1. Ino antony araiky nahavy Jehovah namôron̈o vadian̈a?

 JEHOVAH io “Zan̈ahary ravoravo”, ke tiany ho ravoravo koa atsika. (1 Tim. 1:11) Maro kadô namezany atsika baka atsika ho ravoravo amy fiain̈ana. (Jak. 1:17) An̈isan’ny araiky amy kadô aby zen̈y, izy namôron̈o vadian̈a. Lera lelahy araiky ndreky man̈angy araiky koa fa man̈ano mariazy, irô mivoady fa hifankatia ndreky hifan̈aja fo. Ke izikoa irô mifen̈y fo man̈ano raha hahavy fifankatiavan̈andrô hahaimare fo, irô ho sambatra mare.​—Ohab. 5:18.

2. Karakôry vadian̈an’olo maro amy ziôty?

² Mampalahelo fa maro olo fivadiany amy ziôty man̈adin̈a voady nataondrô tamin’ny andran’ny mariazindrô, ke irô tsy sambatra. Misy tatitry vo tsy ela, baka amy Fikamban̈ana Iraisam-pirenena Momba Fahasalaman̈a mivolan̈a fa maro lelahy mamopoko vady, manihitihy na man̈ano raha mamparary fôn’ny vadindrô. Lelahy man̈ano raha aby zen̈y, man̈ano sary man̈aja vady izikoa fa ankilan’olo, fa mampijaly vady izikoa fa an-tran̈ondrô an̈y. Maro koa lelahy tia mizaha sary vetaveta, ke raha zen̈y mahavy vadindrô mahatsapa tsy tian̈a ndreky kivy mare.

3. Ino mahavy lelahy sasany mampijaly vady?

³ Ino raha mety mahavy lelahy sasany mampijaly vady? Babandrô baka mety kafiry mare, ke irô mieritreritry fa mety fo man̈ano karaha zen̈y. Fa sasany ndraiky mety baka amy kolontsain̈indrô mahavy irô mampijaly vady. Irô mieritreritry fa irô mila man̈ano raha karaha zen̈y han̈aboahandrô fa irô mahafehy vadindrô. Sasany koa tsy nampianarin̈y hifehy fihetseham-pô, karaha ataony hahay hifehy heloko. Fa sasany ndraiky zatra mizaha sary vetaveta, ke raha zen̈y mahavy irô hanan̈a hevitry diso momba man̈angy ndreky momba firaisan̈a. Fan̈ampin’izen̈y koa, misy tatitry mivolan̈a fa nohon’ny valan̈aretin̈y COVID-19 in̈y,  nahainaro fo lelahy mampijaly vady. Fa ndray karakôry ndray karakôry antony mahavy zen̈y, lelahy tsy tôkony hampijaly vady zen̈y foeky.

4. Ino raha mila tandreman’ny lelahy kristianin̈y manambady, aviô nan̈ino?

⁴ Lelahy kristianin̈y manambady mila mitandrin̈y amy fomba fiheverandrô man̈angy, tsao irô tafan̈araka hevitry dison’olo aby amy donia ty. a Nan̈ino? Fôtony baka amy raha iritriretin’olo mahavy izy han̈ano raha. Apostoly Paoly nampitandrin̈y irô Kristianin̈y ta Roma tan̈y “tsy han̈eky hibolibolain’ny donia ty eky.” (Rom. 12:1, 2) Tamin’ny apostoly Paoly nanoratra tamindrô Romanin̈y aby io, efa taon̈o maromaro nisian’ny fiangonan̈a tan̈y. Kanefa, raha nivolan̈in’i Paoly man̈aboaka fa mbala nisy olo sasany tamy fiangonan̈a tao mbala nibolibolain’ny fomba ndreky toe-tsain̈in’ny donia ty. Ke zen̈y nahavy Paoly nandrisiky irô han̈ova toe-tsan̈indrô ndreky fitondran-ten̈andrô. Torohevitrinany zen̈y koa mandeha amy lelahy kristianin̈y amin’ny andra ziôty. Mampalahelo fa sasany nan̈eky nibolibolain’ny toe-tsain̈in’ny donia ty, ke nampijaly vadindrô. b Ke karakôry ma fomba tian’i Jehovah itondrasan’ny lelahy vadiny? Hahitantsika valin’ny fan̈ontanian̈a zen̈y amin’ny andinin-teny fôtotro amy lahatsoratra ty.

5. Izikoa 1 Petera 3:7 zahan̈a, karakôry tôkony hitondrasan’ny lelahy vadiny?

⁵ Vakia 1 Petera. 3:7. Jehovah man̈iraka lelahy han̈amia voninahitry vady. Man̈amia voninahitry zen̈y ivolan̈ana fomba fitondrasan̈a olo araiky ajain̈a. Ke lelahy araiky man̈amia voninahitry vady zen̈y, tsara fan̈ahy ndreky tia vady. Amy lahatsoratra ty, atsika handiniky akôry an̈aboahan’ny lelahy araiky fa izy man̈amia voninahitry vadiny. Fa hidinihintsika antsendriky, karakôry ma lelahy mangala baraka vady zen̈y.

AZA MAN̈ANO RAHA MANGALA BARAKA VADINAO

6. Karakôry fahitan’i Jehovah lelahy mampijaly vady? (Kolosianina 3:19)

⁶ Mamopoko vady. Halan’i Jehovah olo kafiry. (Sal. 11:5) Faran-draha halany koa lelahy mampijaly vady. (Mal 2:16; vakia Kolosianina 3:19.) Eraka raha voakoran̈a amy 1 Petera 3:7, andinin-teny fôtotro amy lahatsoratra ty, izikoa misy lelahy mampijaly vady, raha zen̈y handrobaka fifandraisany amy Zan̈ahary. Ke Jehovah mety tsy hitandren̈y vavaka ataony foeky.

7. Izikoa Efesianina 4:31, 32 zahan̈a, ino volan̈a tsy tôkony hataon’ny lelahy manambady? (Zahava koa “Fan̈azavan̈a.”)

⁷ Manihitihy vady. Misy lelahy sasany masiaka mare amy vadindrô ke man̈ano volan̈a mamparary fô. Kanefa samy halan’i Jehovah aby “hinihiny, heloko mare, midaladala ndreky tihitihy.” c (Vakia Efesianina 4:31, 32.) Tsisy raha tsy ren̈in’i Jehovah. Ke fomba fikoran̈an’ny lelahy amy vadiny, ndray tsisy olo mahita, mbala misy vokany amy Jehovah fo. Ke lelahy manihitihy vady tsy vitan’ny mandrobaka vadian̈andrô fo fa, firaka amy fifandraisany amy Zan̈ahary koa robaka.​—Jak. 1:26.

8. Akôry hevitrin’i Jehovah momba sary vetaveta, aviô nan̈ino?

⁸ Mizaha sary vetaveta. Akôry hevitrin’i Jehovah momba sary vetaveta? Halany mare izio. Ke izikoa lelahy manambady mizaha sary vetaveta, raha zen̈y handrobaka fifandraisany amy  Jehovah ndreky mangala baraka vadiny. d Tian’i Jehovah lelahy tsy hivadiky amy vadiny, tsy amy raha volan̈iny fo fa firaka amy raha iritriretiny koa. Jesosy nivolan̈a fa izikoa misy lelahy araiky mizaha man̈angy hafa tsy vadiny ke man̈iry han̈ano firaisan̈a aminany, efa nandiadia vady edy izy “tan̈atin’ny fônany tan̈y.” e​—Mat. 5:28, 29.

9. Nan̈ino ma halan’i Jehovah lelahy miforse vady han̈ano raha tsy iken’ny eritreritrin’ny vadiny, irô koa fa man̈ano firaisan̈a?

⁹ Miforse vady han̈ano raha tsy iken’ny eritreritrinany, irô koa fa man̈ano firaisan̈a. Misy lelahy sasany miforse vady han̈ano firaisan̈a mahavy vadindrô mahatsiaro ambanian̈a, voaloto na tsy tian̈a. Halan’i Jehovah fitiavan-ten̈a ndreky tsy fijirian̈a olo karaha zen̈y. Tiany lelahy ho tia ndreky ho tsara fan̈ahy amy vadiny, baka iô han̈aja tsara fihetseham-pônany. (Efes. 5:28, 29) Akôry ndraiky izikoa misy lelahy kristianin̈y efa zatra man̈ambany na mampijaly vady na koa mizaha sary vetaveta? Akôry han̈ovoany toe-tsain̈inany ndreky raha ataony zen̈y?

AKÔRY HIALAN̈A AMY FITONDRAN-TEN̈A MANGALA BARAKA?

10. Ino raha mety hianaran’ny lelahy manambady baka amy modelin’i Jesosy?

¹⁰ Ino han̈ampy lelahy tsy hampijaly vady ndreky ho vôly amy fitondran-ten̈a mangala baraka? Izy afaka mifen̈y hangala tahaka Jesosy. Nata Jesosy tsy nanambady, ten̈a modely tsara mety harehan’ny lelahy manambady fomba nitondrasany irô mpianatranany aby io. (Efes. 5:25) Ohatra, diniha baka karakôry mety hangalan’ny lelahy manambady tahaka fomba nitondrasan’i Jesosy mpianatranany ndreky fomba fikoran̈any tamindrô.

11. Karakôry fomba nitondrasan’i Jesosy irô apostolinany aby io?

¹¹ Jesosy ten̈a tsara fan̈ahy ndreky nan̈aja irô mpianatranany aby io. Izy tsiary ndraiky ratsy fan̈ahy na nanjikiziky tamindrô. Izy nata Tômpo, izy tsiary nampiasa fahifan̈anany io nan̈ambanimbanian̈a irô mpianatranany aby io na nan̈ano raha hahavy irô havozo izy. Fa izy nanetry ten̈a nikarakara irô. (Jaona 13:12-17) Ho izy tamy mpianatranany aby io: “Ambilà zaho hampianatra anarô; ho velombelon̈o anarô, fôtony zaho tsara fan̈ahy ndreky manetry ten̈a.” (Mat. 11:28-30) Aleva onon̈o fa Jesosy nalemy toetry. Fa olo malemy toetry zen̈y ma dindery? Aha, olo malemy toetry zen̈y olo mahavita mifehy ten̈a. Aviô nata misy olo man̈ano raha mampameloko izy, kalma fo izy ndreky mahavita mifehy fihetseham-pônany.

12. Karakôry nataon’i Jesosy nikoran̈a tamin’olo?

¹² Jesosy nankahery ndreky namelombelon̈o olo tamy raha nivolan̈iny. Izy tsiary ndraiky nan̈ano volan̈a mahery tamy mpan̈ara-dia izy. (Lioka 8:47, 48) Aviô nata irô mpanohitry aby io nanihitihy izy ndreky nankaratsy izy, “izy tsy nanihitihy irô.” (1 Pet. 2:21-23) Ndraikindraiky Jesosy nangin̈y fo tozay hamaly irô. (Mat. 27:12-14) Ke ten̈a modely tsara mety harehan’ny lelahy kristianin̈y manambady raha zen̈y!

13. Izikoa Matio 19:4-6 zahan̈a, akôry hataon’ny lelahy “hitambatra amy vadiny”? (Zahava koa sary.)

¹³ Jesosy nivolan̈a fa lelahy tsy tôkony hivadiky amy vadiny. Izy nan̈ampody raha nivolan̈in’ny Babany ke nivolan̈a fa lelahy tôkony “hitambatra amy vadiny.” (Vakia Matio 19:4-6.) Matoanteny griky nadika “hitambatra” ampiasain̈a amin’ny andininy io, dikany ara-bakiteny “mikôly.” Ke zen̈y mivolan̈a fa fifankatiavan̈a misy amy lelahy ndreky man̈angy fivadiany io tôkony ho fatatra mare karaha dity miaro mongo in̈y. Ke izikoa araiky amin’olo fivadiany man̈ano raha mampalahelo vady, irô  roe samy hijaly. Lelahy ten̈a tia vady zen̈y, tsy han̈eky hizaha sary vetaveta foeky na ino na ino. Izy direkty han̈ano raha ke ‘tsy hizaha raha tsisy ilan̈a izy.’ (Sal. 119:37) Izy man̈ano fifan̈ikian̈a amy masonany, ke tsy han̈ara-maso ndreky han̈iry han̈ano firaisan̈a amy man̈angy hafa, karaha nataon’i Joba.​—Joba 31:1.

14. Ino aby raha mila ataon’ny lelahy mampijaly vady, baka han̈aremany fifandraisany amy Jehovah ndreky amy vadiny?

¹⁴ Lelahy araiky mamopoko vady na manihitihy vady mila man̈ano raha maromaro han̈areman̈a fifandraisany amy Jehovah ndreky amy vadiny. Ino aby ma raha mila hataony zen̈y? Voanalohany, mila takany fa ten̈a maventy problemonany io, fôtony tsisy raha misitriky amason’i Jehovah. (Sal. 44:21; Mpito. 12:14; Heb. 4:13) Faharoe, izy mila vôly mampijaly vady, ndreky mila man̈ova fitondran-ten̈anany. (Ohab. 28:13) Fahatelo, izy mila mifôno amy Jehovah ndreky amy vadiny, aviô mitady familan-keloko baka amindrô. (Asa. 3:19) Izy koa mila miangavy Jehovah baka izy hanan̈a fan̈irian̈a hiova ndreky han̈ampy izy hifehy eritreritrinany, raha volan̈iny ndreky raha ataony. (Sal. 51:10-12; 2 Kor. 10:5; Fil. 2:13) Fahefatra, izy mila man̈ano raha mifan̈araka amy vavaka ataony, ke mila mifen̈y baka tsy ho kafiry ndreky tsy han̈ano volan̈a manihitihy eky. (Sal. 97:10) Fahadimy, izy mila mitady fan̈ampian̈a malaky amin’ny anti-pan̈ahy, baka irô hahavita han̈ampy izy. (Jak. 5:14-16) Fahatsiota, izy mila man̈ano raha han̈ampy izy tsy han̈ano fitondran-ten̈a mangala baraka karaha zen̈y eky amin’ny afara. Lelahy manambady zatra mizaha sary vetaveta koa tôkony han̈ano irô raha tsiota aby zen̈y. Jehovah hitahy ezaka ataony han̈ova fitondran-ten̈anany zen̈y. (Sal. 37:5) Fa mbala misy raha hafa koa mila hataon’ny lelahy manambady, ankoatran’ny miala amy fitondran-ten̈a mangala baraka zen̈y. Izy koa mila mianatra karakôry atao man̈amia voninahitry vady. Akôry mety hahavitany zen̈y?

AKÔRY HAN̈AMEZANAO VONINAHITRY VADINAO?

15. Akôry mety an̈aboahan’ny lelahy manambady amy vadiny fa izy tia izy?

¹⁵ Aboaha fa anao tia izy. Misy rahalahy sasany manan̈a vadian̈a sambatra man̈ano fahazaran̈a  isan’andra, man̈ano raha han̈aboahandrô amy vadindrô fa irô ten̈a tia vady. (1 Jaona 3:18) Lelahy mety man̈aboaka amy vadiny fa izy tia izy na amy raha madiniky fo, karaha ataony mamihin̈y tan̈anany, na mitolon̈o izy hely. Izy koa mety mandefa mesazy amy vadiny ke manoratra karaha ty: “Zaho ngoma anao” na man̈ontany izy: “Akôry anao ao?” Izy mety manoratra karty hely amiany vadiny ke mampiasa volan̈a voafidy tsara han̈ambarany habezan’ny fitiavany izy. Izikoa lelahy man̈ano raha aby zen̈y, izy man̈amia voninahitry vadiny, ke raha zen̈y hahaihankafatatra vadian̈andrô fo.

16. Nan̈ino lelahy tôkony hidera vady?

¹⁶ Volàn̈a amy vadinao fa anao mankasitraka izy. Man̈amia voninahitry vadiny lelahy araiky izikoa izy man̈ano raha an̈aboahan̈a amy vadiny fa ten̈a valera aminany vadiny io, baka iô midera izy. An̈isan’ny fomba araiky han̈anaovany zen̈y, fan̈anaovany mersy vadiny amy raha jiaby nataony han̈ampian̈a izy. (Kol. 3:15) Izikoa lelahy manambady midera vadiny amy fônany, hamparavoravo vadiny raha zen̈y. Ke izy hahatsiaro tsy hanan̈a ahiahy, tian̈a, baka iô amian̈a voninahitry.​—Ohab. 31:28.

17. Akôry an̈aboahan’ny lelahy fa izy man̈aja vady?

¹⁷ Tsara fan̈ahy ndreky man̈isy hajany. Lelahy tia vady zen̈y ten̈a man̈isy valera vadiny, ke izy mihevitry fa vadiny io kadô tsara baka amy Jehovah. (Ohab. 18:22; 31:10) Ke vokany, izy tsara fan̈ahy ndreky man̈aja vadiny, an̈atin’izen̈y leran’ny irô man̈ano firaisan̈a. Izy tsy hiforse vadiny han̈ano raha tsy hampahazo ain̈y izy, han̈ambany izy, na tsy hampilamin̈y eritreritrinany. f Lelahy manambady koa hifen̈y han̈ano raha hahavy eritreritrinany tômpiny hadio fo manoloan̈a Jehovah.​—Asa. 24:16.

18. Tôkony ho tapa-kevitry han̈ino lelahy manambady? (Zahava koa efajoro “ Raha Efatra Han̈ampy Anao ho Lelahy Man̈aja Vady.”)

¹⁸ Anarô lelahy manambady, matokisa fa Jehovah mahita ndreky ten̈a mankasitraka ezaka ataonarô han̈amezan̈a voninahitry vadinarô, amy lafiny jiaby amy fiain̈ananarô. Ke mifen̈a fo ho tapa-kevitry han̈amia voninahitry vady, ke tsy han̈ano raha hangalan̈a baraka izy ndreky hifen̈y ho tsara fan̈ahy, han̈aja, aviô ho tia izy mare. Izikoa anao man̈ano zen̈y, aboakanao fa anao tia ndreky man̈isy valerany vadinao. Amia voninahitry vadinao, amy zen̈y anao hiaro fifandraisanao amy Jehovah, raha ten̈a valera io.​—Sal. 25:14.