1-2. Akôry aby mety hahavy atsika ho voa raha tsy rariny?

 JESOSY nan̈ano fan̈oharan̈a momba man̈angy araiky maty vady, tsy vôly niangavy mpitsara araiky baka hahazo ny rariny. Azo antoko fa haindrô mpianatranany aby io tsarabe raha nahazo man̈angy tamy tantara io, fôtony naro olo tamy zen̈y navoa raha tsy rariny. (Lioka 18:1-5) Mbala ten̈a raha maventy amintsika koa tantara io amy ziôty, fôtony atsika jiaby ndraikindraiky mety ho tôjy raha tsy rariny aby.

² Maro amin’olo miain̈y amy donia misy atsika iziôty man̈avakavaka, ratsy fan̈ahy ndreky tia ten̈a. Ke atsika tsy gaga izikoa atsika avoa raha tsy rariny. (Mpito. 5:8) Kanefa mety tsy ampoizintsika mare izikoa rahalahy na ranabavy man̈ano raha tsy rariny amintsika. Fa raha zen̈y ndraiky mety ho hisy. Fa tsara alaintsika onon̈o fo, irô rahalahy ndreky ranabavintsika aby io tsy fahavalon’ny fahamarin̈ana. Irô mbala tsy lavorary karaha atsika fo. Maro raha mety hianarantsika baka amy Jesosy tamin’izy navoa raha tsy rariny, nohon’ny raha nataondrô mpanohitry ratsy fan̈ahy aby io. Ndray atsika mahavita miatriky raha tsy rariny ataondrô mpanohitry ratsy fan̈ahy aby io, ke atsika tsy mba tôkony hahari-draha ke handefitry amindrô mpiara-manompo amintsika aby io! Karakôry ma raha tsapan’i Jehovah izikoa misy olo man̈ano raha tsy rariny amintsika na ambelan̈an’ny fiangonan̈a zen̈y na an̈aty ao? Tsy jireny ma raha mahazo atsika zen̈y?

3. Mampalahelo Jehovah ma mahita atsika avoa raha tsy rariny? Nan̈ino?

³ Tian’i Jehovah olo ho tsara fan̈ahy amintsika, ke ten̈a mampalahelo izy izikoa misy olo man̈ano raha tsy rariny amintsika. “Jehovah tia rariny.” (Sal. 37:28) Jesosy man̈amia  toky atsika fa hataon’i Jehovah ‘raha hazahoan̈a ny rariny ... farany malaky’ izikoa fa fotoan̈a mety tsara amy zen̈y. (Lioka 18:7, 8) Baka iô, efa tsy ho ela Jehovah han̈adoso raha jiaby mampijaly atsika ndreky han̈afoan̈a raha tsy rariny jiaby.​—Sal. 72:1, 2.

4. Akôry ataon’i Jehovah man̈ampy atsika amy ziôty?

⁴ Fa atsika ndraiky mbala mila miambin̈y fotoan̈a han̈adosoan’i Jehovah problemo jiaby io. Fa mandra-pavian’izen̈y, izy man̈ampy atsika hahavita hiaritry raha tsy rariny. (2 Pet. 3:13) Ohatra, izy mampianatra atsika karakôry tôkony hatao izikoa fa misy olo man̈ano raha tsy rariny amintsika, baka tsy hahaihampisy problemo. Fomba araiky an̈anaovany zen̈y, aboakany atsika amy Baiboly ao raha nataon’ny Zanany izikoa fa tôjy raha tsy rariny, hangalantsika fianaran̈a. Atsika koa amezany torohevitry mety arehan̈a tsarabe lera atsika tôjy raha tsy rariny.

MITANDREMA AMY RAHA ATAONAO LERA ANAO TÔJY RAHA TSY RARINY

5. Nan̈ino atsika mila mitandrin̈y amy raha volan̈intsika ndreky raha ataontsika, izikoa fa avoa raha tsy rariny?

⁵ Mety hampalahelo ndreky hampakivy atsika mare raha tsy rariny mahavoa atsika. (Mpito. 7:7) Mpanompon’i Jehovah tsy mivadiky, karaha ataon’i Joba ndreky Habakoka nahatsapa karaha zen̈y koa. (Joba 6:2, 3; Hab. 1:1-3) Tsy diso atsika izikoa malahelo. Fa ndray zen̈y, atsika mila mitandrin̈y amy raha hataontsika, tsao fo tafan̈ano raha ratsy.

6. Ino raha nianarantsika baka tamy raha nataon’i Absaloma? (Zahava koa sary.)

⁶ Atsika mety tihamaly faty, izikoa fa misy olo nan̈ano raha tsy rariny amintsika na amin’olo tiantsika. Fa atsika koa man̈ano zen̈y, mety hahaihampisy problemo fo. Diniha baka raha nataon’i Absaloma, zanakan’i Davida Mpanjaka. Izy neloko mare izikoa fa naolan̈an’i Amnona rahalahiny i Tamara anabaviny. Erakan’ny Lalàn̈an’i Mosesy, mendriky vonen̈a i Amnona tamy raha nataony io. (Lev. 20:17) Amy rariny tsarabe izikoa Absaloma neloko mare tamy raha nataon’ny rahalahiny. Fa ndray zen̈y, izy tsy nanan̈a fahifan̈a hamono i Amnona.​—2 Sam. 13:20-23, 28, 29.

7. Karakôry nataon’ny mpan̈ano salamo araiky, izikoa fa nahita raha tsy rariny?

⁷ Izikoa karaha tsy voasazy foeky irô mpan̈ano raha tsy rariny aby io, atsika mety hieritreritry fa tsisy varany foeky man̈ano  raha marin̈y. Misy mpan̈ano salamo araiky nahita fa nampijaly vahoakan’i Jehovah irô olo ratsy fan̈ahy aby io, kanefa karaha tsisy raha nahazo irô. Ho izy: “Karaha zen̈y irô olo ratsy fan̈ahy aby io! Fiain̈anandrô karaha milamin̈y fo.” (Sal. 73:12) Nampaneloko izy mare nahita raha tsy rariny io, ke izy nihevitry fa karaha tsisy varany aby manompo Jehovah. Karaha ty ho izy: “Zaho koa fa nifen̈y handiniky raha aby zen̈y, nikorontan̈a jerinaka.” (Sal. 73:14, 16) Ke ho izy baka tiô: “Efa tseky nivily lalan̈a zaho, efa tseky nigorosy vitinaka.” (Sal. 73:2) Karaha zen̈y koa raha nahazo rahalahy araiky, Alberto an̈arany.

8. Karakôry nataon’ny rahalahy araiky, izikoa izy fa navoa raha tsy rariny?

⁸ Alberto nataon’ny rahalahy sasany nangalatra volan’ny fiangonan̈a. Ke vokany, izy nafaka tamy tombotsoanany, baka iô koa naro rahalahy amy fiangonan̈a nahay raha zen̈y, lôso tsy nan̈aja izy. Ke ho izy: “Zaho neloko mare baka iô kivy.” Nambelany helokonany zen̈y hampihen̈y fifandraisany tamy Jehovah, aviô izy tsy nivory ndreky tsy nitory foeky tan̈atin’ny dimy taon̈o. Ke tantara zen̈y ahitan̈a ino raha mety hiboaka izikoa atsika tsy mahafehy helokontsika, lera atsika avoa raha tsy rariny.

 ALEVA TAHAKA KARAKÔRY NATAON’I JESOSY NIATRIKY RAHA TSY RARINY

9. Ino raha tsy rariny niaretan’i Jesosy? (Zahava koa sary.)

⁹ Jesosy ten̈a modely lavorary izikoa fa niatriky raha tsy rariny. Maro olo nan̈ano raha tsy rariny taminany, firaka tamin’iry havany. Irô havany tsy nino izy aby io nivolan̈a fa izy zen̈y adala. Irô mpitariky fivavahan̈a aby io koa nivolan̈a fa izy zen̈y niaraka niasa tamy demony, aviô irô maramila romanin̈y aby io nan̈adroadro izy ndreky namopoko izy, baka iô namono izy foeky tamy farany. (Mar. 3:21, 22; 14:55; 15:16-20, 35-37) Niaretan’i Jesosy raha tsy rariny jiaby zen̈y, aviô izy tsy namaly faty foeky. Ino raha ianarantsika baka amin’ny ohatra nambelany zen̈y?

10. Karakôry nataon’i Jesosy niatriky raha tsy rariny? (1 Petera 2:21-23)

¹⁰ Vakia 1 Petera 2:21-23. a Jesosy nan̈ambela modely lavorary harehantsika izikoa atsika fa miatriky raha tsy rariny. Hainy lera karakôry tôkony mangin̈y ndreky lera karakôry tôkony mivolan̈a. (Mat. 26:62-64) Baka iô tsy vandy jiaby nataon’olo momba izy zay nivaliany aby. (Mat. 11:19) Baka iô izy koa fa nivolan̈a, izy tsy nanihitihy irô mpan̈enjiky izy aby iô na nandrahon̈o irô. Jesosy nifehy ten̈a fo, fôtony “nankin̈iny tamin’ny araiky mitsara erakan’ny rariny fo fiain̈ananany.” Hain’i Jesosy fa fahitan’i Jehovah raha nahazo izy io ny raha ten̈a maventy. Izy natoky fa Jehovah mbala hamaha raha tsy rariny jiaby io amy fotoan̈a mety tsara.

11. Ino raha sasany mila ataontsika, baka atsika hahafehy raha volan̈intsika? (Zahava koa sary.)

¹¹ Izikoa misy olo man̈ano raha tsy rariny  amintsika, atsika mety mangala tahaka Jesosy, ke mitandrin̈y amy raha hivolan̈intsika. Sasany amy raha avoa atsika io mety tsisy dikany aby, ke atsika tsy voatery mivolan̈a ndreky man̈ano raha aby. Na atsika mifidy hangin̈y fo, baka tsy ho tafivolan̈a raha mety hampitombo problemo. (Mpito. 3:7; Jak. 1:19, 20) Fa ndraikindraiky koa atsika mila mivolan̈a, izikoa fa mahita raha tsy rariny na mila miaro finoan̈antsika. (Asa. 6:1, 2) Fa izikoa atsika mila mivolan̈a, atsika mila mifen̈y baka ho kalma ndreky han̈aja olo fo.​—1 Pet. 3:15. b

12. Akôry han̈ankin̈antsika fiain̈anantsika amin’ny “araiky mitsara erakan’ny rariny”?

¹² Mety mangala tahaka Jesosy koa atsika ke han̈ankin̈y fiain̈anantsika amin’ny “araiky mitsara erakan’ny rariny.” Izikoa misy olo mitsaratsara na mampijaly atsika, atsika matoky fa Jehovah mahay ny marin̈y. Fatokisantsika zen̈y han̈ampy atsika hiaritry raha tsy rariny avoa atsika, fôtony atsika mahay fa Jehovah mbala han̈ano raha handaminan̈a raha tsy rariny jiaby mahazo atsika io. Ke izikoa izio efa napetrakantsika amy Jehovah, atsika tsy tôkony ho meloko na hikisasy olo eky. Fihetseham-pô karaha zen̈y mety hahavy atsika han̈ano raha ratsy, tsy ho ravoravo, na handrobaka fifandraisantsika amy Jehovah foeky.​—Sal. 37:8.

13. Ino han̈ampy atsika hifen̈y fo hiaritry raha tsy rariny?

¹³ Atsika ndraiky tsy hahavita hangala tahaka modely lavorarin’i Jesosy. Ndraikindraiky baka atsika tafivolan̈a na tafan̈ano raha hanin̈enantsika. (Jak. 3:2) Baka iô raha tsy rariny sasany koa mety hahavy atsika halahelo mare na han̈isy holatra amin’ny ain̈intsika foeky, ke mety tsy hiala foeky koa mbala amy donia ty. Ke izikoa zen̈y raha mahazo anao, matokisa fa hain’i Jehovah raha zen̈y. Baka iô Jesosy koa efa niaritry raha tsy rariny, ke izy mahay raha tsapanao. (Heb. 4:15, 16) Jehovah tsy vitan’ny man̈amia atsika modely lavorarin’i Jesosy fo, fa izy koa man̈amia torohevitry mety tsara han̈ampy atsika hiatriky raha tsy rariny. Alô atsika ziôty handiniky torohevitry aroe baka amy bokin’ny Romanina ao, afaka man̈ampy atsika.

“AMBILÀ ZAN̈AHARY HAN̈ABOAKA HELOKONANY”

14. Ino mba dikany ‘man̈ambela Zan̈ahary han̈aboaka helokonany’ zen̈y? (Romanina 12:19)

¹⁴ Vakia Romanina 12:19. Apostoly Paoly nandrisiky Kristianin̈y ‘han̈ambela Zan̈ahary han̈aboaka helokonany.’ Man̈ano zen̈y atsika, izikoa man̈ambela Zan̈ahary hanapa-kevitry ombian̈a izy hampisy ny rariny ndreky karakôry fomba han̈anaovany zen̈y. Izikoa fa navoa raha tsy rariny rahalahy araiky, John an̈arany, karaha ty ho izy: “Zaho nila nifen̈y mare baka tsy hitady ny rariny erakan’ny hitiavako izy fo. Romanina 12:19 nan̈ampy zaho hiambin̈y Jehovah.”

15. Nan̈ino ten̈a tsara miambin̈y Jehovah handamin̈y problemo? Man̈ameza ohatra.

¹⁵ Hahazo hatsaran̈a atsika izikoa miambin̈y Jehovah handamin̈y problemo. Atsika koa man̈ano zen̈y, atsika tsy hiady manokan̈a, ke tsy hiasaloha ndreky tsy ho kivy. Jehovah vôn̈ono han̈ampy atsika. Izy mira mivolan̈a amintsika: “Ambilà aminaka ny tsy rariny; zaho hikarakara raha zen̈y.” Baka iô izy mampan̈anten̈a karaha ty: “Zaho hamaly.” Izikoa atsika man̈eky zen̈y, ho vitantsika tsy hiasaloha momba izin̈y eky, aviô atsika matoky fa ho vitan’i Jehovah handamin̈y izio amy fomba mety tsara. Zen̈y raha nan̈ampy rahalahy John in̈y. Ho izy: “Izikoa zaho miambin̈y  Jehovah, ho tsaratsaran’ny ataoko fomba handaminany izio.”

“RISIA AMY TSARA FO NY RATSY”

16-17. Nan̈ino vavaka han̈ampy atsika ‘handresy ny ratsy amy tsara’? (Romanina 12:21)

¹⁶ Vakia Romanina 12:21. Paoly nandrisiky atsika ‘handresy ny ratsy amy tsara.’ Tamy Toritenin’i Jesosy Tan̈abon’ny Bongo, izy nivolan̈a: “Tiava fo fahavalonarô, baka iô aza vôly mivavaka nin’olo man̈enjiky anarô.” (Mat. 5:44) Zen̈y ankitin̈y raha nataon’i Jesosy. Atsika ziôty mety efa nieritreritry raha mampijaly niaretan’i Jesosy tamy izy nipipendrô maramila romanin̈y aby io tamy tsato-kazo in̈y. Tsy ten̈a haintsika karakôry hirifirin’ny raha nahazo izy, fa izy fo misaora ratsy mare fomba nampijaliandrô izy, aviô nanehoko mare ain̈inany.

¹⁷ Jesosy mbala tia Jehovah ndreky tsy nivadiky taminany fo, ndray izy niatriky raha tsy rariny mare. Izy tsy nan̈ozon̈o irô maramila nampijaly izy aby io, fa ho izy: ‘Baba, ambilà hadisovan̈andrô, fôtony tsy haindrô raha ataondrô io.’ (Lioka 23:34) Ke izikoa atsika mivavaka nindrô olo mampijaly atsika aby io, raha zen̈y mety hampakirikiry helokontsika amindrô, aviô mety hiova fomba fahitantsika irô.

18. Karakôry nan̈ampian’ny vavaka i Alberto ndreky John hiatriky raha tsy rariny?

¹⁸ Vavaka koa nan̈ampy irô rahalahy aroe nikoran̈intsika taloha tarỳ in̈y hiatriky raha tsy rariny navoa irô. Alberto nivolan̈a: “Zaho nivavaka nindrô rahalahy nan̈ano raha tsy rariny taminaka aby io. Matetiky zaho nangataka tamy Jehovah han̈ampy zaho baka han̈adin̈a izio.” Mamparavoravo fa Alberto ziôty nanjary mpanompon’i Jehovah tsy mivadiky ndraiky koa. Karaha ty ndraiky ho John: “Matetiky zaho nivavaka niny rahalahy nan̈ano raha nampalahelo zaho io. Vavaka aby zen̈y nan̈ampy zaho han̈ambela hadisovan̈anany ndreky tsy hitsaratsara izy, aviô koa nan̈ampy zaho nilamin-tsain̈y.”

19. Ino raha mila ataontsika mandra-pifaran̈an’ny donia ty? (1 Petera 3:8, 9)

¹⁹ Mety mbala ho hisy raha tsy rariny fo avoa atsika, alohan’ny hifaran̈an’ny donia ty. Fa ndray karakôry ndray karakôry izio, irarian̈a atsika tsy ho vôly foeky hivavaka amy Jehovah, ke hangataka izy han̈ampy atsika. Irarian̈a koa atsika hangala tahaka fomba nataon’i Jesosy niatriky raha tsy rariny, baka iô tsy ho vôly han̈araka torolalan̈an’ny Baiboly. Izikoa atsika tsy vôly man̈ano zen̈y, azo antoko fa Jehovah tsy maintsy hitahy atsika.​—Vakia 1 Petera 3:8, 9.