1. Akory nataony Petera koa iro fa baka nahazo laoko tamy fomba mahagaga?

 PETERA nan̈arato firaka andra kiaka fa tsisy raha nazony. Ke gaga izy koa fa nirahiny Jesosy karaha ty: “Mandihana amy lalin̈y an̈y, baka io alatsaha haratonaro hazahoanaro laoko!” (Lioka 5:4) Petera ndraiky tsy nieritreritry hahazo laoko, fa nataony fo raha nan̈irahany Jesosy izy io. Kanefa naro laoko nazondro baka tio, ke natriaka harato io. Tontohitry iro fa fahagagan̈a nahavy iro nahazo laoko marobe io. Ke Petera ndreky iro namany aby io ‘lany fan̈ahy mare.’ Petera nivolan̈a: “Tompoko anao, mialà aminaka fa zaho ty olo panota.” (Lioka 5:6-9) Petera mety nihevitry fa izy tsy vain̈y hiaraka tamy Jesosy foeky.

2. Nan̈ino ten̈a han̈ampy atsika mandiniky tantarany Petera?

² Marin̈y raha nivolan̈iny Petera. Izy “olo panota.” Aboakany Soratra Masin̈y fa ndraikindraiky Petera tafivolan̈a ndreky tafihan̈ano raha nanin̈enany. Karaha zen̈y koa ma tsapanao ndraikindraiky? Misy toetry ratsy na fahalimian̈anao koa ma hitanao tsy mety resinao? Izikoa zen̈y, hankahery anao mianatra tantarany Petera. Nan̈ino? Diniha baka ty: Azony Jehovah natao tsy nampanoratra hadisovan̈any Petera tan̈aty Baiboly tao. Kanefa tsy zen̈y nataony. Iro io nirahiny natao tao baka hangalantsika fianaran̈a. (2 Tim. 3:16, 17) Lera atsika mianatra tantarany Petera, ho hitantsika fa lelahy io nanan̈a fahalimian̈a ndreky fihetsehampo karaha nintsika. Ke zen̈y han̈ampy atsika hahita fa Jehovah tsy mitaky raha lavorary amintsika. Tiany atsika tsy han̈eky ho resiny hakivian̈a fa hifen̈y fo, ndray iô fahalimian̈antsika.

3. Nan̈ino atsika tsy tôkony han̈eky ho kivy?

 ³ Nan̈ino atsika tsy tôkony han̈eky ho kivy? Fotony arakarakany hifen̈antsika amy raha araiky hahavy atsika hahay izio tsarabe. Ty misy ohatra: Mety antaon̈ony olo araiky vo hahay hitendry gitara tsarabe. Ke an̈aty fotoan̈a zen̈y, mety mbala hivalambalan̈a matetiky hira ataony. Kanefa arakarakany han̈ampodimpodianany izio, izy loso mahaimahay fo. Baka io, ndray izy efa mahay mitendry mare, ndraikindraiky izy mety mbala tafihan̈ano diso. Fa izy tsy kivy. Izy mbala mifen̈y fo mankatsara fahaizan̈anany. Mira zen̈y, ndray tsapantsika fa misy fahalimian̈antsika efa resintsika, mety mbala ho tafimpody han̈ano izio ndraiky atsika. Ke atsika mbala mila mifen̈y fo miady amizio. Atsika jiaby samby mety ho tafivolan̈a na tafan̈ano raha hanin̈enantsika. Kanefa izikoa atsika tsy man̈eky kivy Jehovah han̈ampy atsika hahavita han̈ano ny tsaratsarany tio. (1 Pet. 5:10) Alo atsika handiniky modeliny Petera fotony izy tsy nan̈eky kivy. Jesosy nahinakinaka izy fo ndray tio hadisovan̈anany. Fahaizantsika zen̈y han̈ampy atsika tsy ho voly hanompo Jehovah.

4. Eraka raha koran̈iny Lioka 5:5-10, ino raha nivolan̈iny Petera momba izy, fa akory nan̈amezany Jesosy toky izy?

⁴ Soratra Masin̈y tsy mivolan̈a ino antony nahavy Petera nivolan̈a fa izy “olo panota” na koa ino fahotan̈a tiany volan̈iny io. (Vakia Lioka 5:5-10.) Fa ndray zen̈y, mety nisy hadisovan̈a maventy ankitin̈y nataony. Hainy Jesosy fa Petera navozo fotony izy nieritreritry tsy vain̈y hiaraka tamy Jesosy. Hainy Jesosy koa fa Petera hahavita tsy hivadiky. Ke Jesosy tsara fan̈ahy nivolan̈a tamy Petera: “Aza mavozo eky anao.” Jesosy ten̈a natoky Petera, ke raha zen̈y nan̈ova mare fiain̈ananany. Nialany Petera ndreky Andrea rahalahiny asandro tafara tatỳ, fa iro nandeha nan̈aradia Mesia. Namiany Jehovah hatsaran̈a maro iro baka tio.​—Mar. 1:16-18.

5. Ino hatsaran̈a nazony Petera noho izy tsy nan̈eky resiny tahotro ndreky nan̈eky han̈aradia Jesosy?

⁵ Maro raha tsara hitany Petera izikoa izy efa loso pan̈aradia Kristy. Izy nahita Jesosy nampajanga olo marary, nan̈adoso demony, ndreky namelon̈o olo maty. b (Mat. 8:14-17; Mar. 5:37, 41, 42) Petera koa nahazo fahitan̈a momba voninahitriny Fanjakan̈any Jesosy aminy hoavy, ary nisy vokany mare taminany raha zen̈y. (Mar. 9:1-8; 2 Pet. 1:16-18) Raha aby zen̈y tsy ho hitany Petera foeky izikoa izy tsy nan̈aradia Jesosy. Azo antoko fa izy ravoravo mare, fotony tsisy fihetsehampo  nambelany hisakana izy tsy hahazo hatsaran̈a aby zen̈y!

6. Betibetiky fo ma efa resiny Petera edy fahalimian̈anany? Hazavà.

⁶ Ndray tio raha hitany ndreky ren̈iny aby zen̈y, Petera mbala nila niady tamy fahalimian̈anany fo. Alo baka hidinihintsika ohatra sasany amy zen̈y. Jesosy koa fa nan̈azava fa izy tsy maintsy hijaly ndreky hofoaty eraka raha volan̈iny Soratra Masin̈y, izy nivolan̈iny Petera. (Mar. 8:31-33) Matetiky koa Petera ndreky iro apostoly sasany aby io nimalo azovy farany be amindro. (Mar. 9:33, 34) Taminy alin̈y talohany nifatesany Jesosy, Petera nasaky nanapaka sofin̈iny lelahy araiky. (Jaona 18:10) Baka io, mbala taminy alin̈y io fo, Petera resiny favozoan̈a olo ke intelo aby izy nan̈ano sary tsy nahay Jesosy kanefa iro pinaman̈a. (Mar. 14:66-72) Ke Petera vaky tan̈y sady nalahelo mare.​—Mat. 26:75.

7. Ino tombontsoa nazony Petera izikoa Jesosy fa nitsangana tamy maty?

⁷ Jesosy tsy nan̈ary apostolinany nalahelo be io. Jesosy koa fa nivilomin̈y, Petera mbala nambelany han̈aboaka fitiavany izy. Petera nirahiny Jesosy niambin̈y ondrikondrikinany. (Jaona 21:15-17) Petera von̈ono han̈ano raha nan̈irahany Jesosy izy zen̈y. Taminy andrany Pantekoty, izy mba ta Jerosalema ke an̈isanolo voanalohany voahosotro fan̈ahy masin̈y.

8. Ino hadisovan̈a maventy nataony Petera ta Antiokia?

⁸ Ndray efa tafaranizy nanjary Kristianin̈y voahosotro, Petera mbala nila niady tamy fahalimian̈anany fo. Tamy taon̈o 36, Zan̈ahary nan̈iraka Petera nandeha tamy lelahy tsy Jiosy kahian̈a Kornelio. Zan̈ahary nandatsaka fan̈ahy masin̈y tamy Kornelio, ke izy nanjary voahosotro. Raha zen̈y nan̈aboaka fa “Zan̈ahary tsy man̈avakavaka”, avio olo hafa firenena afaka ho an̈isany fiangonan̈a kristianin̈y. (Asa. 10:34, 44, 45) Tafaranizen̈y, Petera nanomboko niaraka nihina taminolo hafa firenena, kanefa zen̈y raha tsiary niritriretiny hatao. (Gal. 2:12) Fa nisy Kristianin̈y jiosy sasany ndraiky nieritreritry fa Jiosy ndreky olo hafa firenena tsy tôkony hiaraka hihina. Ke izikoa fa nisy sasany tamindro navy ta Antiokia, Petera voly niaraka nihina tamindro rahalahiny hafa firenena aby io fotony izy mety navozo tsao ho meloko iro Kristianin̈y jiosy aby io. Hitany apostoly Paoly fihatsarambelatsihiny Petera zen̈y ke izy nivolan̈iny mare tamasonolo jiaby. (Gal. 2:13, 14) Ndray tio hadisovan̈a nataony io, Petera tsy nan̈eky kivy. Ino raha nan̈ampy izy?

9. Akory an̈aboahany Jaona 6:68, 69 fa Petera tsy nivadiky?

⁹ Petera tsy nivadiky. Tsisy raha nambelany hahavy izy ho voly han̈aradia Jesosy. Akory nan̈aboahany zen̈y? Nisy fotoan̈a, ohatra, Jesosy nivolan̈a raha tsy nazava tamy pianatranany foeky. (Vakia Jaona 6:68, 69.) Ino raha niboaka? Maro tamy pianatranany aby io voly nan̈aradia izy. Iro tsy niambin̈y Jesosy han̈azava sady tsy nan̈ontany izy foeky. Ke Petera ke? Izy tsy niala fotony hainy fa efa ‘volan̈a volan̈iny Jesosy edy hazahoan̈a fiain̈ana tsisy farany.’

10. Akory nan̈aboahany Jesosy fa izy natoky Petera? (Zahava koa sary.)

¹⁰ Jesosy tsy nan̈ary Petera. Taminy alin̈y farany talohany nifatesany, hainy Jesosy fa Petera ndreky iro apostoly namany aby io hiala izy. Ndray zen̈y, Jesosy nivolan̈a tamy Petera fa izy natoky fa Petera mbala ho tafiarin̈y ndreky hahavita tsy hivadiky. (Lioka 22:31, 32) Hainy Jesosy fa ‘jery mazoto fa nofotro ndraiky malemy.’ (Mar. 14:38) Ke ndray Petera nan̈ano sary tsy nahay Jesosy, Jesosy tsy nan̈ary apostolinany io. Jesosy koa fa nitsangana  tamy maty, izy niboaka tamy Petera. Mety Petera zaraiky fo tio tamy zen̈y. (Mar. 16:7; Lioka 24:34; 1 Kor. 15:5) Misaora nankahery Petera raha zen̈y, fotony izy efa kivy mare!

11. Akory nataony Jesosy nan̈amia toky Petera fa Jehovah hikarakara izy?

¹¹ Jesosy nan̈amia toky Petera fa Jehovah hikarakara izy. Tamy fomba akory? Tafaranizy nitsangana tamy maty, Jesosy nimpody nan̈ano fahagagan̈a hafa baka Petera ndreky iro apostoly namany aby io mahazo laoko maro ndraiky koa. (Jaona 21:4-6) Azo antoko fa fahagagan̈a io nan̈amia toky Petera fa tsy sarotro amy Jehovah han̈ampy izy hahazo raha ilainy andavanandra. Mety tsaroany apostoly io Jesosy nivolan̈a fa Jehovah han̈amia raha ilainolo mitsakaraka amy toeran̈a voanalohany Fanjakan̈any Zan̈ahary. (Mat. 6:33) Raha aby zen̈y nan̈ampy Petera han̈ano asa fitorian̈a raha farany maventy amy fiain̈ananany, fa tsy asany pan̈arato. Izy tsy navozovozo nitory foeky tamy Pantekoty taon̈o 33, ke andrivony olo nanjary nan̈eky vaovao tsara. (Asa. 2:14, 37-41) Izy baka tio koa nan̈ampy iro Samaritanin̈y ndreky hafa firenena aby io hanjary pan̈aradia Kristy. (Asa. 8:14-17; 10:44-48) Jehovah nampiasa Petera tamy fomba miavaka baka hitaritan̈a karazanolo jiaby hiditry an̈aty fiangonan̈a.

12. Nan̈ino tantarany Petera afaka man̈ampy atsika izikoa an̈aty fotoan̈a lava atsika miady amy fahalimian̈a araiky?

¹² Jehovah afaka man̈ampy atsika tsy ho resiny hakivian̈a. Mety tsy mora ndraiky zen̈y, intsaka eky izikoa an̈aty fotoan̈a lava atsika miady amy fahalimian̈a araiky. Ndraikindraiky koa fahalimian̈antsika aby io mbala lombolombony niny Petera. Fa Jehovah afaka man̈amia angovo han̈ampy atsika tsy ho kivy. (Sal. 94:17-19) Nisy rahalahy araiky, ohatra, tia lelahy talohanizy nianatra fahamarin̈ana. Tan̈aty taon̈o taon̈o, karaha zen̈y fo fiain̈ananany. Fa izy baka tio niova tanteraka ke nan̈araka raha koran̈iny Baiboly. Ndray zen̈y, ndraikindraiky izy mbala niady mare tamy fan̈irian̈a ratsy. Ke ino nan̈ampy izy tsy han̈eky ho kivy? Izy nivolan̈a: “Jehovah man̈amia angovo atsika.” Karaha ty koa ho izy: “Izikoa fan̈ahiny Jehovah man̈ampy atsika, ... hitako fa ho vitantsika [fo] han̈araka lalan̈any fahamarin̈ana ... Mbala vitany Jehovah fo nampiasa zaho, avio ndray zaho tsy lavorary izy mbala man̈amia angovo zaho fo.”

13. Akory mety hangalantsika tahaka ohatrany Petera, erakany raha koran̈iny Asan’ny Apostoly 4:13, 29, 31? (Zahava koa sary.)

 ¹³ Hitantsika tio fa tsy indraiky fo Petera resiny favozoan̈a olo. Kanefa izikoa izy fa nivavaka baka hahazo angovo, Petera loso nisy korazy mare. (Vakia Asan’ny Apostoly 4:13, 29, 31.) Atsika koa afaka mandresy favozoan̈a olo. Diniha baka raha niain̈any Horst, rahalahy tanora araiky niain̈y tan Allemagne tamy fotoan̈any Ady Lehibe II. Tamy fotoan̈a io, olo jiaby tsy maintsy nivolan̈a “Heil Hitler!” koa fa han̈ano mbalatsara. Dikanizio “Hitler hamonjy atsika!” Hainy Horst fa tsy mety mivolan̈a zen̈y, kanefa matetiky izy tafivolan̈a fo fotony izy navozo papianatra ndreky piaramianatra taminany. Fa raimandreniny Horst tsy nan̈asiaka izy. Iro niaraka nivavaka taminany, nangataka Jehovah han̈ampy izy hanan̈a korazy. Ke nohony fan̈ampian̈a baka tamy raimandreninany ndreky filampian̈a tamy Jehovah, Horst loso nahazo angovo nahavitany tsy hivadiky. Karaha ty ho izy tafara tatỳ: “Jehovah tsiary nan̈ary zaho.” c

14. Akory mety ataony piambin̈y ondrikondriky be fitiavan̈a man̈amia toky olo kivy?

¹⁴ Jehovah ndreky Jesosy tsy han̈ary atsika. Tafarany Petera nan̈ano sary tsy nahay Jesosy in̈y, ty fanapahankevitry maventy tsy maintsy nataony: Mbala hanohy han̈aradia Kristy fo sa ho voly? Jesosy niangavy Jehovah baka tsy ho levon̈o finoan̈any Petera. Nivolan̈iny Jesosy tamy Petera vavaka zen̈y, baka io naboakany tamy Petera fa izy natokisany hahavita hankahery iro rahalahiny aby io. (Lioka 22:31, 32) Misaora nankahery Petera mare nahatsiaro raha nivolan̈iny Jesosy zen̈y! Lera misy fanapahankevitry maventy tsy maintsy ataontsika, Jehovah mety hampiasa iro piambin̈y ondrikondriky  be fitiavan̈a aby io han̈amia toky atsika baka ho vitantsika tsy hivadiky. (Efes. 4:8, 11) Paul zioty an̈isany antipan̈ahy efa ela, izy mifen̈y man̈amia fankahirezan̈a karaha zen̈y. Izikoa fa misy olo kivy, irahiny antsendriky iro hieritreritry akory fomba nitaomany Jehovah iro tamy fahamarin̈ana. Baka io, iro amezany toky fa Jehovah tsy han̈ary iro fotony izy be fitiavan̈a sady tsy mivadiky. Karaha ty nambarany Paul: “Maro olo kivy hitako nahavita nianko nohony fan̈ampiany Jehovah.”

15. Nan̈ino tantarany Petera ndreky Horst mankamarin̈y raha volan̈iny Matio 6:33?

¹⁵ Karaha nataony Jehovah nikarakara raha nilainy Petera ndreky apostoly hafa, hikarakara raha ilaintsika koa izy izikoa fanompoan̈a ataontsika raha voanalohany amy fiain̈anantsika. (Mat. 6:33) Koa fa vita Ady Lehibe II, nan̈ano pisava lalan̈a Horst, araiky nikoran̈intsika taloha tarỳ in̈y. Fa izy fo masikiny mare, ke izy nisalasala tsao tsy hahita vola hahavitany manohy man̈ano fanompoan̈a manontolo andra. Ndray zen̈y, ino raha nataony? Izy tapakevitry hizaha asa ho vitany Jehovah ankitin̈y han̈amia raha ilainy. Ke izy nandeha nanompo fo tan̈atiny herin̈iandrany fitsidihany piandraikitry faritry. Koa fa tapitry herin̈iandra io, piandraikitry faritry nan̈amia izy anvelopy misy vola fa tsy nivolan̈iny taminany azovy olo nan̈amia izio. Gaga mare Horst nahazo izio. Vola tan̈aty tao nahampy tsara an̈anaovany pisava lalan̈a tan̈aty fanjava maromaro. Kado io nan̈amia toky Horst fa Jehovah tsy maintsy han̈ampy izy hahazo raha ilainy. Ke firaka izy naty, Fanjakan̈any Zan̈ahary fo nataony Horst raha farany maventy tamy fiain̈ananany.​—Mal. 3:10.

16. Nan̈ino mahatsara atsika mianatra tsarabe raha momba Petera ndreky iro taratasy nisoratiny?

¹⁶ Misaora ravoravo Petera fotony Jesosy tsy niala izy foeky nata izy niangavy Jesosy hiala izy! Kristy tsy voly nampiofan̈a Petera baka ho loso apostoly tsy mivadiky ndreky ohatra tsara alainy Kristianin̈y tahaka. Misy leson maro maventy azontsika baka amy fampiofan̈ana zen̈y. Petera nikoran̈a sasany amindro leson aby zen̈y ndreky raha hafa koa tamindro taratasy aroe nisoratiny tamy fiangonan̈a tamy taonjato voanalohany. Efa an̈aty Baiboly iro taratasy aby zen̈y amy zioty. Amy lahatsoratra man̈araka, atsika handiniky fampatsiarovan̈a vitsivitsy baka amy taratasy aby io ndreky akory fomba mety han̈arehantsika zen̈y.