SAROTRO aminao ma man̈ano fianaran̈a manokan̈a isaka herin̈iandra? Misy fotoan̈a ma anao tsy ravoravo man̈ano izio? Atsika jiaby samy mety hahatsapa karaha zen̈y aby ndraikindraiky. Kanefa mba misy raha hafa koa mila ataonao matetiky, karaha ataony mila miseky. Ilàn̈a fotoan̈a ndreky ezaka miseky zen̈y, fa kanefa izikoa atsika efa baka miseky in̈y mahatsiaro velombelon̈o oe. Mianatra Baiboly io koa mety ampiran̈iny amy “rano fisehan̈a, tsy ino zen̈y fa volan̈a” mahavelombelon̈o. (Efes. 5:26) Diniha baka soso-kevitry ten̈a man̈ampy aby ty:

• Man̈anaova programo. Fianaran̈a manokan̈a io an̈isan’ny “raha ten̈a maventy” tsy maintsy ataon’ny Kristianin̈y araiky. (Fil. 1:10) Baka tsy ho adin̈anao programo nataonao io, nan̈ino izikoa izio ambelanao amy tany mora hita, karaha ataon’ny amy riba na amy raha hafa mora tazan̈a? Na koa asa mety hitanao han̈ampy anao izikoa ataonao man̈ena alarme amy telefaoninao, aloha helin’ny fotoan̈a tôkony hianaranao io.

• Ataova mifan̈araka aminao. Moramora aminao ma mifantoko an̈atin’ny fotoan̈a lava be, sa an̈atin’ny fotoan̈a fôhifôhiky fa atao matetitetiky? Anao ny ten̈a mahay ny raha mety aminao. Ke ataova mifan̈araka amy zen̈y lera ianaranao. Izikoa anao mahatsiaro tsy tihianatra foeky lera avy fotoan̈a fianaranao io, nan̈ino izikoa mianatra fo fa atao folo minity fo? Ndray folo minity fo, efa be edy raha ho vitanao an̈atin’izen̈y, tozay anao tsy mianatra foeky. Aviô anao koa fa nanampôno, anao mety tihaihan̈iry hanohy hianatra fo.​—Fil. 2:13.

• Mifidiana tsialohaloha raha ianaran̈a. Izikoa efa amy lera fianaranao io anao vo hieritreritry ino raha ianaranao, anao mety tsy hahavita ‘hampiasa amy fomba tsara fotoan̈anao’ io. (Efes. 5:16) Nan̈ino izikoa efa ataonao listy irô lahatsoratra na foto-kevitry tianao hianaran̈a? Aviô lera misy fan̈ontanian̈a avy an̈aty jerinao, direkty efa sorata. Isaka anao baka mianatra, anao koa mety manoratra hevitry hafa an̈atin’ny listin-draha tianao hianaran̈a ao.

• Aza mentitry loatra. Ataova afaka ivoan̈a programo io, karaha ataony halavasan’ny lera ianaranao na foto-kevitry fidinao. Ny raha ten̈a mikonty baka, tsy ombian̈a, na lera firy, na ino raha ianaranao, fa anao mianatra tsy tapaka.

Ten̈a hahazo hatsaran̈a atsika, izikoa atsika man̈ano fianaran̈a tsy tapaka. Atsika hahaihifandray marikitry amy Jehovah, hahay hanapa-kevitry tsara, aviô hahatsiaro velombelon̈o.​—Jos. 1:8.