LAHATSORATRA FIANARAN̈A 43
HIRA 90 Andao Isika Hifampahery
Akôry Atao Izikoa Misalasala?
“Aleva antoko aby raha jiaby.”—1 TES. 5:21.
HEVITRY HIDINIHIN̈Y
Ino raha mety hataontsika, izikoa fisalasalan̈antsika misy vokany amy fanompoantsika Jehovah?
1-2. a) Ino aby raha mety hampisalasala mpanompon’i Jehovah? b) Ino raha hidinihintsika amy lahatsoratra ty?
ATSIKA jiaby io na tanora na matoe ndraikindraiky misalasala a tsao atsika efa tsy valera amy Jehovah eky na misalasala amy fanapahan-kevitry nataontsika taloha tan̈y. Ohatra, iritrireta tanora Vavolombelon̈on’i Jehovah araiky misalasala tsao izy tsy jiren’i Jehovah, ke misalasala izy han̈ano batisa. Na koa, misy rahalahy araiky tamy mbala tanora nifidy nan̈ano fanompoan̈a Jehovah voalohan-toeran̈a tamy fiain̈ananany, fa tsy nan̈ano asa be karama. Fa iziôty izy sahiran̈a, ke misalasala izy tsao tsy nety safidinany in̈y. Iritrireta koa ranabavy araiky efa matoe ke efa tsy matanjaka eky. Mety ho kivy izy fôtony efa tsy mahavita karaha taloha eky. Asa anao mba efa navy nan̈ontany: ‘Jehovah ma ten̈a mijery zaho? Tsy matiantoko edy zaho nan̈ano sôron̈o nin’i Jehovah in̈y? Mbala misy raha ilàn’i Jehovah zaho edy va?’
2 Izikoa fan̈ontanian̈a aby zen̈y tsy voavaly, mety hisy vokany amy fanompoan̈antsika raha zen̈y. Ke amy lahatsoratra ty atsika handiniky, nan̈ino torolalan̈a amy Baiboly han̈ampy atsika izikoa atsika misalasala: 1) tsao Jehovah tsy mijery atsika, 2) tsao tsy nety fanapahan-kevitry nataontsika taloha tan̈y, na 3) tsao atsika efa tsy ilain’i Jehovah eky.
IZIKOA ATSIKA MISALASALA, INO RAHA METY HAN̈AMPY?
3. Ino raha araiky tôkony hataontsika izikoa atsika misalasala?
3 Fomba araiky an̈adosoan̈a fisalasalan̈a io, fan̈anaovan̈a fikarohan̈a amy Volan̈an’ny Zan̈ahary. Izikoa atsika man̈ano zen̈y, hahaiho fatatra fo finoan̈antsika ndreky fifandraisantsika amy Jehovah, ke atsika ‘hiôrin̈y tsara amy finoan̈a.’—1 Kor. 16:13.
4. Akôry ‘hangalantsika antoko raha jiaby’? (1 Tesalonianina 5:21)
4 Vakia 1 Tesalonianina 5:21. Aleva onon̈o fa Baiboly io mandrisiky atsika ‘hangala antoko raha jiaby.’ Akôry han̈anaovantsika zen̈y? Izikoa misy raha mampisalasala atsika, atsika mila mizaha, ino raha koran̈in’ny Baiboly momba izio. Ohatra misy tanora araiky ziôty misalasala tsao Jehovah tsy ten̈a mikarakara izy. Ke tôkony hambelany karaha io fo ma izio? Ehe, izy tôkony ‘hangala antoko raha jiaby’ ke hizaha, ino hevitrin’i Jehovah momba raha zen̈y.
5. Akôry hahaizantsika hevitrin’i Jehovah momba raha mampisalasala atsika?
5 Atsika koa fa mamaky Baiboly, mira “maharen̈y” Jehovah mikoran̈a amintsika fo. Fa izikoa tiantsika hahay hevitrin’i Jehovah momba raha mampisalasala atsika, tsy ampy izikoa mamaky Baiboly fo. Mila ataontsika mifan̈araka amy foto-kevitry mampisalasala atsika io famakian̈a Baiboly ataontsika ndreky raha ianarantsika. Fa baka atsika hahavita zen̈y, mila man̈ano fikarohan̈a amy boky ndreky gazety aboakan’ny fandaminan̈an’i Jehovah atsika. (Ohab. 2:3-6) Mety mivavaka amy Jehovah koa atsika, mangataka izy hitariky atsika amy fikarohan̈a ataontsika ndreky han̈ampy atsika hahita hevitrinany momba izio. Aviô, atsika mety mizaha irô torolalan̈a amy Baiboly ndreky fan̈azavan̈a mety arehan̈a mifan̈araka amy raha mampiasaloha atsika io. Mahatsara atsika koa mamaky tantaran’olo amy Baiboly efa tôjy problemo karaha nintsika io.
6. Akôry han̈ampian’ny fivorian̈a atsika handresy raha mampisalasala atsika?
6 Fivorian̈antsika koa an̈isan’ny fomba araiky ‘harin̈esantsika’ Jehovah mivolan̈a amintsika. Izikoa atsika mivory tsy tapaka, mety haharen̈y hevitry koran̈in’ny mpan̈ano kabaro na valin-teny amezan’ny mpan̈atriky, ke mety hahavaly tsarabe fan̈ontanian̈antsika. (Ohab. 27:17) Fa atsika iziô ndraiky handiniky, ino aby raha mety ataontsika amindrô raha voafaritry tsara mety hampisalasala atsika ty.
IZIKOA ANAO MISALASALA TSAO TSY JIREN’I JEHOVAH
7. Ino fan̈ontanian̈a mety apetrakan’olo sasany?
7 Asa anao mba efa nan̈ontany: ‘Jehovah ma ten̈a mijery zaho?’ Izikoa baka anao mahatsapa tsisy dikany, ho sarotro aminao ho lôso kamaradin’i Jehovah Mpamôron̈o raha jiaby. Davida koa fa navy tatran’ny raha karaha zen̈y. Gaga izy izikoa fa nieritreritry fa Jehovah io mijery atsika olombelon̈o ankitin̈y. Ke izy nan̈ontany: “Ino ma olombelon̈o zen̈y Jehovah ke ho azonao onon̈o, aviô ino ma zanakan’olombelon̈o mety maty zen̈y ke handeha jirenao?” (Sal. 144:3) Aia hahitanao valin’ny fan̈ontanian̈a zen̈y?
8. Eraka 1 Samoela 16:6, 7, 10-12, ino raha ten̈a zahavan’i Jehovah amin’olo?
8 Baiboly mampianatra atsika fa jiren’i Jehovah nata olo tsy asian’olo fôtiny. Ohatra, Jehovah nan̈iraka Samoela nandeha tan-tran̈on’i Jese tan̈y, handeha han̈ôsotro araiky tamindrô zanany lelahy aby io, hatao mpanjakan’Israely fan̈araka. Jese nikaiky fito tamindrô zanany lelahy valo aby io, hizahan’i Samoela, ke Davida zaraiky fo tsy tan̈atiny. Izy baka farany hely tamindrô. b Fa kanefa Davida edy nifidin’i Jehovah. (Vakia 1 Samoela 16:6, 7, 10-12.) Hitan’i Jehovah baka fa Davida io tsaiky lelahy ten̈a tia izy.
9. Nan̈ino anao matoky fa Jehovah ten̈a tia anao? (Zahava koa sary.)
9 Diniha akôry nan̈aboahan’i Jehovah fa izy ten̈a mijery anao. Izy man̈amia torohevitry anao mifan̈araka amy raha ilainao. (Sal. 32:8) Akôry hahavitany zen̈y izikoa anao tsy hainy tsarabe? (Sal. 139:1) Aviô izikoa anao man̈araka torohevitrin’ny Baiboly ndreky fomba nan̈ampiany anao, ho resy lahatra anao fa Jehovah mitahy anao. (1 Tan. 28:9; Asa. 17:26, 27) Hitan’i Jehovah koa anao man̈ano erakan’ny vitanao manompo izy ndreky man̈araka raha volan̈iny. Hitany koa irô toetry tsaranao aby io ke izy tihanjary kamaradinao. (Jer. 17:10) Fa tiany koa anao han̈eky hikamarady aminany.—1 Jaona 4:19.
“Izikoa anao mitady [Jehovah], hataony raha hahitanao izy.” —1 Tan. 28:9 (Zahava fehintsoratra 9) c
ANAO KOA MISALASALA TSAO TSY NETY SAFIDY NATAONAO
10. Izikoa atsika mandiniky fanapahan-kevitry nataontsika taloha tan̈y, ino fan̈ontanian̈a mety handalo an̈atin’ny jerintsika?
10 Izikoa fa mandeha taon̈o, olo sasany mety hisalasala tsao tsy nety safidy nataony taloha tan̈y. Irô baka mety nanapa-kevitry niala tamy asa tsara, aviô tsy nan̈eky nan̈ano asa be karama baka hahavita hampitombo fanompoan̈a. Fa baka tiô nandeha taon̈o, mety efa ampolon’ny taon̈o. Irô amy zay mahita namandrô karaha be vola ndreky karaha miadan̈a. Ke vokany, irô mety hieritreritry: ‘Tsao tsy nety safidy nataoko hampitombo fanompoan̈a in̈y ay? Na tsao mba tôkony nataoko fo asa be karama in̈y?’
11. Nan̈ino ma mpanoratra Salamo faha-73 kivy?
11 Izikoa karaha zen̈y raha mampisalasala anao, diniha raha tsapan’ny mpanoratra Salamo faha-73. Hitany baka irô olo tsy nanompo Jehovah aby io karaha botrabotra, mpan̈arivo, aviô karaha tsisy problemo foeky tamy fiain̈anandrô. (Sal. 73:3-5, 12) Izikoa izy fa nizaha irô io ndreky irô karaha nahômby tamy fiain̈ana io, izy nisalasala tsao tsy nety safidy nataony hanompo Jehovah in̈y. Ho izy: “Problemo fo raha niain̈ako rango marandrain̈y firaka hariva”, ke kivy izy. (Sal. 73:13, 14) Ke akôry nataony?
12. Eraka Salamo 73:16-18, ino raha nan̈ampy mpan̈ano salamo io tsy ho kivy eky?
12 Vakia Salamo 73:16-18. Mpan̈ano salamo io nandeha tamy toeran̈a masin̈in’ny Zan̈ahary. Tan̈y izy nahavita nandiniky tsarabe. Nanjary nazava taminany fa ndray karaha olo miadan̈a fahitan̈a irô olo ratsy fan̈ahy aby io, irô tsy manan̈a fan̈antinan̈a momba ny amaray. Ke raha zen̈y nahavy izy nilamin-tsain̈y, aviô tsy kivy eky, fa natoky tsarabe fa efa fanapahan-kevitry nataony in̈y edy ny farany tsara. Ke vokany, nanjary nahaitapa-kevitry hanompo Jehovah fo izy.—Sal. 73:23-28.
13. Izikoa anao misalasala amy safidy nataonao taloha tan̈y, ino raha han̈ampy anao hilamin-tsain̈y? (Zahava koa sary.)
13 Karaha nataon’ny mpan̈ano salamo in̈y, Volan̈an’ny Zan̈ahary io koa han̈ampy anao hilamin-tsain̈y. Amy fomba akôry? Ampiràn̈a baka fiain̈ananao ndreky nin’olo tsy manompo Jehovah. Maro hatsaran̈a azonao iziôty, an̈isan’izen̈y Jehovah mitahy anao. Fa irô tsy manompo Jehovah aby io ndraiky mety mitôron̈o fanan̈anandrô amy ziôty, fa kanefa irô tsy manan̈a fan̈antinan̈a amy fiain̈ana amin’ny amaray foeky. Fa anao ndraiky tsy basiny mahazo kadô maro baka amy Jehovah rango iziôty fo fa, hahazo irô raha maro tsara mbala amezany amin’ny amaray an̈y koa. (Sal. 145:16) Diniha koa baka ty: Haintsika ma mety nan̈ano karakôry fiain̈anantsika izikoa atsika nan̈ano safidy hafa? Fa ny raha azontsika antoko fo, lan̈iany nifidy han̈ano fanapahan-kevitry baka amy fitiavan̈a Jehovah ndreky fitiavan̈a naman̈a, tsy maintsy mahazo raha ilainy fo, aviô ten̈a ho sambatra.
Diniha matetiky hatsaran̈a maro mbala hamezan’i Jehovah anao amin’ny amaray (Zahava fehintsoratra 13) d
IZIKOA ANAO MISALASALA TSAO EFA TSY ILAIN’I JEHOVAH EKY
14. Ino raha iain̈an’olo sasany, aviô ino fan̈ontanian̈a mety hanahiran̈a jerindrô?
14 Misy mpanompon’i Jehovah sasany matoe na marary na koa misy antsa. Raha zen̈y mety mahavy irô hisalasala tsao irô efa tsisy dikany amy Jehovah eky. Irô mety han̈ontany: ‘Mbala misy raha ilàn’i Jehovah zaho edy va?’
15. Ino raha natokisan’ny mpan̈ano Salamo faha-71?
15 Karaha zen̈y koa raha nahazo mpanoratra Salamo faha-71. Karaha ty vavaka nataony: “Aza ialan̈a zaho ndray lany angôvo.” (Sal. 71:9, 18) Fa ndray zen̈y, mpan̈ano salamo io resy lahatra fa izikoa izy tsy mivadiky amy Jehovah, hitariky ndreky hanohan̈a izy fo Jehovah. Ke hitan’ny mpan̈ano salamo io baka tamy zen̈y fa ravoravo mare Jehovah izikoa olo araiky man̈ano erakany vitany amy fanompoan̈a izy, nata izy efa tsy mahavita be.—Sal. 37:23-25.
16. Akôry aby mety hampiasan’i Jehovah irô olo efa matoe aby io? (Salamo 92:12-15)
16 Izikoa anao efa matoe, diniha akôry fahitan’i Jehovah anao. Izy mahavita man̈ampy anao hahavita hanompo izy fo, nata mahaimihen̈y angôvonao. (Vakia Salamo 92:12-15.) Ke raha mbala mety ho vitanao fo zahava fa aza mandiniky raha efa tsy ho vitanao eky. Ohatra, anao koa tsy mivadiky amy Jehovah ndreky tia olo, anao efa mankahery olo edy. Mety koran̈inao amin’olo akôry nataon’i Jehovah nan̈ampy anao tan̈atin’ny taon̈o maro zay, ndreky ino fampan̈antinan̈an’ny Baiboly atokisanao fa tsy maintsy ho tanteraka amin’ny amaray. Aviô koa aza adin̈a fa vavaka ataonao nin’olo hafa io, ten̈a misy heriny amin’ny ankitin̈y. (1 Pet. 3:12) Ndray karakôry fiain̈anantsika iziôty, atsika jiaby samy mahavita man̈ano raha nin’i Jehovah ndreky man̈ampy olo hafa fo.
17. Nan̈ino anao tsy tôkony hampiran̈a raha vitanao amy raha vitan’olo hafa?
17 Izikoa anao ziôty mijaly jery fôtony anao efa tsy mahavita be amy fanompoan̈a, matokisa fa valera amy Jehovah zay raha vitanao. Fa anao mety tihampiran̈a raha vitanao amy raha vitan’olo fo, fa aza man̈eky han̈ano zen̈y! Nan̈ino? Fôtony Jehovah tsy mampiran̈a raha vitanao amy raha vitan’olo hafa. (Gal. 6:4) Ohatra, Maria nan̈amia kadô Jesosy menaka man̈itry faran’ny lafo. (Jaona 12:3-5) Fa tsy karaha zen̈y ndraiky man̈angy masikiny sady maty vady in̈y. Koran̈in’ny Baiboly fa vola madiniky aroe fo namezany, izy amy zen̈y hely valerany. (Lioka 21:1-4) Kanefa tamy Jesosy, nira fo fan̈amezan̈a nataondrô roe vavy io, fôtony izio nan̈aboaka fa irô samy nanan̈a finoan̈a. Izy nangala tahaka toetrin’ny Babany. Ke matokisa fa hitan’i Jehovah raha jiaby ataonao ninany, nohon’ny anao mino izy ndreky tia izy. Ten̈a valera aminany raha zen̈y, ndray anao mahatsapa fa karaha hely izio.
18. Ino raha han̈ampy atsika handresy fisalasalan̈a? (Zahava koa efajoro “ Volan̈an’i Jehovah Han̈ampy Anao Handresy Fisalasalan̈a.”)
18 Mety hisalasala aby atsika jiaby io ndraikindraiky. Fa karaha efa hitantsika, Baiboly Volan̈a Zan̈ahary io mahavita man̈ampy atsika handresy fisalasalan̈a zen̈y. Ke mifen̈a han̈ano raha hahavy anao hatoky tsarabe fa tsy hisalasala eky. Jehovah ten̈a mijery atsika tsiaraikiaraiky. Hitany anao nan̈ano safidy tsara ke nan̈ano izy voanalohany tamy fiain̈ananao, ke tsy maintsy hitantirahiny fo fampan̈antinan̈anany fa hitahy anao. Matokisa fa Jehovah tia ndreky mikarakara mpanomponany tsiaraikiaraiky tsy mivadiky aminany.
HIRA 111 Maro ny Antony Mahafaly Antsika
a FAN̈AZAVAN̈A: Amy lahatsoratra ty, atsika handiniky fisalasalan̈a mahavy atsika hieritreritry tsao atsika efa tsy valera amy Jehovah eky, na tsao tsy fahendrena fanapahan-kevitry nataontsika taloha tan̈y. Irô io ndraiky tsy fisalasalan̈a koran̈in’ny Baiboly baka amy tsy fanan̈ana finoan̈a Jehovah ndreky fampan̈antinan̈anany.
b Nata Baiboly tsy mivolan̈a amintsika firy marin̈y taon̈on’i Davida tamy Jehovah nifidy izy, azo antoko fa mbala tanora izy tamy zen̈y.—Zahava Tilikambo Fiambesan̈a 1 Septambra 2011, p. 29 feh. 2.
