (Kol. 1:10) Izy koa han̈amia anao angôvo hahavitanao han̈ano ny tsara, aviô izy koa efa nan̈ampy olo maro hahavita tsy hivadiky taminany. (1 Kor. 10:13) Zen̈y mahavy an̈atin’ny fiangonan̈a, vitsy fo olo voaroaka. Jehovah man̈amia raha jiaby ilain’ny vahoakanany, baka irô hahavita tsy hivadiky aminany.

12. Akôry tôkony hataontsika, baka atsika tsy ho tafan̈ano fahotan̈a maventy?

 ¹² Tsisy olo lavorary, ke mety ho tafan̈ano raha tsy mety aby jiaby. (Jak. 1:14) Fa kanefa, anjaranao ndraiky mifidy ino raha hataonao, izikoa anao tôjy fakam-pan̈ahy. Anao manapa-kevitry amy fomba tianao hitondrasan̈a fiain̈ananao. Fa kanefa misy olo mivolan̈a fa tsisy olo mahavita mifehy ten̈a zen̈y. Tsy marin̈y zen̈y. Ho vitanao fo hifehy fan̈irian̈anao. Ke ndray misy raha mitsapa jery anao, anao mety mifidy tsy han̈ano raha ratsy foeky. Ke baka anao hahavita zen̈y, mivavaha isan’andra. Mianara Baiboly tsy tapaka, man̈aton̈a fivorian̈a, aviô koràn̈a amin’olo finoan̈anao. Izikoa anao zatra man̈ano raha aby zen̈y, anao hahazo angôvo hahavitanao miain̈y mifan̈araka amy voady nataonao tamy Jehovah, tamin’ny anao nanokan-ten̈a. Aviô, aza adin̈a foeky fa Jehovah han̈ampy anao.​—Gal. 5:16.

13. Ino ma môdely tsara nambelan’i Josefa nintsika?

¹³ Ho moramora aminao hiain̈y mifan̈araka amy fanokan̈an-ten̈anao, izikoa fa dinihinao tsialohaloha, ino raha handeha hataonao, izikoa fa tôjy fakam-pan̈ahy. Baiboly mivolan̈a fa naro olo tsy lavorary nahavita nan̈ano karaha zen̈y. Ohatra amy zen̈y Josefa. Natetiky vadin’i Potifara nitaon̈o izy hoandry aminany, fa Josefa tsy nisalasala foeky tamy raha handeha hataony. Baiboly mivolan̈a fa ‘Josefa tsy nety’ aviô ho izy: “Ataoko akôry han̈ano raha ratsy be zen̈y ke hanota amy Zan̈ahary?” (Gen. 39:8-10) Hitantsika baka amy zen̈y, efa hain’i Josefa tsialohaloha ino raha handeha hataony, talohan’ny man̈angy io nitaon̈o izy handika fitsipikin’ny Zan̈ahary. Ke nanjary noranora tamy Josefa nan̈araka fitsipikin’i Jehovah, lera izy fa tôjy fakam-pan̈ahy.

14. Akôry hahavitantsika hanohitry fakam-pan̈ahy?

¹⁴ Akôry tôkony hataonao baka anao ho tapa-kevitry tsarabe karaha nataon’i Josefa in̈y izikoa fa tôjy fakam-pan̈ahy? Mila manapa-kevitry anao rango iziôty ino raha handeha hataonao, izikoa fa misy fakam-pan̈ahy. Mianara direkty han̈ano ehe, amy raha koa fa fa halan’i Jehovah. Aza man̈eky hieritreritry izio foeky. (Sal. 97:10; 119:165) Anao koa man̈ano zen̈y, anao hahavita hanohitry fakam-pan̈ahy, fôtony fa hainao ino raha handeha hataonao.

15. Akôry han̈aboahan’olo araiky fa izy ‘mitady mare’ Jehovah? (Hebreo 11:6)

¹⁵ Anao iziôty efa mahay fa anao efa nahita ny marin̈y, aviô anao mety efa tihanompo Jehovah  amy fônao jiaby. Fa misy raha fo mety hampisalasala anao hanokan-ten̈a ndreky hatao batisa. Aleva onon̈o raha nataon’i Davida Mpanjaka. Anao koa mety miangavy Jehovah, karaha nataon’i Davida ty: “A Zan̈ahary e, diniha tsarabe zaho. Ataova hay fônaka. Diniha zaho, baka iô ataova hay raha mampiasaloha ndreky raha iritriretiko. Zahava an̈atinaka ao tsao misy lalan̈a mampanehoko zaho, ke tarita amy lalan̈an’ny mandrakizay zaho.” (Sal. 139:23, 24) Jehovah mitahy lan̈iany olo “mitady izy mare.” Ke anao koa mifen̈y manakatra tanjon̈onao hanokan-ten̈a ndreky hatao batisa, aboakanao amy zen̈y fa anao ten̈a mitady izy ankitin̈y.​—Vakia Hebreo 11:6.

AZA VÔLY MAN̈ATON̈O JEHOVAH

16-17. Akôry ataon’i Jehovah mitaon̈o olo manan̈a raimandreny Vavolombelon̈on’i Jehovah? (Jaona 6:44)

¹⁶ Jesosy nivolan̈a fa mpianatranany aby io nitahômin’i Jehovah. (Vakia Jaona 6:44.) Diniha baka fa ten̈a raha maventy raha zen̈y, aviô ino ma dikan’izen̈y aminao. Jehovah mahita raha tsara amin’olo tsiaraikiaraiky tahôminy io. Fiheverany irô io ‘fanan̈ananany manokan̈a’, na ‘raha ten̈a valera’ aminany. (Deot. 7:6; l.p.a.) Karaha zen̈y koa fahitavany anao.

¹⁷ Mety Vavolombelon̈o Jehovah raimandreninao mitarimy anao iziôty. Ke anao mety hieritreritry fa anao manompo Jehovah, fôtony raimandreninao manompo Jehovah. Fa kanefa, Baiboly mivolan̈a: “Man̈aton̈a Zan̈ahary, fa izy han̈aton̈o anao.” (Jak. 4:8; 1 Tan. 28:9) Ke izikoa anao man̈ano raha han̈aton̈ana Jehovah, izy han̈aton̈o anao koa. Tsy raha olo sendra tafiaraka amy fandaminan̈anany fo fahitan’i Jehovah anao fa izy mitaon̈o olo tsiaraikiaraiky, an̈atin’izen̈y olo jiaby nitarimin̈y tamy fahamarin̈ana. Ke izikoa misy olo manapa-kevitry han̈aton̈o izy, izy vôn̈ono koa han̈aton̈o olo io, karaha volan̈in’ny Jakoba 4:8.​—Ampiràn̈a amy 2 Tesalonianina 2:13.

18. Ino raha hidinihintsika amy lahatsoratra fan̈araka ty? (Salamo 40:8)

¹⁸ Izikoa anao manokan-ten̈a amy Jehovah ndreky atao batisa, aboakanao amy zen̈y fa anao manan̈a toe-tsain̈in’i Jesosy. Naboakany tamy babany fa izy vôn̈ono han̈ano zay raha han̈irahany izy. (Vakia Salamo 40:8; Heb. 10:7) Fa amy lahatsoratra man̈araka, atsika handiniky ino raha han̈ampy anao hanompo Jehovah fo, ke tsy hivadiky aminany, ndray anao efa vita batisa.