1. Ino raha volan̈iny anjely araiky, avio ino tôkony ho vokatra zen̈y amintsika?

 IZIKOA misy anjely mivolan̈a aminao, hitandrin̈esanao ma raha koran̈iny? Amy zioty misy anjely araiky mivolan̈a raha ‘amy firenena, foko ndreky aminolo samy amy fivolan̈ananany avio amy vahoaka jiaby.’ Ino eky raha volan̈iny? Ho izy: “Matahora Zan̈ahary, amia voninahitry izy, ... ke mivavaha amy pan̈amboatra lan̈itry ndreky tany.” (Apok. 14:6, 7) Jehovah zaraiky fo ten̈a Zan̈ahary, ke olo jiaby tôkony hivavaka aminany. Atsika ten̈a mankasitraka izy fotony ambelany hanompo izy amy tempolinany maventy arapan̈ahy!

2. Ino ma tempoly arapan̈ahiny Jehovah io? (Zahava koa efajoro “ Tsy Raha aby ty Izio.”)

² Ino ma tempoly arapan̈ahy zen̈y, avio aia tany misy fan̈azavan̈a momba izio tsarabe? Tempoly arapan̈ahy io tsy tran̈o arabakiteny. Fa izio fandaharan̈a nataony Jehovah, baka atsika olombelon̈o afaka manompo izy amy fomba ankasitrahiny, miorin̈y amy soropan̈avotan̈a nataony Jesosy. Apostoly Paoly nan̈azava tsarabe momba izio tamy taratasy nisoratiny tamindro Kristianin̈y hebreo nipetraka ta Jodia tamy taonjato voanalohany. b

3-4. Nan̈ino Paoly niasaloha momba iro Kristianin̈y hebreo ta Jodia tan̈y, avio akory nan̈ampiany iro?

³ Ino ma nahavy Paoly nanoratra tamindro Kristianin̈y hebreo ta Jodia tan̈y? Mety nisy antony aroe maventy. Voanalohany, baka hankahirezan̈a iro. Ankamarozandro baka mety tombo tamy Fivavahan̈a Jiosy. Ke pitondra fivavahan̈a aby nisy iro taloha io nety nankaratsy iro fotony iro nanjary Kristianin̈y.  Nan̈ino? Fotony Kristianin̈y tsisy tempoly, tsisy alitara nan̈anaovan̈a soron̈o tamy Zan̈ahary, avio tsisy pisoron̈o nikarakara iro. Raha zen̈y mety nampakivy iro pianatra Kristy aby io ndreky nampihen̈y finoan̈andro. (Heb. 2:1; 3:12, 14) Ary nety nisy sasany tamindro foeky nieritreritry himpody amy Fivavahan̈a Jiosy.

⁴ Faharoe, Paoly nan̈ambara iro Kristianin̈y hebreo aby io fa iro tsy nifen̈y hahay iro fahamarin̈ana vaovao ndreky lalin̈y, na iro “hanin̈y mahery” amy Volan̈a Zan̈ahary. (Heb. 5:11-14) Sasany tamindro koa nety mbala nitandrin̈y mare Lalàn̈any Mosesy. Nazavainy Paoly fa soron̈o nitakiny Lalàn̈a io tsy ten̈a mahavita mamafa fahotan̈a. Baka tamy zen̈y nahavy Lalàn̈a ‘nifoan̈ana.’ Paoly baka tio nampianatra sasany amy fahamarin̈ana lalin̈y aby io. Nampatsiaroviny Paoly iro Kristianin̈y namany aby io fa ‘fan̈antinan̈a ten̈a tsara’ araiky miorin̈y amy soron̈o nataony Jesosy, avio izio ten̈a hahavita han̈ampy iro ‘han̈aton̈o Zan̈ahary.’​—Heb. 7:18, 19.

5. Ino ma raha mila mazava tsara amintsika amy bokiny Hebreo ao, avio nan̈ino?

⁵ Nazavainy Paoly tamindro rahalahiny hebreo aby io nan̈ino fomba hanompoandro Jehovah, amy maha Kristianin̈y iro zioty, tsaratsarany fanompoan̈a nataondro taloha. Fomba fanompoan̈a natao tamy Fivavahan̈a Jiosy io “alokony raha mbala ho avy, fa Kristy ny ten̈a izy.” (Kol. 2:17) Ino ma aloko zen̈y? Izio kandindon̈o raha araiky fo fa tsy ten̈a izy. Ke fomba nanompoandro Jiosy aby io Zan̈ahary taloha tan̈y in̈y kandindon̈o fo, fotony araiky ten̈a izy mbala ho avy. Mila mazava amintsika tsarabe fandaharan̈a nataony Jehovah han̈ambilan̈a fahotan̈antsika, baka atsika afaka manompo izy amy fomba ankasitrahiny. Ke ino tsy mampitovy kandindon̈o (fanompoan̈a nataony Jiosy taloha tan̈y) amy “ny ten̈a izy” (fanompoan̈a ataony Kristianin̈y)? Alo atsika handiniky raha koran̈iny bokiny Hebreo. Zen̈y han̈ampy atsika hahay tsarabe ino tempoly arapan̈ahy io avio nan̈ino izio mahakasiky atsika.

6. Ino ma raha nilavan̈a tran̈olay masin̈y?

⁶ Kandindon̈o. Paoly nikoran̈a momba tran̈olay naorin̈y Mosesy tamy taon̈o 1512 T.K. (Zahava efajoro “Kandindon̈o​—Ny Ten̈a Izy.”) Tran̈olay masin̈y nikahian̈a toeran̈a nivoriandro Israelita aby io lera iro  nanompo Zan̈ahary ndreky nan̈ano soron̈o. (Eks. 29:43-46) Izio nindesindro niaraka tamindro lera iro nifindrafindra toeran̈a tamy tany paiky tan̈y. Efa ho 500 taon̈o nampiasandro Israelita aby io tran̈olay io firaka iro nahavita tempoly ta Jerosalema. (Eks. 25:8, 9; Nom. 9:22) Fa tran̈olay masin̈y io fo mbala mifan̈itsy amy raha araiky bebenizen̈y amy Kristianin̈y.

7. Ombian̈a ma nanomboko nisy tempoly arapan̈ahy?

⁷ Ny ten̈a izy. Tran̈olay masin̈y taminy andrandro Israelita aby in̈y, ‘kandindon̈o raha andan̈itry an̈y’, avio izio mifan̈itsy amy tempoly arapan̈ahy maventiny Jehovah. Paoly nivolan̈a fa ‘tran̈olay [na tran̈olay masin̈y] io fan̈oharan̈a ivolan̈ana fotoan̈a amy zioty.’ (Heb. 8:5; 9:9) Ke tamy fotoan̈any Paoly nanoratra tamindro Hebreo aby io efa nisy tempoly arapan̈ahy io. Tamy taon̈o 29 izio nanomboko nisy. Tamy taon̈o io Jesosy natao batisa, voahosotro fan̈ahy masin̈y, avio nanomboko nan̈ano asany ‘pisoron̈obe an̈abo’ tamy tempoly arapan̈ahiny Jehovah tao. c​—Heb. 4:14; Asa. 10:37, 38.

8-9. Eraka Hebreo 7:23-27, nan̈ino tsy mitovy foeky iro pisoron̈obe taminy Israely ndreky Jesosy Kristy, Pisoron̈obe an̈abo?

⁸ Kandindon̈o. Pisoron̈obe nisolo ten̈a vahoaka man̈oloan̈a Zan̈ahary. Arona pisoron̈obe voanalohany taminy Israely. Tamy tran̈olay nitokanan̈a, Jehovah nanendry izy. Fa eraka raha nazavainy Paoly, ‘maro pisoron̈o tsy maintsy nifandimby fotony lan̈iany maty efa tsy afaka ho pisoron̈o eky.’ d (Vakia Hebreo 7:23-27.) Salakady iro pisoron̈obe aby io koa tsy lavorary, ke iro tsy maintsy nan̈ano soron̈o nohony fahotan̈andro. Zen̈y raha maventy tsy mampitovy Jesosy Pisoron̈obe an̈abo ndreky iro pisoron̈obe taminy andrany Israely.

⁹ Ny ten̈a izy. Jesosy Kristy Pisoron̈obentsika. Izy ‘panompo ... amy ten̈a tran̈olay ao, avio Jehovah nan̈orin̈y tran̈olay io fa tsy olo.’ (Heb. 8:1, 2) Paoly nivolan̈a fa Jesosy ‘pisoron̈o velon̈o mandrakizay, ke izy tsisy pandimby.’ Paoly koa nivolan̈a fa Jesosy ‘tsisy loto, tafisaraka amy panota’ avio tsy karaha pisoron̈obe taminy Israely fotony ‘izy tsy mila man̈ano soron̈o isanandra’ nohony fahotan̈anany. Alo ndraiky atsika iziô hikoran̈a momba alitara ndreky soron̈o. Hizahavantsika ohatra ino tsy nampitovy alitara ndreky soron̈o nampiasain̈y tamy fanompoan̈a nataony Jiosy taloha tan̈y ndreky niny Kristianin̈y.

10. Mifan̈itsy aminino ma soron̈o natao taminy alitara varahin̈y?

¹⁰ Kandindon̈o. Tambelan̈a tany fidiran̈a tamy tran̈olay io nisy alitara varahin̈y nan̈anaovan̈a soron̈o biby namian̈a Jehovah. (Eks. 27:1, 2; 40:29) Fa iro soron̈o aby io fo tsy ten̈a nahavita nan̈adoso fahotan̈anolo. (Heb. 10:1-4) Iro soron̈o biby natolotro tsy tapaka tamy tran̈olay masin̈y io mifan̈itsy amy soron̈o araiky hahavita hamafa tanteraka fahotan̈anolombelon̈o.

11. Ino ma alitara nan̈anaovany Jesosy soron̈o ain̈inany? (Hebreo 10:5-7, 10)

¹¹ Ny ten̈a izy. Hainy Jesosy fa antony nandifasany Jehovah izy tambony tany teto han̈amia ain̈inany hatao soron̈o han̈avotan̈a olombelon̈o jiaby. (Mat. 20:28) Ke tamy batisanany, Jesosy nan̈aboaka fa izy von̈ono han̈ano sitrapony Jehovah. (Jaona 6:38; Gal.  1:4) Alitara nanolorany Jesosy ain̈inany io tsy alitara namboarinolombelon̈o, fa izio manondro “sitrapony” Zan̈ahary. Sitrapony Jehovah baka Zanany io han̈ano soron̈o ain̈inany lavorary. Jesosy nan̈ano soron̈o ain̈inany “indraiky fo” baka handrakofan̈a fahotan̈anolo jiaby mino Kristy. (Vakia Hebreo 10:5-7, 10.) Fa mifan̈itsy aminino fo iro raha aby tan̈atiny tran̈olay io? Atsika iziô handiniky zen̈y.

12. Azovy aby afaka niditry taminy efitry tsiaraikiaraiky tamy tran̈olay masin̈y tao?

¹² Kandindon̈o. Mitovy fo raha tan̈atiny tran̈olay masin̈y tao ndreky tempoly naorin̈y ta Jerosalema tafara tatỳ. Tan̈aty tao nisy efitry aroe aby: ‘Toeran̈a Masin̈y’ (na ‘Masin̈y’) ndreky ‘Farany Masin̈y’, avio nisy rido nampisaraka iro efitry aby io. (Heb. 9:2-5; Eks. 26:31-33) Tan̈aty Toeran̈a Masin̈y tao nisy raha fipitrahany jiro volamena, alitara fan̈oroan̈a emboko man̈itry, baka io latabatrany mofo atolotro. ‘Pisoron̈o voahosotro’ fo nahazo niditry tamy Toeran̈a Masin̈y tao han̈ano asany pisoron̈o. (Nom. 3:3, 7, 10) Tamy Farany Masin̈y tao ndraiky nisy vata volamena misy fifan̈ikian̈a, izio man̈ambara fa Jehovah iô. (Eks. 25:21, 22) Pisoron̈obe zaraiky fo nahazo nandeha tambadiky rido tao, ke niditry tamy Farany Masin̈y, indraiky isaka taon̈o, taminy Andra Fandrakofan̈a Fahotan̈a. (Lev. 16:2, 17) Isaka taon̈o, izy niditry tao nitondra liony biby handrakofan̈a fahotan̈anany ndreky niny vahoaka jiaby. Tafara tatỳ, Jehovah nampiasa fan̈ahy masin̈inany han̈azavan̈a ino  ten̈a dikany raha aby tan̈atiny tran̈olay io.​—Heb. 9:6-8.

13. Ino ma mifan̈itsy amy Masin̈y ndreky Farany Masin̈y tamy tran̈olay io?

¹³ Ny ten̈a izy. Pianatra Kristy vitsivitsy fo voahosotro fan̈ahy masin̈y, ke iro manan̈a fifandraisan̈a manokan̈a amy Jehovah. Iro 144000 aby io hiaraka amy Jesosy han̈ano asany pisoron̈o andan̈itry an̈y. (Apok. 1:6; 14:1) Toeran̈a Masin̈y tamy tran̈olay masin̈y io mifan̈itsy amy fananganany Zan̈ahary iro voahosotro aby io hanjary zanany arapan̈ahy ndray iro mbala ambony tany eto. (Rom. 8:15-17) Efitry Farany Masin̈y tamy tran̈olay io ndraiky mifan̈itsy amy lan̈itry, toeran̈a misy Jehovah. ‘Rido’ nampisaraka Toeran̈a Masin̈y ndreky Farany Masin̈y io mifan̈itsy amy vatan̈any Jesosy taminizy mbala olombelon̈o. Izikoa izy mbala tamy vatan̈anany in̈y fo izy tsy afaka niditry tamy lan̈itry, han̈ano asany Pisoron̈obe an̈abo amy tempoly arapan̈ahy. Tamy Jesosy nan̈amia ain̈inany natao soron̈o han̈avotan̈a olombelon̈o in̈y, izy nan̈abian̈a lalan̈a hahafahany voahosotro jiaby hiain̈y andan̈itry an̈y. Fa iro koa mila manan̈a vatan̈a arapan̈ahy baka hahafahandro hahazo kadondro andan̈itry an̈y. (Heb. 10:19, 20; 1 Kor. 15:50) Tafarany Jesosy natsangana tamy maty, izy niditry tamy Farany Masin̈y tamy tempoly arapan̈ahy. Iro voahosotro aby io koa hiaraka aminany ao.

14. Eraka Hebreo 9:12, 24-26, nan̈ino ma tsisy tsaratsarany fomba anompoan̈a Jehovah amy tempoly arapan̈ahy ao?

¹⁴ Ke tsisy tsaratsarany fandaharan̈a nataony Jehovah amy fivavahan̈a madio, miorin̈y amy soropan̈avotan̈a ndreky asany pisoron̈o ataony Jesosy Kristy. Nan̈ino? Pisoron̈obe taminy andrany Israely niditry tamy Farany Masin̈y tamy tran̈olay namboarinolombelon̈o izikoa fa nitondra liony biby natao soron̈o. Jesosy ndraiky niditry ‘tamy lan̈itry foeky’, toeran̈a farany masin̈y, izikoa fa hiboaka man̈oloan̈a Jehovah. Nindesiny tan̈y valerany ain̈inany lavorary nan̈avotan̈a atsika in̈y baka ‘han̈adosoan̈a tanteraka fahotan̈a baka amy soron̈o nataony.’ (Vakia Hebreo 9:12, 24-26.) Tsisy tsaratsarany soron̈o nataony Jesosy in̈y, fotony izin̈y mahavita man̈adoso tanteraka fahotan̈a. Ho hitantsika baka io fa, na man̈anten̈a hiain̈y andan̈itry an̈y atsika na ambony tany eto, atsika jiaby samy afaka manompo Jehovah amy tempolinany arapan̈ahy.

15. Azovy nanompo tamy tokotaniny tran̈olay masin̈y io?

¹⁵ Kandindon̈o. Tamy tran̈olay io nisy tokotany malalaka voakodidin̈y lakoro. Tao nan̈anaovany pisoron̈o aby io asandro. Tamy tokotany io tao nisy alitara varahin̈y maventy fan̈anaovan̈a fan̈atitry iroan̈a, avio nisy kovetibe varahin̈y fasian̈a rano hanasany pisoron̈o aby io ain̈indro alohany iro man̈ano fanompoan̈a masin̈y. (Eks. 30:17-20; 40:6-8) Tamy tempoly aby namboarin̈y tafara tatỳ ndraiky nisy tokotany ambelan̈a. Afaka nitsangana ndreky nanompo Zan̈ahary tao olo nata tsy pisoron̈o.

16. Azovy aby manompo amy tokotany tsiaraikiaraiky amy tempoly arapan̈ahy?

¹⁶ Ny ten̈a izy. Alohany han̈anaovandro asany pisoron̈o miaraka amy Jesosy andan̈itry an̈y, iro voahosotro mbala tavela ambony tany eto mifen̈y tsy mivadiky sady manohy manompo amy tokotany an̈atiny amy tempoly arapan̈ahy. Kovetibe fasian̈a rano tamy tran̈olay ndreky tamy tempoly tao in̈y mampatsiaro raha maventy iro voahosotro aby io ndreky Kristianin̈y jiaby. Tsy ino zen̈y fa iro mila mifen̈y fo madio fitondranten̈a ndreky madio amy lafiny arapan̈ahy. Ke aia fo “vahoaka  be”, olo aby tsy mivadiky sady mifen̈y manohan̈a iro voahosotro rahalahiny Kristy aby io, manompo Jehovah? Apostoly Jaona nahita iro ‘nitsangana man̈oloan̈a sezy fiandrianan̈a ... man̈ano fanompoan̈a masin̈y amy Zan̈ahary matsan̈a alin̈y.’ (Apok. 7:9, 13-15) Ambony tany eto iro man̈ano zen̈y, amy tokotany ambelan̈a amy tempoly arapan̈ahy. Ten̈a man̈ano mersy Jehovah atsika fotony namiany tombontsoa tsisy ambaka izy, ke afaka manompo izy amy tempolinany maventy arapan̈ahy!

17. Ino aby soron̈o azontsika amian̈a Jehovah?

¹⁷ Kristianin̈y jiaby amy zioty manan̈a tombontsoa hampiasa fotoan̈andro ndreky angovondro avio fanan̈anandro hampandihanan̈a asany Fanjakan̈any Zan̈ahary. Karaha nivolan̈iny apostoly Paoly tamy Kristianin̈y hebreo aby in̈y, atsika koa afaka ‘man̈ano soron̈o fideran̈a Zan̈ahary, tsy ino zen̈y fa volan̈a aboakany vava han̈anaovan̈a fan̈ambaran̈a momba an̈aranany aminolo jiaby.’ (Heb. 13:15) Ke amiantsika izy ny farany tsara baka amintsika. Zen̈y an̈aboahantsika fa atsika ten̈a mankasitraka tombontsoa anan̈antsika manompo Jehovah.

18. Eraka Hebreo 10:22-25, ino aby sasany amy raha tôkony hataontsika fo, avio ino raha tsy mila hadin̈antsika foeky?

¹⁸ Vakia Hebreo 10:22-25. Izikoa fa ho tapitry taratasy nalefany taminy Hebreo aby io, Paoly nikoran̈a momba lafiny samihafa amy fanompoan̈a tsy maintsy ataontsika. An̈isanizen̈y iziô mivavaka amy Jehovah, mitory aminolo, miaraka mivory amy fiangonan̈a, avio mifankahery ‘intsaka eky izikoa fa hitantsika fa mahaimarikitry fo andrany [Jehovah].’ Amy faramparany bokiny Apokalypsy ao anjeliny Jehovah mivolan̈a: ‘Zan̈ahary ivavaha!’ (Apok. 19:10; 22:9) Nampodiny indroe aby volan̈a aby zen̈y baka han̈aboahan̈a fa izio ten̈a raha maventy. Ke anò atsika tsy han̈adin̈a foeky iro fahamarin̈ana lalin̈y nianarantsika tato momba tempoly arapan̈ahy maventiny Jehovah. Irarian̈a koa atsika hankasitraka fo tombontsoa tsarabe manompo Zan̈aharintsika be voninahitry io!