1. Ino ma raha ten̈a mahasôfy olo maro amy ziôty?

 METY hitanao donko fa maro olo iziôty sôfy mitady voninahitrindrô tômpiny fo fa tsy mijery olo. Ohatra, olo sasany mampiasa tranonkala fifaneraseran̈a, ke mipoerapoera mare an̈atin’izio ao, momba ain̈indrô tômpiny ndreky raha vitandrô. Fa kanefa, vitsy fo olo man̈amia voninahitry Jehovah Zan̈ahary. Ke amy lahatsoratra ty, hidinihintsika karakôry ma man̈amia voninahitry Jehovah zen̈y, aviô ino raha tôkony handrisiky atsika han̈ano zen̈y. Hianarantsika koa akôry han̈amezantsika Zan̈ahary voninahitry mendriky izy, aviô akôry koa han̈amezan’i Jehovah voninahitry mendriky an̈aranany teteky iô.

KARAKÔRY MA MAN̈AMIA VONINAHITRY JEHOVAH ZEN̈Y?

2. Akôry nan̈aboahan’i Jehovah voninahitrinany tamy Bongo Sinay? (Zahava koa sary.)

² Ino ma voninahitry zen̈y? Amy Baiboly ao, “voninahitry” zen̈y ivolan̈ana zay raha mahavy olo araiky misy lanjany mare. Tsy ampy firy andra nan̈afahan’i Jehovah firenenan’Israely andevo baka ta Ezipty tan̈y, naboakan’i Jehovah irô voninahitrinany. Miniminia baka raha nisy tamy zen̈y. An-tapitrisany Israelita nivory tamy Bongo Sinay tiô, hitandren̈y raha hivolan̈in’i Jehovah tamindrô. Tiô fo, nahiziky tany jiaby tamy bongo io, aviô nisy hôrohôron-tany koa niaraka volkan nipoaka, ndreky tselatra, ndreky difi-baratra, ke nangotroko mare. (Eks. 19:16-18; 24:17; Sal. 68:8) Misora lany fan̈ahy irô Israelita aby io nahita angôvonany.

3. Karakôry ma man̈amia voninahitry Jehovah zen̈y?

³ Fa karakôry basy atsika olombelon̈o? Atsika ma mahavita man̈amia voninahitry Jehovah? Ia. Fomba araiky han̈amezantsika voninahitry Jehovah, atsika man̈ambara amin’olo angôvonany mahery ndreky toetrinany maro tsara aby io.  Man̈amia voninahitry izy koa atsika, izikoa midera izy, nohon’izy nan̈ampy atsika. (Isaia 26:12) Mpanjaka Davida an̈isan’ny ohatra araiky maventy amy fan̈amezan̈a voninahitry Jehovah. Tamin’izy nivavaka nisolo ten̈a firenenan’Israely, karaha ty nivolan̈iny tamy Zan̈ahary: “Ninao Jehovah angôvo, habezan̈a, hatsaran̈a, haja ndreky voninahitry, fôtony ninao raha jiaby an-dan̈itry an̈y ndreky ambony tany eto.” Ke izikoa fa vita vavaka nataon’i Davida in̈y, olo jiaby “nidera Jehovah.”​—1 Tan. 29:11, 20.

4. Akôry nataon’i Jesosy nan̈amia voninahitry Jehovah?

⁴ Tamy Jesosy tambony tany teto, izy nan̈amia voninahitry Babany, ke nivolan̈a tamin’olo fa baka tamy Babany nahavy izy nahavita fahagagan̈a. (Mar. 5:18-20) Jesosy koa nan̈amia voninahitry Jehovah baka tamy raha nivolan̈iny momba Babany ndreky fomba fitondrasany olo. Tandraraiky Jesosy nampianatra tamy synagoga. Tamindrô olo aby nitandren̈y izy tao, nisy man̈angy zay narary tan̈atin’ny 18 taon̈o, fôtony izy nisazohan’ny demony nampalemy. Izy nivônkiny mare ke tsy afaka niangana foeky. Nijaly mare izy! Nahinakinaka izy mare Jesosy. Ke Jesosy nan̈aton̈o izy, nivolan̈a karaha ty taminany: “A man̈angy, afaka aretin̈inao.” Nametra-tan̈ana taminany Jesosy, ke tiô ny iô man̈angy io niangana, aviô izy “nanomboko nan̈amia voninahitry Zan̈ahary.” Janga man̈angy io ke nanjary natanjaka tsara! (Lioka 13:10-13) Ten̈a nanan̈a antony tsara nan̈amezan̈a voninahitry Jehovah man̈angy io, ary karaha zen̈y koa atsika.

INO MA MANDRISIKY ATSIKA HAN̈AMIA VONINAHITRY JEHOVAH?

5. Ino aby antony tôkony han̈ajantsika Jehovah?

⁵ Man̈amia voninahitry Jehovah atsika fôtony ten̈a man̈aja izy. Maro antony tôkony han̈ajantsika Jehovah. Izy faran’ny mahery, aviô angôvonany tsisy farany. (Sal. 96:4-7) Hita baka amy raha niasainy koa fa izy ten̈a hendry. Izy nan̈amia atsika fiain̈ana ndreky raha jiaby ivilomantsika. (Apok. 4:11) Izy tsy mivadiky. (Apok. 15:4) Mahômby aby raha jiaby ataony, aviô izy man̈atanteraka fampan̈antinan̈anany fo. (Jos. 23:14) Amy lerany mpaminan̈y Jeremia nivolan̈a karaha ty momba Jehovah: “Tsisy karaha anao foeky, na amindrô olo hendry jiaby amindrô firenena aby io, ndreky amy fanjakan̈andrô”! (Jer. 10:6, 7) Ten̈a maro ankitin̈y antony mahavy atsika tôkony han̈aja Babantsika an-dan̈itry an̈y. Fa atsika tsy basin’ny man̈aja mare Jehovah fo fa atsika koa tia izy.

6. Nan̈ino ma atsika tia Jehovah?

⁶ Man̈amia voninahitry Jehovah atsika fôtony ten̈a tia izy. Diniha baka irô toetry maro tsaran’i Jehovah, ke mahavy atsika ho tia izy. Izy mamindra fô ndreky mahinakinaka olo. (Sal. 103:13; Isaia 49:15) Mahinakinaka izy mahita atsika mijaly. (Zak. 2:8) Ampiany atsika hahay izy ndreky hanjary Kamaradinany. (Sal. 25:14; Asa. 7:27) Izy koa manetry ten̈a, ke “miôndriky izy mizaha raha an-dan̈itry an̈y ndreky ambony tany atỳ. Izy mampitsangana olo ambany hiala amy fotaka.” (Sal. 113:6, 7) Akôry ataontsika tsy han̈amia voninahitry Zan̈aharintsika io!​—Sal. 86:12.

7. Ino tombontsoa miavaka anan̈antsika?

⁷ Man̈amia voninahitry Jehovah atsika fôtony tiantsika olo hahay izy. Maro olo tsy mahay ny marin̈y momba Jehovah. Fôtony nan̈ino? Fôtony Satana man̈ajamba sain̈indrô, ke man̈aparitaka vandy maro momba Jehovah. (2 Kor. 4:4) Satana mandresy lahatra olo, baka irô hivolan̈a fa Jehovah io mamaly faty, tsy mijery olo, aviô baka aminany mahavy  jaly jiaby mahazo olombelon̈o. Fa atsika mahay ny marin̈y momba Zan̈aharintsika io! Ke atsika afaka man̈ambara olo ny marin̈y momba Jehovah, ndreky man̈ampy irô hidera izy koa. (Isaia 43:10) Salamo faha-​96 mikoran̈a fomba han̈amezan̈a voninahitry Jehovah. Hianarantsika amizio ao akôry han̈amezantsika voninahitry ten̈a mendriky Jehovah.

AKÔRY HAN̈AMEZANTSIKA JEHOVAH VONINAHITRY MENDRIKY IZY?

8. Ino fomba araiky han̈amezantsika voninahitry Jehovah? (Salamo 96:1-3)

⁸ Vakia Salamo 96:1-3. Man̈amia voninahitry Jehovah atsika amy raha volan̈intsika momba izy. Irô andininy aby io man̈iraka atsika “hihira nin’i Jehovah”, “hidera an̈aranany”, “han̈ambara vaovao tsara momba famonjian̈anany” ndreky “han̈ambara voninahitrinany amindrô firenena aby io.” Irô jiaby zen̈y fomba mety han̈amezantsika voninahitry Babantsika an-dan̈itry an̈y, amy raha volan̈intsika. Irô Jiosy tsy nivadiky ndreky irô Kristianin̈y jiaby tamy taonjato voanalohany, tsy nisalasala foeky nan̈ambara tamin’olo raha tsara vitan’i Jehovah tamindrô ndreky niaro lazan’i Jehovah. (Dan. 3:16-18; Asa. 4:29) Akôry han̈anaovantsika karaha zen̈y?

9-10. Ino raha ianarantsika baka amy tantaran’i Angelena? (Zahava koa sary.)

⁹ Diniha baka ohatran’i Angelena, a ranabavy mipetraka a Etazonỳ an̈y. Ten̈a nisy korazy izy ke nikoran̈a raha momba Jehovah tamy tany niasany tan̈y. Izy mbala mpiasa vaovao tamy tany niasany io. Ke irô jiaby vo niditry niasa tao nirahin̈y nan̈ambara raha mombamomba irô. Angelena efa nan̈oman̈a sary man̈aboaka fa izy ten̈a ravoravo manompo Jehovah. Fa talohan’ny latoronany hivolan̈a, nisy lelahy araiky antsendriky talohanany. Lelahy io nivolan̈a fa iry olobeny zen̈y Vavolombelon̈on’i Jehovah. Fa izy baka tiô nankaratsy Vavolombelon̈on’i Jehovah ndreky raha inoandrô. Angelena nivolan̈a: “Narary mare fônaka naharen̈y zen̈y. Tan̈aty jeriko tan̈y: ‘Akôry eky ataoko niany? Hambelako fo olo io hivolan̈a raha vandy momba Jehovah? Sa zaho hasaky hiaro Izy?’”

¹⁰ Angelena nan̈ano vavaka mangin̈y hely. Izy baka tiô tsara fan̈ahy nivolan̈a karaha ty: “Mira ninao zen̈y koa ninaka. Raimandreniko  koa Vavolombelon̈on’i Jehovah, ke zaho mbala Vavolombelon̈on’i Jehovah fo firaka iziôty.” Raha nivolan̈in’ny lelahy io ndray nampameloko, Angelena nifen̈y baka ho kalma fo. Naboakany sarinany miaraka amy kamaradinany ravoravo manompo Jehovah, aviô nan̈aja tsarabe koa izy nan̈azava raha inoany. (1 Pet. 3:15) Ino vokatran’ny raha zen̈y? Izikoa fa vita volan̈an’i Angelena, lelahy io komansy nalemy. Ndray izy aby nikoran̈a sovenira tsara nanan̈any tamin’izy mbala niaraka tamy Vavolombelon̈on’i Jehovah, tamin’izy mbala hely. Angelena nivolan̈a: “Ten̈a mendriky harovan̈a lazan’i Jehovah. Voninahitry maventy miaro an̈aranany.” Voninahitry maventy ambaka zen̈y koa nintsika midera Jehovah ndreky man̈amia voninahitry izy, izikoa fa misy olo mangala baraka izy.

11. Akôry an̈arehan’ny mpanompon’i Jehovah raha koran̈in’ny Salamo 96:8, taloha tan̈y ndreky iziôty?

¹¹ Vakia Salamo 96:8. Afaka man̈amia voninahitry Jehovah atsika baka amy raha maro valera anan̈antsika. Efa nan̈ano karaha zen̈y fo mpanompon’i Jehovah letrizay. (Ohab. 3:9) Ohatra, irô Israelita aby io nan̈amia raha maro valera nanan̈andrô, nan̈ampian̈a tamy fan̈amboaran̈a tempoly ndreky fikobabian̈a izio. (2 Mpanj. 12:4, 5; 1 Tan. 29:3-9) Sasany tamy mpianatran’i Jesosy koa ‘nampiasa fanan̈anandrô’, baka izy ndreky apostolinany aby io nahazo raha nilaindrô. (Lioka 8:1-3) Irô Kristianin̈y tamy taonjato voanalohany koa nan̈amia fan̈ampian̈a irô rahalahy ndreky anabavindrô tatran’ny mosary. (Asa. 11:27-29) Afaka man̈amia voninahitry Jehovah koa atsika amin’ny andra iziôty, ke man̈ano fan̈amezan̈a an-tsitrapô.

12. Ino ivolan̈antsika fa man̈amia voninahitry Jehovah fan̈amezan̈a ataontsika? (Zahava koa sary.)

¹² Diniha baka tantara araiky ty ahitan̈a fa man̈amia voninahitry Jehovah ankitin̈y fan̈amezan̈a ataontsika. Nisy tatitry tamin’ny 2020 nan̈aboaka vokatran’ny hain-tany nahadin̈y ela ta Zimbabwe. An-tapitrisany olo natahoran̈a hofoatin’ny mosary, an̈isan’izen̈y ranabavy Prisca. Ndray tiô hain-tany be zen̈y, Prisca mbala nitory isaka robia ndreky joma, karaha fataony fo. Ndray lera fambolian̈a izy mbala nan̈ano karaha zen̈y fo. Irô jiraninany aby io neloko taminany, fôtony izy tsy mandeha mamboly zen̈y fa mbala mandeha mitory fo. Ho irô taminany: “Anao mbala hofoatin’ny mosary.” Prisca nisy korazy mare nivolan̈a karaha ty tamindrô: “Jehovah  tsy man̈ary mpanomponany foeky.” Tsy ela tafaran’izin̈y, Prisca an̈isan’ny nahazo fan̈ampian̈a baka tamy fandaminan̈antsika. Nahazo hanin̈y ndreky raha maro nilainy izy, baka amy fan̈amezan̈a ataontsika tsiaraikiaraiky. Lany fan̈ahy irô jiraninany aby in̈y, ke nivolan̈a taminany: “Tsy nan̈ary anao ankitin̈y Zan̈ahary. Ke zahay mba ampianara momba izy kony.” Fito amindrô jiraninany aby io efa mivory.

13. Akôry hataontsika han̈amia voninahitry Jehovah baka amy fitondran-ten̈antsika? (Salamo 96:9)

¹³ Vakia Salamo 96:9. Man̈amia voninahitry Jehovah atsika baka amy fitondran-ten̈antsika. Nila nadio vatan̈a irô mpisôron̈o nanompo tamy tempolin’i Jehovah. (Eks. 40:30-32) Fa mbala beben’izen̈y, irô nila nadio fitondran-ten̈a. (Sal. 24:3, 4; 1 Pet. 1:15, 16) Mila mifen̈y mare atsika miala amy “toetry taloha”, an̈atin’izen̈y toe-tsain̈y ndreky raha fatao maloto. Fa atsika mila misikiny “toetry vaovao”, dikan’izen̈y eritreritry ndreky raha fatao man̈aboaka fa atsika mangala tahaka Jehovah ndreky toetrinany maro tsara. (Kol. 3:9, 10) Nohon’i Jehovah man̈ampy, ndray olo ratsy fitondran-ten̈a be karakôry mbala mahavita miova fo, ke misikiny toetry vaovao.

14. Ino raha ianaranao baka amy tantaran’i Jack? (Zahava koa sary.)

¹⁴ Diniha baka tantaran’i Jack, lelahy araiky kafiry mare. Fa Demony foeky fikahian’olo izy. Nohon’ny raha nataony, Jack navoaheloko hofoaty. Fa tan̈atin’izy niambin̈y andra hamonoan̈a izy in̈y, izy nianatra Baiboly tamy rahalahy araiky nandeha nitory tamy prizon nisy izy tan̈y. Izikoa fa ela ny ela, Jack niala tamy toetrinany taloha, ke nahafeno fepetra natao batisa. Niova mare Jack, ke tamin’ny andra handeha hamonoan̈a izy in̈y, nisy polisy sasany nitomoan̈y nan̈ano veloma izy. Nisy polisy araiky sergent tao nivolan̈a karaha ty: “Tamy Jack vo niditry tato, izy faran’ny olo tsy nety niarasan̈a nipetraka. Fa izy iziô ndraiky nanjary olo faran’ny tsara toetry.” Herin̈iandra tafaran’ny namonoan̈a Jack, irô rahalahy aby io navy tamy prizon tan̈y nan̈ano fivorian̈a. Nisy lelahy araiky mbala vo sambany nivory tamin’io tao. Ino raha nandrisiky izy navy hivory? Fôtony izy gaga nahita Jack niova be in̈y. Ke izy mba tihahay ino raha mila hataony, baka izy hahavita hanompo  Jehovah. Hitantsika baka amy zen̈y fa fitondran-ten̈antsika mety hahavita han̈amia voninahitry Babantsika an-dan̈itry an̈y!​—1 Pet. 2:12.

AKÔRY HATAON’I JEHOVAH HAN̈AMIA VONINAHITRY AN̈ARANANY TETEKY IÔ?

15. Akôry hataon’i Jehovah hankamasin̈y tanteraka an̈aranany teteky iô? (Salamo 96:10-13)

¹⁵ Vakia Salamo 96:10-13. Andininy faramparany amy Salamo faha-​96 mivolan̈a fa Jehovah io Mpitsara man̈ano ny marin̈y ndreky Mpanjaka. Akôry hataon’i Jehovah han̈amia voninahitry an̈aranany teteky iô? Baka amy didim-pitsaran̈a handeha hataony. Tsy ela izy handravan̈a Babylony Be, fôtony izio mangala baraka an̈aranany. (Apok. 17:5, 16; 19:1, 2) Fa olo sasany hahita fandravan̈ana Babylony Be io mety han̈araka fivavahan̈a marin̈y miaraka amintsika amy zen̈y. Aviô amy farany, amin’ny Aramagedona, Jehovah handripaka donian’i Satana jiaby, ke haripany miaraka amy zen̈y koa lan̈iany olo manohitry izy ndreky tsy man̈isy fôtiny an̈aranany. Aviô izy han̈avotro lan̈iany olo tia izy ndreky man̈araka volan̈anany ndreky lan̈iany olo tihan̈amia voninahitry izy. (Mar. 8:38; 2 Tes. 1:6-10) Afaran’ny fitsapan̈a farany, koa fa vita Fanjakan̈a Arivo Taon̈on’i Kristy, Jehovah hankamasin̈y amy fomba feno an̈aranany. (Apok. 20:7-10) Amy fotoan̈an’izen̈y, “tany jiaby ho feno fahaizan̈a voninahitrin’i Jehovah karaha rano mandrakotro faran’ny ambany amy ranomasin̈y in̈y.”​—Hab. 2:14.

16. Tapa-kevitry han̈ino anao? (Zahava koa sary.)

¹⁶ Misora ho tsara mare fiain̈ana izikoa olo jiaby hidera Jehovah ndreky han̈amia izy voninahitry mendriky an̈aranany! Fa rango iziôty, atsika mety man̈ambara raha momba Zan̈aharintsika io amin’olo, ndreky man̈ano raha man̈amia voninahitry izy. Ke baka atsika tsy han̈adin̈a fa raha zen̈y ten̈a maventy, Filan-kevi-pitantan̈ana nifidy Salamo 96:8 hatao andinin-teny nin’ny taon̈o 2025: “Ameza voninahitry Jehovah, fôtony zen̈y mendriky an̈aranany.”