1-2. Ino aby raha sarotro mety hatrefin’ny mpanompon’i Jehovah tsy mivadiky?

 METY hiova tampoko fiainan̈antsika. Zen̈y ohatra, raha nahazo rahalahy araiky manam-pinoan̈a, Luis an̈arany. a Dôkotera nivolan̈a fa izy nisy kansera tsy dia fohita, aviô hofoaty izy afaka fanjava vitsivitsy. Monika ndreky vadiny ndraiky nazoto mare tamy fanompoan̈a Jehovah. Vadiny io anti-pan̈ahy. Tandraraiky, hain’i Monika fa vadiny io nan̈ano fahotan̈a maventy fo tambadimbadiky tan̈y, tan̈atin’ny taon̈o maro. Olivia ndraiky ranabavy selibatera. Izy tsy maintsy niala tran̈onany, fôtony hisy sikilony mare handalo. Lera izy nimpody, zahany ravan̈an’ny sikilony tran̈onany. Segondy fo fiain̈anan’i Luis, Monika aviô Olivia niova tanteraka. Anao ma efa navoa raha karaha zen̈y? Efa nisy raha sarotro tampoko ma natrefinao ke nampiova fiain̈ananao mare?

² Atsika ndray mpanompon’i Jehovah tsy mivadiky, atsika mbala misy prôblemo fo, aviô mahay marary karaha olo jiaby. Atsika koa mety tôjy fanoheran̈a ndreky fan̈injehan̈a baka aminolo tsy tia vahoakan’ny Zan̈ahary. Ndray tsy misakan̈a raha aby zen̈y Jehovah, izy mampan̈anten̈a fa han̈ampy atsika. (Isaia 41:10) Vitantsika fo hiravoravo, han̈ano fanapahan-kevitry mety tsarabe, aviô tsy hivadiky, ndray an̈atin’ny raha sarotro mare, fôtony izy man̈ampy. Amy lahatsoratra ty, atsika handiniky fomba efatra han̈ampian’i Jehovah atsika lera an̈atin’ny sarotro. Hidinihintsika koa raha mila ataontsika, baka atsika hahazo hatsaran̈a baka amy fan̈ampian̈a amian’i Jehovah.

JEHOVAH HIAMBIN̈Y ANAO

3. Ino raha mety ho sarotro amintsika lera atsika mandalo raha sarotro mare?

³ Raha sarotro. Izikoa atsika fa miatriky raha sarotro mare, mety tsy ho mora amintsika hahavita hieritreritry tsara ndreky  hanapa-kevitry. Nan̈ino? Mety marary mare baka fôntsika, mety hiasaloha mare koa atsika. Mety karaha olo very lalan̈a in̈y foeky fahitantsika atsika ke tsy haintsika foeky raha tôkony hatao. Aleva onon̈o raha tsapan’ny ranabavy aroe nikoran̈intsika tiô in̈y, tamin’irô niatriky raha sarotro aby in̈y. Karaha ty nivolan̈in’i Olivia: “Tamy tran̈onaka robakan’ny sikilony in̈y, zaho nahatsapa karaha narian̈a, ke rivan̈a mare.” Karaha ty koa nivolan̈in’i Monika momba raha tsapany, tamy vadiny namitaka izy in̈y: “Diso fan̈antinan̈a mare zaho, fônaka mira navoa tomboko meso in̈y. Nanjary sarotro taminaka han̈ano raha aby efa fataoko andavan’andra. Zaho tsiary nieritreritry zaho handeha ho voa raha karaha in̈y.” Lera atsika kivy, Jehovah mampan̈anten̈a fa izy han̈ampy atsika. Amy fomba karakôry?

4. Ino raha ampan̈antinain’i Jehovah atsika, izikoa zahan̈a Filipianina 4:6, 7?

⁴ Karakôry ataon’i Jehovah? Izy mampan̈anten̈a fa izy han̈amia atsika ‘fiadan̈ananany.’ (Vakia Filipianina 4:6, 7.) Ino ma zen̈y? Izio filaminan-tsain̈y tsapantsika izikoa atsika fa mikamarady marikitry amy Jehovah. Fiadan̈ana io “tsy takatran’ny jerin’olombelon̈o” foeky. Dikan’izen̈y, izio tsaratsaran’ny raha iritriretintsika. Efa navy nisy fotoan̈a ma anao izikoa fa baka nivavaka mare tamy Jehovah, tiô fo anao nahatsapa nilamin-tsain̈y edy? Baka amy “fiadan̈anan’ny Zan̈ahary” nahavy anao nahatsapa karaha zen̈y.

5. Akôry ataon’ny fiadan̈anan’ny Zan̈ahary io miambin̈y jerintsika ndreky fôntsika?

⁵ Mbala andininy io fo koa mivolan̈a fa fiadan̈anan’ny Zan̈ahary “hiambin̈y” na hiaro “fônarô ndreky sain̈inarô.” Tamy voanalohany tan̈y, “miambin̈y” io volan̈a fampiasain̈a tamy tafiky. Izio nivolan̈ana maramila maromaro niambin̈y tanàna baka tsy hidiran’ny fahavalo. Olo nipetraka tamy tanàna io tao nahatsiaro misy piaro tsarabe, fôtony haindrô fa nisy maramila miambin̈y irô. Karaha zen̈y koa, lera fiadan̈anan’ny Zan̈ahary io miambin̈y fôntsika ndreky jerintsika, atsika mahatsiaro kalma fo, fôtony atsika mahay fa atsika misy piaro. (Sal. 4:8) Karaha Hana, nata tsy miova iô ny iô raha mavoa atsika, mety ho kalma fo atsika. (1 Sam. 1:16-18) Izikoa atsika fa kalma, lôso mahay misain̈y tsara ndreky mahay manapakevitry.

6. Ino raha mety hataontsika, baka hahazo hatsaran̈a baka amy fiadan̈anan’ny Zan̈ahary? (Zahava koa sary.)

⁶ Ino raha mila ataontsika? Iangavia Jehovah han̈ampy anao, izikoa anao fa an̈atin’ny sarotro. Amy fomba akôry? Aza vôly mivavaka firaka anao mahazo fiadan̈anan’ny Zan̈ahary. (Lioka 11:9; 1 Tes. 5:17) Luis araiky nikoran̈intsika taloha tarỳ in̈y, nan̈azava ino raha nataondrô ke nan̈ampy irô fivadiany, izikoa fa ren̈indrô  fa afaka fanjava vitsivitsy izy hofoaty. Karaha ty nivolan̈iny: “Amy fotoan̈a karaha zen̈y, sarotro mare manapa-kevitry momba fahasalaman̈a ndreky prôblemo hafa. Fa zahay nilamin-tsain̈y fo tamy fotoan̈a sarotro be in̈y, fôtony zahay nivavaka.” Luis ndreky vadiny nivolan̈a fa irô nivavaka mare ndreky matetiky, ke nangataka tamy Jehovah han̈amia irô fiadan̈an-tsain̈y ndreky fô kalma aviô fahendrena han̈ampy irô hanapa-kevitry tsara. Ke irô nahatsapa fa Jehovah nan̈ampy irô. Izikoa anao fa miatriky raha sarotro, mivavaha mare fa ho hitanao edy fa fiadan̈anan’i Jehovah miambin̈y fônao ndreky sain̈inao.​—Rom. 12:12.

JEHOVAH HAN̈AMPY ANAO HO KALMA NDREKY TSY HAVOZO LOATRA

7. Karakôry mety ho tsapantsika izikoa atsika tojy raha sarotro mare?

⁷ Raha sarotro. Izikoa fa miatriky raha sarotro mare atsika, mety tsy ho karaha mahazatra fihetsikintsika, eritreritrintsika, na koa fihetseham-pôntsika. Mety hahatsiaro karaha sambo araiky afikofikon’ny riaka mahery in̈y atsika, izikoa fa mikorontan̈a mare fihetseham-pôntsika. I Ana araiky nikoran̈intsika taloha tarỳ in̈y nivolan̈a fa karaha zen̈y raha tsapany izikoa fa naty Luis vadiny. Karaha ty ho izy: “Ndraikindraiky zaho rivan̈a mare ke lôso mahinakinaka mare amin’ny ain̈inaka. Mahinihiny mare koa zaho, fôtony izy efa tsy iô eky.” Nisy fotoan̈a koa Ana nahatsapa latsa-tokan̈a mare aviô navozo, izikoa fa hanapa-kevitry fôtony vadiny in̈y mpan̈ano raha zen̈y. Ndraikindraiky izy nahatsapa karaha sambo araiky efa tsy ela ho dobo an̈atin’ny ranomasin̈y, afikofikon’ny daroba mare in̈y. Akôry an̈ampian’i Jehovah atsika, lera atsika tatrany fihetseham-pô karaha zen̈y?

8. Eraka raha avoakoran̈a amin’ny Isaia 33:6, ino toky amezan’i Jehovah atsika?

⁸ Karakôry ataon’i Jehovah? Izy man̈amia atsika toky fa izy han̈ano raha hahavy atsika ho kalma ndreky tsy havozo loatra. (Vakia Isaia 33:6.) Izikoa fa misy andra ratsy amy ranomasin̈y, mety hihetsiky mare sambo araiky. Baka hiadivan̈a amy zen̈y, maro sambo misy fitaovan̈a man̈ampy izy tsy hihetsiketsiky. An̈ilan̈ila amy sambo misy izio, fa izio fo tsy hita baka an̈abo atỳ. Ke tsy dia havozoan̈a ho dobo sambo io baka iô, ke mahatsiaro ho voaro tsara irô olo an̈atin’izio. Fa izy fo izikoa tian̈a hiasa tsara irô fitaovan̈a aby io, sambo io mila mandeha aloha fo fa tsy mimpody afara. Karaha zen̈y koa izikoa atsika manompo Jehovah fo ndray an̈atin’ny sarotro, Jehovah man̈ampy atsika ho kalma ndreky tsy havozo loatra.

9. Amy karakôry irô raha fan̈anaovan̈a fikarohan̈a aby io han̈ampy atsika hifehy fihetseham-pôntsika? (Zahava koa sary.)

⁹ Ino raha mila ataontsika? Izikoa mikorontan̈a mare fihetseham-pônao baka amy prôblemo  mahazo anao, aza vôly mivavaka ndreky mivory aviô mitory. Marin̈y ndraiky fa mety tsy hahavita karaha ny vitanao taloha anao, kanefa aleva onon̈o fa Jehovah tsy han̈iraka anao han̈ano raha mandilatran’ny vitanao. (Ampiràn̈a amy Lioka 21:1-4) Ino ohatra, fahazaran̈a ara-pan̈ahy tôkony hitohizanao fo? Manokàna fotoan̈a ianaran̈a manokan̈a ndreky isaintsain̈ana. Nan̈ino? Fôtony Jehovah mampiasa fandaminan̈anany han̈amezan̈a fan̈azavan̈a mankahery baka amy Soratra Masin̈y. Irô io man̈ampy atsika hahavita hifehy fihetseham-pôntsika. Anao afaka mampiasa fitaovan̈a fikarohan̈a misy amy volan̈anao, karaha ataon’ny JW Library^®, Fanondroana Bokin’ny Vavolombelon’i Jehovah aviô Fitaovan̈a Fikarohan̈an’ny Vavolombelon̈o Jehovah (Malagasy) baka hahitanao raha ten̈a ilainao. Monika araiky nikoran̈intsika taloha tarỳ in̈y nivolan̈a fa izikoa fa hitany nanomboko nikorontan̈a fihetseham-pônany, izy direkty nitady torohevitry baka tamy fitaovan̈a fikarohan̈a aby io. Ohatra, izy nan̈ano fikarohan̈a momba “heloko.” Ndraikindraiky koa izy nitady “fivadihan̈a” na “tsy mivadiky.” Ke nivakiny fo raha hitany tao firaka izy nahatsiaro nahivankivan̈a. Karaha ty ho izy: “Zaho koa fa nanomboko nan̈ano fikarohan̈a io, zaho niasaloha mare, fa zaho koa fa namaky izio ndraiky, zaho nahatsapa fa Jehovah nitolon̈o zaho mare. Arakaraka namakiako izio, hitako fa Jehovah ten̈a nahazo raha tsapako jiaby, aviô izy nan̈ampy zaho.” Fan̈ampian̈a aby baka amy Jehovah zen̈y koa han̈ampy anao hifehy fihetseham-pônao, firaka anao mahatsapa fa milamin-tsain̈y.​—Sal. 119:143, 144.

JEHOVAH HANOHAN̈A ANAO

10. Izikoa atsika fa tôjy raha mamparivan̈a mare, akôry mety ho tsapantsika ?

¹⁰ Raha sarotro. Izikoa misy raha maharivan̈a mare mahavoa atsika, mety ho reraka vatan̈antsika ndreky fôntsika. Atsika mety han̈ano karaha olo pilomoay naratra in̈y. Izy baka efa zatra milomoay mare kanefa nanjary mitsapiky. Mety nisy raha nora tamintsika nan̈ano izy taloha, fa nanjary tsy mora amintsika iziôty. Na koa nisy raha namparavoravo atsika nan̈ano izy taloha, kanefa mety tsy tihan̈ano izio foeky atsika iziôty. Karaha Elia, na hitsangana zen̈y fo efa mety ho sarotro amintsika koa. Atsika baka tihoandry fo. (1 Mpanj. 19:5-7) Ke izikoa atsika fa rivan̈a mare, ino raha ampan̈antinain’i Jehovah fa hataony?

11. Ino koa fomba hafa an̈ampian’i Jehovah atsika? (Salamo 94:18)

¹¹ Karakôry ataon’i Jehovah? Izy mampan̈anten̈a fa han̈ampy atsika. (Vakia Salamo 94:18.) Karaha pilomoay araiky maratra mila  tahan̈a baka hahavita hanohy hilomoay ndraiky, atsika koa mety mila fan̈ampian̈a baka hahavita hanohy hanompo Jehovah. Amy fotoan̈a aby io, Jehovah man̈amia toky atsika karaha ty: “Zaho Jehovah Zan̈aharinao mitana anao amy tan̈anao ankavanan̈a, zaho mivolan̈a karaha ty in̈y: ‘Aza mavozo anao, fa zaho han̈ampy anao.’” (Isaia 41:13) Hain’i Davida tsara raha zen̈y. Tamin’izy tôjy raha sarotro ndreky fahavalo, ho izy tamy Jehovah: ‘Tan̈anao ankavanan̈a manohan̈a zaho.’ (Sal. 18:35) Fa akôry ataon’i Jehovah manohan̈a atsika?

12. Azôvy aby mety ampiasain’i Jehovah han̈ampy atsika lera atsika rivan̈a?

¹² Matetiky Jehovah koa fa manohan̈a atsika, izy mandrisiky olo han̈ampy atsika. Ohatra, nisy fotoan̈a Davida rivan̈a mare, ke Jonatana kamaradinany namangy izy, nankahery izy, aviô nan̈amia korazy izy. (1 Sam. 23:16, 17) Karaha zen̈y koa, Jehovah nan̈iraka Elisa han̈ampy Elia. (1 Mpanj. 19:16, 21; 2 Mpanj. 2:2) Amy ziôty koa Jehovah mety hampiasa havan̈a, naman̈a na koa anti-pan̈ahy han̈ampy atsika. Fa ndray zen̈y, izikoa atsika fa kivy mare, atsika mety tsy tihiaroaro aminolo. Olo jiaby mety han̈ano karaha zen̈y. Fa ino raha mety ataontsika baka hazahoantsika fan̈ampian̈a baka amy Jehovah?

13. Ino raha mila ataontsika baka atsika hahazo hatsaran̈a amy fan̈ampian’i Jehovah? (Zahava koa sary.)

¹³ Ino raha mila ataontsika? Mifen̈a tsy hitokantokan̈a. Atsika koa mitokantokan̈a, jerintsika amin’ny ain̈intsika tômpiny ndreky amy prôblemo mahazo atsika fo. Mety ho hisy vokany amy fanapahan-kevitrintsika zen̈y. (Ohab. 18:1) Marin̈y ndraiky fa atsika jiaby io ndraikindraiky mba tihitokan̈a, intsaka eky izikoa atsika fa misy prôblemo. Fa ndray zen̈y, izikoa atsika mitokantokan̈a loatra, mety hahavy atsika hierin̈y irô olo aby ampiasain’i Jehovah han̈ampy atsika raha zen̈y. Ke nata anao miatriky raha sarotro, ikia fo fan̈ampian̈a baka amin’ny havanao ndreky namanao aviô anti-pan̈ahy. Aleva onon̈o fa irô io ampiasain’i Jehovah han̈ampy anao.​—Ohab. 17:17; Isaia 32:1, 2.

JEHOVAH HANKAHERY ANAO

14. Ino raha mety hampavozo atsika?

¹⁴ Raha sarotro. Misy fotoan̈a atsika mety mavozo. Misy mpanompon’ny Zan̈ahary amy Baiboly ao nivolan̈a fa nisy fotoan̈a irô nijaly ndreky navozo mare, fôtony irô nampijalinolo, karaha ataon’ny fahavalondrô. (Sal. 18:4; 55:1, 5) Karaha zen̈y koa, atsika mety toherinolo a lekoly, am-piasan̈a, toherin’ny fianakavian̈antsika na koa manam-pahifan̈a. Atsika koa mety mavozo hofoaty fôtony marary. Amy  fotoan̈a karaha zen̈y, atsika mety hahatsiaro karaha tsaiky hely ke mila fan̈ampian̈a. Akôry ataon’i Jehovah man̈ampy atsika amy fotoan̈a karaha zen̈y?

15. Eraka raha volan̈in’ny Salamo 94:19, ino raha ataon’i Jehovah amintsika?

¹⁵ Karakôry ataon’i Jehovah? Izy mankahery ndreky mampilamin̈y fôntsika. (Vakia Salamo 94:19.) Atsika koa fa mamaky salamo io, mety tsaiky viavy hely mavozo andra ratsy, raha avy an̈aty jerintsika. Izy tsy tafandry foeky. Ke avy babany man̈aton̈o izy iô, aviô mamihin̈y izy firaka izy tafandry. Nata mbala latsaka mare mahalen̈y ambelan̈a an̈y, tsaiky io tsy taitry fôtony izy efa antan̈an’ny babany. Lera atsika tôjy raha mampavozo in̈y koa, atsika mety mila Babantsika an-dan̈itry an̈y hamihin̈y atsika, firaka atsika mahatsapa milamin-tsain̈y. Fa izikoa tiantsika hankahirezin’i Jehovah, ino raha mila ataontsika?

16. Ino raha mila ataontsika baka hazahoantsika fankahirezan̈a baka amy Jehovah? (Zahava koa sary.)

¹⁶ Ino raha mila ataontsika? Manokàna fotoan̈a tsy tapaka hivavahan̈a ndreky hamakian̈a Volan̈a Jehovah. (Sal. 77:1, 12-14) Amy zen̈y, lera anao fa tôjy prôblemo, raha voanalohany ataonao hitady fan̈ampian̈a baka amy Babanao andan̈itry an̈y. Koràn̈a aminany raha mampavozo anao ndreky raha mampiasaloha anao. Ambilà izy hikoran̈a aminao ndreky hankahery anao baka amy Volan̈anany ao. (Sal. 119:28) Anao mety hahita andininy amy Baiboly ao ten̈a hankahery anao, lerany anao mavozo in̈y. Ohatra, mety hankahery anao bokin’i Joba, Salamo ndreky Ohabolana, aviô koa volan̈a Jesosy amy Matio toko faha-6 ao. Lera anao mivavaka amy Jehovah ndreky mamaky Volan̈anany, ho tsapanao fa izy ten̈a mankahery anao.

17. Ino toky anan̈antsika?

¹⁷ Atsika matoky fa Jehovah iô fo han̈ampy atsika izikoa atsika fa tôjy raha sarotro. Atsika tsy ho latsa-tokan̈a zen̈y foeky. (Sal. 23:4; 94:14) Jehovah mampan̈anten̈a fa izy hiambin̈y atsika, han̈ano raha hahavy atsika hilamin-tsain̈y, hanohan̈a atsika, aviô hankahery atsika. Karaha ty raha avoakoran̈a amin’ny Isaia 26:3 momba Jehovah: ‘Harovanao lan̈ian’ny olo milampy tanteraka aminao, hampiadan̈inao fo irô, fôtony anao atokisandrô.’ Ke matokisa Jehovah, aviô mifen̈a man̈ano raha hahavy anao hahazo hatsaran̈a baka amy raha jiaby ampiasainy han̈ampian̈a anao. Izikoa anao man̈ano zen̈y, anao hahazo angôvo fo, ndray tôjy raha sarotro.