Sarotro aminao ma mahazo onon̈o raha vo baka nianaranao? Raha zen̈y mety mahazo olo jiaby. Ino raha azonao atao? Impodiana zahan̈a ndraiky hevitry maventy.

Anao koa fa mianatra, mijanòna hely ndraikindraiky mangala onon̈o hevitry ten̈a maventy. Apostoly Paoly nandrisiky irô rahalahy ndreky ranabavy aby io han̈ano karaha zen̈y, izikoa fa nianatra taratasy nalefany. Izy nivolan̈a: “Ty hevitry maventy amy raha jiaby voakoran̈a zen̈y.” (Heb. 8:1) Karaha zen̈y nataony nan̈ampy irô hahay ino dikan’ny raha nivolan̈iny, aviô ino ifandraisan’ny raha jiaby nikoran̈iny.

Isaka anao mianatra, anao mety manokana folo minity amy faran’ny fianaran̈a, hangalan̈a onon̈o irô hevitry maventy tamy raha nianaranao. Izikoa tsy azonao onon̈o tsara ino aby hevitry maventy, impodiana zahan̈a ndraiky lohatenihely na vakia ndraiky fehezanteny voanalohany isaka fehintsoratra. Izikoa misy raha vaovao nianaranao, mifen̈a han̈azava izio amy fomba fivolan̈ananao. Anao koa fa mimpody mangala onon̈o irô hevitry maventy aby io, anao tsy vitan’ny hahazo onon̈o raha nianaranao fo fa hahita fomba koa han̈arehan̈a izio amy fiain̈ananao.