Nohon’ny sôron̈o nataon’i Jesosy tamin’izy nandatsaka lionany nan̈ifan̈a vidim-pan̈avotan̈a in̈y fo mahavy atsika ho voavela heloko. (Efes. 1:7) Fa kanefa, Baiboly mivolan̈a: ‘Be fandiferan̈a [Zan̈ahary] ke nan̈ambela fahotan̈a nataon’olo taloha tan̈y’, dikan’izen̈y talohan’ny nan̈amezan’i Jesosy vidim-pan̈avotan̈a. (Rom. 3:25) Karakôry nahavitan’i Jehovah nan̈ano zen̈y, sady nan̈araka fo fitsipikinany lavorary momba ny rairiny?

Efa mira navoaefa in̈y vidim-pan̈avotan̈a io tamy Jehovah, izikoa izy efa nanapa-kevitry fa han̈amia ‘taranaka’ hamonjy irô olombelon̈o manam-pinoan̈a. (Gen. 3:15; 22:18) Efa azon’ny Zan̈ahary antoko tsarabe fa Zanany lahitokan̈a han̈eky han̈amia vidim-pan̈avotan̈a amy fotoan̈a efa nisafidiny. (Gal. 4:4; Heb. 10:7-10) Jesosy solonten̈an’ny Zan̈ahary tambony tany teto, ke nanan̈a fahifan̈a han̈ambela heloko, nata mbala tsy tsendriky voaefa vidim-pan̈avotan̈a. Efa hainy fa ho afaka handrakotro fahotan̈an’olo manam-pinoan̈a sôron̈o hataony afara atỳ.​—Mat. 9:2-6.