Fan̈ontanian̈any Pamaky
Ankoatrany mana ndreky rakibo, mbala nisy raha hafa koa ma nihoanindro Israelita aby io tamy tany paiky tan̈y?
Tan̈atiny 40 taon̈o, tamy tany paiky tan̈y, mana raha ten̈a nihoanindro Israelita aby io. (Eks. 16:35) Indroe aby koa Jehovah nan̈amia iro rakibo. (Eks. 16:12, 13; Nom. 11:31) Fa ankoatrany zen̈y mbala nisy raha hafa koa nihoanindro Israelita aby io.
Ohatra, ndraikindraiky Jehovah nitariky vahoakanany tamy ‘tany nety nangalan̈a kajo.’ Nisy rano mety igiahan̈a ndreky hanin̈y tamy toeran̈a aby io. (Nom. 10:33) Araiky amindro toeran̈a aby zen̈y Elima, avio tan̈y ‘nisy loharano 12 baka io kakazo palmie 70.’ (Eks. 15:27) Mety dara kakazo palmie koran̈iny io. Boky Raha Maniry amy Baiboly (angiley) mivolan̈a fa “dara io maniry amy toeran̈a maro, . . avio izio kakazo ten̈a fihoaninolo amy tany paiky an̈y. Antapitrisany olo mampiasa izio hatao hanin̈y, han̈amboaran̈a menaka ndreky tran̈o.”
Iro Israelita aby io koa nety nidoko tamy toeran̈a araiky kahian̈a amy zioty Feiran. Izio faritry maventy misy raha maniry ndreky rano amy tany paiky an̈y. Izio mbala an̈isany Vavasaha Feiran. “Mandeha 130 kilometara halavasany vavasaha misy ten̈arano io. Izio an̈isany ten̈a lava, farany tsara ndreky farany malaza a Sinay an̈y”, volan̈iny boky araiky momba toeran̈a amy Baiboly. Boky io koa mivolan̈a: “Amy vavasaha io ao tany misy Faritry Misy Raha Maniry Ndreky Rano a Feiran io. Izio 45 kilometara miala amy ranomasin̈y. Tsara mare izio, feno palmie, avio mandeha 4,8 kilometara halavasan̈anany. Kadiriny 610 metara an̈abony habosany ranomasin̈y misy izio. Ampiran̈inolo amy zaridainy Edena izio. Efa rango ela, tianolo mare mandeha amy toeran̈a io fotony an̈y misy dara mandeha andrivony.”
Dara amy faritry misy raha maniry amy tany paiky Feiran an̈y
Iro Israelita aby io koa fa niala ta Ezipty, iro nitondra koba ndreky kapila figodren̈a koba. Iro koa nety nitondra varimbazaha ndreky menaka. Azo antoko fa mety tsy naharitry ela raha aby zen̈y. Iro vahoaka aby io koa nitondra ‘ondrikondriky ndreky aomby, biby fitarimian̈a maro.’ (Eks. 12:34-39) Kanefa mety maro tamindro biby aby io naty fotony tsy nora raha nisy tamy tany paiky tan̈y. Sasany tamindro io mety nataony Israelita aby io hanin̈y. Sasany ndraiky mety natao soron̈o; mety natao soron̈o tamy zan̈ahary diso foeky. a (Asa. 7:39-43) Fa iro Israelita aby io ndraiky nety mbala nisy ondrikondriky ndreky aomby fo. Ahaizantsika zen̈y raha nivolan̈iny Jehovah tamindro vahoakanany aby io izikoa iro fa tsy nan̈araka volan̈anany. Ho izy: ‘Hanjary piambin̈y ondrikondriky amy tany paiky atỳ an̈atiny 40 taon̈o zanakanaro.’ (Nom. 14:33) Mety baka tamindro biby nitarimindro aby io nazahoandro ronono ndreky hena ndraikindraiky. Fa raha zen̈y ndraiky azo antoko fa tsy nahampy iro Israelita kadiriny telo tapitrisa aby io, tan̈atiny 40 taon̈o. b
Taia nahitan̈a hanin̈y ndreky rano namian̈a iro biby aby io? c Tamy fotoan̈a zen̈y mety mbala nisy mahalen̈y mare tan̈y, ke nisy raha maniry maro tamy tany paiky tan̈y. Amy boky Fandalinana Soratra Masina, aminy “Arabia”, mivolan̈a fa kadiriny tamy 3500 taon̈o loso tan̈y, “maromarony rano misy amy zioty, rano nisy tamy faritry Arabia tan̈y. Haintsika raha zen̈y fotony an̈y misy vavasaha ritry maro, navy nisy ten̈arano. Zen̈y mivolan̈a fa nahampy tsarabe mahalen̈y tan̈y tamy zen̈y.” Fa ndray zen̈y, ten̈a paiky tan̈y ndreky nampavozo. (Deot. 8:14-16) Ke izikoa tsy tio fahagagan̈a nataony Jehovah nan̈amezan̈a rano iro, azo antoko fa naty tamy tany paiky tan̈y iro Israelita aby io ndreky bibindro.—Eks. 15:22-25; 17:1-6; Nom. 20:2, 11.
Mosesy nivolan̈a tamindro Israelita aby io fa iro namezany Jehovah mana fotony ‘tiany ho haindro fa tsy mofo zaraiky fo raha mahavelon̈o olo fa volan̈a jiaby baka amy vavany Jehovah koa.’—Deot. 8:3.
a Baiboly mikoran̈a fotoan̈a aroe nan̈anaovan̈a soron̈o biby namian̈a Jehovah, tamy tany paiky tan̈y. Voanalohany, tamy fotoan̈a nan̈apitrahan̈a pisoron̈o tamy pilasy. Avio faharoe, tamy fotoan̈any Pasky. Fotoan̈a aroe io samy tamy taon̈o 1512 T.K., kadiriny taon̈o araiky nialandro Israelita aby io ta Ezipty.—Lev. 8:14–9:24; Nom. 9:1-5.
b Mandeha anjato arivony biby nazondro Israelita aby io babo baka taminy ady, tamy faramparany 40 taon̈o niain̈andro tamy tany paiky tan̈y. (Nom. 31:32-34) Fa ndray zen̈y, iro mbala nihina mana fo firaka iro tafiditry tamy Tany Nampan̈antinain̈y.—Jos. 5:10-12.
c Tsisy fivolan̈ana foeky fa iro biby aby io koa mba nihina mana, fotony mana eraka zay laninolo tsiaraikiaraiky fo nambela nalaindro Israelita aby io.—Eks. 16:15, 16.
