1-2. Karakory fomba ten̈a tsara amakian̈a ndreky ianaran̈a Baiboly? Hazavà aminy ohatra.

 IRITRIRETA anao zioty hanapakevitry hivanga tran̈o araiky. Ino ma raha tianao zahan̈a alohany hivanganao izio? Sary man̈aboaka akory poziny tran̈o io izikoa zahan̈a baka aloha? Hay be fa tianao ho hita mivantan̈a tran̈o io. Nan̈ino? Amy zen̈y anao afaka man̈arihary tsara mizaha izio, ndreky miditry an̈atiny efitry jiaby an̈aty ao avio mandiniky tsarabe lafindraha jiaby amizio. Mety ho tianao koa hahazo plany tran̈o io baka ho hainao fomba nan̈amboaran̈a izio. Tianao ho hita aby tsipiriandraha jiaby momba tran̈o tianao vangain̈a io.

² Afaka man̈ano karaha zen̈y koa atsika lera mamaky ndreky mianatra Baiboly. Misy manampahaizan̈a araiky momba Baiboly nivolan̈a fa Baiboly io mira “tran̈o araiky maventy, habo be avio lalin̈y sady matanjaka be fototronazy.” Ke akory hahavy atsika hahay tsara raha jiaby an̈aty Baiboly? Izikoa vakinao malakilaky fo izio, mety fampianaran̈a fototro fo raha ho hainao na ‘raha fototro baka amy volan̈a masin̈iny Zan̈ahary’ fo. (Heb. 5:12) Ke anao mila mandiniky lalin̈y tsarabe Baiboly, karaha anao mila “miditry an̈atiny” tran̈o araiky tianao zahan̈a tsarabe in̈y. Fomba ten̈a tsara ianaran̈a Baiboly, ohatra, mizaha karakory ifandraisany hevitry tsiaraikiaraiky an̈atinizio ao. Mifen̈a koa hahatakatra tsarabe ino raha inoanao avio nan̈ino anao mino fa izio marin̈y.

3. Ino raha nampirisihiny apostoly Paoly hataony piaramanompo taminany, avio nan̈ino? (Efesianina 3:14-19)

³ Baka atsika hahay tsarabe Volan̈a Zan̈ahary aminy antsipiriany, atsika mila mianatra fahamarin̈ana lalin̈y an̈aty ao. Apostoly  Paoly nandrisiky piaramanompo taminany hazoto hianatra Volan̈a Zan̈ahary. Nan̈ino? Amy zen̈y iro ‘hahatakatra tsarabe ampohony ndreky andavany avio habosany ndreky halalin̈any’ fahamarin̈ana. Ke iro baka io hanjary “hamahatra tsara ndreky hiorin̈y tsarabe” amy finoan̈andro. (Vakia Efesianina 3:14-19.) Mila man̈ano karaha zen̈y koa atsika. Atsika handiniky karakory atao mianatra tsarabe Volan̈a Zan̈ahary baka hazava tsara amintsika hafatra an̈atinizio ao.

4. Ino raha mety ataontsika baka atsika hifandray marikitry amy Jehovah? Man̈ameza ohatra.

⁴ Amy maha Kristianin̈y atsika, tsy fampianaran̈a fototro fo raha tiantsika ho hay. Atsika tihianatra firaka amy ‘raha lalin̈y momba Zan̈ahary.’ (1 Kor. 2:9, 10) Han̈ampy atsika hahavita zen̈y fan̈ahy masin̈y Zan̈ahary. Nan̈ino izikoa amy fianaran̈a manokan̈a ataonao, anao mianatra raha han̈ampy anao hifandray marikitry tsarabe amy Jehovah? Ohatra, anao mety man̈ano fikarohan̈a momba akory nataony nan̈aboaka fitiavany panomponany taloha tan̈y, avio nan̈ino raha zen̈y ahitan̈a fa anao koa tiany. Azonao atao koa mandiniky karakory fomba tiany Jehovah hanompoandro Israelita aby io izy taloha tan̈y, avio zen̈y ampiràn̈a amy fomba tiany hanompoantsika izy amy zioty. Na koa mety dinihinao aminy antsipiriany iro faminanian̈a tanteraka tamy Jesosy taminizy tambony tany teto.

5. Misy raha ma tianao han̈anaovan̈a fikarohan̈a amy fianaran̈a manokan̈a ataonao?

⁵ Misy olo mazoto mianatra Baiboly nivolan̈a raha vitsivitsy tiandro hianaran̈a aminy antsipiriany. Sasany amy raha nivolan̈indro zen̈y hitanao aminy efajoro “ Raha Mety Atao Fianaran̈a Manokan̈a.” Hamparavoravo anao mare mianatra raha aby zen̈y, izikoa anao mampiasa Fanondroana Bokin’ny Vavolombelon’i Jehovah na Fitaovana Fikarohana ho An’ny Vavolombelon’i Jehovah. Izikoa anao mandiniky lalin̈y Baiboly, ho fatatra finoan̈anao avio raha zen̈y han̈ampy anao ‘hahay Zan̈ahary.’ (Ohab. 2:4, 5) Atsika zioty handiniky sasany amy fahamarin̈ana lalin̈y amy Baiboly mety ianarantsika tsarabe.

6. a) Ino tsy mampitovy tetiky ndreky fikasan̈a? b) Nan̈ino atsika mivolan̈a fa “mandrakizay” fikasan̈any Zan̈ahary momba olombelon̈o ndreky tany? (Efesianina 3:11)

⁶ Diniha, ohatra, ino raha volan̈iny Baiboly momba fikasan̈any Zan̈ahary. Misy raha tsy mampitovy tetiky (plan) ndreky fikasan̈a. Tetiky mety ampiran̈iny amy lalan̈a araiky fidinao handihanan̈a amy toeran̈a araiky tianao himboan̈a. Kanefa izikoa misy raha misakana lalan̈a io, anao mety tsy ho tody amy toeran̈a io an̈y. Fa toeran̈a tianao himboan̈a io ndraiky afaka ampitovisin̈y amy fikasan̈a. Hainao tsara tany handeha hingoanao io, fa lalan̈a imboanao fo mety hiovaova. Izikoa misy sakana amy lalan̈a araiky, anao afaka mangala lalan̈a hafa. Atsika ravoravo fotony efa nambarany Jehovah amintsika tsihelihely amy Baiboly ao ‘fikasan̈anany mandrakizay.’ (Efes. 3:11, l.p.a.) Jehovah afaka mifidy fomba isankarazany han̈atantirahan̈a fikasan̈anany. Avio, izy mahomby fo fotony ‘nataony han̈atantirahan̈a fikasan̈anany raha jiaby.’ (Ohab. 16:4) Raha ataony Jehovah koa misy vokany maharitry mandrakizay. Ino ma fikasan̈any Jehovah, avio ino fan̈ovoan̈a nataony baka han̈atantirahan̈a izio?

7. Adama ndreky Eva koa fa nikomy, akory nataony Jehovah baka fikasan̈anany ho tanteraka fo? (Matio 25:34)

⁷ Nivolan̈iny Zan̈ahary taminolombelon̈o voanalohany ino fikasan̈anany momba iro. Iro tiany ‘hanan̈a taranaka ke ho maro ndreky hameno tany, hamehy tany ty, avio hanjaka ... amy raha manampahin̈ana jiaby ambony tany.’ (Gen. 1:28) Adama ndreky Eva koa fa nikomy tamy Zan̈ahary, olombelon̈o nanjary panota. Fa zen̈y tsy nisakana Jehovah tsy han̈atanteraka fikasan̈anany. Nivoany fo fomba an̈atantirahany raha zen̈y. Direkty izy tapakevitry hanangana Fanjakan̈a araiky andan̈itry an̈y han̈atanteraka fikasan̈anany tamy voanalohany momba olombelon̈o ndreky tany. (Vakia Matio 25:34.) Avio tamy fotoan̈a efa nifidiny tsarabe, Jehovah nandefa Zanany talan̈olo tambony tany tatỳ hampianatra olombelon̈o momba Fanjakan̈a io, ndreky han̈amia ain̈inany han̈avotan̈a atsika amy fahotan̈a ndreky fahafatesan̈a. Fa Jesosy baka tio natsangana tamy maty baka hanjary Panjakany Fanjakan̈any Zan̈ahary andan̈itry an̈y. Fa mbala misy raha maro koa afaka ianarantsika momba fikasan̈any Zan̈ahary.

8. a) Ino ma fotokevitriny Baiboly? b) Eraka raha azavainy Efesianina 1:8-11, ino ma fikasan̈any Jehovah farany maventy? (Zahava sary amy fon̈ony gazety ty.)

⁸ Fanjakan̈any Zan̈ahary indesiny Kristy io handeha han̈atanteraka fikasan̈any Jehovah momba tany ty ndreky hankamarin̈y an̈arany Jehovah. Zen̈y ten̈a fotokevitriny Baiboly. Tsy niova fikasan̈any Jehovah. Izy nampan̈anten̈a fa zay raha nivolan̈iny tsy maintsy hitantirahiny. (Isaia 46:10, 11, l.p.a.; Heb. 6:17, 18) Ke handeha hiova paradisa tany ty. Efa lavorary ndreky man̈ano ny marin̈y aby taranaka Adama ndreky Eva ambony tany eto amy zen̈y, ke iro “hankafy fiain̈ana tsisy farany.” (Sal. 22:26.) Fa mbala misy raha maventy hafa koa hitantirahiny Jehovah. Izy hampiray sain̈y zavaboary manantsain̈y jiaby andan̈itry an̈y ndreky ambony tany eto. Ke olo jiaby han̈eky Jehovah ho Pitondra ndreky tsy hivadiky aminany. (Vakia Efesianina 1:8-11.) Tsy mahagaga anao ma fomba tsarabe indesiny Jehovah han̈atantirahan̈a fikasan̈anany zen̈y?

9. Firaka raha handalo ombian̈a ma efa haintsika izikoa atsika mamaky Baiboly?

⁹ Iritrireta baka faminanian̈a nivolan̈iny Jehovah tamy zaridainy Edena, amy Genesisy 3:15. b Izio mikoran̈a raha hiboaka ke han̈atanteraka fikasan̈anany. Kanefa, andrivony taon̈o  tafara tatỳ vo niboaka raha aby zen̈y. Ohatra, Zan̈ahary nivolan̈a taminy Abrahama fa izy hanan̈a taranaka maro, avio hisy araiky amy taranakanany hanjary Kristy. (Gen. 22:15-18) Baka io tamy taon̈o 33, naratra hotrombitiny Jesosy, eraka volan̈a faminanian̈a in̈y. (Asa. 3:13-15) Tapany farany amy faminanian̈a io mivolan̈a fa ‘taranaka’ io hanorotoro lohany Satana, fa mbala mandilatra 1000 taon̈o an̈y raha zen̈y vo ho tanteraka. (Apok. 20:7-10) Baiboly koa mbala man̈ambara raha maro mbala handalo parapifaran̈any fifandrafian̈a misy amy doniany Satana ndreky fandaminany Jehovah.

10. a) Ino raha mbala hiboaka teteky iô? b) Akory mety han̈oman̈antsika jerintsika ndreky fontsika? (Zahava lamariky amy pazy ambany.)

¹⁰ Diniha baka raha mampavozo efa nambarany Baiboly aby ty. Voanalohany, iro firenena aby io han̈ambara fa hisy “fiadanan̈a ndreky filaminan̈a!” (1 Tes. 5:2, 3) Fa “tampoko” iô hanomboko fahorian̈a be lera firenena aby io hanafiky fivavahan̈a diso jiaby. (Apok. 17:16) Avio mety hisy raha hafahafa hiboaka izikoa fa ‘ho avy amy rondro amy lan̈itry arỳ Zanakolo, aminy angovo ndreky voninahitry maventy.’ (Mat. 24:30) Jesosy hitsara olombelon̈o, ke han̈avaka ondrikondriky ndreky bengy. (Mat. 25:31-33, 46) Satana amy zen̈y ndraiky tsy hitazan̈a fo. Halany mare vahoakany Zan̈ahary, ke izy handrisiky firenena maromaro mitambatra hanafiky iro. Goga baka amy tany Magoga ikahiany Baiboly iro firenena aby zen̈y. (Ezek. 38:2, 10, 11) Afara helinizen̈y, lan̈iany voahosotro mbala ambony tany eto hampanongain̈y andan̈itry an̈y, hiaraka amy Kristy ndreky tafikinany, han̈ano ady Aramagedona. Ady io hamaran̈a fahorian̈a be. c (Mat. 24:31; Apok. 16:14, 16) Baka io amy zay, hanomboko hitondra tany ty Fanjakan̈a Arivo Taon̈ony Kristy.​—Apok. 20:6.

11. Ino raha afaka ataonao lera anao miain̈y mandrakizay? (Zahava koa sary.)

¹¹ Alo atsika iziô handiniky raha aminy afarany 1000 taon̈o an̈y. Baiboly mivolan̈a fa nataony Pamoron̈o ‘an̈aty fontsika olombelon̈o fan̈irian̈a hiain̈y mandrakizay.’ (Mpito. 3:11) Diniha ino vokatra zen̈y aminao ndreky amy  fifandraisanao amy Jehovah. Misariky jerintsika amy raha zen̈y boky Man̈atòn̈a Jehovah. Amy pazy 319 ao mivolan̈a: “Ho maromarony raha haintsika amy zioty momba Jehovah, raha ho haintsika izikoa atsika fa baka niain̈y tan̈atiny anjatony, andrivony, antapitrisany na andrivony tapitrisa taon̈o foeky. Atsika fo mbala hahatsapa fa misy raha maro tsara tsy ho voakonty foeky mbala mila hianaran̈a. ... Tsy ho takatrany jerintsika foeky hatsaran̈any fiain̈ana ndreky raha maro mahavarian̈a amy Paradisa. Fa mbala mikamarady marikitry amy Jehovah fo ndraiky ny raha ten̈a tsara amy zen̈y.” Parapavianizen̈y, ino koa raha mety zahantsika lera atsika mianatra Volan̈a Zan̈ahary?

12. Akory ahafahantsika handiniky raha amy lan̈itry an̈y? Man̈ameza ohatra.

¹² Volan̈a Zan̈ahary mikoran̈a raha vitsivitsy misy amy Jehovah ‘an̈abo an̈y.’ (Isaia 33:5) Baiboly man̈ambara raha maro mahagaga momba Jehovah ndreky tapany andan̈itry amy fandaminan̈anany. (Isaia 6:1-4; Dan. 7:9, 10; Apok. 4:1-6) Atsika, ohatra, afaka mamaky iro raha mahagaga hitany Ezekiela izikoa fa ‘nibian̈a lan̈itry ke [izy] nahita fahitan̈a baka tamy Zan̈ahary.’​—Ezek. 1:1.

13. Eraka raha azavainy Hebreo 4:14-16, ino ten̈a tianao aminy anjara asany Jesosy andan̈itry an̈y?

¹³ Diniha koa ino raha ataony Jesosy baka andan̈itry an̈y an̈ampian̈a atsika. Izy Panjakantsika sady Pisoron̈obe ten̈a be hinakinaka. Baka aminany ahafahantsika man̈aton̈o ‘sezy fiandrianany Zan̈ahary araiky man̈aboaka hatsarampan̈ahy miavaka’ lera atsika mivavaka. Atsika koa afaka mangataka famindrampo avio fan̈ampian̈a ‘amy fotoan̈a mety.’ (Vakia Hebreo 4:14-16.) Anò atsika tsy han̈adin̈a foeky hisaintsain̈y raha nataony Jehovah ndreky Jesosy avio raha mbala ataondro amintsika baka andan̈itry an̈y. Tôkony hanohin̈y fontsika mare fitiavandro atsika ndreky handrisiky atsika  hazoto amy fanompoan̈a Jehovah.​—2 Kor. 5:14, 15.

14. Ino fomba ten̈a tsara an̈aboahantsika fa atsika ten̈a mankasitraka Jehovah ndreky Jesosy? (Zahava koa sary.)

¹⁴ Mifen̈a han̈ampy olo hanjary Vavolombelon̈o Jehovah ndreky hanjary pianatra Jesosy. Zen̈y an̈isany fomba ten̈a tsara han̈aboahantsika fa atsika mankasitraka Zan̈ahary ndreky Zanany. (Mat. 28:19, 20) Karaha zen̈y iziô nan̈aboahany apostoly Paoly fa izy ten̈a nankasitraka Zan̈ahary ndreky Kristy. Hainy fa sitrapony Jehovah “hamonjian̈a karazanolo jiaby ndreky hahaizandro tsarabe ny marin̈y.” (1 Tim. 2:3, 4) Ke izy nifen̈y mare tamy fanompoan̈a baka ho afaka han̈ampy olo maro erakany vitany, amy zen̈y izy hahavita ‘han̈avotro olo na amy karakory na amy karakory.’​—1 Kor. 9:22, 23.

15. Izikoa zahan̈a Salamo 1:2, ino raha hampasambatra atsika?

¹⁵ Panoratra salamo nivolan̈a fa sambatra ndreky mahomby lan̈iany olo ‘tia lalàn̈any Jehovah’ ndreky ‘misaintsain̈y lalàn̈anany matsan̈a alin̈y.’ (Sal. 1:1-3) Amy bokinany Fandinihan̈a Salamo (angiley), Joseph Rotherham pandika Baiboly nan̈azava momba andininteny aby io. Izy nivolan̈a fa “olo araiky tôkony ho tia mare taridalan̈a Zan̈ahary ke hikaroko izio, hianatra izio, ndreky handany fotoan̈a hisaintsain̈y izio.” Nivolan̈a koa izy fa “izikoa nisy andra araiky tsy namakian̈a Baiboly, very boriny fo andra zen̈y.” Ho ravoravo anao mianatra Baiboly, izikoa anao mandiniky tsipiriandraha maro mahavarian̈a an̈atinizio ndreky mizaha ino ifandraisany raha jiaby zen̈y. Mamparavoravo mare mandalin̈y Volan̈a Zan̈ahary aminy antsipiriany!

16. Ino raha hidinihintsika amy lahatsoratra man̈araka?

¹⁶ Tsy sarotro amintsika hahay fahamarin̈ana maro tsara ampianariny Jehovah atsika an̈atiny Volan̈anany ao. Amy lahatsoratra man̈araka, atsika hianatra araiky amy fahamarin̈ana lalin̈y an̈aty Baiboly ao. Izio momba tempoly arapan̈ahy maventiny Jehovah. Nikoran̈a momba izio Paoly tamy taratasy nalefany tamy Kristianin̈y hebreo aby io. Irarian̈a hamparavoravo anao mare handiniky izio!