LAHATSORATRA FIANARAN̈A 46
HIRA 49 Ampifalio ny Fon’i Jehovah
Anarô Rahalahy, Mifen̈y ho Mpikarakara Fiangonan̈a ma Anarô?
“Man̈amia raha olo ten̈a mampasambatra tozay amezan’olo raha.”—ASA. 20:35.
HEVITRY HIDINIHIN̈Y
Lahatsoratra ty handrisiky irô rahalahy vita batisa, baka irô han̈iry ho lôso mpikarakara fiangonan̈a ndreky hahafeno raha takin̈a amy mpikarakara fiangonan̈a.
1. Ino raha tsapan’i Paoly momba irô mpikarakara fiangonan̈a aby io?
TEN̈A matomboko asa ataon’ny mpikarakara fiangonan̈a an̈atin’ny fiangonan̈a. Apostoly Paoly nankasitraka irô rahalahy tsy mivadiky aby io. Ohatra, tamy taratasy nisoratiny tamy fiangonan̈a ta Filipy, izy nankasitraka manokan̈a irô mpikarakara fiangonan̈a ndreky irô anti-pan̈ahy aby io.—Fil. 1:1.
2. Karakôry raha tsapan’i Luis momba asan’ny mpikarakara fiangonan̈a?
2 Ndray tanora na matoe, maro amindrô rahalahy vita batisa aby io ravoravo man̈ano asan’ny mpikarakara fiangonan̈a. Ohatra i Devan, tamin’izy 18 taon̈o, izy voatendry mpikarakara fiangonan̈a. Fa i Luis ndraiky, izy voatendry mpikarakara fiangonan̈a tamin’izy efa 50 taon̈o mandilatra. Karaha raha tsapan’olo maro fo raha nivolan̈iny, izikoa izy fa nivolan̈a: “Ten̈a tombontsoa mare man̈ano asan’ny mpikarakara fiangonan̈a io, intsaka eky zaho koa fa mieritreritry fitiavan̈a jiaby naboakan’ny fiangonan̈a taminaka!”
3. Ino raha hidinihintsika ato?
3 Izikoa anao rahalahy vita batisa kanefa mbala tsendriky mpikarakara fiangonan̈a, anao ma mety manakatra tanjon̈o io? Ino ma tôkony handrisiky anao han̈ano zen̈y? Baka iô ino aby fepetra takin’ny Soratra Masin̈y mila fenonao? Amy lahatsoratra ty, atsika handiniky valin’ny fan̈ontanian̈a aby io. Fa alô antsendriky atsika handiniky ino asan’ny mpikarakara fiangonan̈a.
INO MA ASAN’NY MPIKARAKARA FIANGONAN̈A?
4. Ino ma asan’ny mpikarakara fiangonan̈a? (Zahava koa sary.)
4 Mpikarakara fiangonan̈a zen̈y rahalahy vita batisa, voatendrin’ny fan̈ahy masin̈y han̈ampy anti-pan̈ahy aby io hikarakara raha ilain̈y an̈atin’ny fiangonan̈a. Sasany amindrô io mangala antoko fa ampy tsara fitaovan̈a ilain’ny fiangonan̈a ndreky faritany iasandrô. Sasany ndraiky man̈ano raha hahavy fiangonan̈a ho voadio ndreky ho voakobaby tsara. Mpikarakara fiangonan̈a koa mikarakara mpan̈atriky, man̈ano raha hampandeha tsara feo ndreky video amy fivorian’ny fiangonan̈a. Ten̈a ilain̈a asa jiaby ataondrô mpikarakara fiangonan̈a aby io. Fa ny ten̈a raha maventy, irô mila tia raha ara-pan̈ahy, ke mila tia Jehovah ndreky miain̈y mifan̈araka amy fitsipikinany. Irô koa mila tia mare rahalahy ndreky ranabavy aby io. (Mat. 22:37-39) Ino han̈ampy rahalahy araiky vita batisa, baka izy ho lôso mpikarakara fiangonan̈a?
Mpikarakara fiangonan̈a aby io mangala tahaka Jesosy, ke vôn̈ono irô hikarakara raha ilain’olo (Zahava fehintsoratra 4)
5. Karakôry ma mifen̈y hanjary mpikarakara fiangonan̈a zen̈y?
5 Baiboly mikoran̈a raha takin̈a amin’olo hitindren̈y hanjary mpikarakara fiangonan̈a. (1 Tim. 3:8-10, 12, 13) Anao hahazo tombontsoa io izikoa mianatra ndreky mifen̈y hahafeno raha aby takin’ny Soratra Masin̈y io. Fa alô antsendriky atsika handiniky ino tôkony ho antony mahavy anao hanakatra tanjon̈o io.
INO TÔKONY HANDRISIKY ANAO HANAKATRA TANJON̈O IO?
6. Ino tôkony handrisiky anao hikarakara irô rahalahy ndreky ranabavinao aby io? (Matio 20:28; zahava koa amy fôn̈ony.)
6 Jesosy Kristy môdelintsika maventy. Fitiavany Babany ndreky fitiavany olo fo nandrisiky izy tamy raha jiaby nataony. Fitiavan̈a zen̈y koa nandrisiky izy niasa mare, ndreky nan̈ano asa niheverin’olo ho asa ambany. (Vakia Matio 20:28; Jaona 13:5, 14, 15) Izikoa fitiavan̈a mahavy anao hifen̈y hanjary mpikarakara fiangonan̈a, Jehovah hitahy anao ndreky han̈ampy anao hanakatra tanjon̈o zen̈y.—1 Kor. 16:14; 1 Pet. 5:5.
Jesosy nan̈amia môdely irô apostoly aby io nampianaran̈a irô hanetry ten̈a hikarakara raha ilain’olo fa tsy hifen̈y hitady laza (Zahava fehintsoratra 6)
7. Nan̈ino rahalahy araiky tsy tôkony harisikin’ny fitadiavan̈a voninahitry?
7 Amy donia ty, matetiky olo man̈ano raha mampalaza ain̈inany irin’olo mare. Fa amy fandaminan̈an’i Jehovah ndraiky tsy karaha zen̈y. Rahalahy araiky arisikin’ny fitiavan̈a karaha Jesosy zen̈y tsy tia fahifan̈a ndreky tsy mitady voninahitry amin’olo. Izikoa olo tia fahifan̈a edy voatendry an̈ivon’ny fiangonan̈a, azo antoko fa izy tsy han̈ano asa mitaky fanetren-ten̈a, kanefa raha zen̈y ilain̈a mare hikarakaran̈a ôndrikôndrikin’i Jehovah valera aby io. Izy mety hieritreritry fa asa karaha zen̈y man̈ambany izy. (Jaona 10:12) Jehovah tsy hitahy foeky ezaka ataon’olo arisikin’ny fan̈ambonian-ten̈a na fitiavan-ten̈a karaha zen̈y.—1 Kor. 10:24, 33; 13:4, 5.
8. Ino torohevitry namezan’i Jesosy irô apostolinany aby io?
8 Nisy fotoan̈a ndray irô kamaradin’i Jesosy marikitry izy aby io, mbala ratsy fo antony nahavy irô nan̈iry hahazo tombontsoam-panompoan̈a. Diniha baka raha nataon’ny apostoly Jakoba ndreky Jaona. Irô nangataka Jesosy han̈amia toeran̈a miavaka irô tamy Fanjakan̈anany. Jesosy tsy nivolan̈a tamindrô fa nety tsara irô nangataka raha zen̈y. Fa izy nan̈azava tamindrô apostoly jiaby 12 aby io karaha ty: “Zay olo tiho be aminarô, tsy maintsy manjary mpanomponarô, aviô zay olo tiho voanalohany aminarô tsy maintsy manjary mpanomponarô jiaby.” (Mar. 10:35-37, 43, 44) Izikoa antony tsara mahavy irô rahalahy aby io han̈iry hikarakara olo, irô hahavita han̈ampy mare fiangonan̈a.—1 Tes. 2:8.
INO MAHAVY ANAO HANAKATRA TANJON̈O?
9. Ino han̈ampy anao hahaihan̈iry fo hanakatra tanjon̈onao io?
9 Azo antoko fa anao tia Jehovah ndreky man̈iry hikarakara olo. Fa ndray zen̈y, anao mety tsy tihan̈ano asa takin̈a amy mpikarakara fiangonan̈a. Fa ino mety han̈ampy anao hahaihan̈iry fo han̈ano fanompoan̈a io? Nan̈ino anao izikoa mieritreritry haravoan̈a azo baka amin’ny fanompoan̈a irô rahalahinao ndreky ranabavinao aby io? Jesosy nivolan̈a: “Man̈amia raha olo ten̈a mampasambatra tozay amezan’olo raha.” (Asa. 20:35) Jesosy nan̈araka torolalan̈a io. Izy ravoravo mare nikarakara olo, ke anao koa ho karaha zen̈y.
10. Karakôry nan̈aboahan’i Jesosy fa namparavoravo izy nanompo olo hafa? (Marka 6:31-34)
10 Diniha baka ohatra araiky man̈aboaka fa Jesosy ten̈a ravoravo nanompo olo hafa. (Vakia Marka 6:31-34.) Tandraraiky, irô apostolinany aby io kajo, ke irô nandeha tamy tany mitokana hangala kajo. Fa nisy olo marobe nandeha talohandrô. Irô baka nan̈anten̈a fa Jesosy hampianatra irô. Izy tsy voatery han̈ano zen̈y, fôtony ndray lera nihinanany niaraka tamin’ny apostolinany aby io tsisy. Na koa Jesosy nety ho nan̈iraka irô olo aby io nody, izy koa fa baka nampianatra irô fahamarin̈ana araiky na aroe fo. Fa izy narisikin’ny fitiavan̈a, ke “nanomboko nampianatra irô raha maro.” Aviô, firaka “andra hariva” izy mbala nampianatra fo.” (Mar. 6:35) Tsy nohon’ny adidy fo nan̈anaovany zen̈y, fa izy “nahinakinaka irô.” Fitiavany irô olo aby io nahavy izy tihampianatra irô. Faran-draha namparavoravo Jesosy eky nanompo olo hafa.
11. Karakôry nataon’i Jesosy nan̈amia raha nilain’olo? (Zahava koa sary.)
11 Jesosy nampianatra irô vahoaka aby io raha momba Zan̈ahary. Fa mbala misy raha beben’izen̈y koa nataony. Izy nan̈ano fahagagan̈a nan̈amezan̈a hanin̈y irô, ke mpianatranany aby io nirahiny nirasa raha zen̈y. (Mar. 6:41) Fan̈anaovany raha zen̈y nampianarany irô karakôry hatao mikarakara raha ilain’olo. Naboakany tamindrô koa fa raha nataony io ten̈a raha maventy. Baka iô, matetiky irô mpikarakara fiangonan̈a aby io man̈ano raha karaha zen̈y. Diniha baka haravoan̈andrô apostoly aby io, irô koa fa nirasa hanin̈y, baka tamy fahagagan̈a nataon’i Jesosy io, firaka “olo jiaby nihina ke voky”! (Mar. 6:42) Fa kanefa, tsy tamy zen̈y zaraiky fo Jesosy nan̈ano raha mahatsara olo, alohan’ny ninany tômpiny. Izy mbala nan̈ano zen̈y fo tamy fiain̈ananany jiaby. (Mat. 4:23; 8:16) Namparavoravo Jesosy ndreky nahafa-pô izy fampianarany olo ndreky izy nanetry ten̈a nikarakara raha nilain’olo. Azo antoko fa hahatsapa haravoan̈a karaha zen̈y koa anao, izikoa anao vôn̈ono hanompo olo hafa, amy maha mpikarakara fiangonan̈a.
Fitiavanao Jehovah ndreky fan̈irian̈anao hikarakara raha ilain’olo, handrisiky anao han̈ano erakany vitanao han̈ampian̈a irô rahalahy ndreky ranabavy aby io (Zahava fehintsoratra 11) a
12. Nan̈ino atsika tsy tôkony hieritreritry fa tsisy raha azontsika han̈ampian̈a fiangonan̈a?
12 Izikoa anao mahatsapa fa tsisy raha hainao, aza kivy. Azo antoko fa anao manan̈a toetry ilain̈a an̈ivon’ny fiangonan̈a. Mety hampatsara anao mare mamaky raha nivolan̈in’i Paoly, amy 1 Korintianina 12:12-30. Hita tsarabe amizio ao fa anao ndreky mpanompon’i Jehovah jiaby, samy ilain̈a ndreky valera mare an̈atin’ny fiangonan̈a. Ke izikoa anao iziôty mbala tsendriky mahafeno raha takin̈a amin’olo hanjary mpikarakara fiangonan̈a, aza rivan̈a. Mifen̈a han̈ano erakan’ny vitanao amy fanompoan̈a Jehovah, ndreky han̈ampy irô rahalahinao aby io. Irô anti-pan̈ahy aby io handiniky raha momba anao io, ndreky han̈iraka anao han̈ano raha mety ho vitanao.—Rom. 12:4-8.
13. Lelahy voatendry fo ma mila man̈araka ankamarozan’ny raha takin̈a amindrô io?
13 Diniha koa antony hafa tôkony hahavy anao hifen̈y hahafeno raha takin̈a amy mpikarakara fiangonan̈a: Ankamarozan’ny raha takin̈a io tôkony harehan’ny Kristianin̈y jiaby. Kristianin̈y jiaby baka tôkony hifandray marikitry amy Jehovah, ho ravoravo koa fa man̈amia raha olo, ndreky tôkony hifen̈y han̈amia môdely amy fan̈arahan̈a fitsipikin’i Jehovah. Ke ino tsarabe ma raha mila ataon’ny rahalahy, baka hanakaran̈a tanjon̈o io?
AKÔRY HANAKARANAO TANJON̈O IO?
14. Ino ma dikan’ny “matotro sain̈y” zen̈y? (1 Timoty 3:8-10, 12)
14 Alô atsika handiniky raha sasany takin̈a amy mpikarakara fiangonan̈a, koran̈in’ny 1 Timoty 3:8-10, 12. (Vakia.) Mpikarakara fiangonan̈a zen̈y mila “matotro sain̈y.” Mety karaha ty koa handikan̈a raha zen̈y: “Mandray andraikitry” na koa “mendriky hajain̈y.” Zen̈y ndraiky tsy mivolan̈a fa anao fady mitokiky ndreky mikidikidy. (Mpito. 3:1, 4) Fa ndray zen̈y, anao tôkony han̈ano tsarabe andraikitrinao jiaby. Ke izikoa anao malaza mankefa tsara andraikitry namian̈a anao, olo amy fiangonan̈a hatoky ndreky han̈aja anao.
15. Ino ma dikan’ny “tsy mivadibadi-dela” ndreky “tsy tia tombony azo amy raha tsy marin̈y” zen̈y?
15 Dikan’ny “tsy mivadibadi-dela” zen̈y ndraiky, anao man̈ano ny marin̈y ndreky atokisan̈a. Anao mitana volan̈anao ndreky tsy mamitaka olo. (Ohab. 3:32) Fa dikan’ny “tsy tia tombony azo amy raha tsy marin̈y” zen̈y ndraiky, anao man̈ano ny marin̈y fo izikoa fa miaraka miasa amin’olo, ndreky amy fomba hampiasanao vola. Anao tsy man̈araraotro irô rahalahinao ndreky ranabavinao aby io, baka hahazahoanao vola.
16. a) Ino ma dikan’ny “tsy mpigiaka toaka be” zen̈y? b) Ino ma dikan’ny “manan̈a feon’ny fieritreretan̈a madio” zen̈y?
16 “Tsy migiaka toaka dila loatra” zen̈y ndraiky, anao tsy migiaka toaka be loatra, ndreky tsy malaza ho olo mpigiaka toaka be. Fa dikan’ny “manan̈a feon’ny fieritreretan̈a madio” zen̈y, anao miain̈y mifan̈araka amy fitsipikin’i Jehovah. Baka iô anao ndray tsy lavorary, anao milamin-tsain̈y, fôtony anao mifandray tsara amy Zan̈ahary.
17. Karakôry han̈aboahan’ny rahalahy araiky fa izy atokisan̈a izikoa izy fa “zahan̈a toetry mba ho hita fa mendriky” zen̈y? (1 Timoty 3:10; zahava koa sary.)
17 “Hizahan-toetry ndreky hita fa mendriky” anao, izikoa irô anti-pan̈ahy aby io mahita fa vitanao tsara andraikitry namian̈a anao, baka iô hitandrô fa anao olo mety tavandrain̈y. Ke izikoa irô anti-pan̈ahy aby io fa man̈amia raha hataonao, areha tsarabe toromarikindrô momba izio ndreky tari-dalan̈a baka amy fandaminan̈a. Ataova azo antoko tsara koa fa hainao raha tafiditry amy raha an̈irahan̈a anao io, baka iô ombian̈a izio mila vita. Ke izikoa anao mazoto tsara man̈ano raha tsiaraikiaraiky an̈irahan̈a anao, olo amy fiangonan̈a hahita raha zen̈y, ke hankasitraka mare fandrosoan̈anao. Anarô anti-pan̈ahy, mifen̈a mare hampiofan̈a irô rahalahy vita batisa aby io. (Vakia 1 Timoty 3:10.) Asa amy fiangonan̈anarô ao misy rahalahy vita batisa, an̈elan̈elan’ny 10 firaka 14 taon̈o, na ambanin’izen̈y? Irô ma manan̈a fahazaran̈a tsara mianatra manokan̈a ndreky mazoto man̈oman̈a fivorian̈a? Irô ma mifen̈y mamaly teny isaka fivorian̈a, ndreky mazoto mandeha manompo? Izikoa ia valiny, irô ameza raha atao mifan̈araka amy taon̈ondrô ndreky raha misy amy fiain̈anandrô. Karaha zen̈y hahafahan̈a ‘hizaha toetry’ irô rahalahy tanora aby io, ke ho ‘hita fa mendriky’ irô. Ke irô koa fa an̈elan̈elan̈a 17 ndreky 19 taon̈o, irô mety hahafeno raha takin̈a amy mpikarakara fiangonan̈a.
Irô anti-pan̈ahy aby io man̈amia raha atao irô rahalahy vita batisa aby io, hizahavan̈a toetry irô, ‘misy hahaizan̈a fa irô mendriky’ (Zahava fehintsoratra 17)
18. Ino ma dikan’ny “tsisy raha hivolan̈ana izy” zen̈y?
18 “Tsisy raha hivolan̈ana izy.” Dikan’izen̈y, tsisy raha ivolan̈ana anao amy resaka fitondran-ten̈a ratsy. Marin̈y ndraiky fa Kristianin̈y mety han̈odian’olo ho nan̈ano raha ratsy. Ndray Jesosy fo natetiky nataon’olo karaha zen̈y. Baka iô koa, izy efa nivolan̈a tsialohaloha fa tsy maintsy hataon’olo karaha zen̈y koa mpan̈ara-dia izy. (Jaona 15:20) Fa ndray zen̈y, anao tôkony hifen̈y fo hadio fitondran-ten̈a karaha nataon’i Jesosy, amy zen̈y anao hanan̈a laza tsara amy fiangonan̈a.—Mat. 11:19.
19. Ino ma tafiditry amy “manambady tokana” zen̈y?
19 “Manambady tokana.” Dikan’izen̈y, anao mila man̈araka fitsipiky namezan’i Jehovah momba vadian̈a tamy voanalohany tan̈y: Lelahy araiky, man̈angy araiky. (Mat. 19:3-9) Kristianin̈y tsy tôkony hijangajanga. (Heb. 13:4) Fa tsy zen̈y fo. Anao koa tsy tôkony hivadiky amy vadinao, baka iô tsy tôkony hankadala man̈angy hafa foeky.—Joba 31:1.
20. Karakôry ma ataon’ny lelahy “mahay mitondra tsara fianakavian̈anany” zen̈y?
20 “Hahay hitondra vadiny ndreky zanany.” Izikoa anao lohan’ny fianakavian̈a, anao mila man̈ano tsarabe andraikitrinao zen̈y. Anao mila mitariky fotoam-pivavahan̈an’ny fianakavian̈a tsy tapaka, baka iô miaraka manompo matetiky amin’olo tsiaraikiaraiky amy fianakavian̈anao, erakan’ny vitanao. Ampia vadinao ndreky iry zanakanao hanan̈a fifandraisan̈a manokan̈a amy Jehovah. (Efes. 6:4) Izikoa anao mahavita mikarakara tsara fianakavian̈anao, zen̈y han̈aboahanao fa anao koa afaka mikarakara fiangonan̈a.—Ampiràn̈a amy 1 Timoty 3:5.
21. Izikoa anao mbala tsy mpikarakara fiangonan̈a amy ziôty, ino raha mety hataonao?
21 Anarô rahalahy aby, izikoa anao mbala tsy mpikarakara fiangonan̈a iziôty, azafady vakia tsarabe lahatsoratra ty, baka iô mivavaha amy Jehovah momba izio. Ianara raha takin̈a amy mpikarakara fiangonan̈a, aviô mifen̈a mare baka hahafeno raha aby zen̈y. Diniha koa habezan’ny fitiavanao Jehovah ndreky fitiavanao irô rahalahy ndreky ranabavinao aby io. Ampitombosa fitiavanao hanompo irô. (1 Pet. 4:8, 10) Mifen̈a baka hanjary mpikarakara fiangonan̈a, ke anao hahita haravoan̈a izikoa fa mikarakara raha ilaindrô rahalahinao ndreky ranabavinao amy fiangonan̈a ao. Ke irarian̈a Jehovah hitahy ezaka ataonao, baka hanjary mpikarakara fiangonan̈a!—Fil. 2:13.
HIRA 17 “Sitrako Tokoa”
a FAN̈AZAVAN̈A SARY: Ankavia, Jesosy manetry ten̈a mikarakara irô mpianatranany aby io; ankavanan̈a, mpikarakara fiangonan̈a araiky man̈ampy rahalahy araiky efa matoe, amy fiangonan̈a.
