1-2. Nan̈ino ma tôkony hahalian̈a atsika tantarany Samsona?

 INO raha avy an̈aty jerinao koa fa maharen̈y an̈aran̈a Samsona zen̈y? Lelahy araiky matanjaka oe? Marin̈y zen̈y. Fa Samsona nan̈ano fanapahankevitry ratsy nahavy izy nijaly mare. Ndray zen̈y, Jehovah nifantoko tamy raha jiaby nataony Samsona tamy fanompoan̈a izy. Nirahiny Zan̈ahary nisoratin̈y an̈aty Baiboly ao ohatrany lelahy tsy mivadiky io baka hangalantsika fianaran̈a.

² Jehovah nampiasa Samsona nan̈ano raha maro mahagaga han̈ampian̈a iro Israelita vahoakanany. Anjatony taon̈o tafarany nifatesany Samsona, Jehovah nan̈iraka apostoly Paoly nanoratra an̈arany Samsona niaraka taminy an̈arany lelahy hafa ten̈a nanampinoan̈a. (Heb. 11:32-34) Ohatrany Samsona afaka hankahery atsika. Nata izy niatriky raha sarotro, izy nilampy tamy Jehovah fo. Hidinihintsika amy lahatsoratra ty ino raha ianarantsika baka aminy ohatrany Samsona, ndreky nan̈ino ohatranany io afaka hankahery atsika.

3. Ino andraikitry nazony Samsona?

³ Tamy Samsona vo teraka, Filistiny nanjaka tamy firenenany Israely ndreky nampijaly iro. (Mpits. 13:1) Ten̈a kafiry iro Filistiny aby io ke nijaly mare Israelita aby io. Jehovah nifidy Samsona ‘han̈avotro iro Israelita aby io amy Filistiny.’ (Mpits. 13:5) Tsy mora andraikitry zen̈y! Baka ho vitany raha zen̈y, Samsona tsy maintsy nilampy tamy Jehovah.

4. Akory nataony Jehovah nan̈ampy Samsona han̈avotro ain̈inany tampelantan̈any Filistiny? (Mpitsara 15:14-16)

⁴ Akory nan̈aboahany Samsona fa izy natoky Jehovah ndreky nitavandra fan̈ampian̈anany? Ty misy ohatra araiky: Tandraraiky,  nisy maramila filistiny nandeha nanambotro Samsona ta Lehy. Izio mety ta Joda tan̈y. Nangorohoro mare iro lelahy ta Joda tao ke nanapakevitry hanolotro Samsona tamy fahavalondro. Nifihezinolo firenena araiky taminany aby io tamy tady aroe vaovao izy avio nindesindro tamy Filistiny aby io tan̈y. (Mpits. 15:9-13) Ndray zen̈y, ‘fan̈ahiny Jehovah nan̈amia angovo Samsona’ ke vitany nanapaka tady namihezan̈a izy io. Baka io, izy nahita ‘lakatombazan̈any borikilahy araiky mbala mando’, nalainy izio, avio namonoany lelahy filistiny 1000.​—Vakia Mpitsara 15:14-16.

5. Akory nan̈aboahany Samsona fa izy nilampy tamy Jehovah?

⁵ Lakatombazan̈any borikilahy zen̈y tsy raha findesin̈y miady. Ke ino nahavy Samsona nampiasa izio? Azo antoko fa hainy Samsona fa Jehovah han̈ampy izy handresy Filistiny aby io, ndray ino fitaovan̈a ampiasainy hiadivan̈a amindro. Ke zay raha nazony tan̈anany, nampiasainy lelahy tsy mivadiky io nan̈anaovan̈a sitrapony Jehovah. Resiny Samsona iro maramila aby io fotony izy nilampy tamy Jehovah.

6. Ino raha ianarantsika baka amy tantarany Samsona?

⁶ Ndray sarotro mare andraikitry araiky, Jehovah han̈amia angovo ilaintsika baka ho vitantsika raha han̈irahany atsika. Mety tsy ampoizintsika foeky fomba han̈ampiany Jehovah atsika. Karaha nataony nan̈amia angovo Samsona in̈y, matokisa fa Jehovah koa han̈ampy anao han̈ano sitraponany izikoa anao mitavandra fan̈ampian̈a baka aminany.​—Ohab. 16:3.

7. Ino ohatra man̈aboaka fa ten̈a raha maventy mitady taridalan̈any Jehovah?

⁷ Maro amindro rahalahy ndreky ranabavy mandray anjara aminy asa fan̈oren̈ana aby io nan̈aboaka fa iro matoky Jehovah. Taloha, matetiky, iro rahalahintsika aby io fo nan̈ano plan ndreky nan̈orin̈y ankamarozany Tran̈o Fivorian̈a ndreky tran̈o hafa ampiasainy fandaminan̈a. Fa tafara tatỳ, nahainaro fo olo natao batisa, ke zen̈y nahavy fandaminan̈a nila nan̈ova fomba fiasa. Iro rahalahy  piandraikitry aby io nitady taridalan̈a Jehovah ndreky nan̈andran̈a fomba fiasa vaovao, karaha ataony mividy tran̈o avio havaozin̈y. Robert, ohatra, an̈isany nandray anjara tamy tetikasa fan̈oren̈ana maro nataontsika erantany, tato ho ato zay. Karaha ty ho izy: “Tamy voanalohany, tsy nora taminolo sasany nan̈eky fomba fiasa vaovao io. Izio baka tsy nitovy foeky tamy raha nataontsika tan̈aty taon̈o taon̈o. Fa ndray zen̈y, iro rahalahy aby io von̈ono fo han̈araka fomba fiasa vaovao io. Ke hita fa nitahiny Jehovah ankitin̈y fan̈ovoan̈a natao io.” Zen̈y mbala ohatra araiky fo ahitan̈a akory ataony Jehovah mitariky vahoakanany han̈ano sitraponany. Ke atsika jiaby mila man̈ontany ten̈a karaha ty matetiky: ‘Zaho ma mba mitady taridalan̈a Jehovah ndreky von̈ono han̈araka fan̈ovoan̈a?’

8. Ino raha nataony Samsona izikoa izy fa sakara mare?

⁸ Misy raha mahagaga hafa nataony Samsona koa ma tsaroanao? Izy namono lion, avio izy namono Filistiny 30 lahy ta Askelona. (Mpits. 14:5, 6, 19) Hainy Samsona fa tsisy andra nahavitany raha karaha zen̈y izikoa tsy tio Jehovah. Karaha zen̈y, ohatra, tandraraiky, izy sakara mare izikoa fa baka namono Filistiny 1000 aby. Afaka nataony direkty nitady rano higian̈a, fa tsy zen̈y nataony. Izy niangavy Jehovah han̈ampy izy.​—Mpits. 15:18.

9. Akory nataony Jehovah namaly vavakany Samsona? (Mpitsara 15:19 ndreky lamariky amy pazy ambany)

⁹ Jehovah namaly fiangavian̈any Samsona ke nan̈ano fahagagan̈a nampisy lohatany nan̈aboaka rano. Samsona koa fa nigiaka rano io ‘nimpody taminany ndraiky angovonany baka io izy nanjary velombelon̈o.’ (Vakia Mpitsara 15:19 ndreky lamariky amy pazy ambany.) Mety mbala tio fo lohatany io taon̈o maro tafara tatỳ, tamy paminan̈y Samoela nahazo fan̈ahy masin̈y nanoratra bokiny Mpitsara. Lohatany io nampatsiaro iro Israelita aby io fa Jehovah von̈ono han̈ampy panomponany tsy mivadiky, amy fotoan̈a ilavandro izy, izikoa iro milampy aminany.

10. Ino raha tsy maintsy ataontsika baka hazahoantsika fan̈ampian̈a baka amy Jehovah? (Zahava koa sary.)

¹⁰ Atsika koa mila mitavandra Jehovah fo na ino na ino talenta na fahaizan̈a anan̈antsika na raha efa vitantsika tamy fanompoan̈a. Atsika mila manetry ten̈a ndreky man̈eky fa ho vitantsika raha han̈irahany Jehovah atsika izikoa atsika milampy aminany. Samsona nahazo angovo nilainy izikoa fa nigiaka rano baka tamy Jehovah. Karaha Samsona, atsika koa mila man̈eky fan̈ampian̈a baka amy Jehovah, baka ho vitantsika tsy hivadiky aminany.​—Mat. 11:28.

11. Akory an̈aboahantsika fa atsika mahay man̈araraotro fan̈ampian̈a jiaby baka amy Jehovah? Havazà aminy ohatra.

¹¹ Diniha baka tantarany Aleksey, rahalahy araiky an̈isany miatriky fan̈injehan̈a mare a Russie an̈y. Ino raha nan̈ampy izy hahavita hiatriky raha sarotro zen̈y? Iro roeny vadiny niaraka nan̈ano raha arapan̈ahy fo isanandra. Ho izy: “Zaho mifen̈y fo man̈ano fianaran̈a manokan̈a ndreky vaky Baiboly isanandra. Isaka maraindrain̈y, zahay roeny vadiko miaraka man̈ano teny vakina ndreky miaraka mivavaka.” Ino raha ianarantsika baka amy zen̈y? Atsika tôkony hilampy amy Jehovah fo fa tsy hitoron̈o angovontsika. Akory han̈anaovantsika zen̈y? Isanandra, atsika mila man̈ano raha hampatanjaka finoan̈antsika, karaha ataony mianatra Baiboly, mivavaka, mivory ndreky mitory. Baka io, Jehovah amy zay han̈ampy atsika hahavita hanompo izy fo. Izy nan̈amia angovo Samsona, ke matokisa  fa Izy koa hahavita han̈amia angovo atsika.

12. Ino fanapahankevitry ratsy nataony Samsona, avio ino tsy mampitovy fiarahany Samsona tamy Delila ndreky tamy man̈angy hafa talohanizen̈y?

¹² Samsona olo tsy lavorary karaha atsika, ke ndraikindraiky koa izy mba nan̈ano safidy ratsy. Nisy araiky tamy fanapahankevitry nataony ten̈a navoazany lagin̈y mare. Efa pitsara Samsona tamy zen̈y, fa baka tio izy ‘nanjary tia man̈angy araiky tamy Vavasahany Soreka tan̈y. Delila an̈arany man̈angy io.’ (Mpits. 16:4) Fa talohanizen̈y, Samsona tihangala vady man̈angy araiky filistiny. “Jehovah nahavy izy hanapakevitry han̈ano zen̈y”, fotony Jehovah nitady fomba hamangoan̈a iro Filistiny aby io. Tafaranizen̈y, Samsona nidoko tantran̈ony man̈angy makorely araiky ta Gaza, tanànany Filistiny. Tamy fotoan̈a io, Jehovah nan̈amia angovo Samsona ke vitany nan̈apoaka ndreky nibata barony tanàna io, ke nanjary niban̈aban̈a tanàna io. (Mpits. 14:1-4; 16:1-3) Fa Delila ndraiky mety man̈angy israelita. Safe fiarahany Samsona taminany io tsy tetiky handeha hiadivan̈a tamy Filistiny.

13. Ino raha nataony Delila ke nampiditry lagin̈y tamy Samsona?

¹³ Delila namezandro Filistiny aby io vola be, amy zen̈y izy mamitaka Samsona. Ke izy nan̈eky. Izy tsy voly nan̈ontany Samsona, ino mahavy izy matanjaka be io. Tamy farany Samsona namosa foeky. Jambany fitiavan̈a ma Samsona nahavy izy tsy naharaka tetikiny Delila? Tsy ten̈a hay ndraiky fa nampalahelo fo, hadisovan̈a nataony Samsona taminio nahavy izy loso tsy nankasitrahiny Jehovah ndreky tsy natanjaka eky tan̈aty fotoan̈a vitsivitsy.​—Mpits. 16:16-20.

14. Ino vokany izikoa Samsona efa natoky Delila?

 ¹⁴ Samsona natoky Delila fa tsy Jehovah, ke vokanizen̈y izy nijaly mare. Izy nisamborindro Filistiny aby io avio nipotserindro masonany. Nigadraindro ta Gaza tan̈y izy, tamy tanànanolo aby nalainy baraka in̈y, avio nataondro andevo pan̈odin̈y vato maventy fandisanan̈a vary. Baka io, izy nataondro Filistiny aby io fitokizan̈a tamy fety araiky nataondro. Iro taminio nan̈ano fety be niny Dagona, zan̈ahary diso nivavahandro, fotony iro nino fa izy nan̈ampy iro nanambotro Samsona. Nalaindro baka tamy prizon Samsona avio nindesindro tamy fety io baka ataondro ‘fangalan̈a diandian̈a’ ndreky fitokizan̈a.​—Mpits. 16:21-25.

15. Akory nan̈aboahany Samsona fa izy nimpody nilampy tamy Jehovah? (Mpitsara 16:28-30) (Zahava sary amy fon̈ony gazety ty.)

¹⁵ Ten̈a maventy hadisovan̈a nataony Samsona. Ndray zen̈y, izy tsy kivy fa mbala nanompo Jehovah fo. Izy mbala nitady fomba hiadivan̈a tamindro Filistiny aby io, fotony zen̈y raha nan̈irahany Jehovah izy. (Vakia Mpitsara 16:28-30.) Samsona niangavy Jehovah ambaka ty: ‘Ambilà zaho hamaly faty raha nataondro Filistiny aby io.’ Nivaliny araiky ten̈a Zan̈ahary vavakany Samsona ke nampodiny taminany ndraiky angovonany miavaka be in̈y. Vokanizen̈y, naronarony Filistiny natiny taloha, Filistiny natiny Samsona tamy diany araiky io.

16. Ino raha mety ianarantsika baka aminy hadisovan̈a nataony Samsona?

¹⁶ Marin̈y fa Samsona nijaly mare vokatrany hadisovan̈anany, fa ndray zen̈y izy tsy voly nitady fomba han̈anaovan̈a sitrapony Jehovah. Atsika koa tôkony han̈ano karaha zen̈y. Izikoa atsika nan̈ano hadisovan̈a ke nanarin̈y na very tombontsoa, atsika tsy mila kivy. Tsara alaintsika onon̈o fa Jehovah von̈ono han̈ambela hadisovan̈antsika. (Sal. 103:8-10) Ndray iô hadisovan̈a nataontsika, atsika mbala mety ampiasainy Jehovah, karaha nataony tamy Samsona in̈y.

17-18. Nan̈ino mankahery anao tantarany Michael? (Zahava koa sary.)

¹⁷ Diniha baka ohatrany rahalahy tanora araiky kahian̈a Michael. Izy nazoto mare tamy fanompoan̈a. Izy sady pikarakara fiangonan̈a avio pisava lalan̈a maharitry. Mampalahelo fo nisy hadisovan̈a araiky nataony nahavy tombontsoanany aby zen̈y very. Karaha ty ho izy: “Talohanizen̈y, zaho nifen̈y mare  tamy fanompoan̈a Jehovah. Fa tio fo, nanjary tsisy raha nafaka nataoko eky. Zaho tsiary nieritreritry fa Jehovah efa tsy mila zaho, fa zaho fo loso diniky asa raha mbala himpody karaha taloha in̈y edy fifandraisako aminany, na asa raha mbala ho vitako edy himpody hanompo izy karaha nataoko in̈y.”

¹⁸ Mamparavoravo fa Michael tsy kivy foeky. Karaha ty ho izy: “Zaho nifen̈y mare nivavaka, nianatra ndreky nisaintsain̈y fotony tiako himpody karaha taloha fifandraisako amy Jehovah.” Izikoa fa nandeha fotoan̈a, nimpody nazony Michael ndraiky andraikitrinany tamy fiangonan̈a. Ke izy zioty efa antipan̈ahy sady pisava lalan̈a maharitry. Ty raha nambarany: “Fanohan̈ana ndreky fankahirezan̈a nazoko, intsaka eky baka taminy antipan̈ahy, nan̈ampy zaho hahita fa Jehovah mbala tia zaho. Eritreritrinaka zioty efa milamin̈y ke zaho afaka mimpody manompo Jehovah tsarabe. Raha nandalo in̈y nampianatra zaho fa Jehovah von̈ono hamafa hadisovan̈anolo ten̈a mibebaka.” Atsika koa afaka matoky fa izikoa atsika mifen̈y man̈itsy raha tsy mety nataontsika ndreky tsy voly milampy amy Jehovah, izy mbala hampiasa atsika fo ndreky hitahy atsika ndray iô hadisovan̈a nataontsika.​—Sal. 86:5; Ohab. 28:13.

19. Nan̈ino mankahery anao ohatrany Samsona?

¹⁹ Nidinihintsika tamy lahatsoratra ty sasany tamy raha maharikian̈a niain̈any Samsona. Izy tsy lavorary, avio ndray izy tafan̈ano hadisovan̈a vokatrany raha nataony Delila, izy tsy kivy fa mbala nanompo Jehovah fo. Jehovah koa tsy nan̈ary izy. Samsona nimpody nampiasainy Jehovah tamy fomba miavaka mare. Tamy Jehovah, izy mbala olo ten̈a nanampinoan̈a ke nampidiriny amy listinolo tsy mivadiky koran̈iny Hebreo toko faha-​11. Tsy mankahery anao ma mahay fa Zan̈ahary ivavahantsika io ten̈a Baba be fitiavan̈a ndreky man̈iry mare han̈amia angovo atsika, intsaka eky lera atsika malemy? Ke karaha Samsona, alo atsika hiangavy Jehovah karaha ty: ‘Mba tsarova kony zaho ke ameza angovo, azafady!’​—Mpits. 16:28.