Nisy fan̈ovoan̈a sasantsasany nataony fandaminan̈a tamy taon̈o io, ke raha zen̈y nan̈ampy iro Pianatra Baiboly aby io hahaihiray sain̈y fo. Tilikambo Fiambesan̈a nanomboko nan̈aboaka fan̈azavan̈a momba andininteny hidinihindro amy Fivorian̈a Momba Vavaka Ndreky Fideran̈a Jehovah, fataondro isaka herin̈iandra. Ankoatranizen̈y koa, iro Pianatra Baiboly aby io nan̈aboaka kalandrie nisy listiny andininteny hidinihindro isaka herin̈iandra amy fivorian̈a, baka io hira mety hirain̈y amy fianaran̈a manokan̈a na amy fotoampivavahan̈any fianakavian̈a.

Amy fivorian̈a io, Pianatra Baiboly aby io nikoran̈a raha hitandro tamy fanompoan̈a tan̈y ndreky raha tiandro han̈anaovan̈a mersy Jehovah, baka io nan̈ano hira fideran̈a ndreky vavaka. Eva Barney natao batisa taminizy 15 taon̈o, taminy 1923. Karaha ty ho izy izikoa fa nikoran̈a raha tsaroany: “Izikoa fa misy raha tianao volan̈iny, anao mitsangana baka io mivolan̈a karaha ty: ‘Zaho tihan̈ano mersy Tompo amy raha tsara jiaby nataony taminaka.’” Nisy rahalahy sasany farandraha nazoto nandray anjara eky. Karaha ty koa ho Ranabavy Barney: “Nisy ranadahy efa matoe zay, Godwin an̈arany, nanan̈a raha maro tiany han̈anaovan̈a mersy Tompo. Fa koa fa hitany vadiny Godwin fa efa komansy mitsapopa ranadahy pitaridraharaha io, antsoritiny rahavavy io palitony vadiny ke izy mipetraka.”

Isaka fanjava, misy fivorian̈a manokan̈a ataony fiangonan̈a tsiaraikiaraiky amy Fivorian̈a Momba Vavaka Ndreky Fideran̈a Jehovah. Karaha ty koran̈iny Tilikambo Fiambesan̈a 1 Avrily 1923 momba fivorian̈a manokan̈a io: “Antsasany fandaharan̈a amy fivorian̈a io tôkony hatokan̈a hikoran̈ana ndreky hitantaran̈a raha hita tamy fanompoan̈a avio hankahirezan̈a pitory … Zahay mino fa iro fivorian̈a mankahery aby io hahavy piaramanompo hahaipinaman̈a fo.”

Charles Martin 19 taon̈o sady pitory baka a Vancouver, a Kanada. Izy ten̈a nahazo hatsaran̈a tamindro fivorian̈a aby io. Karaha ty ho izy tafara tatỳ: “Tamindro fivorian̈a aby io nianarako voanalohany ino raha volan̈iny koa fa mitory isaka tran̈o. Matetiky misy olo fo mitantara raha tojy izy tamy fitorian̈a isaka tran̈o. Zen̈y nahaizako ino raha tôkony hivolan̈iny ndreky karakory hatao mamaly fanoheran̈a isankarazany.”

Nisy andra koa natokan̈a hanompoan̈a. Ke raha zen̈y nahainampiray sain̈y iro rahalahy aby io fo. Nisy filazan̈a karaha ty tamy Tilikambo Fiambesan̈a  1 Avrily 1923: “Baka atsika miray sain̈y man̈ano asa araiky ..., talata 1 May 1923 io hataontsika andra fan̈anaovan̈a fanompoan̈a. Karaha zen̈y koa isaka talata voanalohany fanjava afarany zen̈y ... Olo tsiaraikiaraiky an̈ivony fiangonan̈a tôkony samy handray anjara amizio.”

Ndray Pianatra Baiboly mbala tanora efa nandray anjara taminy asa io. Mbala 16 taon̈o fo Ranabavy Hazel Burford tamy zen̈y, karaha ty ho izy: “Tamy Gazety tao nisy fomba fitory (miramiran̈a amy raha mety koran̈iny) mety nianaran̈a tsianjery. a Zaho nazoto nitory niaraka tamy dadako.” Fa nisy rahalahy araiky tsy nan̈eky Ranabavy Burford handeha hitory. Ranabavy io lany fan̈ahy. Ho izy: “Tsy tiany ranadahy araiky efa matoe zay foeky zaho mandeha mitory. Tamy fotoan̈a zen̈y mbala tsy nazava tsara taminolo sasany fa Pianatra Baiboly jiaby, an̈isanizen̈y ‘tsaiky man̈angy ndreky tsaiky lelahy’, samby tôkony hidera Pamoron̈o Be Voninahitry.” (Sal. 148:12, 13) Ndray zen̈y, Ranabavy Burford mbala nandeha nitory fo. Tafara tatỳ, izy nan̈atriky kilasy faharoe tamy Sekoliny Gileada ndreky nan̈ano misionera ta Panama. Koa fa nandeha fotoan̈a, nan̈ova toetsain̈indro momba fandihanany tanora mandeha mitory iro rahalahy aby io.

Fivoriambe koa nahainampiray sain̈y iro rahalahy aby io fo. Naro tamindro fivoriambe aby io nisy andra natokan̈a nan̈anaovan̈a fanompoan̈a. Karaha zen̈y zioty tamy lay natao ta Winnipeg, ta Kanada. Olo jiaby nan̈atriky fivoriambe tan̈y nasain̈y nitory tamy tanàna io, tamy 31 Marsy. Naro olo nitorian̈a taminy ezaka manokan̈a io, ke tsara mare vokany. Nisy fivoriambe hafa koa natao ta Winnipeg tamy 5 Aoty. Kadiriny 7000 olo nan̈atriky izio. Tamy fotoan̈a zen̈y, io tamponisa farany an̈abo tamy fivoriambe natao ta Kanada tan̈y.

Fivoriambe ten̈a maventy nataony vahoakany Jehovah taminy 1923, araiky natao ta Los Angeles, ta Californie, tamy 18-26 Aoty. Tamindro herin̈iandra talohany fivoriambe io, naboaka gazety raha mombamomba izio, baka io iro Pianatra Baiboly aby io koa nahavita nandrasa invitasion mandeha 500000. Nan̈apitahandro afisy koa tamy taxi, bisy na tamy tomabilinolo.

 Tamy sabotsy 15 Aoty, Rahalahy Rutherford nan̈ano kabaro mitondra titra “Ondrikondriky Ndreky Bengy.” Tamy kabaro io, nazavainy tsarabe fa “ondrikondriky” mifan̈itsy aminolo manan̈a toetsain̈y tsara hiain̈y amy Paradisa ambony tany eto. Izy baka tio koa namaky fanapahankevitry araiky kahian̈a “Fampitandreman̈a.” Fanapahankevitry io nikoran̈a raha tsy mety nataondro Fivavahan̈a Miaboko Kristianin̈y aby io ndreky nandrisiky olo tsara fô jiaby hiala amy “Babylony be.” (Apok. 18:2, 4) Baka io tafara tatỳ, nisy trakty nisy fanapahankevitry io nirasaindro Pianatra Baiboly aby io erantany. Nazoto mare iro ke antapitrisany voarasandro.

Taminy andra farany tamy fivoriambe io, nisy pan̈atriky mandilatra 30000 naharen̈y Rahalahy Rutherford nan̈ano kabaro natao ninolo jiaby, titranany “Firenena Jiaby Mengo Aminy Aramagedona, fa Olo Antapitrisany Velon̈o amy Zioty Ndraiky Tsy Hofoaty Foeky.” Efa ampoizindro Pianatra Baiboly aby io fa ho maro olo ho avy, ke iro namondro stady be mbala vo vita ta Los Angeles. Baka olo jiaby maharen̈y tsarabe, iro rahalahy aby io nampiasa fitaovan̈a mamparesaka feo nisy tamy stady io tao. Fitaovan̈a nampiasaindro io teknolozy vaovao tamy zen̈y. Maro koa olo naharen̈y fandaharan̈a io tamy radio.

Tamy taon̈o 1923, nitombo mare koa asa fitorian̈a tan Afriky, Eropy, Inde, ndreky Ameriky Atsimo. Tan Inde, ohatra, nisy rahalahy araiky sady nikarakara vadiny ndreky zanany tsiota avio mbala nan̈ampy tamy fan̈amboaran̈a boky ndreky gazety tamy volan̈a hindi, tamoul, télougou, ndreky ourdou. An̈arany rahalahy io A. Joseph.

Ta Sierra Leone nisy pianatra Baiboly aroe, Alfred Joseph ndreky Leonard Blackman, nanoratra tamy foibe ta Brooklyn ta New York. Iro nangataka andifasan̈a olo han̈ampy iro. Nahazo valiny iro tamy 14 Avrily 1923. Karaha ty ho Alfred: “Andra sabotsy efa alin̈y mare, nisy olo nikaiky zaho tamy telefony.” Nisy feo maresaka ren̈iny nivolan̈a karaha ty: “Anao ma olo nanoratra tamy Fikambanan̈a Tilikambo Fiambesan̈a, nangataka andifasan̈a pitory in̈y?” “Ia”, ho Alfred. Olo nikaiky izy io namaly: “Zaho nalefandro.” Izio feony William Brown. Mbala vo navy baka ta Karaiby izy ndreky Antonia vadiny taminy andra io. Niaraka tamindro koa zanakandro aroe vavy, Louise ndreky Lucy. Tsy ela iro rahalahy aby io efa nifanojy tamindro vahiny aby io edy.

Karaha ty koa nivolan̈iny Alfred: “Kiaka andra, zaho ndreky Leonard mbala mikoran̈a Baiboly karaha fataonay isaka herin̈iandra, nisy lelahy  lava be navy tambaravaran̈a tao. Izio Rahalahy Brown. Nafana fô tamy fahamarin̈ana mare izy, ke amarainizio izy efa tihan̈ano kabaro natao ninolo jiaby edy.” Tsy ampy fanjava araiky, efa voarasany Rahalahy Brown boky ndreky gazety jiaby nindesiny baka tan̈y. Tsy ela, izy efa nahazo boky mandilatrany 5000, kanefa betibetiky fo efa maro koa boky nilain̈y. Ndray zen̈y, tsy pivarotro boky nahaizanolo Rahalahy Brown. Tan̈aty fotoan̈a jiaby nan̈anaovany asa fanompoan̈a zay, izy ten̈a nafana fô mare. Baka io, amy kabaronany tsy maintsy misy andininteny baka amy Baiboly fo, zen̈y nahavy izy nikahianolo Brown Baiboly.

Hely loatra birony sampan̈a tamy tanànany Barmen tan Allemagne tan̈y, ke iro rahalahy aby io tapakevitry hifindra. Sady ren̈indro koa fa tafiky fransay efa tsy ho ela tafiditry tamy tanàna io tao. Iro Pianatra Baiboly aby io nahita tran̈obe araiky ta Magdebourg. Izio nety tsarabe nan̈anaovan̈a pirinty boky. Tamy 19 Ziain, efa voapirin̈indro rahalahy aby io entan̈a jiaby fan̈anaovan̈a pirinty ndreky fitaovan̈a hafa, baka io iro nifindra tamy Betela vaovao ta Magdebourg. Zisty taminy andra tafarany nivolan̈ana tamy foibe fa vita fifindran̈a io, niboaka tamy gazety fa efa nazony tafiky fransay tanànany Barmen. Hitandro rahalahy aby io fa ten̈a fitahian̈a ndreky fiarovan̈a baka amy Jehovah mare fifindran̈a io.

George Young ndraiky nitety tany nitory vaovao tsara. Izy nanangana birony sampan̈a vaovao ta Brezily ndreky nanomboko nan̈aboaka Tilikambo Fiambesan̈a tamy volan̈a portigey. Tan̈aty fanjava vitsivitsy fo, izy efa nahavita nan̈apetraka bokikely ndreky gazety mandilatra 7000. Ravoravo mare Sarah Ferguson koa fa nitsidiky fianakavian̈andro Rahalahy Young. Ranabavy Ferguson efa pamaky Tilikambo Fiambesan̈a rango taminy 1899, fa izy fo tsiary nan̈ano batisa. Kanefa nafaka fanjava vitsivitsy, vitany Ranabavy Ferguson ndreky zanany efatra nan̈ano dingana maventy be io.

Tamy faramparany taon̈o 1923, Tilikambo Fiambesan̈a 15 Desambra 1923 nikoran̈a ino vokany fan̈ovoan̈a natao tamy fivorian̈a ndreky fanompoan̈a avio fivoriambe aby io tamy Pianatra Baiboly. Izio nivolan̈a: “Hita tsarabe fa loso fatatra mare finoan̈any fiangonan̈a ... Irarian̈a atsika ho von̈ono aminy asa maro ndreky hazoto sady ho ravoravo hanohy hanompo Zan̈ahary amy taon̈o 1924.”

Namparavoravo mare iro Pianatra Baiboly aby io koa taon̈o 1924. Efa tan̈aty fanjava maromaro, nisy rahalahy baka tamy Betela nan̈ano asa fan̈oren̈ana tamy tanànany Staten Island. Izio tsy lavitry foibendro ta Brooklyn. Iro tran̈o aby naorin̈y tamy toeran̈a vaovao io vita tamy voanalohandohany taon̈o 1924. Iro io koa nahafahan̈a nampiray sain̈y iro rahalahy erantany ndreky nahafahan̈a nan̈aparitaka vaovao tsara mandilatrany taloha.