1. Ino raha mety hanahiran̈a jerin’ny mpanompon’i Jehovah sasany tsy mivadiky?

 TEN̈A mankahery mahay fa Jehovah mankasitraka vahoakanany amy fitambarany! Sady Baiboly lastiô mivolan̈a fa ‘mamparavoravo Jehovah vahoakanany.’ (Sal. 149:4) Fa ndray zen̈y, ndraikindraiky sasany amintsika mety ho kivy, ke mety ho lôso diniky karaha ty: ‘Mba mankasitraka zaho edy ma Jehovah?’ Maro tamy mpanompon’i Jehovah tsy nivadiky taloha tan̈y ndraikindraiky mba kivy, fôtony nieritreritry karaha zen̈y koa.​—1 Sam. 1:6-10; Joba 29:2, 4; Sal. 51:11.

2. Olo karakôry mahazo sitraka amy Jehovah?

² Koran̈in’ny Baiboly mazava tsara fa olombelon̈o tsy lavorary afaka mahazo sitraka baka amy Jehovah. Amy fomba akôry? Tsy maintsy haboakantsika fa atsika mino Jesosy Kristy, aviô man̈ano batisa. (Jaona 3:16) Aboakantsika amin’olo jiaby amy zen̈y fa atsika efa nibebaka tamy fahotan̈antsika, aviô efa nampan̈anten̈a Zan̈ahary fa han̈ano sitrapônany. (Asa. 2:38; 3:19) Ravoravo Jehovah izikoa atsika man̈ano irô dingana aby io baka hifandraisan̈a aminany. Izikoa atsika mbala man̈ano erakan’ny vitantsika han̈ajan̈a voady nataontsika tamin’ny atsika nanokan-ten̈a, Jehovah mankasitraka atsika, ke atsika ikeny ho lôso kamaradinany marikitry.​—Sal. 25:14.

3. Ino raha hidinihintsika iziôty?

³ Fa nan̈ino ma ndraikindraiky misy olo mieritreritry fa irô tsy ankasitrahan’ny Zan̈ahary? Akôry an̈aboahan’i Jehovah fa izy mankasitraka atsika? Ino raha mety hataon’ny Kristianin̈y araiky, baka izy hatoky tsarabe fa Zan̈ahary ten̈a mankasitraka izy?

NAN̈INO OLO SASANY METY HIERITRERITRY FA IRÔ TSY ANKASITRAHAN’I JEHOVAH?

4-5. Ndray atsika mahatsiaro ten̈a tsisy dikany, ino raha azontsika antoko?

⁴ Maro amintsika rango mbala hely efa nahatsiaro ten̈a tsisy dikany. (Sal. 88:15) Karaha ty iziô nivolan̈in’ny rahalahy araiky,  Adrián an̈arany: “Zaho tsy vôly nahatsapa ten̈a tsisy dikany. Tsaroako tamy zaho mbala hely, zaho nivavaka baka fianakavian̈anaka ho avy amy Paradisa. Fa ndray zen̈y, zaho tsy ten̈a natoky fa zaho mendriky hiain̈y amy Paradisa.” Fa Tony ndraiky tsy nitarimin̈a tan̈atin’ny fahamarin̈ana. Karaha ty nivolan̈iny: “Papako ndreky mamako tsiary nivolan̈a taminaka fa irô tia zaho na mirehareha manan̈a zaho. Karaha tsisy nahafa-pô irô foeky raha nataoko.”

⁵ Izikoa atsika ndraikindraiky mahatsiaro ten̈a tsisy dikany, aleva onon̈o fa Jehovah nitaon̈o atsika han̈aton̈o izy. (Jaona 6:44) Hitany raha tsara an̈atintsika ao, nata tsy hitantsika raha zen̈y. Izy mahay raha an̈aty fôntsika. (1 Sam. 16:7; 2 Tan. 6:30) Ke izikoa izy mivolan̈a fa atsika misy valera, atsika ndraiky hisalasala?​—1 Jaona 3:19, 20.

6. Ino raha tsapan’i Paoly nohon’ny fahotan̈a vitany taloha?

⁶ Mety mbala han̈amelo-ten̈a fo sasany amintsika nohon’ny raha nataony talohan’izy nianatra fahamarin̈ana. (1 Pet. 4:3) Nata Kristianin̈y araiky tsy mivadiky mbala mila mifen̈y mare miady amy fahalimian̈anany. Anao ke, ndraikindraiky ma anao mahatsiaro fa Jehovah tsy afaka man̈ambela hadisovan̈anao? Izikoa zen̈y raha mahazo anao, hankahery anao mahay fa nata mpanompon’i Jehovah tsy nivadiky mba tatran’ny raha karaha zen̈y koa. Karaha zen̈y iziô apostoly Paoly. Nalahelo mare izy, izikoa fa nandiniky fahalimian̈anany. (Rom. 7:24) Izy efa nibebaka tamy fahotan̈anany, aviô efa nan̈ano bastisa. Fa ndray zen̈y, izy mbala nahatsapa karaha ty fo: “Amin’ny apostoly jiaby zaho olo ten̈a tsisy kontiny” aviô ‘lohany’ amy mpanota.​—1 Kor. 15:9; 1 Tim. 1:15.

7. Ino raha mila alaintsika onon̈o momba fahotan̈a nataontsika taloha tan̈y?

⁷ Babantsika an-dan̈itry an̈y mampan̈anten̈a fa, izy hamela helokontsika izikoa atsika mibebaka. (Sal. 86:5) Ke izikoa atsika ten̈a manen̈iny amy fahotan̈a vitantsika, mety matoky atsika fa ten̈a mitana raha nivolan̈iny i Jehovah. Izy efa nan̈ambela helokontsika.​—Kol. 2:13.

8-9. Ino raha mety hataontsika, baka atsika tsy hieritreritry foeky fa raha ataontsika tsy mahampy hamparavoravo Jehovah?

⁸ Atsika jiaby mety samy tihahavita be amy fanompoan̈a Jehovah. Kanefa olo sasany mety hieritreritry fa karaha tsy ten̈a mahampy azahoan̈a fankasitrahan̈a baka amy Jehovah foeky raha ataondrô. Karaha ty nivolan̈in’ny ranabavy araiky, Amanda an̈arany: “Zaho tsy vôly nieritreritry fa mila man̈ano raha maro, izikoa tihan̈amia Jehovah ny farany tsara. Ke matetiky zaho nan̈ano raha mandilatran’ny vitako. Izikoa zaho fa tsy nahavita nan̈ano zen̈y zaho kivy mare, aviô nieritreritry fa Jehovah koa mba diso fan̈antinan̈a aminaka nohon’izio tsy vitako.”

⁹ Ino han̈ampy atsika tsy hieritreritry foeky fa tsy mahampy hamparavoravo Jehovah raha ataontsika? Aleva onon̈o fa Jehovah tsy mentitry loatra na tsy milefitry zen̈y foeky. Izy tsy man̈iraka atsika han̈ano raha mandilatran’ny vitantsika. Ankasitrahany zay raha ataontsika ninany erakan’izay faran’ny tsara vitantsika. Miniminia koa irô olo koran̈in’ny Baiboly fa nanompo Jehovah tamy fôndrô jiaby. An̈isan’izen̈y i Paoly. Izy nifen̈y nan̈ano fanompoan̈a tan̈atin’ny taon̈o maro. Izy nan̈ano dia andrivony kilômetara aviô nan̈orin̈y fiangonan̈a maro, kanefa nisy fotoan̈a koa izy tsy ten̈a nahavita nitory. Ke Zan̈ahary ma efa tsy nankasitraka izy eky? Tsy zen̈y foeky. Izy baka mbala nan̈ano erakan’izay vitany fo, ke Jehovah tsy vôly nitahy izy. (Asa. 28:30, 31) Ndraikindraiky, mety hiovaova koa raha afaka hamianao Jehovah. Fa ndray zen̈y, aleva onon̈o fa antony an̈anaovanao izio ny raha ten̈a maventy amy Jehovah. Alô atsika iziô handiniky fomba  sasany han̈aboahan’i Jehovah fa izy mankasitraka atsika.

KARAKÔRY AN̈ABOAHAN’I JEHOVAH FA IZY MANKASITRAKA ATSIKA?

10. Akôry hahavy atsika ‘haharen̈y’ Jehovah mivolan̈a fa izy mankasitraka atsika? (Jaona 16:27)

¹⁰ Baka amy Baiboly. Jehovah tia man̈aboaka amindrô olo marikitry fônany fa izy mankasitraka irô. Koran̈in’ny Soratra Masin̈y fa indroe aby Izy nivolan̈a tamy Jesosy fa izy Zanany ten̈a tiany sady ankasitrahiny. (Mat. 3:17; 17:5) Mba tianao ma haharen̈y Jehovah man̈amia toky anao fa anao ankasitrahiny? Jehovah efa tsy mikoran̈a amintsika mivantan̈a eky, fa izy mikoran̈a amintsika baka amy Volan̈anany. Ke izikoa atsika mamaky volan̈an’i Jesosy amy Filazantsara ao, mira “maharen̈y” Jehovah fo atsika mivolan̈a amintsika karaha ty: ‘Anao ankasitrahiko.’ (Vakia Jaona 16:27.) Jesosy ten̈a nangala tahaka toetrin’ny Babany. Nisy fotoan̈a, ohatra, Jesosy nikoran̈a tamy mpan̈ara-dia izy tsy nivadiky ndreky tsy lavorary aby io, fa izy mankasitraka irô. Ke izikoa atsika mamaky volan̈an’i Jesosy aby zen̈y, atsika afaka mangala sary an-tsain̈y Jehovah mivolan̈a amintsika irô volan̈a aby zen̈y koa.​—Jaona 15:9, 15.

11. Nata mandalo raha sarotro atsika, nan̈ino zen̈y tsy mivolan̈a fa Jehovah efa tsy mankasitraka atsika eky? (Jakoba 1:12)

¹¹ Baka amy raha ataony. Jehovah vôn̈ono han̈ampy atsika. Izy ohatra man̈amia raha ilaintsika. Fa ndraikindraiky, atsika ambelany hiatriky raha sarotro, karaha nataony tamy Joba olo marin̈y in̈y. (Joba 1:8-11) Fa nata atsika mandalo raha sarotro, zen̈y tsy mivolan̈a fa Zan̈ahary efa tsy mankasitraka atsika eky. Fa raha zen̈y hahafahantsika man̈aboaka fa atsika ten̈a tia Zan̈ahary sady ten̈a matoky izy. (Vakia Jakoba 1:12.) Lera izy man̈ampy atsika hiaritry, ho tsapantsika fa izy ten̈a tia ndreky mikarakara aviô manohan̈a atsika.

12. Ino raha ianarantsika baka amy tantaran’i Dmitrii?

¹² Diniha baka raha nahazo Rahalahy Dmitrii, mipetraka an Asie an̈y. Nafak’asa izy, aviô tan̈atin’ny fanjava maromaro tsy nety nahita asa. Nanapa-kevitry izy fa hampitombo fanompoan̈anany, baka han̈aboahan̈a fa izy matoky Jehovah. Niteky andra niteky fanjava, fa izy mbala tsy nahita asa fo. Izy baka tiô koa narary sady tsy afaka nihetsiky tan̈abon’ny fandrian̈a. Izy nanomboko nieritreritry fa izy efa tsy ten̈a mahavita mamelon̈o vady aman-janaka eky, ke niasaloha tsao Jehovah efa tsy mankasitraka  izy eky koa. Kanefa tamin’ny alin̈y araiky zay, zanany man̈angy nan̈ano pirinty andinin-teny amin’ny Isaia 30:15 ty: “Anarô matokisa aviô aza taitaitry, fa baka amy zen̈y hazahoanarô angôvo.” Nindesiny tamy fandrian̈an’ny papany tiô izio, ke izy nivolan̈a karaha ty: “Papa, lera anao kivy in̈y, aleva onon̈o fo andinin-teny ty.” Tontohitry Dmitrii fa Jehovah mbala manohan̈a irô fo. Fianakavian̈anany tsiary ndraiky tsisy hanin̈y, lamba, aviô tany nipitrahan̈a. Ho Dmitrii: “Ke raha nila nataoko, nifen̈y fo tsy ho taitaitry baka iô natoky Zan̈ahary.” Izikoa anao tôjy prôblemo karaha zen̈y, matokisa fa Jehovah mikarakara anao fo, aviô izy han̈ampy anao hiaritry.

13. Azôvy aby mety hampiasain’i Jehovah baka han̈aboahany amintsika fa izy mankasitraka atsika, aviô akôry han̈anaovandrô zen̈y?

¹³ Baka amy mpiara-manompo. Jehovah mampiasa irô rahalahy ndreky ranabavintsika aby io, baka han̈aboahan̈a amintsika fa izy mankasitraka atsika. Izy, ohatra, mety handrisiky irô hikoran̈a raha mankahery atsika, amy fotoan̈a ilavantsika zen̈y. Karaha zen̈y iziô raha niain̈an’ny ranabavy araiky tan Asie, tamin’izy niasaloha mare. Nafak’asa baka izy, baka tiô amy zay narary fatatra koa. Vadiny koa tafara tatỳ, nan̈ano fahotan̈a maventy ke nafaka anti-pan̈ahy. Karaha ty nivolan̈in’ny ranabavy io: “Tsy azoko foeky nan̈ino zaho tatran’izen̈y. Zaho nieritreritry nisy raha tsy nety donko nataoko, ke Jehovah tsy nankasitraka zaho eky.” Ranabavintsika io niangavy Jehovah baka han̈aboaka aminany fa Izy ten̈a mbala mankasitraka izy. Ke karakôry nataon’i Jehovah? Karaha ty nivolan̈in’ny ranabavy io: “Nikoran̈a taminaka anti-pan̈ahy tamy fiangonan̈anay ke nan̈amia toky zaho fa Jehovah tia zaho.” Nangataka fan̈ampian̈a tamy Jehovah ndraiky ranabavy io tafara tatỳ. Karaha ty ho izy: “Andran’izin̈y fo zaho efa nahazo taratasy baka tamy ranadahy ndreky  rahavavy maromaro tamy fiangonan̈anay edy. Tsapako fa naharen̈y vavaka nataoko Jehovah, izikoa zaho fa namaky volan̈a mankahery nisoratindrô tao.” Matetiky baka amy volan̈a feno hatsaram-pan̈ahy ataon’olo hafa amintsika, han̈aboahan’i Jehovah fa izy mankasitraka atsika.​—Sal. 10:17.

14. Ino koa fomba hafa an̈aboahan’i Jehovah fa izy mankasitraka atsika?

¹⁴ Jehovah koa mampiasa mpiara-manompo han̈amezan̈a torohevitry atsika, lera atsika mila zen̈y. Raha zen̈y an̈isan’ny fomba an̈aboahan’i Jehovah fa izy mankasitraka atsika. Nampiasa apostoly Paoly, ohatra, izy tamy taonjato voanalohany hanoratra taratasy 14, handeha tamy mpiara-manompo. Nisy torohevitry mentitry kanefa feno fitiavan̈a tamindrô taratasy aby io. Nan̈ino ma Jehovah nan̈iraka Paoly nanoratra torohevitry aby io tamy taratasinany? Jehovah mira baba be fitiavan̈a, ke man̈anatra zanany “tiany.” (Ohab. 3:11, 12) Ke izikoa misy olo man̈amia torohevitry atsika baka amy Baiboly, zen̈y tsy mivolan̈a fa Jehovah meloko amintsika, fa raha zen̈y man̈aboaka fa Jehovah mbala mankasitraka atsika. (Heb. 12:6) Ino koa raha hafa hahaizan̈a fa Jehovah mankasitraka atsika?

POROFO HAFA FA JEHOVAH MANKASITRAKA ATSIKA

15. Azôvy ma amian’i Jehovah fan̈ahy masin̈y, aviô nan̈ino zen̈y man̈amia toky atsika?

¹⁵ Jehovah man̈amia fan̈ahy masin̈y lan̈iany olo ankasitrahiny. (Mat. 12:18) Diniha baka fan̈ontanian̈a aby ty: ‘Hita amy fiain̈ananaka ma fa zaho manan̈a toetry vokatran’ny fan̈ahin’ny Zan̈ahary? Hitanao lôso nahainanan̈a faharetan̈a fo ma anao iziô, izikoa ampiran̈iny tamin’ny anao mbala tsy nahay Jehovah?’ Aza adin̈a fa arakaraka ifen̈anao man̈aboaka toetry vokatran’ny fan̈ahin’ny Zan̈ahary, ahitanao fa mankasitraka anao Jehovah!​—Zahava efajoro “ Vokatran’ny Fan̈ahy.”

16. Azôvy ampiasain’i Jehovah hitory vaovao tsara, aviô ino raha tsapanao baka amy zen̈y? (1 Tesalonianina 2:4)

¹⁶ Faran-draha mamparavoravo Jehovah eky man̈ankiny fitorian̈a vaovao tsara amin’olo ankasitrahiny. (Vakia 1 Tesalonianina 2:4.) Ranabavy Jocelyne iziô nahazo hatsaran̈a izikoa fa nitory vaovao tsara tamin’olo. Tandraraiky izikoa izy efa nifoha maraindrain̈y in̈y, kivy mare. Karaha ty nivolan̈iny: “Zaho tsisy angôvo nan̈anaovan̈a raha foeky. Kanefa zaho mpisava lalan̈a, andra fandihanako manompo tamin’io. Ke zaho nivavaka, aviô zaho nandeha  nanompo fo.” Jocelyne tamy maraindrain̈y io fanôjy man̈angy araiky tsara fan̈ahy mare, Mary an̈arany. Nan̈eky hianatra Baiboly izy. Nitantara Mary fanjava vitsivitsy tafara tatỳ fa, vo baka nivavaka nangataka fan̈ampian̈a tamy Zan̈ahary izy, tamy Jocelyne nikonkon̈o varavaran̈anany. Jocelyne koa fa nieritreritry raha nandalo in̈y, karaha ty ho izy: “Jehovah mira nivolan̈a taminaka karaha ty: ‘Zaho mankasitraka anao.’” Marin̈y ndraiky fa, tsy olo jiaby handray atsika izikoa atsika efa mitory. Ndray zen̈y, mety matoky atsika fa izikoa atsika man̈ano erakan’ny vitantsika hitorian̈a vaovao tsara amin’olo, Jehovah ravoravo amintsika.

17. Ino raha ianaranao baka amy raha nikoran̈in’i Vicky momba vidim-pan̈avotan̈a? (Salamo 5:12)

¹⁷ Amezan’i Jehovah hatsaran̈a baka amy vidim-pan̈avotan̈a lan̈iany olo ankasitrahiny. (1 Tim. 2:5, 6) Karakôry izikoa atsika efa mino vidim-pan̈avotan̈a sady efa natao batisa, kanefa mbala tsy man̈eky fo fôntsika fa Jehovah mankasitraka atsika? Aleva onon̈o fa ndraikindraiky fihetseham-pônao mety hamitaka anao, fa Jehovah ndraiky ten̈a azo atokisan̈a fo. Izikoa olo araiky mino vidim-pan̈avotan̈a, iken’ny Zan̈ahary ho olo marin̈y. Baka iô, izy mampan̈anten̈a fa hitahy irô. (Vakia Salamo 5:12; Rom. 3:26) Karaha zen̈y iziô Vicky. Nahazo hatsaran̈a izy koa fa nisaintsain̈y vidim-pan̈avotan̈a. Tandraraiky, izikoa izy efa baka nandiniky mare momba vidim-pan̈avotan̈a io, karaha ty raha nivolan̈iny: “Jehovah ten̈a nahari-draha mare taminaka. Fa zaho ndraiky nira nivolan̈a taminany karaha ty: ‘Anao tsy mety ho tia olo karaha zaho ty. Baka iô tsy mahavita mandrakotro fahotan̈anaka foeky sôron̈o nataon’ny Zanakanao.’” Kanefa izikoa izy efa baka nisaintsain̈y momba kadô baka tamy Jehovah io, nanomboko tontohitry izy fa ten̈a tia izy mare Jehovah. Ke izikoa atsika misaintsain̈y momba vidim-pan̈avotan̈a io, ho tsapantsika koa fa Jehovah ten̈a tia atsika ndreky mankasitraka atsika.

18. Ino raha azontsika antoko izikoa atsika tsy vôly tia Babantsika an-dan̈itry an̈y?

¹⁸ Nata atsika efa mifen̈y man̈araka irô sôso-kevitry aby tiô in̈y, ndraikindraiky atsika mety mbala ho kivy fo, aviô mety mbala hisalasala tsao mbala tsy mahazo sitraka amy Jehovah fo atsika. Izikoa karaha zen̈y raha tsapanao, aleva onon̈o fa izy mankasitraka “lan̈iany olo tia izy fo.” (Jak. 1:12) Ke mifen̈a fo hifandray marikitry amy Jehovah, aviô zahava ino aby irô fomba an̈aboahany fa izy mankasitraka anao. Aza adin̈a foeky fa Jehovah “tsy lavitry atsika tsiaraikiaraiky.”​—Asa. 17:27.