1. Ino aby hatsaran̈a azontsika, nohon’ny atsika an̈isan’ny fandaminan̈an’i Jehovah?

 ATSIKA io an̈isan’ny fandaminan̈an’i Jehovah, ke ten̈a fitahian̈a maventy raha zen̈y, amin’ny andra farany, sarotro be misy atsika iziôty. Nata mahairatsy fiain̈ana amy donia ty, Jehovah mahavita mampiray sain̈y atsika, ke man̈amia atsika fianakavian̈a ara-pan̈ahy. (Sal. 133:1) Izy man̈ampy atsika hifankatia tsarabe. (Efes. 5:33–6:1) Izy koa man̈amia atsika fahendrena, hahavitantsika miaritry raha sarotro mandalo amy fiain̈anantsika, aviô hahavy atsika ho ravoravo fo.

2. Ino raha mila ataontsika, aviô nan̈ino?

² Ndray izy man̈ano zen̈y, mila mifen̈y mare atsika baka hahavita hanompo Jehovah ndreky tsy hivadiky aminany. Fôtony nan̈ino? Matetiky baka atsika meloko baka amy tsy fahalavorarian̈an’ny namantsika. Mety ho sarotro amintsika koa, izikoa atsika tômpiny man̈ano hadisovan̈a, intsaka eky izio hadisovan̈a mimpodimpody. Ke mila miaritry fo atsika amy fanompoantsika Jehovah, 1) izikoa misy rahalahy na ranabavy man̈ano raha mampameloko atsika, 2) izikoa vadintsika nandiso fan̈antinan̈a atsika, aviô 3) izikoa atsika kivy baka amy raha ataontsika tômpiny. Amy lahatsoratra ty, hidinihintsika tsiaraikiaraiky irô io. Aviô koa atsika hangala fianaran̈a baka amin’olo tsy nivadiky koran̈in’ny Baiboly.

MIARETA FO NDRAY MISY MPIARA-MANOMPO MAMPAMELOKO ANAO

3. Ino raha sarotro mety tôjy mpanompon’i Jehovah?

³ Raha sarotro. Sasany amy mpiara-manompo amintsika mety tsy hitovy toetry amintsika ke mety hampameloko atsika. Sasany mety han̈ambany atsika, na mety han̈ano raha hampakivy atsika, na mety ho ratsy fan̈ahy amintsika foeky. Irô mpiandraikitry an̈atin’ny fiangonan̈a koa mety han̈ano hadisovan̈a. Raha  jiaby zen̈y mety hampisalasala olo sasany tsao tsy fandaminan̈an’i Jehovah misy irô. Ke irô tôkony hiray sain̈y miaraka vahoakan’i Jehovah, manjary tsy tihivory miaraka amin’olo nampameloko irô io, na koa mety ho vôly hivory foeky. (Zef. 3:9) Fahendrena ma raha karaha zen̈y? Diniha ino raha mety hianarantsika baka amin’olo tantarain’ny Baiboly fa tôjy raha karaha zen̈y, kanefa tsy nivadiky tamy Jehovah.

4. Ino aby raha sarotro tôjy apostoly Paoly?

⁴ Ohatran’olo amy Baiboly. Hain’ny apostoly Paoly fa irô mpiara-manompo taminany aby io tsy lavorary. Ohatra, tamy somilan’izy nanjary Kristianin̈y, sasany mbala tsy nino fo fa izy efa nanjary mpianatra. (Asa. 9:26) Tafaran’izen̈y koa, nisy olo sasany nankaratsy izy ke nahavy olo tsy nahatoky izy. (2 Kor. 10:10) Paoly koa nahita anti-pan̈ahy araiky tamy fiangonan̈a nan̈ano fanapahan-kevitry tsy nety, ke nety nampameloko olo hafa. (Gal. 2:11, 12) Aviô nisy naman’i Paoly marikitry koa, Marka an̈arany, nandiso fan̈antinan̈a izy mare. (Asa. 15:37, 38) Mety ho nataon’i Paoly tamban̈a tsy hiarasan̈a amindrô mpiara-manompo aby io raha zen̈y. Fa kanefa, izy nizaha toetry tsarandrô rahalahy ndreky ranabavy aby io fo, ke mbala tsy vôly nanompo Jehovah. Ino raha nan̈ampy Paoly hiaritry?

5. Ino raha nan̈ampy Paoly hihavan̈a tsarabe tamindrô rahalahy ndreky ranabavy aby io? (Kolosianina 3:13, 14) (Zahava koa sary.)

⁵ Paoly tia irô rahalahiny ndreky anabaviny aby io. Fitiavany irô io nahavy izy nizaha toetry tsarandrô fo fa tsy nijery toetry ratsindrô. Fitiavan̈a io koa nandrisiky Paoly han̈araka raha nisoratiny amy Kolosianina 3:13, 14. (Vakia.) Diniha baka akôry nataon’i Paoly nan̈ambela hadisovan̈an’i Marka. Nata Marka niala i Paoly tamy dia misionera voanalohany nataony, Paoly tsy nitana heloko am-pô taminany. Tafaran’izen̈y koa, Paoly koa fa nanoratra taratasy feno fitiavan̈a nandeha tamy fiangonan̈a ta Kolosia, izy nidera Marka, fôtony izy mpiara-miasa aminany ten̈a valera taminany, sady ‘ten̈a nan̈ampy ndreky nankahery’ izy. (Kol. 4:10, 11) Ke Paoly koa fa nigadra ta Roma, izy nan̈afatra Marka halefa taminany tan̈y, handeha han̈ampy izy. (2 Tim. 4:11) Hita baka amy zen̈y fa Paoly namela heloko rahalahiny io, sady mbala nihavan̈a taminany tsarabe fo. Ino raha ianarantsika baka amy Paoly?

6-7. Akôry hataontsika hifen̈y ho tia irô rahalahintsika ndreky ranabavintsika aby io fo, nata irô mbala tsy lavorary? (1 Jaona 4:7)

⁶ Leson. Tian’i Jehovah atsika hifen̈y fo baka ho tia irô rahalahy ndreky ranabavintsika aby io. (Vakia 1 Jaona 4:7.) Izikoa misy  rahalahy ndreky ranabavintsika hitantsika karaha tsy manan̈a toetry kristianin̈y, atsika mety matoky fo fa tsy kiniandrô ho ratsy fan̈ahy amintsika, aviô irô tihan̈ano raha volan̈in’i Jehovah fa tsara fo. (Ohab. 12:18) Tian’i Jehovah fo olonany tsy mivadiky aminany, nata irô tafan̈ano raha tsy mety. Atsika mbala kamaradiny fo, aviô izy tsy mitana heloko am-pô amintsika. (Sal. 103:9) Ten̈a raha maventy izikoa atsika mangala tahaka toetrin’i Jehovah, tia mamela heloko!​—Efes. 4:32–5:1.

⁷ Aza adin̈a koa fa farany io efa ten̈a mahaimarikitry, ke ten̈a mila mihavan̈a mare amindrô rahalahy ndreky ranabavintsika aby io atsika. Ampoizin̈y hahaimare fo baka fan̈injehan̈a. Nata atsika io mbala mety higadrain̈y aby nohon’ny finoan̈antsika. Ke izikoa miboaka raha zen̈y, ten̈a mila irô rahalahy rahalahintsika ndreky ranabavintsika aby io atsika, mandilatran’ny taloha. (Ohab. 17:17) Diniha baka raha nandalo tamy Josep, a anti-pan̈ahy an Espagne an̈y. Nigadrain̈a izy ndreky rahalahy sasany, fôtony irô tsy nan̈ano maramila. Ho izy: “Zahay jiaby niaraka nifan̈osihosy tamy prizon tao, ke nanjary tafan̈ano raha nampahinihiny naman̈a. Ten̈a nila nifandefitry zahay, ndreky namela heloko tamy fô jiaby. Raha zen̈y nan̈ampy zahay niray sain̈y fo, ndreky nahavita niaro namanay. Naro baka olo tsy Vavolombelon̈on’i Jehovah nigadrain̈y niaraka taminay tao. Tandraraiky zay tan̈anaka nibandin̈a, fôtony naratra, ke naro raha tsy vitako. Nila namako zaho nitahitahy zaho tamy zen̈y. Fa araiky tamindrô rahalahiko aby io nanasa lambanaka ndreky nikarakara zaho mare. Hitako tamy raha niain̈ako in̈y fa ten̈a tia zaho irô rahalahiko aby io, intsaka eky tamy fotoan̈a sarotro be nandalovako in̈y.” Ke atsika ten̈a mila mihavan̈a tsarabe amindrô rahalahy aby io, rango iziôty.

MIARETA FO NDRAY VADINAO NANDISO FAN̈ANTINAN̈A ANAO

8. Ino raha sarotro misy an̈atin’ny vadian̈a ao?

⁸ Raha sarotro. Tsisy vadian̈a tsisy olan̈a. Baiboly man̈ambara mazava fa lan̈iany olo manambady, “hanan̈a fahorian̈a amy nôfotro.” (1 Kor. 7:28) Fôtony nan̈ino? Fôtony olo aroe tsy lavorary nan̈ano tran̈o araiky. Irô tsy mira toetry, aviô samy amy raha tiandrô ndreky samy amy raha halandrô. Mety tsy mira tany favian̈a koa irô, baka iô tsy mira fomba. Ke izikoa fa ela ny ela, mety misy toetry tsy hitandrô talohan’irô nan̈ano mariazy foeky, ho hitandrô miboaka ao. Safe mety hahavy olan̈a an̈atin’ny tokantran̈o raha jiaby zen̈y. Ke irô tôkony han̈ano raha handaminan̈a olan̈a io, irô ndraiky manjary miady. Ke amy farany irô mety tsy hahita hevitry izikoa tsy hifampisintaka na hisaraka foeky. Fa zen̈y ma vahaolan̈a ten̈a tsara? b Alô atsika handiniky tantaran’olo araiky amy Baiboly, nahavita niaritry tan̈atin’ny vadian̈a ndray izy niatriky raha sarotro, ke hangalantsika fianaran̈a.

9. Ino raha sarotro tôjy Abigaila?

⁹ Ohatran’olo amy Baiboly. Abigaila nanambady i Nabala. Koran̈in’ny Baiboly fa Nabala io lelahy masiaka ndreky ratsy toetry mare. (1 Sam. 25:3) Tsy maintsy sarotro tamin’i Abigaila niain̈y niaraka tamy lelahy zen̈y tan̈y! Ke nisy hiriky ma nahavitan’i Abigaila niala tamy vadiny io? Tamin’i Davida olo ho mpanjakan’Israely, navy handeha hamono vadiny, fôtony Nabala tamin’io nankaratsy Davida ndreky maramilan’i Davida. (1 Sam. 25:9-13) Abigaila tamy zen̈y nety ho  nilefa izikoa tiany, amy zen̈y matin’i Davida i Nabala. Fa izy tsy nan̈ano zen̈y. Izy nandeha nan̈aton̈o Davida, ke namango nisakana i Davida tsy hamono Nabala. (1 Sam. 25:23-27) Nety ho ino nandrisiky Abigaila nan̈ano zen̈y?

10. Ino raha mety nandrisiky Abigaila niaritry fo tamy vadian̈anany?

¹⁰ Abigaila tia Jehovah, aviô izy nan̈aja fitsipikin’i Jehovah momba vadian̈a. Mety nieritreritry raha nivolan̈in’i Jehovah tamin’i Adama ndreky Eva, tamin’i Jehovah namôron̈o vadian̈a voanalohany io izy. (Gen. 2:24) Hain’i Abigaila fa masin̈y amy Jehovah vadian̈a io. Izy tihamparavoravo Jehovah, ke zen̈y nahavy izy nan̈ano zay raha azony natao, baka irô jiaby tran̈o araiky tsy maty, an̈atin’izen̈y vadiny. Nan̈ano raha nalaky izy, nisakanan̈a Davida tsy hamono Nabala. Baka iô koa izy vôn̈ono hiala tsin̈y tamy Davida, nata tsy izy ny diso. Mazava tsarabe fa ten̈a tian’i Jehovah man̈angy araiky nisy korazy ndreky tsy tia ten̈a io. Ino raha ianaran’olo fivadiany baka amin’i Abigaila?

11. a) Tian’i Jehovah han̈ano karakôry ma olo fivadiany? (Efesianina 5:33) b) Ino ma raha ianaranao baka amy fomba niarovan’i Carmen vadian̈anany? (Zahava koa sary.)

¹¹ Leson. Tian’i Jehovah olo fivadiany han̈aja vadian̈andrô, nata araiky amindrô mety sarotro iarahan̈a mipetraka. Ten̈a ravoravo Jehovah, izikoa mahita olo fivadiany, mifen̈y miaraka mandamin̈y olan̈a misy amy tokantran̈ondrô ndreky man̈aboaka fitiavan̈a tsy mitady valiny, aviô mifan̈aja. (Vakia Efesianina 5:33.) Diniha baka raha nataon’i Carmen. Tsiota taon̈o tafaran’ny mariazindrô, izy nianatra Baiboly tamy Vavolombelon̈on’i Jehovah, aviô natao batisa. Karaha ty ho Carmen: “Neloko mare vadiko. Halany baka zaho nanjary tia Jehovah, ke izy nan̈adary mare taminaka, aviô izy nivolan̈a fa hialany zen̈y zaho.” Ndray tiô raha zen̈y, Carmen niaritry fo tamy vadian̈anany. Tan̈atin’ny 50 taon̈o izy nifen̈y ho tia ndreky han̈aja vadiny io fo. Karaha ty koa nivolan̈iny: “Izikoa fa nandeha taon̈o, nanjary haiko karakôry raha tsapan’ny vadiko, aviô nanjary tsara fan̈ahy zaho nikoran̈a taminany. Haiko baka fa vadian̈a io masin̈y amy Jehovah, ke zaho nan̈ano erakany vitako, niarovan̈a izio. Zaho tsiary ndraiky niala izy, fôtony tiako Jehovah.” c Ke izikoa anarô iziôty misy olan̈a an̈atin’ny tokantran̈o, matokisa fa Jehovah hanohan̈a anarô ndreky han̈ampy anarô hiaritry fo.

MIARETA FO NDRAY ANAO KIVY AMIN’NY AIN̈INAO TÔMPINY

12. Ino raha sarotro mety ho tôjy atsika izikoa atsika nan̈ano fahotan̈a maventy?

¹² Raha sarotro. Baiboly mivolan̈a fa fahotan̈antsika io mety hahavy atsika ho “tôrotôro  fô ndreky ho kivy.” (Sal. 51:17) Misy rahalahy araiky, Robert an̈arany, nifen̈y mare tan̈atin’ny taon̈o maro baka hanjary mpikarakara fiangonan̈a. Fa izy baka tiô nan̈ano fahotan̈a maventy, ke izy nahatsapa fa karaha namitaka Jehovah zen̈y izy. Ho izy: “Nan̈enjiky zaho eritreritrinaka ke nira nisy briky tonne araiky in̈y nilanjaiko. Tafaran’izen̈y, narary zaho, aviô kivy mare. Nivavaka tamy Jehovah zaho baka tiô. Tan̈atin’ny jerinaka tan̈y, Jehovah fa tsy hitandren̈y zaho foeky. Fôtony nan̈ino? Fôtony zaho namitaka izy.” Izikoa atsika nan̈ano fahotan̈a maventy, atsika mety ho kivy amin’ny ain̈intsika tômpiny, ke atsika hieritreritry fa Jehovah efa tsy tia atsika eky. (Sal. 38:4) Ke izikoa zen̈y raha tsapanao iziôty, diniha olo araiky koran̈in’ny Baiboly fa nan̈ano fahotan̈a maventy, kanefa tsy kivy fa mbala nanompo Jehovah fo.

13. Ino fahotan̈a ten̈a ratsy nataon’ny apostoly Petera, aviô ino aby raha tsy mety nataony talohan’izen̈y?

¹³ Ohatran’olo amy Baiboly. Tamin’ny alin̈y talohan’ny namonoan̈a Jesosy, apostoly Petera nan̈ano hadisovan̈a maromaro nifanohitohy. Ke raha jiaby zen̈y nanjary nahavy izy nan̈ano raha farany ratsy tamy fiain̈ananany. Voanalohany, izy natoky ten̈a loatra, ke nivolan̈a fa ndray hiala Jesosy irô apostoly sasany aby io, izy tsy hiala Jesosy foeky. (Mar. 14:27-29) Faharoe, tamin’ny zaridain̈in’i Getsemane, Petera natetiky tsy nahavita niambin̈y. (Mar. 14:32, 37-41) Fan̈araka zen̈y koa, izikoa fa navy baka tan̈y irô vahoaka aby io nitondra sabatra, Petera niala i Jesosy. (Mar. 14:50) Farany, Petera nivolan̈a fa tsy nahay Jesosy intelo aby. (Mar. 14:66-71) Karakôry nataon’i Petera izikoa fa hainy fa ten̈a ratsy fahotan̈a nataony? Kivy izy, nitomoan̈y, aviô nahatsapa ten̈a diso mare tamy raha nataony. (Mar. 14:72) Miniminia baka Petera tan̈atin’ny lera maro nijaly jery, izikoa fa nivonen̈a Jesosy kamaradinany io. Ten̈a nahatsapa ten̈a tsisy dikany foeky Petera tamy zen̈y.

14. Ino raha nan̈ampy Petera ke nahavitany nanohy nanompo Jehovah fo? (Zahava sary amy )

¹⁴ Maro antony nahavy Petera mbala nahavita nanohy nanompo Jehovah fo. Izy tsy nitokatokan̈a fa nandeha nan̈aton̈o irô rahalahiny aby io. (Lioka 24:33) Aviô koa, niboaka tamy Petera i Jesosy izikoa fa nivilômin̈y, ke Jesosy nety tihankahery izy koa. (Lioka 24:34; 1 Kor. 15:5) Tafaran’izen̈y koa Jesosy tsy nasiaka tamy Petera tamin’ny hadisovan̈a nataony in̈y, fa izy nivolan̈a tamy Petera han̈amia andraikitry maventy i Petera. (Jaona 21:15-17) Hain’i Petera fa ten̈a ratsy raha nataony in̈y, fa izy tsy nan̈etraka. Fôtony nan̈ino? Fôtony hainy tsarabe fa Jesosy Tômponany io, tsy rivan̈a taminany. Aviô irô naman’i Petera aby io koa tsy niala izy. Ino raha ianarantsika baka amy Petera?

15. Tian’i Jehovah ho resy lahatra amin’ino ma atsika? (Salamo 86:5; Romanina 8:38, 39) (Zahava koa sary.)

 ¹⁵ Leson. Tian’i Jehovah ho haintsika fa izy ten̈a tia atsika tsarabe ndreky mamela heloko. (Vakia Salamo 86:5; Romanina 8:38, 39.) Izikoa atsika fa manota, atsika mahatsapa ten̈a karaha tsisy dikany foeky. Raha mahazo olo jiaby raha zen̈y. Fa kanefa ndraiky, atsika tsy tôkony hieritreritry fa Jehovah efa tsy tia atsika ndreky efa tsy hamela helokontsika eky. Fa ny raha tôkony hataontsika, atsika mila mitady fan̈ampian̈a malaky. Robert araiky nikoran̈intsika taloha tarỳ in̈y nivolan̈a karaha ty: “Nanota zaho fôtony nitôron̈o angôvonaka izikoa fa nanohitry fakam-pan̈ahy.” Fa baka tiô, hainy fa izy nila nivolan̈a tamin’ny anti-pan̈ahy. Ho izy: “Zaho koa fa nikoran̈a tamin’ny anti-pan̈ahy aby io, efa tsapako edy fa nampiasa anti-pan̈ahy aby io Jehovah han̈aboahany fa izy mbala ten̈a tia zaho. Irô anti-pan̈ahy aby io tsy rivan̈a taminaka. Irô nan̈ampy zaho hatoky fa Jehovah tsy niala zaho foeky.” Atsika koa mila mahatsapa fa Jehovah tia atsika mare ndreky mamela helokontsika, izikoa atsika mibebaka amy fahotan̈a nataontsika, mitady fan̈ampian̈a, aviô mifen̈y baka tsy han̈ampody hadisovan̈a nataontsika in̈y eky. (1 Jaona 1:8, 9) Izikoa atsika man̈ano ambaka zen̈y, atsika tsy ho rivan̈a amin’ny ain̈intsika tômpiny, na nisy hadisovan̈a nataontsika.

16. Nan̈ino ma anao tapa-kevitry hanompo Jehovah fo?

¹⁶ Jehovah ten̈a mankasitraka atsika mifen̈y mare manompo izy, an̈atin’ny andra sarotro amin’ny andra farany ty. Ke nohon’i Jehovah man̈ampy, ho vitantsika fo hanompo izy, nata misy raha mahakivy atsika. Tiantsika hifen̈y baka hahavita ho tia irô rahalahintsika ndreky ranabavintsika aby io, ndreky hamela helokondrô, ndray irô man̈ano raha mampameloko atsika. Aboakantsika koa fa atsika ten̈a tia Jehovah ndreky man̈aja fandaharan̈a nataony momba vadian̈a io, ke man̈ano erakany vitantsika atsika, hamaha olan̈a miboaka, an̈atin’ny vadian̈antsika ao. Aviô izikoa atsika nan̈ano fahotan̈a, atsika mitady fan̈ampian̈a amy Jehovah, man̈eky fitiavan̈anany ndreky familan-kelokonany, aviô mifen̈y fo manompo izy. Matoky atsika fa hahazo hatsaran̈a maro atsika, izikoa atsika “tsy rivan̈a man̈ano ny tsara.”​—Gal. 6:9.