1. Ino raha nampan̈anaoviny Jehovah apostoly Petera taloha heliny hifatesany?

 HAINY apostoly Petera fa tsy ho ela izy hofoaty. Efa antaon̈ony maro izy nanompo Jehovah sady tsy nivadiky taminany. Izy niaraka nitory tamy Jesosy ndreky nanomboko fitorian̈a taminy hafa firenena. Avio tafara tatỳ, izy loso an̈isany filankevipitantan̈ana. Kanefa mbala tsy nifaran̈a tio fanompoan̈anany. Kadiriny tamy taon̈o 62-64, Jehovah nampiasa izy hanoratra taratasy aroe amy Baiboly ao. Izio bokiny Petera Voanalohany ndreky Faharoe. Petera nan̈anten̈a fa taratasy aroe nisoratiny io han̈ampy Kristianin̈y lera izy efa tsy iô.​—2 Pet. 1:12-15.

2. Nan̈ino navy tamy fotoan̈any tsarabe taratasy nisoratiny Petera aby io?

² Tamy fotoan̈any Petera nanoratra taratasy aby io, iro piaramanompo taminazy nandalo ‘fitsapan̈a isankarazany.’ (1 Pet. 1:6) Nisy paminan̈y sandoko nampiditry fampianaran̈a diso ndreky fitondranten̈a maloto tamy fiangonan̈a kristianin̈y. (2 Pet. 2:1, 2, 14) Efa tsy ela koa iro Kristianin̈y ta Jerosalema tao hiatriky “farany raha jiaby”, fotony hiravan̈iny tafiky romanin̈y tanàna io ndreky tempolinany. (1 Pet. 4:7) Ke tsy isalasalan̈a foeky fa taratasy nisoratiny Petera io nan̈ampy iro Kristianin̈y aby io hahita ino raha tôkony hataondro, baka hahavitandro miaritry fitsapan̈a isankarazany efa tojy iro ndreky mbala handalovandro. b

3. Nan̈ino ma atsika tôkony handiniky taratasy nisoratiny Petera aby io?

³ Ndray taratasy aby io nisoratiny Petera nindro Kristianin̈y tamy zen̈y, iro io nasainy Jehovah nampidirin̈y amy Baiboly. Ke ndray atsika koa mba mandray hatsaran̈a baka amindro io. (Rom. 15:4) Karaha iro Kristianin̈y tamy taonjato voanalohany aby in̈y, atsika iziô koa miain̈y amy donia araiky feno fitondranten̈a maloto ke mety ho sarotro amintsika koa manompo  Jehovah. Tsy vitany zen̈y fo fa efa tsy ho ela koa atsika hiatriky fahorian̈a be. Izio mbala lombolombony araiky taminy andrany Jiosy taloha tan̈y, tamy fotoan̈a nandravan̈a Jerosalema ndreky tempolinany. Amy taratasy aroe nisoratiny Petera io misy fampatsiahivan̈a maro maventy han̈ampy atsika ho von̈ono fo hiambin̈y andrany Jehovah ndreky tsy havozo olo avio hifen̈y fo hifankatia mare. Fampatsiarovan̈a aby zen̈y koa man̈ampy antipan̈ahy hahita fomba mety an̈ampiandro rahalahy ndreky ranabavy amy fiangonan̈andro, baka iro hatanjaka finoan̈a fo.

4. Eraka raha volan̈iny 2 Petera 3:3, 4, ino raha mety hampangozohozo finoan̈antsika?

⁴ Ankamarozany olo man̈odidin̈y atsika olo tsy mino raha volan̈iny Baiboly momba ny hoavy. Mety hankalefaka atsika iro panohitry aby io, fotony efa ela baka atsika nivolan̈a fa ho avy farany. Olo sasany koa mivolan̈a fa raha zen̈y tsy ho hisy foeky. (Vakia 2 Petera 3:3, 4.) Izikoa atsika fa maharen̈y koran̈a karaha zen̈y baka aminolo toriantsika, na piaramiasa amintsika, na koa havantsika, mety hangozohozo finoan̈antsika. Petera nan̈azava ino raha afaka han̈ampy atsika.

5. Ino raha han̈ampy atsika hanan̈a faharetan̈a hiambin̈y farany donia ty? (2 Petera 3:8, 9)

⁵ Misy olo sasany mihevitry fa ela loatra Jehovah mamaran̈a donia ratsy ty. Raha nivolan̈iny Petera afaka man̈ampy atsika, fotony izio mampatsiaro atsika fa tsy honohono hitovy amy nintsika foeky fomba fikontiany Jehovah andra. (Vakia 2 Petera 3:8, 9.) Amy Jehovah arivo taon̈o zen̈y mira andra araiky fo. Izy maharidraha fotony tsisy olo tiany hofoaty. Izikoa fa avy andrany Jehovah hifaran̈a donia ty. Ke atsika afaka mampiasa fotoan̈a hely tavela zioty hitorian̈a aminolo man̈erantany. Tsisy tombontsoa ambaka zen̈y!

6. Akory ataontsika ‘han̈ano antsain̈y fo’ andrany Jehovah? (2 Petera 3:11, 12)

⁶ Petera nan̈iraka atsika ‘han̈ano antsain̈y fo’ andrany Jehovah. (Vakia 2 Petera 3:11, 12.) Akory hahavitantsika han̈ano zen̈y? Isanandra atsika afaka mifen̈y misaintsain̈y hatsaran̈any fiain̈ana amy donia vaovao. Miniminia, ohatra, anao miain̈y tsiko madio, mihina hanin̈y mahasalama, mitsena iro havanao ndreky namanao hatsangana amy maty, avio mampianatra olo efa niain̈y taloha be tan̈y raha momba fahatantirahany faminanian̈any Baiboly. Fisaintsain̈ana raha aby zen̈y han̈ampy anao ho von̈ono fo hiambin̈y sady hatoky fa efa tsy ho ela hifaran̈a donia ty. “Fahaizantsika tsialohaloha” raha mbala hoavy zen̈y han̈ampy atsika “tsy ho voatarikiny” papianatra sandoko.​—2 Pet. 3:17.

7. Ino mety vokatrany favozoan̈a olo io amintsika?

⁷ Haintsika fa andrany Jehovah io efa marikitry, ke zen̈y mahavy atsika mazoto mare mitory vaovao tsara io aminolo jiaby. Fa ndraikindraiky fo atsika mety havozo han̈ano zen̈y. Nan̈ino? Fotony mety hampavozo atsika raha iritriretinolo momba atsika na raha mety hataonolo amintsika. Zen̈y iziô raha navoa Petera. Taminy alin̈y nitsaran̈a Jesosy, Petera navozo hivolan̈a fa izy an̈isany pianatranany. Impirimpiry izy nivolan̈a fa Jesosy tsy hainy foeky. (Mat. 26:69-75) Fa vitany Petera fo nandresy favozoan̈a olo. Karaha ty raha nisoratiny tafara tatỳ: ‘Aza mavozo raha havozoandro avio aza miasaloha.’ (1 Pet. 3:14) Volan̈a Petera io man̈amia toky atsika fa atsika afaka mandresy favozoan̈a olo.

8. Ino raha han̈ampy atsika handresy favozoan̈a olo? (1 Petera 3:15)

⁸ Ino raha han̈ampy atsika handresy favozoan̈a olo? Karaha ty volan̈iny Petera amintsika: “Hamasin̈a an̈aty fonaro Kristy amy maha  Tompo izy.” (Vakia 1 Petera 3:15.) Man̈ano zen̈y, ohatra, atsika izikoa misaintsain̈y fahifan̈a ndreky toeran̈a tanany Tompontsika ndreky Panjakantsika, i Kristy Jesosy zen̈y. Ke izikoa anao mahatsiaro mavozo lera misy hiriky hikoran̈ana vaovao tsara aminolo, aleva onon̈o Panjakantsika io. Iritrireta izy manjaka andan̈itry an̈y ndreky misy anjely antapitrisany man̈odidin̈y izy. Aleva onon̈o fa izy manan̈a “fahifan̈a jiaby andan̈itry an̈y ndreky ambony tany eto”, baka io izy ‘hiaraka aminao fo isanandra firaka amy farany donia ty.’ (Mat. 28:18-20) Petera nan̈iraka atsika ho ‘von̈ono fo’ hiaro raha inoantsika. Ke tianao ma hitory aminolo ampiasan̈anaro an̈y, a lekolinaro na koa antany hafa? Iritrireta tsialohaloha ombian̈a anao afaka man̈ano zen̈y, avio omàn̈a ino raha handeha hivolan̈inao. Mivavaha baka hisy korazy ndreky matokisa fa Jehovah han̈ampy anao fo hahavita handresy favozoan̈a olo.​—Asa. 4:29.

9. Tandraraiky, ino nahavy Petera tsy nahavita nan̈aboaka fitiavan̈a? (Zahava koa sary.)

⁹ Petera nianatra akory atao man̈aboaka fitiavan̈a. Tiô izy tamy Jesosy nivolan̈a: “Anaro amiako didy vaovao: Anaro mifankatiava. Anaro mila mifankatia, karaha nitiavako anaro koa.” (Jaona 13:34) Fa ndray zen̈y, tafara tatỳ, Petera mbala resiny favozoan̈a olo fo. Izy tsy nan̈eky niaraka nihina tamy rahalahy ndreky  anabaviny hafa firenena. Karaha ty fomba nivolan̈any apostoly Paoly raha nataony Petera io: ‘Fihatsarambelatsihy.’ (Gal. 2:11-14) Petera nan̈eky nahitsy ndreky nangala leson baka tamy zen̈y. Amy taratasy aroe nisoratiny Petera io, naboakany fa tsy tôkony ho fihetsehampo fo fitiavantsika iro piaramanompo aby io fa mila aboaka amy raha atao koa.

10. Vokatra ino ‘fitiavandrahalahy tsisy fihatsarambelatsihy’? Hazavà. (1 Petera 1:22)

¹⁰ Petera nivolan̈a fa tôkony ‘fitiavandrahalahy tsisy fihatsarambelatsihy’ haboakantsika amindro piaramanompo aby io. (Vakia 1 Petera 1:22.) Vokatrany ‘fan̈arehan̈a fahamarin̈ana’ fitiavan̈a karaha zen̈y. An̈isany fahamarin̈ana zen̈y fampianaran̈a fa “Zan̈ahary tsy man̈avakavaka.” (Asa. 10:34, 35, l.p.a.) Tsy man̈araka didiny Jesosy momba fitiavan̈a atsika izikoa olo sasantsasany amy fiangonan̈a ao fo itiavintsika fa tsy olo jiaby. Karaha Jesosy, mety misy olo ndraiky ten̈a marikitry fontsika. (Jaona 13:23; 20:2) Fa Petera mampatsiaro atsika fa atsika tôkony hifen̈y mare hankatia iro rahalahy ndreky ranabavintsika jiaby, fotony iro io an̈isany fianakavian̈antsika.​—1 Pet. 2:17.

11. Ino ma dikany ‘tia olo mare amy fô’ zen̈y?

¹¹ Petera nandrisiky atsika ‘hifankatia mare amy fô.’ Dikany tia “mare” zen̈y mifen̈y fo mankatia olo araiky ndray tsy mora man̈ano zen̈y. Ohatra iziô, akory izikoa misy rahalahy araiky man̈ano raha mampameloko na mamparary fô atsika? Amy voanalohany atsika mety tihamaly faty mare fa tsy tihan̈ano raha han̈aboahan̈a fitiavan̈a. Kanefa Petera nianatra baka tamy Jesosy fa mamaly faty zen̈y tsy raha mamparavoravo Zan̈ahary. (Jaona 18:10, 11) Karaha ty nisoratiny Petera: ‘Aza mamaly ratsy ny ratsy na man̈ambanimbany koa fa misy man̈ambanimbany. Fa sitrany mirary hatsaran̈a.’ (1 Pet. 3:9) Izikoa anao tia olo mare, anao ho tsara fan̈ahy ndreky handiniky raha mahatsara olo, firaka aminolo nan̈ano raha namparary fonao.

12. a) Izikoa atsika mifankatia mare, ino koa raha ho vitantsika? b) Erakany video Arova Firaisantsain̈y Kado Ten̈a Valera io, tihifen̈y han̈ino anao?

¹² Tamy taratasy nisoratiny voanalohany, Petera nampiasa volan̈a “mifankatia mare.” Karazan̈a fitiavan̈a araiky zen̈y mahavita mandrakotro ‘fahotan̈a maro’ fa tsy sasantsasany fo. (1 Pet. 4:8) Tamy Petera nivolan̈a izio izy mety nahatsiaro raha nampianariny Jesosy izy taon̈o maro talohanizen̈y momba familankeloko. Tamy zen̈y Petera mety nihevitry fa efa tsara fan̈ahy izy matoa nahavita nan̈ambela hadisovan̈any rahalahiny ‘impito.’ Fa ino raha nampianariny Jesosy izy? Izy tôkony han̈ambela hadisovan̈a ‘firaka im- 77.’ Dikanizen̈y, tsisy fetrany. (Mat. 18:21, 22) Ary atsika koa tôkony han̈ano karaha zen̈y. Aza kivy izikoa hitanao sarotro man̈araka torohevitry zen̈y! Panompony Jehovah tsy lavorary jiaby samy mahita fa ndraikindraiky mety ho sarotro man̈ambela hadisovan̈a. Fa raha maventy mila ataonao, mifen̈y eraka angovonao han̈ambela hadisovan̈any rahalahinao ndreky man̈ano raha hihavan̈ana aminany. c

13. Nan̈ino mety ho sarotro aminy antipan̈ahy hahita fotoan̈a hankahirezan̈a piaramanompo amindro?

¹³ Tafarany Jesosy natsangana tamy maty, izy nivolan̈a tamy Petera: ‘Iambesa ondrikondrikinaka madiniky aby io.’ (Jaona 21:16) Azo antoko fa tsy nadin̈any Petera foeky volan̈a zen̈y. Izikoa anao antipan̈ahy, hainao fa ndray anao koa mba tôkony han̈araka toromariky zen̈y. Fa mety tsy mora aminy antipan̈ahy araiky hahita fotoan̈a han̈anaovan̈a  andraikitry maventy be io. Nan̈ino? Fotony andraikitriny antipan̈ahy voanalohany man̈amia raha ilainy fianakavian̈anany arabatan̈a ndreky amy lafiny arapihetsehampo avio arapan̈ahy. Man̈amia modely koa antipan̈ahy ke mazoto man̈ano asa fitorian̈a, avio man̈oman̈a sady man̈ano anjara amy fivorian̈a ndreky fivoriambe. Sasany koa mbala man̈ano andraikitry fan̈ampiny fotony an̈isany Komity Mifandray amy Lopitaly na amy Sampandraharahany Fan̈oren̈ana Antoeran̈a. Ten̈a maro ankitin̈y asany antipan̈ahy!

14. Ino raha mandrisiky antipan̈ahy hiambin̈y ondrikondriky? (1 Petera 5:1-4)

¹⁴ Petera nandrisiky iro antipan̈ahy namany aby io karaha ty: “Ambesa ondrikondriky Zan̈ahary.” (Vakia 1 Petera 5:1-4.) Antipan̈ahy ma anao? Hainay fa anao ten̈a mankatia iro rahalahy ndreky ranabavinao aby io sady tihankahery iro. Fa ndraikindraiky fo anao mety ho be raha atao na kajo mare ke hitanao tsy ho vitanao han̈ano andraikitry io. Izikoa zen̈y, ino raha mety ataonao? Ambarà Jehovah raha tsapanao. Petera nanoratra karaha ty: “Izikoa olo araiky manompo, izy tôkony hanompo sady hilampy aminy angovo baka amy Zan̈ahary.” (1 Pet. 4:11) Problemo sasany tojy iro rahalahy ndreky ranabavinao aby io mety mbala tsy ho voavaha tanteraka izikoa mbala amy donia ty. Kanefa tsarova fa Jesosy Kristy ‘sefony piambin̈y ondrikondriky.’ Izy mahavita man̈ampy iro mihoatrany vitanao. Rango zioty vitany man̈ano zen̈y ndreky firaka amy donia vaovao. Fa raha irahiny Jehovah ataony antipan̈ahy fo mankatia rahalahindro, mankahery iro avio “ho modely arehany ondrikondriky jiaby.”

15. Karakory ataony antipan̈ahy araiky miambin̈y ondrikondriky? (Zahava koa sary.)

¹⁵ Efa ela nampa antipan̈ahy William. Hitany fa ten̈a raha maventy fan̈anaovan̈a asa fiambesan̈a ondrikondriky io. Izikoa fa nanomboko valan̈aretin̈y COVID-19, izy ndreky antipan̈ahy hafa nan̈ano ezaka nikaiky pitory tsiaraikiaraiky taminy andiampitory misy iro, isaka herin̈iandra. Nan̈ino? Karaha ty ho izy: “Maro tamindro rahalahy aby io latsatokan̈a tantran̈ondro tao, ke mora tamindro tafieritreritry raha nampakivy.” Izikoa fa nisy piaramanompo araiky tatrany problemo, William nitandren̈y tsarabe baka hahaizany ino raha ilainy ndreky raha mampiasaloha  izy. Baka io amy zay, izy mitady lahatsoratra na video baka amy tranonkalantsika han̈ampian̈a piaramanompo io. Karaha ty ho William: “Amy zioty ten̈a ilavan̈a asa fiambesan̈a ondrikondriky io mandilatrany taloha. Karaha ataontsika mifen̈y mare man̈ampy olo hahay raha momba Jehovah, atsika koa tôkony hifen̈y mare han̈ampy iro rahalahintsika aby io baka tsy hiala amy fahamarin̈ana.”

16. Akory aby fomba mety han̈arehantsika raha nianarantsika baka tamy taratasiny Petera?

¹⁶ Mbala leson vitsivitsy fo nianarantsika baka tamy taratasy aroe nisoratiny Petera in̈y. Ino raha hitanao mety mbala mila hankatsarainao? Tianao ma, ohatra, hahavita hisaintsain̈y matetiky iro hatsaran̈a miambin̈y anao amy donia vaovao? Sa anao tihan̈ano tanjon̈o hitory a lekoly, ampiasan̈a na koa amy toeran̈a hafa? Anao ma mbala mahita fomba hafa afaka an̈aboahanao fa anao tia mare iro rahalahy ndreky ranabavinao aby io? Izikoa anao antipan̈ahy, anao ma tapakevitry sady von̈ono mare hiambin̈y ondrikondrikiny Zan̈ahary? Izikoa anao mandininten̈a amy fô madio, anao mety hahita raha sasany mbala mila hankatsarainao, fa aza kivy. ‘Tompo tsara fan̈ahy’ ke izy han̈ampy anao hankatsara raha tôkony hatsarainao. (1 Pet. 2:3) Petera man̈amia toky atsika karaha ty: ‘Zan̈ahary ... hankefa fampiofan̈ana anaro. Hataony raha tsy hampiovaova anaro. Izy hampatanjaka anaro ndreky hampiorin̈y tsarabe anaro.’​—1 Pet. 5:10.

17. Ino hatsaran̈a ho azontsika izikoa atsika tsy kivy ndreky man̈ambela Jehovah mampiofan̈a atsika?

¹⁷ Tamy voanalohany, Petera nahatsapa fa izy tsy vain̈y hiaraka amy Jesosy. (Lioka 5:8) Fa Jehovah ndreky Jesosy nanohan̈a izy, ke vitany Petera nifen̈y fo nan̈aradia Jesosy. Vokatra zen̈y, Petera nambela ‘niditry amy Fanjakan̈a mandrakizainy Jesosy Kristy Tompontsika ndreky Pan̈avotro atsika.’ (2 Pet. 1:11) Miavaka ankitin̈y hatsaran̈a nazony! Izikoa anao tsy kivy karaha nataony Petera avio man̈ambela Jehovah mampiofan̈a anao, hahazo hatsaran̈a hiain̈y mandrakizay koa anao. Ho ‘takanao tanjon̈onao ke anao hahazo famonjian̈a fotony anao manampinoan̈a.’​—1 Pet. 1:9.