LAHATSORATRA FIANARAN̈A 5
HIRA 108 Tsy Miovaova ny Fitiavan’Andriamanitra
Ino Hatsaran̈a Azontsika Baka amy Fitiavan̈an’i Jehovah?
‘Navy tamy donia ty Kristy Jesosy baka hamonjy mpanota.’—1 TIM. 1:15.
HEVITRY HIDINIHIN̈Y
Ino hatsaran̈a azontsika baka amy vidim-pan̈avotan̈a, aviô akôry han̈aboahantsika amy Jehovah fa atsika ten̈a mankasitraka izio?
1. Ino raha mety ataontsika baka hamparavoravo Jehovah?
IRITRIRETA iziô, misy olo araiky tianao namezanao kadô ten̈a tsara ndreky ten̈a ilainy. Mety halahelo mare anao izikoa izio akajiny fo, aviô tsy iasany loha foeky. Fa mifanohitry amy zen̈y ndraiky, ho ravoravo mare anao izikoa izio ampiasainy tsara, aviô izy ten̈a ravoravo nan̈ano mersy anao nan̈amia izio izy. Ino ma raha tiantsika havian̈a amy zen̈y? Jehovah nan̈amia atsika Zanany hofotaty han̈avotro atsika. Misora ravoravo mare Jehovah, izikoa atsika man̈aboaka fa atsika man̈ano mersy izy nan̈amia kadô ten̈a valera io, ndreky baka amy fitiavany atsika. Fitiavany atsika io nahavy izy nan̈amia atsika vidim-pan̈avotan̈a io.—Jaona 3:16; Rom. 5:7, 8.
2. Ino raha hidinihintsika amy lahatsoratra ty?
2 Izikoa fa ela ny ela, mety lôso hitantsika kadô tsy ten̈a valera eky vidim-pan̈avotan̈a io. Izikoa zen̈y raha mandalo, mira man̈akajy kadô ten̈a valera io amy tany tsy hitantsika foeky atsika. Ravoravo atsika manan̈a izio, kanefa izio ataontsika amy tany tsy hitan’ny masontsika. Baka hialan̈a amy zen̈y, mila dinihintsika matetitetiky raha jiaby nataon’ny Zan̈ahary ndreky Kristy tamintsika. Lahatsoratra ty han̈ampy atsika han̈ano zen̈y. Hidinihintsika ato ino aby hatsaran̈a azontsika baka amy vidim-pan̈avotan̈a io amy ziôty ndreky amin’ny amaray an̈y. Hidinihintsika koa akôry han̈aboahantsika fa atsika ten̈a mankasitraka fitiavan’i Jehovah atsika, intsaka eky amy vanim-potoan̈an’ny Fahatsiarovan̈a ty.
INO HATSARAN̈A AZONTSIKA AMY ZIÔTY?
3. Ino fomba araiky azahoantsika hatsaran̈a baka amy vidim-pan̈avotan̈a io rango iziôty?
3 Rango iziôty atsika efa mahazo hatsaran̈a baka amy sôron̈o nataon’i Kristy io. Ohatra, baka amy vidim-pan̈avotan̈a io mahavy Jehovah man̈ambela fahotan̈antsika. Tsisy olo nanery izy han̈ano zen̈y, fa izy tihan̈ano zen̈y. Karaha ty nan̈aboahan’ny mpan̈ano salamo fankasitrahany Jehovah fôtony nan̈ambela helokonany: “Anao Jehovah tsara toetry ndreky vôn̈ono han̈ambela hadisovan̈a.”—Sal. 86:5; 103:3, 10-13.
4. Ninjôvy ma nan̈anaovan’i Jehovah vidim-pan̈avotan̈a io? (Lioka 5:32; 1 Timoty 1:15)
4 Olo sasany mety hahatsapa fa tsy vain̈y familan-kelokon’i Jehovah. Ny marin̈y aminany, atsika jiaby tsisy vain̈y izio. Apostoly Paoly nahatsapa fa izy “tsy vain̈y kahian̈a apostoly zen̈y foeky.” Karaha ty koa ho izy: ‘Fa nohon’ny hatsaram-pan̈ahy miavaka naboakan’ny Zan̈ahary nahavy zaho karaha ty.’ (1 Kor. 15:9, 10) Izikoa atsika mibebaka amy fahotan̈a vitantsika, Jehovah han̈ambela helokontsika. Nan̈ino? Tsy baka amintsika vain̈y zen̈y, fa baka amy fitiavany atsika. Ke izikoa anao miasaloha fôtony mahatsapa tsy vain̈y izio, aleva onon̈o ino antony nan̈amezan’i Jehovah vidim-pan̈avotan̈a io. Izio tsy natao nin’olo tsy mpanota, fa natao nin’olo mpanota kanefa mibebaka.—Vakia Lioka 5:32; 1 Timoty 1:15.
5. Izio ma baka amy raha nataontsika mahavy Jehovah vain̈y hamindra fô amintsika? Hazavà.
5 Tsisy amintsika tôkony hieritreritry fa nohony atsika efa nanompo Jehovah tan̈atin’ny taon̈o maro mahavy izy mamindra fô amintsika. Marin̈y ndraiky fa Jehovah mankasitraka atsika, izikoa atsika tsy mivadiky aminany. (Heb. 6:10) Izy nan̈amia Zanany, tsy natao karaman’ny fanompoan̈a vitantsika fa, izio kadô maimaim-poan̈a namezany atsika. Ke izikoa atsika mieritreritry fa nohony raha maro vitantsika tamy fanompoan̈a mahavy atsika mendriky famindram-pôn’i Jehovah na han̈aboahan̈a fiheveran̈a manokan̈a, dikan’izen̈y natinaty bôriny fo Kristy.—Ampiràn̈a amy Galatianina 2:21.
6. Nan̈ino ma Paoly nifen̈y mare nanompo Jehovah?
6 Hain’i Paoly fa tsy baka tamy fanompoan̈a vitany nahavy Jehovah namindra fô taminany. Nan̈ino fo basy izy nifen̈y mare nanompo Jehovah? Nan̈ano zen̈y izy baka nan̈aboahany fa izy nankasitraka Jehovah tsara fan̈ahy ndreky namindra fô taminany. (Efes. 3:7) Karaha nataon’i Paoly in̈y koa, atsika mifen̈y fo mazoto manompo Jehovah fôtony atsika mankasitraka famindram-pônany, fa tsy baka izy hamindra fô amintsika.
7. Ino koa hatsaran̈a araiky azontsika rango iziôty nohony vidim-pan̈avotan̈a? (Romanina 5:1; Jakoba 2:23)
7 An̈isan’ny hatsaran̈a araiky azontsika baka amy vidim-pan̈avotan̈a koa rango iziôty, atsika afaka mifandray marikitry ndreky manan̈a fifandraisan̈a manokan̈a amy Jehovah. a Karaha nikoran̈intsika tamy lahatsoratra talohan’ny ty in̈y, tsy miaraka atsika teraka efa mifandray amy Zan̈ahary edy. Fa baka amy vidim-pan̈avotan̈a, atsika afaka “mihavan̈a amy Zan̈ahary” ke raha zen̈y mahavy atsika afaka mifandray marikitry aminany.—Vakia Romanina 5:1; Jakoba 2:23.
8. Nan̈ino ma atsika tôkony hankasitraka Jehovah nohony atsika afaka mivavaka aminany?
8 An̈isan’ny lafiny araiky amy fifandraisantsika amy Jehovah, atsika afaka mivavaka aminany. Tsy vavaka ataon’ny vahoakanany lera irô miaraka mivory fo ren̈iny, fa vavaka manokan̈a ataontsika tsiaraikiaraiky koa. Vavaka io mahavita mampilamin̈y fôntsika ndreky sain̈intsika, fa tsy zen̈y fo raha azontsika baka amizio. Mankafatatra fifandraisantsika amy Zan̈ahary koa izio. (Sal. 65:2; Jak. 4:8; 1 Jaona 5:14) Tamy Jesosy tambony tany teto, izy matetiky nivavaka fôtony hainy fa Jehovah nitandren̈y izy, aviô izio nahainankafatatra fifandraisany tamy Babany fo. (Lioka 5:16) Ke mankasitraka mare sôron̈o nataon’i Jesosy in̈y atsika, fôtony atsika afaka hanjary kamaradin’i Jehovah ndreky mikoran̈a aminany amy vavaka!
INO HATSARAN̈A HO AZONTSIKA AMIN’NY AMARAY?
9. Nan̈ino vidim-pan̈avotan̈a io azahoan’ny mpanompon’i Jehovah tsy mivadiky hatsaran̈a amin’ny amaray an̈y?
9 Ino hatsaran̈a ho azon’ny mpanompon’i Jehovah tsy mivadiky baka amy vidim-pan̈avotan̈a io, amin’ny amaray? Irô hahazo fiain̈ana mandrakizay. Maro olo mieritreritry fa tsy ho hisy foeky raha zen̈y, fôtony efa nisy olo maty fo letrizay. Fa fikasan̈an’i Jehovah tamy voanalohany tan̈y, olombelon̈o ho velon̈o tsisy farany. Adama koa tsy nanota, tsisy olo nivolan̈a fa olombelon̈o tsy hahavita hiain̈y tsisy farany zen̈y. Ke ndray mety sarotro amintsika mieritreritry fiain̈ana tsisy farany zen̈y iziôty, atsika afaka mino fa ho hisy raha zen̈y, fôtony Jehovah efa nan̈efa raha faran’ny lafo, tsy ino izio fa fahin̈anan’ny Zanany ten̈a tiany.—Rom. 8:32.
10. Ino ma fan̈antinan̈an’ny voahosotro ndreky ôndrikôndriky hafa?
10 Fiain̈ana tsisy farany io ndray mbala amin’ny amaray an̈y, tian’i Jehovah atsika efa hieritreritry izio rango iziôty. Irô voahosotro aby io man̈anten̈a hahazo fiain̈ana tsisy farany an-dan̈itry an̈y, ke hiaraka amy Kristy hitondra tany ty. (Apok. 20:6) Fa ôndrikôndriky hafa ndraiky man̈anten̈a hiain̈y tsisy farany ambony tany eto, fiain̈ana tsisy tehotehoko ndreky alahelo. (Apok. 21:3, 4) Asa anao an̈isan’ny ôndrikôndriky hafa man̈anten̈a hiain̈y tsisy farany ambony tany eto? Tsy matiantoko foeky olo hiain̈y ambony tany eto! Zan̈ahary namôron̈o olombelon̈o nataony hiain̈y ambony tany. Ke ten̈a hamparavoravo atsika mare hiain̈y tsisy farany ambony tany eto zen̈y.
11-12. Ino aby sasany amin’ny hatsaran̈a ho azontsika amy Paradisa ke efa mety miniminentsika rango iziôty? (Zahava koa sary.)
11 Miniminia hely baka han̈ano karakôry fiain̈ananao amy Paradisa ambony tany eto amy zen̈y. Anao tsy hiasalohan’ny aretin̈y na fahafatesan̈a zen̈y eky. (Isaia 25:8; 33:24) Jehovah han̈amia fahafaham-pô anao amy raha tsara jiaby irinao. Ino raha tianao hatao amy zen̈y? Handiniky irô biby na vôron̈o aby io? Sa hisoma lamoziky? Sa hianatra asan-tan̈ana? Amy Paradisa atsika mbala mila olo mahay man̈ano plan’ny tran̈o ndreky mahay miasa tran̈o fo, aviô mila olo mpambôly koa. Olo amy zen̈y koa mbala hikarakara hanin̈y, han̈amboatra fitaovan̈a, aviô han̈ano zaridain ndreky hikarakara izio. (Isaia 35:1; 65:21) Lera anao miain̈y tsisy farany, anao hanan̈a fotoan̈a ampy tsarabe han̈anaovan̈a raha aby zen̈y ndreky han̈anaovan̈a raha maro hafa koa.
12 Ho hisy haravoan̈a mare koa amy zen̈y, fôtony hisy familoman̈a olo maty. (Asa. 24:15) Diniha koa baka anao amy zen̈y ho ravoravo hianatra raha maro momba Jehovah, fôtony anao handiniky raha maro niasainy. (Sal. 104:24; Isaia 11:9) Fa ny faran’ny tsara amy raha jiaby zen̈y, anao tsy hanota foeky, ke anao hahavita hanompo Jehovah ndreky efa tsy mila mangataka familan-keloko eky. Ke anao hanakalo hatsaran̈a aby zen̈y amin’ny ‘haravoan̈a betibetiky azo baka amy fahotan̈a’? (Heb. 11:25) Anao baka tsy han̈ano zen̈y! Aviô hatsaran̈a ho azontsika amy zen̈y, mbala tsaratsaran’ny hatsaran̈a azontsika amy donia ty amy iziôty. Aleva onon̈o koa fa Paradisa ambony tany zen̈y tsy raha fan̈antinan̈a amin’ny amaray fo. Teteky iô, izio hanjary tany hipitrahantsika isan’andra isan’andra. Ke ten̈a ho hisy Paradisa ambony tany zen̈y, fôtony Jehovah ten̈a tia atsika ke nan̈amia atsika vidim-pan̈avotan̈a in̈y.
Ino amin’ny hatsaran̈a aby amy Paradisa io ma ten̈a tianao hita mare? (Zahava fehintsoratra 11-12)
ABOAHA FA ANAO MANKASITRAKA FITIAVAN̈AN’I JEHOVAH
13. Akôry hamaliantsika fitiavan’i Jehovah atsika? (2 Korintianina 6:1)
13 Akôry an̈aboahantsika fa atsika mankasitraka Jehovah nan̈amia vidim-pan̈avotan̈a? Atsika man̈ano asanany voalohan-toeran̈a amy fiain̈anantsika. (Mat. 6:33) Fa an̈abon’ny raha jiaby, Jesosy naty ‘baka zay olo velon̈o tsy han̈ano sitrapôndrô tômpiny eky, fa han̈ano sitrapôn’olo naty nan̈avotro irô sady efa nivilômin̈y.’ (2 Kor. 5:15) Tsy tiantsika foeky han̈adin̈a raha kindren’ny hatsaram-pan̈ahin’i Jehovah miavaka zen̈y.—Vakia 2 Korintianina 6:1.
14. Akôry an̈aboahantsika fa atsika matoky tari-dalan̈an’i Jehovah?
14 Mamaly fitiavan’i Jehovah atsika koa atsika, izikoa matoky izy ndreky man̈eky tari-dalan̈anany. Akôry han̈anaovantsika zen̈y? Mila mizaha raha tian’i Jehovah hataontsika atsika izikoa fa misy fanapahan-kevitry mila hataontsika, karaha ataon’ny fanapahan-kevitry momba fianaran̈a na asa. (1 Kor. 10:31; 2 Kor. 5:7) Izikoa aboakantsika amy raha ataontsika fa atsika manan̈a finoan̈a, hahaiho fatatra fo finoan̈antsika ndreky fifandraisantsika amy Jehovah. Aviô hahaiho fatatra fo koa fan̈antinan̈antsika momba fiain̈ana tsisy farany.—Rom. 5:3-5; Jak. 2:21, 22.
15. Akôry han̈aboahantsika fankasitrahan̈a amy vanim-potoan̈an’ny Fahatsiarovan̈a?
15 Mbala misy raha hafa koa mila ataontsika hamaliantsika fitiavan̈an’i Jehovah. Atsika mampiasa vanim-potoan̈an’ny Fahatsiarovan̈a han̈aboahan̈a amy Jehovah fa atsika ten̈a mankasitraka vidim-pan̈avotan̈a io. Atsika mioman̈a baka ho afaka han̈aton̈o Fahatsiarovan̈a, fa atsika koa mikaiky olo han̈aton̈o izio. (1 Tim. 2:4) Hazavà amin’olo kahinao, ino raha ho hisy amy Fahatsiarovan̈a io. Mety han̈ampy anao fan̈aboahan̈a amindrô video amy jw.org ao, karaha ataon’ny video Nan̈ino ma Jesosy Naty? ndreky Tsarova Nifatesan’i Jesosy. Irô anti-pan̈ahy aby io koa tôkony hangala toky fa efa nikaiky irô olo efa tsy mivory ndreky tsy mitory eky. Miniminia hely baka haravoan̈a an-dan̈itry an̈y ndreky ambony tany eto, izikoa sasany amin’ny ôndrikôndrikin’i Jehovah very aby io mimpody amin’ny andian’ny ôndrikôndrikinany ndraiky! (Lioka 15:4-7) Aviô lera avy amy Fahatsiarovan̈a an̈y, tsy olo efa fankazatra amintsika fo ataontsika mbalatsara fa irô olo vaovao ndreky olo efa ela tsy navy nivory aby io koa. Tiantsika baka irô hahatsapa niraisin̈y tsara!—Rom. 12:13.
16. Nan̈ino ma atsika tôkony hieritreritry hampitombo fanompoan̈a, amy vanim-potoan̈an’ny Fahatsiarovan̈a?
16 Asa anao afaka mampitombo fanompoan̈a amy vanim-potoan̈an’ny Fahatsiarovan̈a? Zen̈y an̈isan’ny fomba araiky koa an̈aboahanao fa anao mankasitraka raha jiaby nataon’ny Zan̈ahary ndreky Kristy tamintsika. Atsika koa varian̈a man̈ano asan’i Jehovah, hahaiho hitantsika fo fa izy man̈ampy atsika, aviô hitombo koa fatokisantsika izy. (1 Kor. 3:9) Tsy vitan’izen̈y fo fa, an̈isan’ny raha tsara atao koa amizio, man̈ano vaky Baiboly amy Fahatsiarovan̈a hita amy Fandinihana ny Soratra Masina Isan’andro na tablô amy boky fianaran̈a fampiasain̈a amy fivorian̈a andavanandra in̈y. Mety hampidirinao amy fianaran̈a ataonao foeky famakian̈a Baiboly io.
17. Ino ma raha mamparavoravo Jehovah? (Zahava koa efajoro “ Fomba Hamalian̈a Fitiavan̈an’i Jehovah.”)
17 Akôry ndraiky izikoa raha misy anao iziôty tsy hahavitanao man̈ano irô raha nikoran̈iny tamy lahatsoratra ty? Aza adin̈a fa Jehovah tsy mampiran̈a raha vitanao amy raha vitan’olo. Hitany raha an̈aty fônao, ke izy ravoravo mahita anao mifen̈y man̈aboaka fankasitrahan̈a kadô maventy namezany io, tsy ino zen̈y fa vidim-pan̈avotan̈a.—1 Sam. 16:7; Mar. 12:41-44.
18. Nan̈ino ma atsika mankasitraka Zan̈ahary Jehovah ndreky Jesosy Kristy?
18 Baka amy vidim-pan̈avotan̈a io zaraiky fo mahavy atsika ho voavela heloko, afaka hikamarady amy Jehovah, aviô man̈anten̈a hiain̈y tsisy farany. Ke irarian̈a atsika tsy vôly han̈aboaka fankasitrahantsika fitiavan̈an’i Jehovah, fôtony izio mahavy izy han̈amia hatsaran̈a jiaby zen̈y atsika. (1 Jaona 4:19) Irarian̈a koa atsika han̈aboaka fankasitrahantsika Jesosy, fôtony izy ten̈a tia atsika ke nan̈amia ain̈inany atsika.—Jaona 15:13.
HIRA 154 Fitiavan̈a io Raha Maharitry
a Jehovah efa nan̈ambela helokon’ny mpanomponany talohan’ny faha Kristianin̈y, nata mbala tsendriky nan̈efa vidim-pan̈avotan̈a io Kristy. Jehovah nan̈ano zen̈y, fôtony natoky tsarabe fa Zanany io tsy hivadiky firaka izy maty. Ke fahitan’i Jehovah izy mira raha efa voaefa in̈y vidim-pan̈avotan̈a io tamy zen̈y.—Rom. 3:25.
