LAHATSORATRA FIANARAN̈A 39
HIRA 125 “Sambatra ny Mamindra Fo”!
Ho Sambatra Anao Izikoa Tia Man̈amia
“Man̈amia raha olo ten̈a mampasambatra tozay amezan’olo raha.”—ASA. 20:35.
HEVITRY HIDINIHIN̈Y
Raha mety ataontsika baka ho ravoravo fo atsika izikoa fa man̈amia raha olo, aviô akôry atao baka hampitombosan̈a haravoan̈a zen̈y.
1-2. Nan̈ino atsika nataon’i Jehovah mahatsiaro sambatra izikoa fa man̈amia raha olo?
JEHOVAH koa fa namôron̈o olombelon̈o, nataony sambatra mare izikoa fa man̈amia raha olo, tozay izikoa fa amezan’olo raha. (Asa. 20:35) Zen̈y ndraiky tsy mivolan̈a fa tsy mahasambatra atsika mahazo kadô. Ndray atsika aby ravoravo izikoa fa misy olo man̈amia raha atsika. Fa kanefa, mbala beben’izen̈y hasambaran̈a azontsika izikoa atsika man̈amia raha olo. Nakiry izy, atsika nataon’i Jehovah karaha zen̈y. Nan̈ino?
2 Fôtony atsika nataon’i Jehovah karaha zen̈y, atsika fo efa afaka mampitombo haravoan̈antsika. Hahaiho ravoravo fo atsika arakaraka hitadiavantsika hevitry han̈amezan̈a raha olo. Tsy mahavarian̈a anao ma fomba namoron̈an’i Jehovah atsika zen̈y?—Sal. 139:14.
3. Nan̈ino ma Jehovah “Zan̈ahary ravoravo”?
3 Soratra Masin̈y man̈amia toky atsika fa mampasambatra man̈amia raha olo. Ke tsy mahagaga izikoa Baiboly mivolan̈a fa Jehovah io “Zan̈ahary sambatra.” (1 Tim. 1:11; l.p.a.) Izy voanalohany nan̈amia raha olo, aviô tsisy mahavita man̈amia be mandilatra izy. Koran̈in’ny apostoly Paoly fa baka aminany mahavy atsika “velon̈o, mihetsiketsiky ndreky misy.” (Asa. 17:28) Ke baka amy Jehovah aby “fan̈amezan̈a tsara jiaby ndreky fan̈amezan̈a lavorary jiaby.”—Jak. 1:17.
4. Ino raha han̈ampy atsika hampitombo haravoan̈antsika?
4 Atsika jiaby samy tiho sambatra izikoa fa man̈amia raha olo. Ke akôry hatao? Mifen̈a ho tia man̈amia karaha Jehovah. (Efes. 5:1) Hianatra baka aminany atsika ato. Hidinihintsika koa ino raha mety atao izikoa olo karaha tsy mahay mankasitraka raha nataontsika tamindrô. Han̈ampy atsika zen̈y baka ho ravoravo fo ndreky hampitombo haravoan̈antsika izikoa fa man̈amia raha olo.
MIFEN̈A HO TIA MAN̈AMIA KARAHA JEHOVAH
5. Ino aby raha amezan’i Jehovah atsika?
5 Ino aby fomba an̈aboahan’i Jehovah fa izy tsy matity? Diniha baka irô ohatra aby ty. Jehovah man̈amia atsika raha ilaintsika. Atsika ndray tsy mpan̈arivo be, ankamarozantsika manan̈a raha ilaintsika nohon’ny fan̈ampiany. Ohatra, atsika ataony mahita hanin̈y, lamba ndreky tany ipitrahan̈a. (Sal. 4:8; Mat. 6:31-33; 1 Tim. 6:6-8) Izio ma baka amin’ny adidy fo mahavy Jehovah man̈amia atsika zen̈y? Aha, tsy zen̈y! Baka amin’ino fo?
6. Ino raha ianarantsika baka amy Matio 6:25, 26?
6 Baka amy fitiavan’i Jehovah atsika mahavy izy man̈amia raha ilaintsika. Diniha baka volan̈an’i Jesosy amy Matio 6:25, 26. (Vakia.) Jesosy nangala ohatra tamy raha niasain’ny Zan̈ahary. Izy koa fa nikoran̈a momba vôron̈o, karaha ty ho izy: “Irô io tsy mamafy, na mitsôngo vary, na mamory hanin̈y an̈aty riha.” Fa zahava amy zay tohin’ny volan̈anany: “Babanarô an-dan̈itry an̈y man̈amia hanin̈y irô io.” Jesosy baka tiô nan̈ontany: “Tsy mbala valera mandilatra irô vôron̈o aby io ma anarô?” Ino raha ianarantsika baka amy zen̈y? Valera mare amy Jehovah mpanomponany aby io mandilatra biby. Ke Jehovah koa mikarakara raha ilaindrô biby aby io, ke izy koa tsy hikarakara atsika. Karaha baba araiky mahakarakara in̈y izy, ke man̈amia raha ilain’ny fianakavian̈anany, nohon’ny fitiavany irô.—Sal. 145:16; Mat. 6:32.
7. Ino fomba araiky hangalantsika tahaka fitiavan’i Jehovah man̈amia raha olo? (Zahava koa sary.)
7 Karaha ataon’i Jehovah, atsika koa mety man̈amia raha olo, baka amy fitiavantsika irô. Ohatra, asa anao mahay mpiara-manompo araiky tsisy hanin̈y na tsisy lamba? Jehovah mety hampiasa anao han̈amia izy raha ilainy zen̈y. Izikoa fa misy antambo, vahoakan’i Jehovah malaza tia man̈ampy olo. Ohatra tamy valan̈aretin̈y COVID-19 in̈y, irô rahalahintsika ndreky ranabavintsika aby io nandrasa lamba ndreky hanin̈y ndreky raha hafa ten̈a nilain’olo. Maro koa nan̈ano fan̈amezan̈a nin’ny asa atao eran-tany. Raha zen̈y an̈ampian̈a irô rahalahy sahiran̈a, amy tany andalovan’ny antambo, eran-tany. Vahoakan’i Jehovah man̈araka raha volan̈in’ny Hebreo 13:16 ty: “Aza man̈adin̈a man̈ano ny tsara ndreky mandrasa raha amin’olo, fôtony sôron̈o karaha zen̈y ten̈a mamparavoravo Zan̈ahary.”
Karaha ataon’i Jehovah, atsika jiaby samy afaka ho tia man̈amia raha olo (Zahava fehintsoratra 7)
8. Jehovah man̈amia atsika angôvo han̈anaovan̈a ino? (Filipianina 2:13)
8 Jehovah man̈amia angôvo. Ravoravo Jehovah mirasa angôvonany tsy mety lany io amy mpanomponany tsy mivadiky. (Vakia Filipianina 2:13.) Asa anao efa navy nivavaka, nangataka angôvo ahavitanao mandresy fakam-pan̈ahy na angôvo ahavitanao miaritry raha sarotro? Anao koa mety nivavaka baka hahazo angôvo ahavitanao man̈ano raha tianao hatao an̈atin’ny andra araiky. Ke izikoa fa nivaly vavaka nataonao io ke anao nahazo angôvo, mety mira raha nivolan̈in’ny apostoly Paoly ty raha tsapanao: “Baka amin’ny araiky man̈amia angôvo zaho in̈y mahavy zaho manan̈a angôvo hindesin̈y hiatriky zay raha miboaka.”—Fil. 4:13.
9. Akôry mety hangalantsika tahaka fomba fampiasan’i Jehovah angôvonany? (Zahava koa sary.)
9 Atsika ndray tsy lavorary, atsika mety mangala tahaka Jehovah fo, ke tsy hatity angôvo. Nata atsika tsy mahavita mandrasa angôvontsika ara-bakiteny, atsika mety mampiasa izio han̈ampian̈a olo. Ohatra, atsika mety mitahitahy rahalahy na ranabavy araiky efa matoe, karaha ataony man̈ano asa an-tran̈o na man̈ano bazarinany. Atsika koa mety man̈ano asa an-tsitrapô, ke man̈ampy amy fan̈adiovan̈a ndreky fikobabian̈a Tran̈o Fivorian̈a, izikoa atsika afaka man̈ano zen̈y. Atsika koa mampiasa angôvontsika karaha zen̈y, ho be hatsaran̈a ho azon’ny rahalahintsika ndreky ranabavintsika.
Mety mampiasa angôvontsika atsika han̈ampian̈a olo (Zahava fehintsoratra 9)
10. Akôry mety hankahirezantsika olo baka amy raha volan̈intsika?
10 Aza adin̈a koa fa volan̈a io misy heriny mare. Asa tsaroanao anao efa navy nidera olo, ke izy baka tiô nanjary nisy korazy mare? Fa asa anao mahay olo mila hankahirezin̈y? Izikoa ia valiny, ataova raha hahitan’olo fa anao mikarakara izy na tia izy. Ke anao mety mamangy izy an-tran̈o, na mitelefony, na mandefa karty aminany, na mandefa e-mail na mesazy. Aza miasaloha amy raha hivolan̈inao aminany, fôtony na volan̈a tsotra fo ampiasainao, izio mety efa hahavy olo io tsy hivadiky amy Jehovah ndreky hanan̈a fan̈antinan̈a.—Ohab. 12:25; Efes. 4:29.
11. Akôry ampiasan’i Jehovah fahendrenanany?
11 Jehovah man̈amia fahendrena. Karaha ty nisoratin’i Jakoba mpianatra: “Izikoa misy aminarô tsendriky mahay man̈avaka ny tsara ndreky ratsy, izy tôkony tsy vôly hangataka amy Zan̈ahary, fôtony izy tsy matity amin’olo jiaby sady tsy mba man̈amia tsin̈y.” (Jak. 1:5; l.a.p.) Hitantsika amy zen̈y fa Jehovah tsy matity fahendrena fa mazoto mirasa izio. Aleva onon̈o koa fa Jehovah koa fa man̈amia fahendrena io, izy “tsy man̈amia tsin̈y”, na “tsy masiaka.” Tsy tiany foeky atsika tsy hasaky hangataka tari-dalan̈a baka aminany. Nata izy mandrisiky atsika hitady zen̈y aby.—Ohab. 2:1-6.
12. Akôry aby fomba mety handrasantsika fahendrena anan̈antsika?
12 Atsika ke? Atsika koa ma afaka mizara fahendrena anan̈antsika karaha ataon’i Jehovah? (Sal. 32:8) Vahoakan’i Jehovah mety man̈ano raha maro hizaran̈a amin’olo raha nianarandrô. Ohatra, matetiky atsika mampiofan̈a olo vaovao, amy fanompoan̈a. Irô anti-pan̈ahy aby io koa manan̈a faharetan̈a man̈ampy irô mpikarakara fiangonan̈a ndreky rahalahy vita batisa aby io, hianatra karakôry han̈anaovan̈a andraikitry an̈atin’ny fiangonan̈a. Akôry ndraiky irô manan̈a traikefa amy fan̈oren̈ana ndreky amy fikobabian̈a? Irô afaka man̈ampy irô olo mbala tsy ampy traikefa han̈ano asa misy ifandraisany amy tran̈on’ny fandaminan̈a.
13. Atsika koa fa mampiofan̈a olo, akôry hangalantsika tahaka Jehovah?
13 Aleva tahaka Jehovah izikoa anao iziôty mampiofan̈a olo. Tsarova fa Jehovah tsy matity fahaizan̈a. Mira zen̈y koa atsika. Tiantsika hirasa fahaizan̈a ndreky traikefa amin’olo ampiofan̈intsika. Tsisy raha asitrikintsika irô, fôtony atsika tsy mavozo irô hisolo plasintsika. Aviô tsy hieritreritry: ‘Zaho zaraiky fo kony nianatra fa tsisy olo nampiofan̈a! Ambilà izy han̈ano karaha zen̈y koa.’ Toe-tsain̈y zen̈y tsy tôkony hisy amy vahoakan’i Jehovah foeky. Tsy mirasa fahaizan̈antsika fo mamparavoravo atsika “fa man̈amia ain̈intsika” irô olo ampiofan̈intsika io koa. (1 Tes. 2:8) Atsika man̈anten̈a fa irô io andra araiky an̈y, ‘mbala hanjary mafatoky koa, ke hampianatra olo hafa.’ (2 Tim. 2:1, 2) Atsika koa man̈ano zen̈y, samy hitombo fahendrena ndreky haravoan̈a, na atsika na irô olo nampiofan̈intsika aby io.
AKÔRY IZIKOA OLO KARAHA TSY MANKASITRAKA?
14. Atsika koa man̈ano ny tsara amin’olo, ino raha mety hataondrô?
14 Izikoa atsika tsy matity, intsaka eky amindrô rahalahintsika ndreky ranabavintsika aby io, matetiky irô mankasitraka atsika. Mety handefa karty irô han̈anaovan̈a mersy atsika, na mety hampiasa fomba hafa koa. (Kol. 3:15) Atsika koa mahazo fankasitrahan̈a karaha zen̈y, mahaihahatsiaro ho sambatra fo atsika.
15. Ino raha tôkony tsy hadin̈antsika izikoa olo karaha tsy mankasitraka ny tsara nataontsika taminany?
15 Fa ndraikindraiky olo tsy mijery raha ataontsika amindrô foeky, atsika koa man̈ampy irô. Tsy iasandrô loha foeky atsika ndray lany fotoan̈a, angôvo ndreky vola tamindrô. Ke izikoa zen̈y ny raha misy, akôry hataontsika baka atsika ho ravoravo fa tsy hahinihiny? Aleva onon̈o andininy ioren̈an’ny fianaran̈a ty, Asan’ny Apostoly 20:35. Haravoan̈a io tsy miankin̈y amy fankasitrahan’olo atsika. Ke atsika mety hanapa-kevitry han̈ano ny tsara amin’olo fo, nata izio tsisy valiny. Akôry mety han̈anaovantsika zen̈y? Diniha baka fomba vitsivitsy aby ty.
16. Tôkony ho ino raha mandrisiky atsika ho ravoravo fo man̈amia raha olo?
16 Aleva onon̈o fa mangala tahaka Jehovah anao. Izy man̈ano ny tsara amin’olo fo, na irô mankasitraka na irô tsy mankasitraka. (Mat. 5:43-48) Jehovah mampan̈anten̈a fa atsika koa man̈amia raha olo ke ‘tsy man̈anten̈a valiny’, “ho be hatsaran̈a” ho azontsika. (Lioka 6:35) An̈isan’ny “valiny” tiany koran̈iny io, volan̈a fankasitrahan̈a baka amin’olo. Ke atsika na mahazo fankasitrahan̈a io na tsy mahazo, Jehovah tsy maintsy hamaly hatsaran̈a amintsika fo, izikoa atsika mazoto man̈ampy olo, ke ‘man̈amia an-karavoan̈a.’—Ohab. 19:17; 2 Kor. 9:7.
17. Ino antony ten̈a maventy mahavy atsika man̈amia raha olo? (Lioka 14:12-14)
17 Mangala tahaka Jehovah koa atsika, izikoa man̈araka torolalan̈a mahatsara amy Lioka 14:12-14 ao. (Vakia.) Tsy diso ndraiky atsika izikoa mikaiky olo mety mahavaly ny tsara ataontsika amindrô, karaha ataony mikaiky irô mihina ndreky tsara fan̈ahy amindrô. Fa karakôry ndraiky tôkony hataontsika, izikoa atsika tontohitry fa isaka atsika man̈ano ny tsara amin’olo, atsika man̈anten̈a valiny baka amindrô fo? Tsara izikoa atsika mifen̈y man̈araka raha nivolan̈in’i Jesosy. Afaka atao mikaiky olo hitanao fa tsy hahavita hamaly ny tsara ataonao aminany. Ho sambatra atsika amy zen̈y, fôtony mangala tahaka Jehovah. Raha zen̈y koa han̈ampy atsika ho ravoravo fo man̈amia raha olo, nata irô tsy tafivolan̈a mersy.
18. Ino han̈ampy atsika tsy hiahiahy olo?
18 Aza miahiahy antony an̈anaovan’olo raha. (1 Kor. 13:7) Izikoa olo tsy mankasitraka raha ataonao, man̈ontania ten̈a: ‘Irô ma ten̈a tsy mankasitraka olo, sa irô nan̈adin̈a nankasitraka zaho?’ Tsy maintsy nisy antony fo nahavy irô tsy nan̈aboaka fankasitrahan̈a tamintsika. Sasany mety hieritreritry fa tsy hainy fomba hivolan̈any fankasitrahan̈anany. Irô mety men̈atra izikoa amian̈a fan̈ampian̈a, sirto izikoa irô taloha mety nahavita nan̈ampy olo, fa iziôty ndraiky mety efa tsy afaka man̈ano zen̈y. Fa na ino na ino antony, izikoa atsika tia irô rahalahy ndreky ranabavintsika aby io, atsika tsy hiahiahy irô, fa ho ravoravo fo ke tsy vôly han̈ano ny tsara amindrô.—Efes. 4:2.
19-20. Nan̈ino mahatsara atsika manam-paharetan̈a izikoa fa man̈amia raha olo? (Zahava koa sary.)
19 Manàn̈a faharetan̈a. Mpanjaka Solomona, mpanjaka hendry nivolan̈a karaha ty momba fahazotoan̈a man̈amia raha olo: “Atsipia an̈abo rano môfonao, fa izikoa afaka andra maromaro, izio mbala ho hitanao fo.” (Mpito. 11:1) Zen̈y mivolan̈a fa mety ho ela, na “afaka andra maromaro” olo vo hankasitraka ny tsara nataonao taminany. Diniha baka ohatra araiky mankamarin̈y zen̈y.
20 Taon̈o maro lôso zay, nisy ranabavy araiky vadin’ny mpiandraikitry faritry, nan̈amia taratasy feno fitiavan̈a ranabavy araiky mbala vo vita batisa vo tsy ela, hankahirezan̈a izy baka izy tsy hivadiky amy Jehovah. Kadiriny efa valo taon̈o tafaran’izin̈y ranabavy io vo namaly taratasy io. Ho izy: “Manoratra aminao zaho fôtony tihivolan̈a aminao fa ten̈a nan̈ampy zaho tan̈atin’ny taon̈o maro taratasy namianao zaho in̈y.” Aviô koa ho izy: “Ten̈a feno hatsaram-pan̈ahy volan̈a nampiasainao, aviô tsy mety hadin̈ako koa andininy nisoratinao tao in̈y.” Aviô izy koa fa nan̈azava raha maro sarotro nandalovany, izy nivolan̈a: “Nisy lera aby zaho efa tseky vôly nanompo Jehovah foeky, fa andininy nisoratinao in̈y ten̈a tafiditry tan̈atin’ny fônaka. Ke raha zen̈y nan̈ampy zaho tsy hivadiky foeky.” a Aviô koa ho izy: “Tan̈atin’ny valo taon̈o in̈y, efa taratasy nalefanao ndreky andininy nisoratinao in̈y edy raha ten̈a nankahery zaho.” Misaora ravoravo mare vadin’ny mpiandraikitry faritry io nahazo taratasy io, “afaka andra maromaro”! Atsika koa mety hahazo fankasitrahan̈a baka amin’olo nan̈anaovantsika ny tsara, nata efa elabe tafaran’ny nan̈anaovantsika zen̈y taminany.
Mety efa afara be atỳ olo sasany vo hankasitraka ny tsara nataontsika taminany (Zahava fehintsoratra 20) b
21. Nan̈ino anao tapa-kevitry hangala tahaka fitiavan’i Jehovah man̈amia raha olo fo?
21 Miavaka fomba namoron̈an’i Jehovah atsika, eraka hitantsika tiô in̈y. Atsika ndray ravoravo izikoa fa mahazo raha, mbala mandilatra zen̈y hasambaran̈antsika, izikoa atsika man̈amia raha olo. Afa-pô atsika izikoa fa mahavita man̈ampy mpiara-manompo. Aviô, sambatra koa atsika izikoa irô mankasitraka atsika. Fa kanefa, ndray man̈ano mersy olo io ndray tsy man̈ano, atsika mbala ravoravo fo fôtony nan̈ano raha tôkony hatao. Aza adin̈a foeky fa na ino na ino raha amianao olo, “Jehovah mahavita man̈amia anao beben’izin̈y.” (2 Tant. 25:9) Atsika tsy hahavita han̈amia beben’ny raha amian’i Jehovah foeky! Aviô, tsisy raha mamparavoravo mandilatran’i Jehovah mamaly ny tsara nataontsika. Irarian̈a atsika hangala tahaka Babantsika an-dan̈itry an̈y fo, ke ho tia man̈amia raha olo.
HIRA 17 “Sitrako Tokoa”
a Andininy nisoratin’ny ranabavy io tan̈atin’ny taratasy io tao, 2 Jaona 8. Karaha ty koran̈in’izio: “Anarô mitandrema, tsao ho very bôriny vokatran’ny ezaka jiaby nataonay. Mitandrema fo, baka anarô hahazo hatsaran̈a feno.”
b FAN̈AZAVAN̈A SARY: Irô io sary namboarin̈y, man̈aboaka raha nataon’ny vadin’ny mpiandraikitrin’ny faritry, voakoran̈a amy fehintsoratra faha-20. Efa taon̈o maro tafara izy vo nahazo taratasy fankasitrahan̈a.
