LAHATSORATRA FIANARAN̈A 42
HIRA 103 Lehilahy ho Fanomezana Ireo Mpiandry
Aboaha fa Ankasitrahinao irô ‘Lelahy Natao Kadô’ aby Io
“Izikoa izy fa nanonga tan̈abo tan̈y ..., izy nan̈amia lelahy maro nataony kadô.”—EFES. 4:8.
HEVITRY HIDINIHIN̈Y
Akôry ataondrô mpikarakara fiangonan̈a, anti-pan̈ahy, ndreky mpiandraikitrin’ny faritry aby io man̈ampy atsika, baka iô akôry han̈aboahantsika fa atsika mankasitraka raha ataondrô lelahy tsy mivadiky aby io?
1. Ino aby sasany amy kadô namezan’i Jesosy atsika?
TSISY olombelon̈o mahavita man̈ampy atsika mandilatra Jesosy. Tamin’izy tambony teto, izy natetiky nan̈ampy olo ke nan̈ano fahagagan̈a. (Lioka 9:12-17) Fa ain̈inany kadô faran’ny maventy namiany atsika. (Jaona 15:13) Aviô rango izy nivilômin̈y, izy mbala manohy man̈ampy atsika fo. Erakan’ny nampan̈antinainy, izy nangataka tamy Jehovah handatsaka fan̈ahy masin̈y, hampianaran̈a ndreky hankahirezan̈a atsika. (Jaona 14:16, 17, l.p.a.; 16:13) Mampiasa fivorian’ny fiangonan̈a koa Jesosy han̈amezan̈a raha ilaintsika, baka atsika hahavita hampianatra olo eran-tany.—Mat. 28:18-20.
2. Azôvy aby ma an̈isan’ny ‘lelahy natao kadô’, koran̈in’ny Efesianina 4:7, 8?
2 Mbala misy kadô hafa koa namezan’i Jesosy atsika. Apostoly Paoly nanoratra fa Jesosy koa fa nanonga tan-dan̈itry tan̈y, izy nan̈amia ‘lelahy natao kadô.’ (Vakia Efesianina 4:7, 8.) Paoly nan̈azava fa Jesosy nan̈amia kadô io, baka hikarakaran̈a fiangonan̈a kristianin̈y amy fomba maro. (Efes. 1:22, 23; 4:11-13) Amy ziôty, an̈isan’ny ‘lelahy natao kadô’ io irô mpikarakara fiangonan̈a, anti-pan̈ahy amy fiangonan̈a ndreky mpiandraikitrin’ny faritry. a Marin̈y fa lelahy aby io tsy lavorary, ke mety han̈ano hadisovan̈a. (Jak. 3:2) Fa Jesosy Kristy Tômpontsika mampiasa irô io han̈ampian̈a atsika. Irô io kadô namezany atsika.
3. Hazavà amin’ny ohatra karakôry ahafahantsika jiaby manohan̈a asa ataondrô ‘lelahy natao kadô’ aby io.
3 Jesosy nanendry irô ‘lelahy natao kadô’ aby io hankahirezan̈a fiangonan̈a. (Efes. 4:12) Fa atsika jiaby ndraiky afaka man̈ampy irô, baka irô hahavita tsara andraikitry maventy be io. Ty baka misy ohatra: Sasany amintsika fo baka iziôty man̈ôrin̈y Tran̈o Fivorian̈a. Fa olo sasany ndraiky manohan̈a irô ke mitahitahy irô man̈ôrin̈y izio, mitondra hanin̈y amindrô, na man̈ampy irô amy fomba hafa koa. Karaha zen̈y koa, atsika jiaby samy mety manohan̈a ezaka mare ataon’ny mpikarakara fiangonan̈a, anti-pan̈ahy ndreky mpiandraikitrin’ny faritry, amy raha volan̈intsika ndreky raha ataontsika. Alô atsika handiniky ino aby hatsaran̈a azontsika baka amin’ny asa mare ataondrô rahalahy aby io. Baka iô, akôry han̈aboahantsika fa atsika mankasitraka irô ndreky Jesosy nan̈amia irô ‘lelahy natao kadô’ aby io.
IRÔ MPIKARAKARA FIANGONAN̈A ABY IO “MAN̈AMPY OLO”
4. Ino aby ma raha nataondrô mpikarakara fiangonan̈a tamy taonjato voanalohany, ‘nan̈ampian̈a olo’?
4 Tamy taonjato voanalohany, nisy rahalahy sasany navoatendry ho mpikarakara fiangonan̈a. (1 Tim. 3:8) Mety irô io olo nivolan̈in’i Paoly fa “man̈ampy olo.” (1 Kor. 12:28) Ten̈a nilain̈y asandrô io, baka hahavy irô anti-pan̈ahy aby io hahavita hifantoko tamin’ny asa fampianaran̈a ndreky fiambesan̈a ôndrikôndriky. Mpikarakara fiangonan̈a aby io nety ho nan̈ampy tamy fan̈anaovan̈a dika mitovy Soratra Masin̈y, na koa nety nivanga raha nilain̈a tamizio.
5. Ino sasany amy raha ataon’ny mpikarakara fiangonan̈a amy ziôty?
5 Diniha baka sasany amindrô raha maro maventy ataondrô mpikarakara fiangonan̈a aby io, amy fiangonan̈anarô ao. (1 Pet. 4:10) Irô mety mikarakara kôntin’ny fiangonan̈a, na faritany, man̈afatra boky ndreky gazety, mpikarakara feo ndreky video, na mpikarakara mpan̈atriky, na man̈ampy amy fikobabian̈a Tran̈o Fivorian̈a. Irô asa jiaby zen̈y ilain̈a aby, baka hampandeha tsara fiangonan̈a. (1 Kor. 14:40) Tsy zen̈y fo fa mpikarakara fiangonan̈a aby io koa irahan̈a man̈ano anjara amy Fivorian̈a Momba Fiain̈anantsika Ndreky Fanompoan̈a, baka iô man̈ano kabaro natao nin’olo jiaby. Mpikarakara fiangonan̈a koa mety tindren̈y han̈ampy mpiandraikitrin’ny andiam-pitory. Ndraikindraiky koa mpikarakara fiangonan̈a mahay, irahan̈a miaraka amin’ny anti-pan̈ahy, man̈ano fitsidihan’ny mpiandry.
6. Ino antony sasany mahavy atsika hankasitraka asa ataon’ny mpikarakara fiangonan̈a?
6 Amy karakôry asandrô mpikarakara fiangonan̈a aby io ten̈a mahatsara fiangonan̈a? Beberly, b ranabavy araiky mipetraka a Bolivie nivolan̈a: “Baka amin’ny asandrô io ahavitako mihira, mamaly ten̈y, maharen̈y tsara kabaro, baka iô mahazo fianaran̈a baka amy video ndreky irô sary aby io! Irô koa man̈ano raha hahavy irô olo man̈aton̈o fivorian̈a ho voaro tsara ndreky man̈ampy olo tsy afaka mandeha mivory han̈araka fivorian̈a amy vidéoconférence! Baka iô izikoa fa vita fivorian̈a, irô mitariky olo han̈adio, mikarakara kônty ndreky mangala antoko fa manan̈a boky ndreky gazety atsika. Ke zaho mankasitraka irô mare.” Karaha ty ho Leslie, vadin’ny anti-pan̈ahy araiky a Kolombia an̈y: “Ten̈a mila irô mpikarakara fiangonan̈a aby io vadiko han̈ano andraikitry isan-karazany. Izikoa tsisy irô io, izy sahiran̈a mare. Zaho ten̈a mankasitraka fahazotoan̈andrô ndreky fahavon̈osan̈andrô han̈ampy.” Azo antoko fa karaha zen̈y koa raha tsapanao.—1 Tim. 3:13.
7. Akôry han̈aboahantsika fa atsika mankasitraka irô mpikarakara fiangonan̈a aby io? (Zahava koa sary.)
7 Atsika ndray mankasitraka irô mpikarakara fiangonan̈a aby io an̈aty fôntsika an̈y, Baiboly mandrisiky atsika karaha ty: “Aboaha fa anarô mahay mankasitraka.” (Kol. 3:15) Krzysztof, anti-pan̈ahy araiky a Failandy, nan̈aboaka fankasitrahan̈anany karaha ty: “Zaho mandefa karty na mesazy misy andininy baka amy Baiboly ndreky mivolan̈a raha voafaritry tsara nataon’ny mpikarakara fiangonan̈a araiky nankahery zaho, na nan̈ino zaho mankasitraka fanompoan̈anany.” Pascal ndreky Jael mipetraka a Nouvelle-Calédonie ndraiky matetiky mivavaka nindrô mpikarakara fiangonan̈a aby io. Pascal nivolan̈a: “Tatotato zay, zahay nivavaka mare nindrô mpikarakara fiangonan̈a aby io, man̈ano mersy Jehovah nan̈amia irô, ndreky mangataka Jehovah tsy hiala irô ndreky han̈ampy irô.” Jehovah mitandren̈y vavaka karaha zen̈y, ke mahazo hatsaran̈a maro fiangonan̈a.—2 Kor. 1:11.
IRÔ ANTI-PAN̈AHY AMINARÔ “MIASA MARE”
8. Nan̈ino ma Paoly nivolan̈a fa ‘niasa mare’ irô anti-pan̈ahy tamy taonjato voanalohany? (1 Tesalonianina 5:12, 13)
8 Irô anti-pan̈ahy tamy taonjato voanalohany tan̈y niasa mare nin’ny fiangonan̈a. (Vakia 1 Tesalonianina 5:12, 13; 1 Tim. 5:17) Irô ‘nitariky’ tamy fiangonan̈a, ke tafiditry amy zen̈y mitariky fivorian̈an’ny fiangonan̈a, baka iô koa anti-pan̈ahy jiaby mangala fanapahan-kevitry amy fiangonan̈a. Irô koa ‘nan̈anatra’ irô rahalahy ndreky ranabavy aby io, ke nan̈amia torohevitry voafaritry tsara ndreky feno fitiavan̈a, baka hiarovan̈a fiangonan̈a. (1 Tes. 2:11, 12; 2 Tim. 4:2) Irô rahalahy aby io koa niasa mare han̈amezan̈a raha nilain’ny fianakavian̈andrô, sady nan̈ampy fianakavian̈andrô hatanjaka ara-pan̈ahy fo.—1 Tim. 3:2, 4; Tit. 1:6-9.
9. Ino sasany amin’ny andrakitrin’ny anti-pan̈ahy aby io amy ziôty?
9 Miasa mare koa irô anti-pan̈ahy amy ziôty. Irô mpitory vaovao tsara. (2 Tim. 4:5) Irô mafana fô mitory ke ten̈a ohatra tsara, mandamin̈y asa fitorian̈a amy faritry misy irô, baka iô koa mampiofan̈a atsika hitory ndreky hahay hampianatra. Irô koa mpitsara mamindra fô ndreky tsy man̈avakavaka. Ke izikoa misy olo araiky man̈ano fahotan̈a maventy, irô anti-pan̈ahy aby io mifen̈y man̈ampy izy hihavan̈a ndraiky amy Jehovah. Fa irô koa mitandrin̈y baka han̈ano raha hampadio fiangonan̈a fo. (1 Kor. 5:12, 13; Gal. 6:1) Ny ten̈a maventy, irô anti-pan̈ahy aby io mpiambin̈y ôndrikôndriky. (1 Pet. 5:1-3) Irô man̈ano kabaro voaoman̈a tsara, mifen̈y hahay olo tsiaraikiaraiky an̈atin’ny fiangonan̈a, aviô man̈ano fitsidihan’ny mpiandry. Misy anti-pan̈ahy sasany koa man̈ampy amy fan̈oren̈ana ndreky fikobabian̈a Tran̈o Fivorian̈a, sasany mikarakara fivoriambe, baka iô man̈ano asan’ny Komity Mifandray Amin’ny Hopitaly na Antokona Mpamangy Marary. Miasa mare irô anti-pan̈ahy aby io ikarakaran̈a atsika!
10. Ino antony sasany mahavy atsika mankasitraka irô anti-pan̈ahintsika miasa mare aby io?
10 Jehovah efa nivolan̈a fa hisy mpiambin̈y ôndrikôndriky hikarakara atsika, ke atsika “tsy havozo eky ndreky tsy hangôrohôro.” (Jer. 23:4) Johanna, ranabavy araiky a Failandy an̈y ten̈a nahatsapa fa marin̈y volan̈a aby zen̈y, tamy mamany narary mare. Ho izy: “Sarotro taminaka hikoran̈a raha an̈aty fônaka tamin’olo. Fa nisy anti-pan̈ahy tsy fankazatra zaho zay nahari-draha mare taminaka. Izy nan̈ano vavaka, ndreky nan̈amia toky zaho fa Jehovah ten̈a tia zaho. Tsy ten̈a azoko onon̈o ndraiky raha nivolan̈iny, fa raha nazoko onon̈o fo zaho nahatsiaro kalma. Zaho matoky fa Jehovah nandefa izy han̈ampy zaho, tamy fotoan̈a nilavako izy tsarabe.” Ino koa raha efa nataondrô anti-pan̈ahy aby io taminao?
11. Akôry han̈aboahantsika fa atsika mankasitraka irô anti-pan̈ahy aby io? (Zahava koa sary.)
11 Tian’i Jehovah atsika hankasitraka anti-pan̈ahy aby io baka an̈atin’ny fôntsika, “nohon’ny asa ataondrô.” (1 Tes. 5:12, 13) Henrietta mipetraka a Failandy an̈y koa nivolan̈a: “Anti-pan̈ahy aby io vôn̈ono han̈ampy olo. Fa zen̈y tsy mivolan̈a fa irô manan̈a fotoan̈a ndreky matanjaka be, na tsisy raha sarotro foeky atrefindrô. Ndraikindraiky ho zaho amindrô: ‘Anarô anti-pan̈ahy ten̈a tsara fan̈ahy. Zaho raha zisty hivolan̈a zen̈y fo.’” Karaha ty koa nivolan̈in’i Sera, ranabavy araiky a Turquie: “Irô anti-pan̈ahy aby io koa mila hankahirezin̈y baka hahavita tsarabe hanohy fo asandrô. Ke atsika mety manoratra karty amian̈a irô, mikaiky irô hihina an-tran̈ontsika an̈y, aviô miaraka mitory amindrô.” Misy anti-pan̈ahy tianao hankasitrahin̈y mare ma an̈y, nohon’ny asa mafy ataony? Aboaha izy fa anao ten̈a mankasitraka raha ataony.—1 Kor. 16:18.
Anao mety mankahery anti-pan̈ahy aby io baka hahavitandrô manohy andraikitrindrô (Zahava fehintsoratra 7, 11, 15)
IRÔ MPIANDRAIKITRIN’NY FARITRY ABY IO MANKAHERY
12. Ino fandaharan̈a natao hankahirezan̈a fiangonan̈a tamy taonjato voanalohany? (1 Tesalonianina 2:7, 8)
12 Kristy Jesosy koa nanendry lelahy sasany han̈ampy fiangonan̈a amy fomba hafa. Izy nampiasa irô anti-pan̈ahy ta Jerosalema nan̈iraka Paoly, Barnabasy ndreky olo hafa koa, han̈ano asan’ny mpitety faritany. (Asa. 11:22) Nan̈ino? Karaha mpikarakara fiangonan̈a ndreky anti-pan̈ahy fo, hankahery fiangonan̈a. (Asa. 15:40, 41) Irô lelahy aby io nan̈ano sôron̈o maro baka hahavitan̈a asa zen̈y. Ndraikindraiky koa irô nirisiky fahin̈anandrô foeky hampianaran̈a ndreky hankahirezan̈a olo.—Vakia 1 Tesalonianina 2:7, 8.
13. Ino sasany amin’ny andraikitrin’ny mpiandraikitrin’ny faritry?
13 Irô mpiandraikitrin’ny faritry aby io mifindrafindra. Sasany amindrô man̈ano dia an-jatony kilometara, mandeha mitsidiky fiangonan̈a. Isaka herin̈iandra, mpiandraikitrin’ny faritry araiky man̈ano kabaro maromaro, man̈ano fitsidihan̈a ôndrikôndriky, baka iô mitariky fivorian’ny mpisava lalan̈a, fivorian’ny anti-pan̈ahy, baka iô fivorian̈a alohan’ny fanompoan̈a. Izy man̈oman̈a kabaro, aviô mandamin̈y fivoriamben’ny faritry ndreky vondrom-paritry. Izy koa mampianatra amy Sekolin’ny Mpisava Lalan̈a, ndreky mandamin̈y fivorian̈a manokan̈a miaraka amy mpisava lalan̈a, amy fivoriamben’ny faritry. Aviô izy koa mandamin̈y raha hafa maventy, ndraikindraiky izio asa meky irahin’ny birôn’ny sampan̈a ataony.
14. Ino aby antony sasany mahavy atsika mankasitraka irô mpiandraikitrin’ny faritry miasa mafy aby io?
14 Ino hatsaran̈a azon’ny fiangonan̈a baka amin’ny asa mafy ataon’ny mpiandrakitrin’ny faritry? Karaha ty ho rahalahy araiky baka a Turquie, momba asa ataondrô mpiandraikitry mpitety faritany aby io: “Isaka fitsidihan̈a ataondrô, mandrisiky zaho handany fotoan̈a han̈ampian̈a irô rahalahy ndreky ranabavy aby io. Maro mpiandrakitrin’ny faritry efa tôjy zaho, fa tsisy tamindrô nahavy zaho nahatsapa fa irô sarotro atôn̈iny na maro asa loatra.” Johanna, araiky nikoran̈intsika taloha tarỳ in̈y, niaraka nitory tamy mpiandraikitrin’ny faritry, fa irô tamy zen̈y tsy tôjy olo foeky. Fa ndray zen̈y, karaha ty ho Johanna: “Mbala tsaroako fo fotoan̈a niarahanay nanompo in̈y. Rahavaviko aroe nifindra lavitry, ke zaho ngoma irô mare. Fa mpiandraikitrin’ny faritry io nankahery zaho mare ndreky nan̈ampy zaho hahita fa amy ziôty atsika mety tsy afaka hiaraka hipetraka amin’ny havantsika ndreky kamaradintsika. Fa amy donia vaovao atsika hanan̈a fotoan̈a mahampy hiarasan̈a amindrô.” Maro amintsika koa manan̈a raha tsara hahatsiarovan̈a irô mpiandraikitrin’ny faritrintsika aby io.—Asa. 20:37–21:1.
15. a) Eraka 3 Jaona 5-8, akôry mety han̈aboahantsika fa atsika mankasitraka irô mpiandraikitrin’ny faritry aby io? (Zahava koa sary.) b) Nan̈ino atsika tôkony hankasitraka vadindrô rahalahy voatendry aby io, baka iô akôry han̈anaovantsika zen̈y? (Zahava efajoro “ Tsarova Vadindrô.”)
15 Apostoly Jaona nandrisiky Gaio handray tsara irô rahalahy nitsidiky aby io ndreky “hikarakara diandrô mifan̈araka amin’ny itiavan’ny Zan̈ahary izy.” (Vakia 3 Jaona 5-8.) An̈isan’ny fomba araiky han̈anaovantsika raha zen̈y, mikaiky mpiandrakitrin’ny faritry hihina amintsika. Fomba hafa koa, manohan̈a fivorian̈a alohan’ny fanompoan̈a an̈atin’ny fitsidihan̈a ataony io. Leslie, nikoran̈intsika taloha tarỳ in̈y koa nahita fomba hafa an̈aboahany fankasitrahan̈a irô. Ho izy: “Zaho mivavaka, baka Jehovah hikarakara raha ilaindrô. Zahay fivadiany koa manoratra taratasy amindrô, mivolan̈a amindrô fa ten̈a nan̈ampy zahay fitsidihan̈a ataondrô io.” Aleva onon̈o koa fa irô mpiandraikitrin’ny faritry aby io mba misy problemo ndreky mahay kajo karaha atsika fo. Ndraikindraiky irô marary, miasaloha, ndreky kivy foeky koa. Ke mety ho valin’ny vavaka ataon’ny mpiandraikitrin’ny faritrinarô, volan̈a feno hatsaram-pan̈ahy na fan̈amezan̈a hely ataonao!—Ohab. 12:25.
ATSIKA MILA ‘IRÔ LELAHY NATAO KADÔ’ ABY IO
16. Eraka Ohabolana 3:27, ino aby fan̈ontanian̈a tsara iritriretin’ny rahalahy aby io?
16 Eran-tany, mbala mila rahalahy maro hanompo, han̈ano asandrô ‘lelahy natao kadô’ aby io. Ke izikoa anao rahalahy vita batisa, asa “anao mbala afaka man̈ampy”? (Vakia Ohabolana 3:27.) Anao ma vôn̈ono hahafeno fepetra hanjary mpikarakara fiangonan̈a? Fa izikoa ndraiky anao efa mpikarakara fiangonan̈a, anao ma mifen̈y hanjary anti-pan̈ahy? c Anao ma mety man̈ano fiovoan̈a amy fiain̈ananao, baka hahavita han̈ano Sekolin’ny Mpitory Ilay Fanjakana? Sekoly io han̈ampy anao ho azon’i Jesosy hampiasain̈a tsarabe. Fa izikoa ndraiky anao mahatsapa fa mbala tsy mahafeno fepetra, mivavaha amy Jehovah. Angataha fan̈ahy masin̈inany han̈ampy anao, baka anao hahavita zay andraikitry ampan̈anaovin̈y anao.—Lioka 11:13; Asa. 20:28.
17. Irô ‘lelahy natao kadô’ aby io man̈aboaka fa Mpanjaka karakôry Jesosy Kristy?
17 Irô lelahy nitindren’i Jesosy hatao ‘lelahy natao kadô’ aby io man̈aboaka fa izy ten̈a mitariky atsika amin’ny andra farany iziôty. (Mat. 28:20) Ke tsy ravoravo ma anao, atsika manan̈a Mpanjaka be fitiavan̈a sady tsy matity ke man̈amia atsika irô rahalahy aby io hikararaka raha ilaintsika? Ke mifen̈a hitady fomba han̈aboahan̈a fa anao ten̈a mankasitraka irô lelahy miasa mare aby io. Aza adin̈a foeky koa man̈ano mersy Jehovah, fôtony baka aminany “fan̈amezan̈a tsara ndreky fan̈amezan̈a lavorary jiaby.”—Jak. 1:17.
HIRA 99 Vavolombelona Maro
a Mbala an̈isan’ny ‘lelahy natao kadô’ aby io koa irô anti-pan̈ahy an̈isan’ny Filan-kevi-pitantan̈ana, irô mpan̈ampy amy Filan-kevi-pitantan̈ana, irô an̈isan’ny Komitin’ny Sampan̈a, baka iô irô anti-pan̈ahy man̈ano karazan̈a fanompoan̈a hafa.
b Nivoan̈a an̈aran̈a sasany.
c Izikoa anao tihahita fan̈azavan̈a karakôry hahavy anao hanjary mpikarakara fiangonan̈a na anti-pan̈ahy, zahava lahatsoratra “Anarô Rahahaly, Mifen̈y ho Mpikarakara Fiangonan̈a ma Anarô?” baka iô “Anarô Rahalahy, Mifen̈y Hanjary Anti-pan̈ahy ma Anarô?” amy Tilikambo Fiambesan̈a Novambra 2024.
