1. Ino raha avy an̈atin’ny jerinao, izikoa anao fa mieritreritry momba Jehovah?

 ANAO ma efa navy nieritreritry, mba karakôry eky Jehovah zen̈y? Lera anao mikoran̈a aminany amy vavaka, ino raha avy an̈atin’ny jerinao? Jehovah tsy hitantsika, fa Baiboly mikoran̈a raha maro momba izy. Jehovah kahian̈a “masoandra ndreky ampinga” aviô ‘môtro mandravan̈a.’ (Sal. 84:11; Heb. 12:29) Ezekiela nahita Jehovah tamy fahitan̈a. Izy nivolan̈a fa Jehovah io mira vato safira, metaly mipilapilatra, aviô sobeha mazava be. (Ezek. 1:26-28) Sasany amy raha aby koran̈in’ny Baiboly momba Jehovah io mety hampagaga atsika mare, na koa mety hahavy atsika hahatsapa tsisy dikany.

2. Nan̈ino mety ho sarotro amintsika hifandray marikitry amy Jehovah?

² Atsika tsy mahita Jehovah, ke mety ho sarotro amintsika hino fa izy tia atsika. Misy sasany amintsika koa nijaly mare tamy fiain̈ana ke mety hieritreritry fa tsisy andra hitiavan’i Jehovah irô. Babandrô mety tsy ten̈a tia irô. Hain’i Jehovah tsarabe raha tsapandrô zen̈y, aviô hainy koa ino vokatran’izen̈y amintsika. Ke baka han̈ampian̈a atsika, nambarany amy Volan̈anany ao irô toetrinany maro tsara.

3. Nan̈ino atsika mila mandiniky tsarabe momba fitiavan̈an’i Jehovah?

³ Fitiavan̈a. Io volan̈a araiky ten̈a mahavolan̈a karakôry Jehovah. Sady Baiboly mivolan̈a fa “Zan̈ahary io fitiavan̈a.” (1 Jaona 4:8) Fitiavan̈a fo mandrisiky izy amy raha jiaby ataony. Jehovah Zan̈ahary ten̈a be fitiavan̈a, ke zen̈y mahavy izy man̈aboaka fitiavan̈a, ndray aminolo tsy tia izy. (Mat. 5:44, 45) Amy lahatsoratra ty, atsika handiniky tsarabe momba Jehovah ndreky fitiavan̈anany. Izikoa atsika mahay tsarabe momba Jehovah, atsika hahaiho tia izy fo.

 ATSIKA TIAN’I JEHOVAH MARE

4. Jehovah ten̈a be fitiavan̈a, ke ino raha tsapanao baka amy zen̈y? (Zahava koa sary.)

⁴ “Jehovah ten̈a be fitiavan̈a.” (Jak. 5:11) Amy Baiboly ao, Jehovah ampiran̈iny amy reny araiky ten̈a tia zanaka. (Isaia 66:12, 13) Miniminia hely baka reny araiky mikarakara sady tia mare zanany. Apetrany moramora ampofoan̈anany zanany, aviô tambitambeziny. Izikoa tsaiky io mitomoan̈y na misy raha marary aminany, ataony raha hazahoan’ny tsaiky io raha ilainy. Lera atsika kivy, atsika koa afaka matoky fa Jehovah tia atsika ke hikarakara atsika. Karaha ty nisoratin’ny mpan̈ano salamo: “Izikoa fa nahainaro raha nampiasaloha zaho, anao nankahery zaho ndreky nampilamin̈y fônaka.”​—Sal. 94:19.

5. Akôry an̈aboahan’i Jehovah fitiavan̈a tsy miovaova io?

⁵ Jehovah tsy mivadiky. (Sal. 103:8) Izy tsy han̈ary atsika, ndray misy raha tsy mety nataontsika. Impirimpiry firenenan’Israely nandiso fan̈antinan̈a Jehovah. Kanefa izikoa irô fa nibebaka, naboakany tamindrô fa izy ten̈a tsy nivadiky tamy vahoakanany. Ohatra, karaha ty ho izy tamindrô: “Fôtony anao nanjary ten̈a misy kôntiny aminaka, anao ten̈a najain̈a, ary anao io tiako.” (Isaia 43:4, 5) Mbala karaha zen̈y koa fitiavan’i Jehovah atsika iziôty. Izy iô fo hanohan̈a atsika. Ndray atsika nan̈ano fahotan̈a maventy, Jehovah tsy han̈ary atsika. Izikoa atsika mibebaka ndreky mimpody amy Jehovah, ho hitantsika fa izy mbala tia atsika fo. Izy mampan̈anten̈a fa izy ten̈a ‘hamafa hadisovan̈a ankitin̈y.’ (Isaia 55:7) Baiboly mivolan̈a fa atsika hahatsapa “fotoan̈a mahavelombelon̈o baka amy Jehovah.”​—Asa. 3:19.

6. Ino raha ampianarin’i Zakaria 2:8 atsika momba Jehovah?

⁶ Vakia Zakaria 2:8. Nohon’ny fitiavan’i Jehovah atsika, zen̈y mahavy izy mihevitry fihetseham-pôntsika ndreky vôn̈ono hiaro atsika. Izy malahelo, koa fa misy raha mampakivy atsika. Ke atsika koa fa mivavaka karaha ty: ‘Arova karaha anakandriamasonao zaho’, atsika matoky fa izy hamaly vavakantsika io. (Sal. 17:8) Maso an̈isan’ny raha saro-pady ndreky valera amy vatan̈antsika. Atsika ampiran̈in’i Jehovah amin’ny anakandriamasonany, ke izy mira mivolan̈a amintsika karaha ty: ‘Lan̈iany olo man̈isy ratsy anarô vahoakanaka, mira mandrobaka raha araiky ten̈a valera aminaka.’

7. Nan̈ino atsika mila mankafatatra fatokisantsika fa Jehovah ten̈a tia atsika?

 ⁷ Tian’ i Jehovah atsika jiaby hahatsapa fa izy ten̈a tia atsika. Fa hainy ndraiky fa nohon’ny raha efa niain̈antsika taloha tan̈y, atsika mety tsy ten̈a hatoky fa izy tia atsika. Na koa misy raha iain̈antsika amy ziôty mety hahavy atsika hisalasala momba fitiavany atsika. Akôry hatokisantsika fa izy tia atsika? Atsika mila mianatra akôry an̈aboahany fa izy tia Jesosy, tia irô voahosotro aby io, aviô tia atsika koa.

FOMBA AN̈ABOAHAN’I JEHOVAH FITIAVAN̈A

8. Nan̈ino Jesosy natoky fa Babany ten̈a tia izy?

⁸ Efa rango efa ela be, Jehovah ndreky Zanany efa nifankatia ndreky nifandray mare. Aviô nata misy olo efa mpinaman̈a efa ela, mbala tsisy elaelan’ny nindrô. Amy Matio 17:5 ao ahitan̈a tsarabe fomba nan̈aboahan’i Jehovah fitiavany i Jesosy. Jehovah baka afaka nivolan̈a tsotra karaha ty fo: ‘Io Zanako, izy ankasitrahako.’ Kanefa tiany ho haintsika karakôry fitiavany Zanany io, ke zen̈y nahavy izy nikaiky izy ‘Zanako ten̈a tiako.’ Jehovah nirehareha tamy Jesosy, intsaka eky tamin’izy von̈ono han̈amia ain̈inany. (Efes. 1:7) Jesosy koa tsy nisalasala foeky tamy fitiavan’ny Babany izy. Tsapany raha zen̈y tan̈atin’ny fônany tan̈y. Matetiky nampodimpodiny tamy raha nivolan̈iny fa Babany tia izy.​—Jaona 3:35; 10:17; 17:24.

9. Ino volan̈a man̈ambara fitiavan’i Jehovah irô voahosotro aby io? Hazavà. (Romanina 5:5)

⁹ Naboakan’i Jehovah koa fa izy ten̈a tia irô voahosotro aby io. (Vakia Romanina 5:5.) Aleva onon̈o baka raha koran̈iny iô: “Natao ao.” Mety adika karaha ty koa izio: ‘Nararaka.’ Misy boky araiky momba Baiboly man̈azava izio karaha ty: ‘Araraka karaha rano be na ten̈arano.’ Sarin-teny zen̈y man̈aboaka tsarabe karakôry habezan’ny fitiavan’i Jehovah irô voahosotro aby io. Haindrô voahosotro aby io fa irô ‘tian’ny Zan̈ahary.’ (Joda 1) Nikoran̈in’ny apostoly Jaona raha tsapandrô io, izikoa izy fa nanoratra karaha ty: ‘Iritrireta hely baka karakôry fitiavan̈a naboakan’ny Baba tamintsika, atsika nataony zanany foeky.’ (1 Jaona 3:1) Irô voahosotro aby io fo ma tian’i Jehovah mare be karaha zen̈y? Ehe, efa naboakan’i Jehovah koa fa atsika jiaby tiany.

10. Ino porofo maventy nan̈aboahan’i Jehovah fa izy ten̈a tia anao?

¹⁰ Ino raha maventy man̈aboaka fa Jehovah ten̈a be fitiavan̈a? Vidim-pan̈avotan̈a. Izio raha araiky faran’ny maventy nan̈aboahan’i Jehovah fa izy ten̈a tia izao tontolo izao! (Jaona 3:16; Rom. 5:8) Jehovah nan̈amia Zanany ten̈a tiany io, ke izio nambelany hofoaty han̈avotan̈a olombelon̈o jiaby, baka atsika ho afaka amy fahotan̈a ndreky ho afaka hanjary kamaradinany. (1 Jaona 4:10) Arakaraka isaintsain̈antsika raha nafoen’i Jehovah ndreky Jesosy, hahaiho takatrantsika fo karakôry habezan’ny fitiavandrô atsika tsiaraikiaraiky. (Gal. 2:20) Tsy nohon’ny fan̈arehan̈a fitsipikinany momba ny rariny fo nahavy Jehovah nan̈amia vidim-pan̈avotan̈a io, fa nohon’ny fitiavan̈a koa. Naboakan’i Jehovah fa izy ten̈a tia atsika. Ke nataony soron̈o i Jesosy, Zanany ten̈a tiany. Nambelany Zanany io hijaly ndreky hofoaty, baka han̈avotan̈a atsika.

11. Ino raha ianarantsika baka amy Jeremia 31:3?

¹¹ Eraka hitantsika tiô in̈y, tsy nitanany tan̈atiny fônany tao fo fitiavan’i Jehovah atsika io fa naboakany atsika. (Vakia Jeremia 31:3.) Atsika nitahomin’i Jehovah han̈aton̈o izy, fôtony atsika tiany. (Ampiràn̈a amy Deoteronomia 7:7, 8.) Tsisy raha hahavita hampisaraka atsika amy fitiavan̈a zen̈y. (Rom. 8:38, 39) Karakôry tsapanao nohony fitiavan̈a zen̈y? Vakia Salamo faha-23, aviô zahava karakôry raha tsapan’i Davida momba fitiavan’i Jehovah izy, aviô ino mety ho vokatran’izen̈y amintsika jiaby.

 INO TSAPANAO IZIKOA ANAO MANDINIKY FITIAVAN’I JEHOVAH ANAO?

12. Akôry hamintin̈anao Salamo 23?

¹² Vakia Salamo 23:1-6. Amy Salamo faha-23 Davida nan̈aboaka fatokisany fa Jehovah tia ndreky nikarakara izy. Nivolan̈iny fa irô roen’i Jehovah nifandray mare ke Jehovah Mpiambin̈y izy, ho izy. Davida nahatsiaro nisy mpiaro, ke Jehovah nambelany nitariky izy. Aviô izy nilampy taminany tamy fô jiaby. Hain’i Davida fa Jehovah ho tia izy fo isan’andra. Ino ma nahavy izy natoky Jehovah karaha zen̈y?

13. Nan̈ino Davida natoky fa Jehovah tsy maintsy hikarakara izy?

¹³ “Tsisy raha hanahiran̈a zaho.” Davida nahatsiaro voakarakara tsara, fôtony Jehovah nan̈ampy izy fo hahazo raha ilainy. Hain’i Davida koa fa Jehovah io kamaradinany sady izy nahazo sitraka taminany. Izy natoky fa ndray ino ndray ino raha hiboaka amy fiainan̈anany, Jehovah mbala hikarakara izy fo. Nisy raha ndraiky nampiasaloha izy, fa nohon’ny fatokisany zen̈y, izy nahatsiaro sambatra ndreky afa-pô fo.​—Sal. 16:11.

14. Akôry mety hikarakaran’i Jehovah atsika?

¹⁴ Jehovah ten̈a tia ndreky mikarakara atsika, intsaka eky lera misy raha ratsy mandalo amintsika. Efa mandilatra 20 taon̈o i Claire a nanompo tamy Betela. Fa nisy fotoan̈a fianakavian̈anany tôjy prôblemo nifanesisesy, ke tsy hainy foeky ino raha hataony. Babany tapaka lalan-drà, rahavaviny araiky voaroaka, aviô nafody koa varotrondrô ke sahiran̈a ara-bola fianakavian̈anany, ke farany nalain’ny banky foeky tran̈ondrô. Akôry nan̈aboahan’i Jehovah fa izy ten̈a nikarakara irô? Ho Claire: “Zahay tsy narian’i Jehovah, ke fianakavian̈anaka nahazo raha nilaindrô fo isan’andra. Matetiky  raha namezan’i Jehovah zahay beben’ny raha nilainay. Tsy afaka an̈aty jeriko fomba nikarakarany zahay, ke tsy hadin̈ako foeky raha zen̈y. Fangalan̈a onon̈o raha aby zen̈y nan̈ampy zaho hanompo Jehovah fo, ndray nisy prôblemo.”

15. Nan̈ino Davida nahatsiaro nahazo angôvo? (Zahava koa sary.)

¹⁵ “Izy man̈amia angôvo zaho.” Ndraikindraiky Davida kivy nohon’ny prôblemo ndreky raha sarotro maro navoa izy. (Sal. 18:4-6) Fa Jehovah nikarakara ndreky namelombelon̈o izy fo. Jehovah nitondra kamaradinany efa kajo mare io tamy tany “feno ahitry mahitso” ndreky “tany fangalan̈a tsitsiko azon-drano tsarabe.” Ke Davida nahazo angôvo ndraiky koa, sady ravoravo nanohy nanompo Jehovah.​—Sal. 18:28-32.

16. Nan̈ino mankahery anao fitiavan’i Jehovah anao?

¹⁶ Karaha zen̈y koa iziôty. “Nohon’ny fitiavan’i Jehovah atsika ndreky tsy fivadihany amintsika, zen̈y tsy maharipaka atsika” lera atsika miatriky raha sarotro amy fiain̈ana. (Fitom. 3:22; Kol. 1:11) Diniha baka raha nahazo Rachel. Tamy valan̈’aretin̈y COVID-19 in̈y, vadiny niala izy, baka iô niala tamy Jehovah koa. Kivy mare Rachel. Akôry nataon’i Jehovah nan̈ampy izy? Karaha ty nivolan̈iny: “Nataon’i Jehovah hitako fa izy ten̈a tia zaho. Izy nanohan̈a zaho fo, ke nampiasa naman̈a maro nikarakara zaho. Irô nitondra hanin̈y taminaka, nandefa mesazy ndreky andinin-teny mankahery, nan̈ano raha namparavoravo zaho, aviô tsy vôly nampatsiaro fa Jehovah ten̈a mikarakara zaho. Ke zaho ten̈a man̈ano mersy Jehovah nan̈amia zaho fianakavian̈a maro sady be fitiavan̈a.”

17. Nan̈ino Davida ‘tsisy raha navozoany’?

¹⁷ “Tsisy raha havozoako, fôtony anao miaraka aminaka.” Matetiky nisy raha mampavozo tamy fiainan̈an’i Davida sady naro natanjaka koa fahavalonany. Fa nohon’ny fahaizany fa Jehovah tia izy, zen̈y nahavy izy nahatsiaro voaro. Tsapan’i Davida fa ndray ino ndray ino raha natrefiny, Jehovah tsy niala izy ke zen̈y nan̈amia toky izy. Tsy mahagaga izikoa izy nihira karaha ty: “[Jehovah] nankafaka zaho tamy raha jiaby nampavozo zaho.” (Sal. 34:4) Ke ndray nisy raha nampavozo izy mare, resiny fo tahotronany zen̈y, fôtony hainy fa Jehovah tia izy.

18. Nan̈ino anao hahazo angôvo lera anao misy raha mampavozo, izikoa matoky fa Jehovah tia anao?

¹⁸ Nan̈ino fahaizantsika fa Jehovah tia atsika man̈amia angôvo atsika, izikoa atsika fa tôjy raha mampavozo? Nisy mpisava lalan̈a araiky, Susi an̈arany. Karaha ty ho izy raha tsapandrô fivadiany, izikoa fa namono ten̈a zanakandrô: “Mira nilatsaham-baratra in̈y anao, lera misy prôblemo tampoko. Anao koa mavozo tsao mbala hisy raha ratsiratsin’izen̈y koa hahazo anao. Fa fahaizanay fa Jehovah tia zahay, nan̈ampy zahay hahatsiaro voaro mare.” Rachel, araiky nikoran̈intsika taloha in̈y koa nivolan̈a: “Tamin’ny alin̈y araiky zay, zaho koa fa nalahelo  mare, zaho ten̈a fombo ndreky navozo oe. Ke zaho nitomoan̈y nivavaka tamy Jehovah. Fa baka tiô, zaho nahatsapa fa izy nan̈ano raha nampilamin̈y fonaka ndreky nanambitamby zaho, karaha ataon’ny reny amy zanany menamena in̈y. Ke zaho baka tiô tafandry. Tsy mety hadin̈ako fotoan̈a zen̈y.” Nisy anti-pan̈ahy araiky zay koa, Tasos an̈arany. Nigadra fito taon̈o izy, fôtony tsy nety nan̈ano maramila. Karakôry nahatsapany fa Jehovah ten̈a tia ndreky nikarakara izy? Ho izy: “Jehovah nan̈amia zaho mandilatra raha nilaiko, ke zen̈y nahavy zaho nahairesy lahatra fo fa zaho mety matoky izy tsarabe. Aviô baka tamy fan̈ahy masin̈inany, Jehovah nan̈amia zaho angôvo han̈ampy zaho ho ravoravo, ndray nampakivy mare tan̈aty prizon tao. Zen̈y nan̈ampy zaho nahita fa, arakaraka atokisako Jehovah hahavy zaho hahaihatsapa fitiavany zaho fo. Ke zaho nanomboko nan̈ano mpisava lalan̈a maharitry, ndray mbala nigadra.”

MAN̈ATÒN̈A ZAN̈AHARINAO BE FITIAVAN̈A IO

19. a) Nan̈ino misy vokany amy raha koran̈intsika amy Jehovah amy vavaka, fahaizantsika fa izy tia atsika? b) Ino amindrô volan̈a aby man̈ambara momba fitiavan̈an’i Jehovah, ten̈a tianao? (Zahava efajoro “ Volan̈a Han̈ampy Atsika Hahatsapa Fitiavan̈an’i Jehovah.”)

¹⁹ Irô fitantaran̈a jiaby nikoran̈intsika tato, man̈aboaka fa miaraka amintsika Jehovah “Zan̈aharin’ny fitiavan̈a.” (2 Kor. 13:11) Izy tihan̈ampy atsika tsiaraikiaraiky. Atsika matoky fa man̈odidin̈y atsika ‘fitiavan̈anany ndreky tsy fivadihany.’ (Sal. 32:10) Arakaraka isaintsain̈antsika fomba an̈aboahany fitiavany atsika, hahaiho hitantsika fo fa izy ten̈a mikarakara atsika. Ke hanjary tihifandray aminany fo atsika. Atsika tsy tokôny hihafahafa koa fa mivavaka aminany, ke mivolan̈a aminany fa ten̈a ilaintsika fitiavany atsika. Koran̈intsika aminany aby raha jiaby mampiasaloha atsika, fôtony atokisantsika fa azony tsarabe raha tiantsika koran̈iny ke izy vôn̈ono han̈ampy atsika.​—Sal. 145:18, 19.

20. Nan̈ino handrisiky atsika han̈aton̈o Jehovah fitiavan̈anany?

²⁰ Izikoa fa andra manintsy, tiantsika man̈aton̈o môtro mafampana, mamindro. Ambaka zen̈y koa, mahasariky atsika fitiavan̈an’i Jehovah. Fitiavan̈anany nata mahery, izio feno tambitamby ndreky hatsaram-pan̈ahy koa. Ke tsy ravoravo mare ma anao fôtony ten̈a tia anao Jehovah? Irarian̈a atsika jiaby han̈eky fitiavany atsika koa, ke hivolan̈a: “Tiako Jehovah”!​—Sal. 116:1.