Volan̈a griky tamy voanalohany nadika “kalesy” amy Fandikan-tenin’ny Tontolo Vaovao io afaka ikoran̈ana kalesy isan-karazany. (Asa. 8:28, 29, 38) Kanefa, mety ho kalesy maventy niondran̈an’ny tandapa etiôpianin̈y io fa tsy karaha kalesy madiniky findesin̈y miady na fan̈anaovan̈a lakorsy in̈y. Diniha baka antony sasany ivolan̈ana zen̈y.

Tandapa etiôpianin̈y lelahy io sady nan̈ano dia lavitry mare. Izy ‘manam-pahifan̈a tambany fifihezan̈an’i Kandasy panjakavavin’i Etiôpianin̈y, aviô niandraikitry harian̈anany jiaby.’ (Asa. 8:27) An̈isan’ny faritrin’i Etiopia taloha ta Soudan avahizo, aviô irô faritry amy tapany atsimon’i Ezipty amy iziôty. Mety tsy ho kalesy araiky fo nandihanan’ny lelahy Etiôpianin̈y io firaka izy navy tamy tany ningoany. Mety tsy maintsy nitondra raha maro nilainy tamy dia lavitry nataony io koa izy. Kalesy nisy laroa efatra an̈isan’ny raha fiondran̈an’olo tamy taonjato voanalohany. “Kalesy karaha zen̈y nalalaka tsara ke nahatondra entan̈a maro. Nahazo ain̈y tsara olo niondran̈a izio na koa nahavita nan̈ano dia maro lavitry”, eraka raha volan̈in’ny boky Fan̈azavan̈a Asan’ny Apostoly (Angiley).

Namaky boky i Etiôpianin̈y io, tamy Filipo nan̈aton̈o izy in̈y. Tantara io mivolan̈a fa “Filipo nilomoay mare tan̈ilan’ny kalesy io. Ren̈in’i Filipo [i Etiôpianin̈y io] namaky mare bokin’ny paminan̈y Isaia.” (Asa. 8:30) Kalesy findesin̈y man̈ano dia lavitry zen̈y tsy mandeha mare. Nandeha nora kalesy io, ke zen̈y nahavitan’i Etiôpianin̈y io namaky teny tan̈atin’izio tao ndreky nahavitan’i Filipo nan̈ian̈a izio tamy lomoay.

Etiôpianin̈y io ‘nikaiky Filipo hanonga, hipetraka ankilanany.’ (Asa. 8:31) Mitsangana fo olo mitengin̈y kalesy fan̈anaovan̈a lakorsy. Tsy karaha zen̈y ndraiky kalesy fitateran̈a olo, ke tsy maintsy nisy raha nipitrahan’ny lelahy etiôpianin̈y io ndreky Filipo tao.

Amy iziôty, mifan̈araka tsarabe amy raha volan̈in’ny Asan’ny Apostoly toko faha-8 ndreky raha nisy tamy tantara, kalesy maventy fitateran̈a olo io fo sarin’ny tandapa miondran̈a kalesy io aboaka amy boky ndreky gazetintsika, fa tsy kalesy madiniky findesin̈y miady na fan̈anaovan̈a lakorsy eky.