1. Ino raha mety an̈ontanianolo atsika a lekoly na ampiasan̈a?

 AKORY ataonao izikoa misy piaramiasa na piaramianatra aminao man̈ontany anao momba finoan̈anao? Mavozo ma anao? Maro amintsika mahatsapa karaha zen̈y. Kanefa fan̈ontanian̈a apetrakandro io mety ahaizantsika raha an̈aty jerindro na raha inoandro, ke ho moramora amintsika hikoran̈a vaovao tsara amindro. Fa ndraikindraiky fo, iro mety tsy mitovy hevitry amintsika na tihitady malo amintsika, ke zen̈y mahavy iro man̈ontany. Raha karaha zen̈y efa tsy tôkony hahalany fan̈ahy atsika fotony misy olo sasany maharen̈y raha diso momba atsika. (Asa. 28:22) Sady atsika miain̈y aminy “andra farany”, ankamarozanolo “tsy mety hifan̈arahan̈a” ndreky “masiaka mare.”​—2 Tim. 3:1, 3.

2. Nan̈ino tsara malemy toetry zen̈y?

² Anao mety ho loso diniky karaha ty: ‘Akory ataoko ho tsara fan̈ahy na hivolan̈a moramora izikoa misy olo mivolambolan̈a raha inoako?’ Ino raha han̈ampy anao? Anao mila malemy toetry. Olo malemy toetry zen̈y tsy mora meloko fa mahay mifehy ten̈a izikoa fa misy olo man̈ano raha mampameloko izy na izikoa fa tsy hainy raha tôkony volan̈iny. (Ohab. 16:32) Fa anao mety hivolan̈a: ‘Mora volan̈iny zen̈y fa sarotro atao!’ Ke ino han̈ampy anao halemy toetry? Ino han̈ampy anao ho tsara fan̈ahy fo ke hivolan̈a moramora izikoa fa misy olo mankaratsy raha inoanao? Baka io izikoa anao raimandreny, akory ataonao han̈ampy zanakanao halemy toetry fo izikoa fa miaro raha inoandro? Alo zahavantsika valinizen̈y.

3. Ino ivolan̈ana fa olo malemy toetry zen̈y olo matanjaka fa tsy malemy? (2 Timoty 2:24, 25)

³ Olo malemy toetry zen̈y olo matanjaka fa tsy malemy. Nan̈ino? Fotony mitaky angovo mare mifen̈y ho kalma fo lera misy raha sarotro miboaka. Fahalimiantoetry io koa mbala an̈isany “vokatrany fan̈ahy.” (Gal. 5:22, 23) Volan̈a griky ‘malemy toetry’ io ndraikindraiky ivolan̈ana sevaly dy efa voafolaka. Miniminia hely baka zen̈y! Ndray sevaly araiky efa voafolaka, izy mbala matanjaka fo. Atsika olombelon̈o ke? Posibla ma atsika halemy toetry kanefa matanjaka fo koa? Ia, fa zen̈y tsy ho vitantsika aminy angovontsika manokan̈a. Atsika mila mangataka fan̈ahy masin̈y Zan̈ahary amy vavaka, ndreky miangavy Jehovah han̈ampy atsika hanan̈a toetry tsarabe io. Maro olo nahavita nifen̈y halemy toetry. Maro, ohatra, piaramanompo amintsika nahavita tsara fan̈ahy fo ndray nisy olo nitady ady tamindro. Ke raha zen̈y nahavy olo hafa hieritreritry raha tsara momba Vavolombelon̈o Jehovah. (Vakia 2 Timoty 2:24, 25.) Ke akory hahavy anao halemy toetry fo?

4. Karakory ma olo malemy toetry zen̈y izikoa zahavan̈a tantarany Isaka?

⁴ Maro tantara amy Baiboly ao man̈aboaka fa fahalimiantoetry io toetry ten̈a tsara. An̈isanizen̈y tantarany Isaka. Taminizy nipetraka ta Gerara faritriny Filistiny, nafana fô izy mare iro olo nipetraka nan̈odidin̈y izy aby io ke nitotofandro vôvo nangadiany panompony babany. Isaka tsy nimalo tamindro. Fianakavian̈anany nindesiny nifindra tantany hafa avio tan̈y iro nimpody nangady vôvo hafa. (Gen. 26:12-18) Navy tan̈y, mbala niadivany Filistiny tamindro fo vôvo aby io. Fa Isaka tsy niady tamindro. (Gen. 26:19-25) Ino raha nan̈ampy izy halemy toetry fo nata nisy olo tsy voly nitady ady taminany? Azo antoko fa hitany modeliny raimandreniny. Izy nangala tahaka toetriny Abrahama tia fihavan̈ana ndreky Saraha ‘kalma avio nalemy toetry.’​—1 Pet. 3:4-6; Gen. 21:22-34.

5. Ino ohatra man̈aboaka fa raimandreny kristianin̈y afaka man̈ampy zanakandro halemy toetry?

⁵ Izikoa anao raimandreny kristianin̈y, matokisa fa ho vitanao han̈ampy zanakanao hahay nan̈ino fahalimiantoetry zen̈y toetry tsara. Zahava baka tantarany Maxence, tanora 17 taon̈o. Maro masiaka olo tojy izy ta lekoly ndreky tamy fanompoan̈a tan̈y. Ke raimandreninany nanampaharetan̈a fo nan̈ampy izy halemy toetry. Karaha ty ho raimandreninany: “Hainy Maxence eky zioty fa izikoa fa misy olo man̈ano raha tsy tian̈a, mora direkty meloko na mamaly, fa mifehy ten̈a ndraiky mitaky angovo.” Mamparavoravo fa vitany Maxence fo nifen̈y halemy toetry.

6. Nan̈ino vavaka afaka han̈ampy atsika halemy toetry?

⁶ Ino raha mety ataonao izikoa misy olo man̈ano raha mampameloko anao? Akory, ohatra, ataonao izikoa misy olo mivolan̈a raha ratsy momba Jehovah na mankaratsy Baiboly? Anao mila mangataka fan̈ahy masin̈y ndreky fahendrena amy Jehovah baka ho vitanao halemy toetry. Fa akory ndraiky izikoa tsapanao fa tsy vitanao nalemy toetry erakany tôkony nataonao? Anao mila mimpody mivavaka ndraiky momba problemo io ndreky mieritreritry fomba hahavitanao tsaratsarany in̈y amy man̈araka. Ke Jehovah amy zay han̈amia anao fan̈ahy masin̈inany baka ho vitanao hifehy ten̈a ke tsy ho meloko fa halemy toetry fo.

7. Nan̈ino fitadidian̈a andininteny afaka han̈ampy atsika hifehy ten̈a amy raha volan̈intsika ndreky ataontsika? (Ohabolana 15:1, 18)

⁷ Maro andininteny amy Baiboly ao afaka man̈ampy atsika hifehy vavantsika lera misy raha sarotro. Fan̈ahy masin̈y Zan̈ahary afaka man̈ampy atsika hahatsiaro andininteny aby io. (Jaona 14:26) Toro lalan̈a amy bokiny Ohabolana ao, ohatra, afaka man̈ampy atsika  halemy toetry. (Vakia Ohabolana 15:1, 18.) Boky io koa man̈aboaka nan̈ino mahatsara atsika kalma fo izikoa fa misy raha sarotro.​—Ohab. 10:19; 17:27; 21:23; 25:15.

8. Nan̈ino tôkony halaintsika onon̈o antony mahavy olo araiky man̈ontany raha inoantsika?

⁸ Atsika mila lalintsain̈y fotony zen̈y an̈isany raha han̈ampy atsika. (Ohab. 19:11) Olo lalintsain̈y zen̈y mahavita mifehy ten̈a lera misy olo mankaratsy raha inoany. Matetiky izikoa fa misy olo man̈ontany atsika momba raha inoantsika, tsy ambarandro ino ten̈a antony mahavy iro man̈ontany. Zen̈y mahavy alohany atsika mamaly, tsara alaintsika onon̈o antsendriky fa tsy voatery ho haintsika antony nahavy izy nan̈ontany.​—Ohab. 16:23.

9. Akory nan̈aboahany Gideona fa izy lalintsain̈y ndreky nalemy toetry izikoa fa nifandray tamy lelahy efraimita aby in̈y?

⁹ Aleva onon̈o karakory nataony Gideona namaly koran̈any lelahy efraimita aby in̈y. Neloko iro nan̈ontany izy nan̈ino iro tsy nitaominy taminizy nandeha niady tamy fahavalony Israely. Kanefa, ino ma ten̈a antony nahavy iro neloko? Iro mety nan̈ambony ten̈a. Fa ndray ino ndray ino antony ten̈a nampaneloko iro, Gideona nahay nandiniky ke nalainy onon̈o  tsarabe ino nahavy iro neloko, avio izy nivolan̈a moramora tamindro. Ke ino vokanizen̈y? Nanjary ‘kirikiry helokonolo aby io.’​—Mpits. 8:1-3.

10. Akory ahaizantsika fomba hamalian̈a olo man̈ontany atsika momba raha inoantsika? (1 Petera 3:15)

¹⁰ Mety hisy piaramiasa na piaramianatra amintsika koa han̈ontany nan̈ino atsika man̈araka raha volan̈iny Baiboly. Atsika tôkony hifen̈y mare hiaro raha inoantsika, fa atsika koa tôkony han̈aja iro. (Vakia 1 Petera 3:15.) Ke izikoa fa misy raha karaha zen̈y, aza direkty mieritreritry fa izy tihankaratsiratsy anao fo, fa diniha baka amy fan̈ontanian̈anany io ino raha ten̈a tiany ho hay. Ndray ino ndray ino antony mahavy izy man̈ontany, atsika tôkony hifen̈y fo ho tsara fan̈ahy lera mamaly. Valintenintsika mety handrisiky izy handiniky tsarabe ndraiky hevitrinany. Na masiaka olo io na tihan̈adroadro atsika, atsika tôkony hifen̈y fo ho tsara fan̈ahy.​—Rom. 12:17.

11-12. a) Ino raha mila alaintsika onon̈o alohany hamaliantsika fan̈ontanian̈a sarotro? (Zahava koa sary.) b) Man̈ameza ohatra ahitan̈a amy karakory fan̈ontanian̈anolo araiky mety han̈ambela atsika hikoran̈a aminany.

¹¹ Diniha ty izikoa misy piaramiasa aminao man̈ontany anao nan̈ino atsika tsy man̈ano aniversera: Izy ma loso diniky asa mba man̈ano fety edy atsika? Sa izy mety mieritreritry fa raha ataontsika io mety handrobaka firaisantsain̈y ampiasan̈a ao? Tsara deraintsika izy fotony tia olo, avio mila amezantsika toky izy fa ndray atsika koa mba man̈iry olo jiaby ampiasan̈a ao ho ravoravo. Izikoa atsika man̈ano zen̈y, atsika mety ho afaka hikoran̈a aminany raha volan̈iny Baiboly momba aniversera.

¹² Mety man̈ano karaha zen̈y koa atsika lera misy olo mametraka fan̈ontanian̈a sarotro amintsika. Mety hisy piaramianatra amintsika hivolan̈a fa Vavolombelon̈o Jehovah tôkony han̈ova fomba fihevitrindro momba fiarahany samy lelahy na samy viavy. Diso hevitry momba Vavolombelon̈o Jehovah ma izy matoa mivolan̈a zen̈y? Sa misy havany na namany lelahy tia lelahy na viavy tia viavy? Sa izy mieritreritry fa atsika tsy tia olo karaha zen̈y foeky? Mety ilaintsika ohatra man̈amia toky izy fa olo jiaby tiantsika, ndreky atsika man̈aja zonolo tsiaraikiaraiky hisafidy fomba fiain̈ana tiany. b (1 Pet. 2:17) Baka io afaka hazavaintsika aminany ino raha koran̈iny Baiboly ndreky nan̈ino fan̈arehan̈a izio man̈ampy atsika ho sambatra.

13. Akory mety han̈ampianao olo mankaratsy olo mino fisiany Zan̈ahary?

¹³ Izikoa misy olo araiky tsy mitovy fomba fihevitry amintsika, atsika tsy tôkony direkty hieritreritry fa haintsika raha inoany. (Tit. 3:2) Karakory, ohatra, izikoa misy tsaiky lekoly araiky aminao mivolan̈a fa adala olo mino fisiany Zan̈ahary? Anao ma tôkony direkty hieritreritry fa matoa izy mivolan̈a zen̈y izy mino evolision na mahay raha maro momba izio? Ndraindray, izy mety man̈ampody raha ren̈iny fo. Ke ino basy mety ataonao? Aza miady hevitry aminany momba evolision fa mitadiava raha amian̈a izy na man̈apitraha fan̈ontanian̈a afaka hidinihiny tsara. Mety aboakanao izy fan̈azavan̈a momba famoron̈ana amy jw.org. Afara an̈y, izy mety ho von̈ono hikoran̈a aminao momba lahatsoratra na video araiky hitany tao. Izikoa atsika mifen̈y man̈aja olo ambaka zen̈y, zen̈y han̈ampy izy han̈iry hahay raha koran̈iny Baiboly.

14. Akory nataony Niall nampiasa tranonkalantsika han̈ampian̈a piaramianatra taminany hahita fa diso raha volan̈inolo momba Vavolombelon̈o Jehovah?

¹⁴ Nisy tanora araiky nampiasa tranonkalantsika han̈aboahan̈a fa diso raha volan̈inolo  momba Vavolombelon̈o Jehovah. Niall an̈arany tanora io. Ho izy: “Misy piaramianatra aminaka zay matetiky mivolan̈a aminaka fa zaho zen̈y tsy mino siansy fotony mino raha volan̈iny Baiboly bokiny angano.” Niall tsy nambelany tsaiky io han̈azava raha inoany foeky. Ke izy nirahiny Niall nizaha fizaran̈a “Siansy Ndreky Baiboly” amy jw.org. Tafara tatỳ, hainy Niall fa tsaiky io efa namaky fan̈azavan̈a tao, ke Niall loso afaka nikoran̈a taminany momba fomba nampisy fiain̈ana. Anao koa mety hahavita han̈ano ambaka zen̈y.

15. Akory mety ataony raimandreny man̈ampy zanakandro ho tsara fan̈ahy fo lera misy piaramianatra amindro mankaratsy finoan̈andro?

¹⁵ Raimandreny afaka mampianatra tsarabe zanany akory atao tsara fan̈ahy fo lera misy olo mankaratsy raha inoany. (Jak. 3:13) Efa ampan̈anaoviny raimandreny sasany fan̈azaranten̈a zanakandro amy fotoampivavahany fianakavian̈a. Zahavandro ino hevitry mety hikoran̈inolo a lekoly an̈y, avio iro miaraka midiniky izio ndreky man̈ano fampisehoan̈a mikasiky fomba hamalian̈a koran̈anolo. Baka io, ampianarindro zanakandro akory atao halemy toetry lera mivolan̈a ndreky akory atao man̈ano koran̈a mahalian̈a.​—Zahava efajoro “ Fan̈azaranten̈a Afaka Man̈ampy Fianakavian̈anao.”

16-17. Nan̈ino fan̈azaranten̈a io afaka man̈ampy tanora?

¹⁶ Fan̈azaranten̈a afaka han̈ampy tanora ho resy lahatra amy raha inoany ndreky hahavita han̈azava izio aminolo. Aminy andiandahatsoratra “Manontany ny Tanora” amy jw.org ao misy “fampiasana ho an’ny tanora.” Iro io natao han̈ampian̈a tanora ho resy lahatra amy raha inoandro ndreky hahavita hamaly raha volan̈inolo amy fomba fivolan̈anandro. Izikoa fianakavian̈a miaraka mianatra iro andiandahatsoratra aby io, iro jiaby samby hahay hiaro finoan̈andro sady halemy fan̈ahy fo koa, ndreky  hahay akory han̈anaovan̈a zen̈y amy fomba mahalian̈a.

¹⁷ Nazavainy Matthew fa fan̈azaranten̈a an̈isany raha ten̈a nan̈ampy izy. Izikoa fa fotoampivavahany fianakavian̈a, matetiky Matthew ndreky raimandreninany miaraka man̈ano fikarohan̈a momba hevitry mety koran̈inolo a lekoly an̈y. Karaha ty nivolan̈iny Matthew: “Dinihinay ino aby fan̈ontanian̈a mety hapetrakanolo a lekoly an̈y, avio ataonay fan̈azaranten̈a fomba hamalian̈a iro io mifan̈araka amy fikarohan̈a hitanay. Izikoa fa mazava tsarabe aminaka nan̈ino zaho mino raha araiky, zaho loso matoky ten̈a ke manjary moramora aminaka halemy toetry koa fa mikoran̈a aminolo.”

18. Ino toetry tsara koran̈iny Kolosianina 4:6?

¹⁸ Marin̈y ndraiky fa ndray marin̈y ndreky maharesy lahatra karakory raha volan̈intsika, tsy olo jiaby han̈eky izio. Fa hahomby ndraiky atsika izikoa mahay mandanjalanja ndreky malemy toetry. (Vakia Kolosianina 4:6.) Lera atsika mikoran̈a aminolo raha inoantsika, atsika miran̈a man̈atsipy laboly aminany. Laboly io mety atsipintsika moramora na torahantsika mare aminany. Izikoa izio atsipintsika moramora, ho vitany hananty izio, ke izy hanohy hisoma. Karaha zen̈y koa, izikoa atsika mahay mandanjalanja ndreky tsara fan̈ahy lera mikoran̈a, olo manjary von̈ono hitandren̈y atsika ndreky hanohy koran̈a ataontsika. Marin̈y ndraiky fa izikoa olo araiky tihiady hevitry na tihankaratsy raha inoantsika fo, atsika tsy voatery hanohy koran̈anany. (Ohab. 26:4) Fa nakiry izy, tsy olo jiaby karaha zen̈y, mbala maro olo mety hitandren̈y atsika.

19. Ino raha tôkony handrisiky atsika halemy toetry lera miaro finoan̈antsika?

¹⁹ Ten̈a maro hatsaran̈a ho azontsika izikoa atsika mifen̈y halemy toetry. Ke mivavaha amy Jehovah. Angataha izy han̈amia anao angovo hahavitanao halemy toetry fo lera mamaly adihevitry na fankaratsian̈a ataonolo. Tsarova fa izikoa anao malemy fan̈ahy, zen̈y mety hisakan̈a hevitry tsy mitovy tsy hivadiky malo. Baka io, izikoa anao mifen̈y halemy toetry ndreky han̈aja lera mamaly, zen̈y mety handrisiky olo sasany han̈ova eritreritrindro momba atsika ndreky momba fahamarin̈ana amy Baiboly. Mifen̈a fo ho ‘von̈ono hiaro’ raha inoanao, baka io asia ‘fahalimiampan̈ahy ndreky fan̈ajan̈a lalin̈y fo izikoa anao fa man̈ano zen̈y.’ (1 Pet. 3:15) Ke ambilà fahalimiantoetry io hanjary angovonao!