1. Ino ma raha handeha hataon’i Jesosy teteky iô?

 HO HISY fivoan-draha maro maventy amy fotoan̈a iain̈antsika! Teteky iô Jesosy hitsara olombelon̈o tsiaraikiaraiky ambony tany eto. Nambaran’i Jesosy raha hahazaintsika ino raha handalo amy donia ty, alohan’izy han̈ano zen̈y. Izy nan̈azava tamy mpan̈ara-dia izy karakory ‘hahaizan̈a’ fotoan̈a himpodianany, nata izio tsy hitan’ny maso ndreky “vanim-potoan̈an’ny faran’ny donia ty.” (Mat. 24:3) Ke raha hahaizan̈a izio nambarany io voakoran̈a amy Matio toko faha-​24 ndreky 25, aviô Marka toko faha-​13 ndreky amy Lioka toko faha-​21.

2. Ino ma raha handeha hidinihintsika amy lahatsoratra ty, baka iô nan̈ino raha zen̈y han̈ampy atsika?

² Jesosy nampiasa fan̈oharan̈a telo hampitandreman̈a atsika, baka atsika hahavita hioman̈a. Irô io fan̈oharan̈a momba ôndrikôndriky ndreky bengy, virijiny misy jery ndreky virijiny tsy misain̈y, aviô fan̈oharan̈a momba talenta. Fan̈oharan̈a tsiaraikiaraiky han̈ampy atsika hahay fa miankin̈y amy raha ataontsika hitsaran̈a atsika. Ke izikoa atsika fa mandiniky irô fan̈oharan̈a aby io, hizahavantsika ino aby raha ianarantsika baka amindrô io ndreky fomba hahafahantsika han̈araka zen̈y. Hidinihintsika voanalohany, fan̈oharan̈a momba ôndrikôndriky ndreky bengy.

ÔNDRIKÔNDRIKY NDREKY BENGY

3. Ombian̈a Jesosy hitsara olo?

³ Amy fan̈oharan̈a momba ôndrikôndriky ndreky bengy io, Jesosy nivolan̈a fa izy hitsara olo, miankin̈y amy fomba handraisandrô vaovao tsara, ndreky fanohan̈andrô rahalahinany  voahosotro aby io. (Mat. 25:31-46) An̈atin’ny “fahorian̈a be”, izy hitsara azôvy ôndrikôndriky ndreky azôvy bengy, aloha helin’ny Aramagedona. (Mat. 24:21) Karaha ataon’ny mpiambin̈y ôndrikôndriky ndreky bengy, Jesosy han̈avaka irô olo tsy nivadiky ke nanohan̈a irô rahalahiny voahosotro aby io ndreky irô tsy nan̈ano zen̈y.

4. Izikoa Isaia 11:3, 4 zahan̈a, nan̈ino atsika matoky tsarabe fa han̈ano ny rariny Jesosy koa fa mitsara? (Zahava koa amy fôn̈ony.)

⁴ Aboakan’ny faminanian̈an’ny Baiboly fa Jehovah nanendry Jesosy nataony mpitsara. Jesosy koa fa hitsara, izy han̈ano ny rariny fo. (Vakia Isaia 11:3, 4.) Zahavany fitondran-ten̈an’olo, toe-tsain̈indrô ndreky raha volan̈indrô, an̈atin’izen̈y fomba itondrasandrô irô rahalahiny voahosotro aby io. (Mat. 12:36, 37; 25:40) Hain’i Jesosy azôvy nanohan̈a irô rahalahiny voahosotro aby io ndreky asa nataondrô. a An̈isan’ny fomba ten̈a maventy hanohan̈an’olo araiky irô rahalahin’i Kristy aby io, fan̈ampian̈a irô amin’ny asa fitorian̈a. Lan̈iany olo manohan̈a asa io, “olo marin̈y” ivolan̈ana irô, baka iô hahazo “fiain̈ana tsisy farany” ambony tany eto irô io. (Mat. 25:46; Apok. 7:16, 17) Mahavarian̈a hatsaran̈a ho azon’olo tsy mivadiky aby zen̈y! Irô koa tsy mivadiky fo an̈atin’ny fahorian̈a be ndreky afaran’izen̈y, an̈arandrô ho tavela an̈atin’ny “bokin’ny fiain̈ana” ao fo.​—Apok. 20:15.

5. Ino raha ianarantsika baka amy fan̈oharan̈a momba ôndrikôndriky ndreky bengy, aviô azôvy aby tôkony ho lian̈a amizio?

⁵ Aboaha fa anao manan̈a finoan̈a ndreky tsy mivadiky. Irô olo hiain̈y ambony tany eto ten̈a handihanan’ny fan̈oharan̈an’i Jesosy momba ôndrikôndriky ndreky bengy. Aboakandrô fa irô manan̈a finoan̈a, ke irô manohan̈a rahalahin’i Kristy aby io amin’ny asa fitorian̈a. Aviô, irô koa man̈araka tari-dalan̈a baka amy “mpanompo atokisan̈a ndreky mahadiniky raha” nifidin’i Jesosy. (Mat. 24:45) Kanefa, mbala mila man̈araka fampitandreman̈a io fo koa irô man̈anten̈a handeha an-dan̈itry. Nan̈ino? Fôtony Jesosy mandiniky fitondran-ten̈andrô, toe-tsain̈indrô ndreky raha volan̈indrô. Aviô mila aboakandrô koa fa irô ten̈a manan̈a finoan̈a. Misy fampitandreman̈a voafaritry tsara handeha amindrô voahosotro aby io koa nikoran̈in’i Jesosy. Fan̈oharan̈a aby zen̈y hitantsika amy Matio toko faha-​25 koa. Alô zahavantsika fan̈oharan̈a momba virijiny misy jery ndreky virijiny tsy misain̈y.

VIRIJINY MISY JERY NDREKY VIRIJINY TSY MISAIN̈Y

6. Akôry nan̈aboahandrô virijiny dimy aby in̈y fa irô misy jery? (Matio 25:6-10)

⁶ Amy fan̈oharan̈a momba virijiny io, Jesosy nikoran̈a momba virijiny folo niboaka hitsena mpan̈ainga. (Mat. 25:1-4) Irô jiaby man̈anten̈a hiaraka amy mpan̈ainga io amy fetin’ny mariazinany. Jesosy nivolan̈a fa dimy tamindrô virijiny aby io “misy jery” fa dimy ndraiky “tsy misain̈y.” Irô virijiny misy jery aby io efa nioman̈a ndreky tsy rikian̈a. Irô efa vôn̈ono hiambin̈y mpan̈ainga io fo nata elaela izy vo avy, aviô nata efa alin̈y be. Ke irô efa nitondra lalampo hampazava irô amin’ny alin̈y. Efa nataondrô mandilatra menakandrô, tsao fo tara avy mpan̈ainga io. Irô nioman̈a tsarabe, baka jirondrô mirehitry fo. (Vakia Matio 25:6-10.) Izikoa efa navy mpan̈ainga io, irô virijiny misy jery aby io niaraka niditry taminany tamy tany han̈anaovan̈a fety io tao. Mira zen̈y fo, lan̈iany Kristianin̈y voahosotro efa nioman̈a ke tsy rikian̈a, aviô tsy mivadiky firak’amy fotoan̈a havian’i Kristy, hahazo kadôndrô hiaraka amy mpan̈ainga, Jesosy zen̈y,  amy Fanjakan̈anany an-dan̈itry an̈y. b (Apok. 7:1-3) Fa akôry ndraiky irô virijiny dimy tsy misain̈y aby in̈y?

7. Akôry niafarandrô virijiny dimy tsy misain̈y aby io, aviô nan̈ino?

⁷ Irô virijiny tsy misain̈y aby in̈y mbala tsy pare izikoa fa navy mpan̈ainga. Ke irô tsy karaha irô virijiny misy jery aby in̈y. Lalampondrô baka efa hofoaty. Kanefa irô tsy nitondra menaka mandilatra. Ke izikoa fa ren̈indrô fa efa tsy ela ho avy mpan̈ainga, irô mbala tsy maintsy nandeha nivanga menaka. Kanefa irô tsy nety nimpody firaka mpan̈ainga io navy. Fa tamy zen̈y, “irô virijiny efa vôn̈ono aby io niditry tamy tany han̈anaovan̈a mariazy io niaraka taminany, baka iô, nafody varavaran̈a.” (Mat. 25:10) Fa irô virijiny tsy misain̈y aby in̈y koa fa navy, handeha hiditry tao, mpan̈ainga io nivolan̈a tamindrô: “Anarô tsy haiko.” (Mat. 25:11, 12) Irô virijiny aby io baka nila nioman̈a ndreky niambin̈y mpan̈ainga io, ndray elabe karakôry izy avy. Ino raha ianarandrô voahosotro aby io baka amy zen̈y?

8-9. Ino raha ianarandrô voahosotro aby io baka amy fan̈oharan̈a momba irô virijiny in̈y? (Zahava koa sary.)

⁸ Aboaha fa anao vôn̈ono ndreky tsy rikian̈a. Jesosy ma nivolan̈a fa hisy andiany aroe irô voahosotro aby io, ke araiky vôn̈ono hiambin̈y firak’amy faran’ny donia ty, fa andiany araiky ndraiky tsy ho vôn̈ono hiambin̈y? Ehe, fa izy nan̈azava ino raha hahazo irô voahosotro aby io, izikoa irô tsy mioman̈a ndreky tsy vôn̈ono hiaritry firak’amy farany. (Jaona 14:3, 4) Ke izikoa zen̈y ny raha misy, irô tsy hahazo hatsaran̈a miambin̈y irô! Ke ten̈a mila mangala onon̈o zen̈y irô. Fa ndray man̈anten̈a hiain̈y an-dan̈itry an̈y atsika, na ambony tany eto, atsika jiaby samy mila man̈araka fampitandreman̈a nataon’i Jesosy tamy fan̈oharan̈a momba virijiny aby io. Atsika tsiaraikiaraiky baka mila miambin̈y, aviô mila mioman̈a ndreky mila vôn̈ono hiaritry firak’amy farany.​—Mat. 24:13.

⁹ Jesosy koa fa baka nikoran̈a fan̈oharan̈a momba virijiny io, baka han̈aboahan̈a fa ten̈a  ilain̈a mioman̈a ndreky tsy ho rikian̈a, izy koa nan̈ano fan̈oharan̈a momba talenta. Fan̈oharan̈a araiky io man̈aboaka fa ten̈a ilain̈a koa mazoto miasa.

TALENTA

10. Akôry nan̈aboahandrô mpanompo aroe aby in̈y fa irô mafatoky? (Matio 25:19-23)

¹⁰ Amy fan̈oharan̈a momba talenta io, Jesosy nikoran̈a momba mpanompo aroe mafatoky ndreky mpanompo araiky tsy mafatoky. (Mat. 25:14-18) Akôry nan̈aboahandrô mpanompo aroe io fa irô mafatoky? Talohan’ny tômpondrô nandeha tan-tany hafa, irô nan̈ankin̈any volabe, talenta ikahian̈a izio. Irô mpanompo aroe io niasa mare, ke nampiasaindrô tsarabe vola nankin̈iny tamindrô io. Ke ino vokany? Lera tômpondrô navy, vola nampodindrô taminany indroen’ny vola nankin̈iny tamindrô. Ke tômpondrô io nidera irô. Irô “niaraka ravoravo tamy tômpondrô.” (Vakia Matio 25:19-23.) Fa karakôry ndraiky mpanompo araiky fahatelo in̈y? Nataony karakôry vola nambelan’ny tômponany taminany io?

11. Akôry niafaran’ny mpanompo araiky “kamo” in̈y, aviô nan̈ino?

¹¹ “Kamo” mpanompo araiky fahatelo io, ke tsy nampiasainy vola talenta araiky namian̈a izy. Tômponany man̈anten̈a fa hampiasainy tsara vola talenta namian̈a izy io. Fa ino ndraiky raha nataony? Izy nangady lavaka, ke naleviny tao izio. Ke tômponany koa fa nimpody, tsisy zana-bola namezan’ny mpanompo io tômponany. Tsy tsara toe-tsain̈inany. Izy tsy niala tsin̈y tamy tômponany foeky, nohon’izy tsy nahavita nampitombo fanan̈an’ny tômponany io. Ndray izy aby nan̈amia tsin̈y tômponany ke nivolan̈a fa tômponany io zen̈y “olo sarôtin-draha.” Ke mpanompo io tsy nahazo sitraka tamy tômponany. Tsy zen̈y fo fa nadoso taminany koa talenta araiky namian̈a izy in̈y, baka iô izy nitoravan’ny tômponany foeky.​—Mat. 25:24, 26-30.

12. Amy ziôty, mifan̈itsy amin-jôvy ma irô mpanompo aroe mafatoky aby in̈y?

¹² Irô mpanompo aroe mafatoky aby in̈y mifan̈itsy amindrô Kristianin̈y voahosotro aby io. Fa Tômpo io, Jesosy zen̈y, nikaiky irô io ‘hiaraka hiravoravo aminany.’ Irô hahazo  fitsanganan̈a voanalohany, ke hiaraka ravoravo aminany an-dan̈itry an̈y. (Mat. 25:21, 23; Apok. 20:5b) Fa modely ratsin’ny mpanompo kamo in̈y ndraiky mampitandrin̈y irô voahosotro aby io. Nan̈ino?

13-14. Ino ma raha ianarandrô voahosotro aby io baka amy fan̈oharan̈a momba talenta aby in̈y? (Zahava koa sary.)

¹³ Aboaha fa anao mazoto miasa. Mira fan̈oharan̈a momba virijiny aby in̈y, amy fan̈oharan̈a momba talenta io Jesosy tsy nivolan̈a tsialohaloha fa ho hisy voahosotro hanjary kamo. Fa izy nan̈azava raha hiboaka izikoa irô tsy mazoto eky. Tsy ho azo antoko fa irô “voakaiky ndreky voafidy.” Irô koa tsy hahazo hiditry amy Fanjakan̈a an-dan̈itry an̈y.​—2 Pet. 1:10.

¹⁴ Fan̈oharan̈an’i Jesosy momba virijiny ndreky momba talenta aby io man̈aboaka tsarabe fa irô voahosotro jiaby tsy maintsy mioman̈a ndreky tsy mila rikian̈a, baka iô mila mazoto miasa. Fa mbala misy raha hafa koa ma nivolan̈in’i Jesosy, hampitandreman̈a irô Kristianin̈y voahosotro aby io? Ia! Raha nivolan̈in’i Jesosy amy Matio 24:40, 41 koa misy ifandraisany amy fitsaran̈a farany irô voahosotro aby io.

AZÔVY “HINDESIN̈Y”?

15-16. Nan̈ino raha volan̈in’ny Matio 24:40, 41 io man̈aboaka fa irô voahosotro aby io ten̈a mila miambin̈y fo?

¹⁵ Talohan’i Jesosy nikoran̈a irô fan̈oharan̈a telo io, izy nikoran̈a momba fitsaran̈a farany irô voahosotro aby io, ke izio han̈aboaka azôvy aby hankasitrahany. Izy nikoran̈a momba lelahy aroe miasa an-tsabo, ndreky man̈angy aroe man̈odin̈y vato fandisanan̈a vary. Irô lelahy aroe io ndreky irô man̈angy aroe io samy nan̈ano asa mitovy aby. Fa Jesosy ndraiky nivolan̈a fa “araiky hindesin̈y, fa araiky hambela.” (Vakia Matio 24:40, 41.) Izy baka tiô amy zay nandrisiky mpan̈ara-dia izy: “Ke anarô miambesa fo, fôtony tsy hainarô andra havian’ny Tômponarô.” (Mat. 24:42) Nivolan̈a raha miramira zen̈y koa Jesosy, izy koa fa nikoran̈a fan̈oharan̈a momba irô virijiny aby io. (Mat. 25:13) Misy ifandraisany ma raha nivolan̈iny io? Ia. Irô ten̈a voahosotro ndreky tsy mivadiky fo “hindesin̈y”, ke hiaraka amy Jesosy amy Fanjakan̈a an-dan̈itry an̈y.​—Jaona 14:3.

¹⁶ Aboaha fa anao miambin̈y fo. Lan̈iany Kristianin̈y voahosotro tsy miambin̈y tsara, tsy havory miaraka amindrô ‘voafidy aby io.’ (Mat. 24:31) Baka iô vahoakan’ny Zan̈ahary jiaby, na aia na aia fan̈antinan̈andrô, mila mangala onon̈o tsara fampitandreman’i Jesosy mila miambin̈y ndreky mifen̈y tsy mivadiky.

17. Nan̈ino ma atsika tsy tôkony hisalasala izikoa Jehovah mbala mifidy olo hatao voahosotro fo firaka iziôty?

¹⁷ Efa haintsika tsarabe raha momba Jehovah, ke atsika matoky fitsaran̈anany. Ke atsika tsy misalasala ndray izy mbala mifidy olo voahosotro, amin’ny andra misy atsika iziôty. c Raha zen̈y baka mampatsiaro atsika raha nivolan̈in’i Jesosy tamy fan̈oharan̈a momba tanin’ny rezain, momba irô olo navy niasa tamy lera faha-11 in̈y. (Mat. 20:1-16) Irô nikahin̈a niasa harivariva tamin’ny andra io, namian̈a karama nitovy tamin’olo nikahian̈a niasa bonera be. Mira zen̈y koa, ndray ombian̈a fotoan̈a nifidianan̈a irô voahosotro aby io, irô hahazo radindrô an-dan̈itry an̈y fo izikoa irô tsy mivadiky.

MAN̈ARAHA FAMPITANDREMAN̈A

18-19. Ino aby fianaran̈a ndreky fampitandreman̈a nidinihintsika tato?

¹⁸ Ino ma raha nidinihintsika tato? Fan̈oharan̈a momba ôndrikôndriky ndreky bengy in̈y man̈aboaka fa lan̈iany manan̈a fan̈antinan̈a hiain̈y tsisy farany ambony tany eto, mila manan̈a finoan̈a ndreky tsy mivadiky amy Jehovah, iziôty ndreky an̈atin’ny fahorian̈a be ho avy io. Amy zen̈y, Jesosy hitsara lan̈iany olo tsy mivadiky  aminany ke lan̈iany hitany mendriky, hamiany “fiain̈ana tsisy farany.”​—Mat. 25:46.

¹⁹ Nandiniky fan̈oharan̈a aroe hampitandreman̈a irô voahosotro aby io koa atsika. Tamy fan̈oharan̈an’i Jesosy momba virijiny misy jery ndreky virijiny tsy misain̈y, dimy tamindrô io nan̈aboaka fa misy jery ankitin̈y. Irô nioman̈a fo ndreky tsy rikian̈a, vôn̈ono fo sady nahadin̈y niambin̈y favian’ny mpan̈ainga in̈y, nata ela izy vo navy. Irô virijiny tsy misain̈y aby in̈y ndraiky tsy nioman̈a. Ke izikoa fa navy mpan̈ainga in̈y, tsy nimboany niditry tamy fetin’ny mariazinany irô. Atsika mila mioman̈a fo ke miambin̈y, na karaha ela Jesosy vo hamaran̈a donia ty. Aviô koa, tamy fan̈oharan̈an’i Jesosy momba talenta aby in̈y, atsika nandiniky mpanompo aroe mafatoky ke nazoto niasa mare. Nankasitraka irô mare tômpondrô, fôtony irô niasa mare. Fa tsy nikeny ndraiky mpanompo araiky kamo in̈y. Ino raha ianarantsika baka amy zen̈y? Mila mazoto fo atsika man̈ano fanompoan̈a Jehovah firak’amy farany. Nidinihintsika koa fa irô voahosotro aby io mila miambin̈y fo fa tsy rikian̈a, baka irô an̈isan’ny ‘hindesin’i’ Jesosy, ke hahazo hatsaran̈a handeha an-dan̈itry an̈y. Efa tsy din̈indrô fotoan̈a ‘hamorian̈a irô’, ke handihanandrô hiaraka amy Jesosy an-dan̈itry an̈y. Izikoa fa vita Aramagedona, irô hingain’i Jesosy, amy mariazin’ny Zanakan’ny Ôndrikôndriky.​—2 Tes. 2:1; Apok. 19:9.

20. Hataon’i Jehovah karakôry lan̈iany olo man̈araka fampitandreman̈anany?

²⁰ Ndray efa man̈aton̈o mare fotoan̈a fitsaran̈a io, tsisy raha tôkony havozoantsika. Atsika koa baka tsy mivadiky, Babantsika an-dan̈itry an̈y io han̈amia atsika “angôvo mihoatra nin’ny olombelon̈o”, amy zen̈y atsika “hahavita hitsangana manoloan̈a Zanak’olo.” (2 Kor. 4:7; Lioka 21:36) Ke na atsika man̈anten̈a hiain̈y an-dan̈itry an̈y, na hiain̈y ambony tany eto, atsika hamparavoravo Babantsika io, izikoa atsika man̈araka irô fampitandreman̈a hita amy fan̈oharan̈a aby nataon’i Jesosy in̈y. Ke nohon’i Jehovah tsara fan̈ahy mare, an̈arantsika ho ‘hita voasoratra amy bokin’ny’ fiain̈ana.​—Dan. 12:1; Apok. 3:5.