Efa taon̈o araiky mandilatra, irô rahalahy tamy Betela nan̈ôrin̈y radiô WBBR ta Staten Island, New York. Irô koa fa baka nanapaka kakazo, irô nan̈ôrin̈y tran̈o maventy hipitrahan’ny mpiasa, baka iô tran̈o hafa han̈ambilan̈a fitaovan̈a. Baka iô izikoa fa vita zen̈y, irô rahalahy aby io nanomboko namory fitaovan̈a “handifasan̈a feo amy radiô.” Fa nisy problemo maromaro ndraiky.

Sarotro mare tamindrô rahalahy aby io nametaka anteny faran’ny maventy tamy toeran̈a io. Izio 91 metara, aviô nila nahanton̈o tan̈elan̈elan’ny kakazo aroe mandeha 61 metara, tsiaraikiaraiky. Tamy voanalohan’ny irô nametaka izio, raha io tsy voatsanganandrô. Fa irô nahatoky fa Jehovah han̈ampy irô, ke vitandrô fo raha io tamy farany. Ho Calvin Prosser, an̈isan’ny niasa tamy tetikasa io: “Izikoa vitanay nanangana izio tamy voanalohany in̈y, zahay nety nitôron̈o: ‘Zahay ten̈a mahay!’” Ke irô rahalahy aby io nidera Jehovah nohon’izy nan̈ampy irô. Fa mbala nisy problemo hafa koa.

Mbala vaovao resaka radiô tamy zen̈y, baka iô mbala sasatra koa tany nandafo fitaovan̈an’izio. Fa, irô rahalahy aby io nahita fitaovan̈a baka nampiasain’olo tsy lavitry tiô. Izio fitaovan̈a fandifasan̈a feo (na émetteur) 500 watts. Baka iô koa irô tsy nivanga mikrô, fa mikrôn’ny telefony tsotra fo nampiasaindrô. Tamin’ny alin̈y araiky zay, fanjava Fevrie, irô tapa-kevitry an̈ohatra hampiasa fitaovan̈a jiaby tsotsotra io. Irô nila programo nalefa, ke irô nihira hira momba Fanjakan̈a io. Nitokiky i Ernest Lowe nikoran̈a raha nandalo tamy zen̈y.  Nikaiky baka i Rutherford Mpitsara, b izikoa fa naharen̈y irô nihira baka tamy radiônany ta Brooklyn, kadiriny 25 kilometara niala tiô.

“Ajanònanarô tsintsin̈y be zen̈y”, ho Rahalahy Rutherford. “Anarô zen̈y karaha miafatrafatra!” Irô rahalahy aby io nen̈anen̈atra ke nivonendrô malaky émetteur io. Fa irô ndraiky ravoravo, fôtony haindrô fa nandeha radiô io ndreky efa pare hampiasain̈a tsara koa.

Tamy 24 Fevrie 1924, nalefa tamy fomba ofisialy fandaharan̈a voanalohany. Nitokana radiô io Rahalahy Rutherford, aviô izy nivolan̈a fa izio “natao hampandrosoan̈a asan’ny fanjakan̈an’i Mesia.” Nivolan̈a koa izy fa “tanjon̈on’ny radiô io han̈ampy olo jiaby na ino na ino finoan̈a misy izy, baka hahatakatra fa miavaka fotoan̈a iain̈antsika iziôty izikoa zahan̈a Baiboly.”

Ten̈a nahomby fandaharan̈a voanalohany io. Nampiasain̈a mare WBBR io tan̈atin’ny 33 taon̈o baka handifasan̈a fandaharan̈a nataon’ny fandaminan̈a.

Nan̈ano fivoriambe ta Columbus, Ohio, irô Mpianatra Baiboly aby io tamy Zie 1924. Nisy solonten̈a baka tamy tany jiaby nan̈aton̈o izio, ke natao tamy fivolan̈ana aby ty kabaro tamizio: Aliman, angiley, arabo, fransay, griky, hongroà, ukrainien, italiain, litoanianin̈y, poloney, russe, aviô skandinavianin̈y. Nalefa tamy radiô programo sasany, aviô nisy gazety araiky tan-toeran̈a nirahin̈y nan̈ano tatitry momba fivoriambe io isan’andra.

Rahalahy ndreky ranabavy nandilatran’ny 5 000 nandeha nitory tamy tanàna io, tamy kamisy 24 Zie. Boky efa ho 30 000 voarasandrô, aviô nisy fampianaran̈a Baiboly andrivony natombokondrô. Nivolan̈a karaha ty Tilikambo Fiambesan̈a: “In̈y andra ten̈a namparavoravo tamy fivoriambe io.”

Niavaka koa tamy joma 25 Zie tamy fivoriambe io. Ten̈a nisy korazy Rahalahy Rutherford namaky fan̈ambaran̈a nivolan̈a raha tsy mety nataondrô mpitondra fivavahan̈a aby io. Karaha taratasy baka amy fitsaran̈a in̈y izio, aviô nivolan̈a irô mpitariky ara-politiky ndreky ara-pivavahan̈a aviô ara-barotro aby io fa “irô tsy vôly misakana olo tsy hahay fandaharan̈a nataon’ny Zan̈ahary baka han̈amezan̈a fiain̈ana olombelon̈o.” Voambara tao koa fa “nanohan̈a Fikambanam-pirenena irô  mpitariky aby io, aviô irô nivolan̈a fa ‘izio ampiasain’ny Zan̈ahary hitondra tany ty.’” Ke irô Mpianatra Baiboly aby io ten̈a nila nisy korazy baka hahavita hanohy hitory hafatra zen̈y amin’olo.

Nan̈ano karakôry vokatran’ny fivoriambe in̈y? Karaha ty volan̈in’ny Tilikambo Fiambesan̈a: “Ten̈a fatatra finoan̈an’ny tafiky helin’ny Tômpo io izikoa fa nan̈aton̈o fivoriambe ta Columbus in̈y. ... Tsy maharesy irô na karakôry angôvo na balan’ny filesidaoro mirehitry mety halefan’ny fahavalo.” Karaha ty ho Leo Claus, an̈isan’ny nan̈aton̈o fivoriambe io: “Efa tsy din̈inay hirasa hafatra io tamy faritaninay izikoa fa vita fivoriambe io.”

Natao pirinty fan̈ambaran̈a nataon’ny Rahalahy Rutherford io aviô titran’ny trakty io Voampanga irô Mpitondra Fivavahan̈a. An-tapitrisany tamizio nanomboko nirasain’ny Mpianatra Baiboly tamy fanjava Oktobra. Tandraraiky Frank Johnson vo baka nirasa izio tamy tanàna hely ta Cleveland, ta Oklahoma. Kanefa, mbala afaka 20 minity vo ho avy mpitory aby io hangala izy. Tsy afaka nijanon̈o niambin̈y tamy tany hitan’olo izy, fôtony nitady izy irô olo neloko tamin’ny hafatra nitoriany io. Ke Rahalahy Johnson tapa-kevitry nisitriky tamy leglizy araiky tsy lavitry tiô. Hitany tao tsisy olo, ke nasiany trakty io tamy Baibolin’olo mpitoriteny tarỳ ndreky tamy sezy tsiaraikiaraiky. Aviô izy niboaka tao malaky. Fa izy mbala nisy fotoan̈a, ke nan̈ano karaha zen̈y koa izy tamy fiangonan̈a aroe aby.

Tafaran’izen̈y, Frank nandeha tamy toeran̈a nifan̈anaovany fotoan̈a tamindrô mpitory hafa aby in̈y. Izy nisitriky tambadiky fivarotan̈a lesansy, sady nizahazaha irô olo nitady izy in̈y. Irô nandalo tiô marin̈y tamy tomabily, fa tsy nahita izy fo. Irô koa fa lôso, navy tiô koa irô mpitory naman’i Frank aby io. Irô baka nitory tsy lavitry tiô, ke nangala izy tamy tomabily. Aviô irô jiaby nandeha.

Karaha ty ho araiky tamindrô rahalahy aby io: “Zahay koa fa niboaka tamy tanàna io nandalo tamindrô leglizy telo io. Nisy olo kadiriny 50 nitsangana nan̈oloan̈a leglizy tsiaraikiaraiky. Sasany namaky trakty io fa sasany ndraiky nan̈aboaka izio tamin’olo mpitoriteny tao. Asa mba nanakôry eky izikoa zahay tatra tao! Nan̈ano mersy Jehovah Zan̈aharinay zahay, fôtony narovany sady nataony nahita fomba hialan̈a tamy fahavalon’ny Fanjakan̈an’ny Zan̈ahary.”

Nasaky nitory koa Mpianatra Baiboly tamy tany hafa tan̈y. Ohatra i Józef Krett, nitory tamy mpifindra monin̈y poloney niasa tamy tany fangadian̈a vato, tamy faritry avaratran’i France. Izy nan̈ano fandaharan̈a han̈ano kabaro ty: “Teteky iô Hatsangana Olo Maty.” Izikoa fa nirasan̈a invitasion irô olo tamy tanàna io, nampitandremin’ny pasitera irô mpivavaka tao baka tsisy handeha han̈aton̈o izio. Kanefa zen̈y edy nahavy olo maro nandeha tan̈y. Nisy olo mandilatran’ny 5 000 nan̈aton̈o kabaro io, an̈isan’izen̈y pasitera io! Nirahin’ny Rahalahy Krett hiaro finoan̈anany pasitera io fa izy tsy nan̈eky. Voazaran’ny Rahalahy Krett aby boky ndreky bokikely jiaby taminany, fôtony olo sakara Volan̈a Zan̈ahary.​—Amosa 8:11.

Nandeha ta Côte-de-l’Or (Ghana amy ziôty) an Afriky, i Claude Brown hitory vaovao tsara. Betibetiky fo efa niparitaka tamy tany io fahamarin̈ana fôtony izy nan̈ano kabaro maromaro ndreky nirasa boky ndreky gazety. Nan̈aton̈o araiky tamy kabaro aby io i John Blankson. Izy tamy zen̈y nianatra baka ho lôso farmasiain. Nalaky hainy fa io fahamarin̈ana. Karaha ty ho John: “Lôso nafana fô mare zaho nohon’ny fahamarin̈ana, ke zaho tsy vôly nikoran̈a momba izio ta lekoly.”

Tandraraiky nandeha tamy leglizy anglikany araiky i John han̈ontany pasitera tao momba  Trinité (Zan̈ahary tokana olo telo), fôtony efa hainy tsarabe fa tsy baka amy Soratra Masin̈y fampianaran̈a io. Niroasin’ny pasitera io izy sady nironton̈iny karaha ty: “Anao tsy Kristianin̈y fa zanakan’ny Devoly. Mialà eto anao!”

John koa fa navy tan-tran̈onany tan̈y, izy nanoratra taratasy tamy pasitera io, nan̈iraka izy han̈azava momba Zan̈ahary tokana olo telo io nan̈oloan̈a olo maro. Fa pasitera io nan̈iraka John handeha amy birôn’ny talen’ny mpampianatra tamy lekolin’olo nianatra ho lôso farmasiain io. Ke mpampianatra io nan̈ontany asa izy ten̈a nanoratra tamy pasitera io marin̈y.

“Ia, tômpoko anao”, volan̈in’i John.

Nirahin’ny mpampianatra io nanoratra taratasy fialan-tsin̈y tamy pasitera io i John. Ke karaha ty nisoratin’i John:

“Tômpoko anao, nirahin’ny mpampianatranay hiala tsin̈y aminao zaho, ary efa vôn̈ono hanoratra taratasy. Han̈eky hiala tsin̈y aminao zaho izikoa anao man̈eky fa diso raha ampianarinao io.”

Gaga mare mpampianatra io ke nan̈ontany: “A Blankson! Ten̈a io raha tianao halefa an̈y?”

“Ia, tômpoko anao. Io fo raha mety soratiko aminany.”

“Anao ho voaroaka amin’io ay! Pasiteran’ny fivavahan̈a tohan̈an’ny fanjakan̈a ataonao karaha io, ke anao mbala mieritreritry ho tafijanon̈o amy lekolim-panjakan̈a ty?”

“A tômpoko anao, ... izikoa anao efa mampianatra zahay in̈y, ke misy raha tsy mazava aminay, zahay ma tsy mahazo man̈ontany?”

“Mahazo ke.”

“Mira zen̈y fo kony raha nataoko io, tômpoko anao ay! Ramose in̈y nampianatra zahay momba Baiboly, ke zaho nan̈ontany izy. Ke izikoa izio tsy voavaliny, nan̈ino ma zaho tôkony hiala tsin̈y aminany?”

Ke tsy niroasin̈y i Blankson, aviô tsy nandefa taratasy fialan-tsin̈y.

Namintin̈y asa fanompoan̈a tamy taon̈o in̈y Tilikambo Fiambesan̈a. Karaha ty voakoran̈a tao: “Atsika ten̈a afaka mivolan̈a karaha Davida karaha ty: ‘Zaho hamianao angôvo hindesin̈y miady.’ (Salamo 18:39) Ten̈a nankahery taon̈o ty fôtony hitantsika foeky tan̈an’ny Tômpo. ... Irô olo ten̈a nanokan-ten̈a taminany ... ravoravo mare nitory.”

Irô rahalahy aby io nieritreritry han̈itatra fitorian̈a baka tamy radiô, tamy faramparan’ny taon̈o in̈y. Ke nisy tran̈o vaovao naôrin̈y tsy lavitry Chicago. WORD nikahian̈a radiô vaovao io. Nety tsarabe raha zen̈y. Fitaovan̈a fandifasan̈a feo 5 000 watts nampiasain̈y tamy WORD io. Ke afaka naharen̈y hafatra momba Fanjakan̈a io aby olo tamy toeran̈a lavitry mare, nata firaka tavaratra ta Kanada tan̈y.

Tamy taon̈o 1925, nisy fan̈azavan̈a vaovao namparavoravo mare irô Mpianatra Baiboly aby io momba Apokalypsy toko faha-​12. Sasany tafintohin̈y nohon’ny fan̈azavan̈a vaovao io. Fa nisy olo maro koa ravoravo fôtony lôso azondrô tsarabe raha mandalo an-dan̈itry an̈y, ndreky vokatran’izio amy vahoakan’ny Zan̈ahary ambony tany atỳ.