Tianao ma hahazo hatsaran̈a tsarabe baka amy fianaran̈a manokan̈a ataonao? Soso-kevitry aby ty han̈ampy anao hahavita hifantoko tsara:

• Mifidiana plasy mety tsara. Izikoa mety, mifidiana plasy tsy feno korontan-draha ndreky mazava tsara, mety hamakian̈a teny. Anao mety mipetraka amy latabatra na amy birô, na anao koa mety mifidy plasy mety tsara an-tany.

• Mitadiava plasy mitokan̈a. Jesosy, ohatra, nifidy fotoan̈a “maraindrain̈y mbala mahizikiziky in̈y” tamy “tany mitokan̈a” lera nivavaka. (Mar. 1:35) Izikoa tsisy foeky plasy mitokan̈a, anao mety mivolan̈a amy fianakavian̈anao na olo tran̈o araiky aminao momba fotoan̈a fianaranao io, ndreky miangavy irô tsy hanabataba anao amy fotoan̈a io.

• Mifen̈a fo hifantoko. Aza ambela hisy raha hanabataba anao. Izikoa anao mampiasa telefony na tabletinao ianaranao, ataova tsisy feony izio na ataova mode avion baka tsy hanabataba. Izikoa anao tafieritreritry raha na asa mila ataonao, aleva naoty malaky baka tsy ho adin̈anao, aviô tohiza fo fianaran̈a. Izikoa anao lôso tsy mifantoko, mijanòna hely, mandehandeha na koa mamavabavatra ain̈y.