LAHATSORATRA FIANARAN̈A 4
HIRA 18 Ankasitrahantsika ny Vidim-panavotana
Ino Raha Ianarantsika Baka amy Vidim-pan̈avotan̈a?
“Karaha ty nan̈aboahan̈a fitiavan̈an’ny Zan̈ahary.”—1 JAONA 4:9.
HEVITRY HIDINIHIN̈Y
Ino aby toetry maro tsaran’i Jehovah Zan̈ahary ndreky Jesosy Kristy hita baka amy vidim-pan̈avotan̈a?
1. Nan̈ino mahatsara atsika man̈aton̈o Fahatsiarovan̈a nifatesan’i Kristy, atao isaka taon̈o?
HAY be fa anao man̈eky fa vidim-pan̈avotan̈a io kadô faran’ny valera eky! (2 Kor. 9:15) Jesosy nan̈ano sôron̈o ain̈inany hamonjian̈a olombelon̈o. Baka amy zen̈y mahavy anao afaka hifandray marikitry amy Jehovah Zan̈ahary. Anao koa afaka man̈anten̈a hiain̈y tsisy farany. Ke ten̈a mety izikoa atsika man̈aboaka fankasitrahan̈a Jehovah nan̈amia vidim-pan̈avotan̈a io, fôtony izy ten̈a tia atsika! (Rom. 5:8) Baka atsika tsy vôly mankasitraka vidim-pan̈avotan̈a io ndreky tsy han̈adin̈a foeky raha nataon’i Jehovah ndreky Jesosy tamintsika, Jesosy nan̈iraka atsika han̈aton̈o Fahatsiarovan̈a nifatesany, atao isaka taon̈o.—Lioka 22:19, 20.
2. Ino raha hianarantsika amy lahatsoratra ty?
2 Amy taon̈o ty, Fahatsiarovan̈a io hatao amy sabotsy 12 Avrily 2025. Azo antoko fa atsika han̈ano raha han̈aton̈ana izio. Hahazo hatsaran̈a mare koa atsika amy vanim-potoan̈an’ny Fahatsiarovan̈a, izikoa mangala fotoan̈a hisaintsain̈ana a raha nataon’i Jehovah ndreky Zanany tamintsika. Amy lahatsoratra ty, atsika handiniky ino raha ianarantsika momba Jehovah ndreky Zanany, baka amy vidim-pan̈avotan̈a io. Amy lahatsoratra fan̈araka, atsika hizaha ino hatsaran̈a azontsika baka amy vidim-pan̈avotan̈a io, baka iô karakôry fomba han̈aboahantsika fa atsika mankasitraka izio.
INO RAHA IANARANTSIKA MOMBA JEHOVAH BAKA AMY VIDIM-PAN̈AVOTAN̈A?
3. Amy karakôry fahafatesan’olo araiky mahavita man̈avotro olo an-tapitrisany? (Zahava koa sary.)
3 Ianarantsika baka amy vidim-pan̈avotan̈a io fa Jehovah Zan̈ahary tia ny rariny. (Deot. 32:4) Nan̈ino? Diniha baka ty: Baka tamy tsy fan̈arahan’i Adama volan̈an’ny Zan̈ahary nahavy atsika nandova fahotan̈a ke maty. (Rom. 5:12) Fa Jehovah ndraiky nandefa Jesosy natao vidim-pan̈avotan̈a baka hankafaka atsika amy fahotan̈a ndreky fahafatesan̈a. Fa amy karakôry sôron̈o nataon’olo araiky lavorary mahavita man̈avotro olo mandeha an-tapitrisany? Apostoly Paoly nan̈azava: “Mira raha nataon’olo araiky [Adama] tsy nan̈araka volan̈a, ke nahavy olo jiaby nanjary mpanota in̈y koa raha nataonolo araiky [Jesosy] nan̈araka volan̈a, ke nahavy olo maro nanjary marin̈y.” (Rom. 5:19; 1 Tim. 2:6) Dikan’izen̈y, baka amin’olo araiky lavorary tsy nan̈araka volan̈a nahavy atsika nanjary andevon’ny fahotan̈a ndreky fahafatesan̈a. Ke mila olo araiky lavorary koa sady man̈araka volan̈a hankafaka atsika amy zen̈y.
Olo araiky nahavy atsika lôso andevon’ny fahotan̈a ndreky fahafatesan̈a. Karaha zen̈y koa, olo araiky nankafaka atsika tamy zen̈y (Zahava fehintsoratra 3)
4. Nan̈ino ma tsy direkty nambelan’i Jehovah hiain̈y tsisy farany lan̈iany taranakan’i Adama man̈ano ny marin̈y?
4 Izio ma Jesosy tsy maintsy naty vo mahavita man̈avotro atsika? Izio ma tsy nety izikoa Jehovah direkty nanapa-kevitry han̈ambela lan̈iany taranakan’i Adama man̈ano ny marin̈y hiain̈y tsisy farany? Izikoa amin’olombelon̈o tsy lavorary, raha zen̈y karaha mety fo. Fa raha zen̈y ndraiky tsy mifan̈araka amy fan̈anaovan’i Jehovah ny rariny. Jehovah man̈ano ny rariny, ke tsy mety izy eky han̈ano sary tsy hahita tsy fan̈arahan̈a volan̈a nataon’i Adama in̈y.
5. Nan̈ino atsika matoky fa Jehovah tsy maintsy han̈ano ny rariny fo?
5 Akôry ma izikoa Jehovah tsy nan̈amia vidim-pan̈avotan̈a ke tsy nijery fan̈anaovan̈a ny rariny zen̈y, fa direkty nan̈ambela taranakan’i Adama tsy lavorary hiain̈y mandrakizay? Izikoa zen̈y, olo mety hieritreritry fa Jehovah tsy mijery fitsipikinany momba ny tsara ndreky ratsy. Ke vokany, olo mety hiasaloha tsao mbala han̈ano karaha zen̈y koa izy, ke tsy han̈atanteraka raha nampan̈antinainy momba ny amaray. Fa atsika ndraiky tsy mila miasaloha, fôtony tsy ho karaha zen̈y foeky raha ho hisy. Jehovah nan̈araka fitsipikinany momba ny rariny, nata tsy nora taminany nan̈ambela Zanany ten̈a tiany io natao sôron̈o. Zen̈y man̈amia toky atsika fa izy tsy maintsy man̈ano ny rariny fo.
6. Ino toetrin’i Jehovah hafa nahavy izy nandefa Zanany? (1 Jaona 4:9, 10)
6 Mbala misy toetrin’i Jehovah hafa koa nandrisiky izy nandefa Jesosy han̈avotro atsika, tsy ino zen̈y fa fitiavan̈a. (Jaona 3:16; vakia 1 Jaona 4:9, 10.) Jehovah nandefa Zanany hofoaty namonjian̈a atsika, fôtony atsika tiany hiain̈y tsisy farany, baka iô koa tiany atsika ho an̈isan’ny fianakavian̈anany. Diniha baka: Adama koa fa nanota, izy efa tsy an̈isan’ny fianakavian̈an’i Jehovah eky. Ke niaraka atsika teraka, efa tsy an̈isan’ny fianakavian̈an’ny Zan̈ahary edy. Fa baka tamy vidim-pan̈avotan̈a io mahavy lan̈iany olombelon̈o man̈aboaka fa mino Zan̈ahary ndreky man̈araka volan̈anany, ho lôso an̈isan’ny fianakavian̈anany ndraiky, andra araiky an̈y. Fa ndray rango iziôty, atsika efa afaka mifandray marikitry amy Jehovah, ndreky amindrô rahalahy ndreky ranabavy aby io. Jehovah ten̈a tia atsika ankitin̈y!—Rom. 5:10, 11.
7. Nan̈ino jaly niaretan’i Jesosy in̈y man̈ampy atsika hahay tsarabe fitiavan’i Jehovah atsika?
7 Ho haintsika tsarabe habezan’ny fitiavan’i Jehovah atsika, izikoa atsika mandiniky nan̈ino ten̈a mafy taminany nan̈amia vidim-pan̈avotan̈a io. Satana nivolan̈a fa tsisy mpanompon’ny Zan̈ahary hahavita tsy hivadiky zen̈y, izikoa fa tôjy raha sarotro. Baka hamalian̈a raha zen̈y, Jehovah nan̈ambela Jesosy hijaly talohan’izy naty. (Joba 2:1-5; 1 Pet. 2:21) Hitan’i Jehovah raha jiaby navoa Jesosy tamy zen̈y: Izy nankadalain’ny mpitondra fivavahan̈a mpanohitry aby io, nivangoen’ny maramila aby io karavasy, baka iô izy nipipen̈a tamin’ny hazofijalian̈a. Mbala hitan’i Jehovah koa Zanany ten̈a tiany io nijaly mare firaka izy naty. (Mat. 27:28-31, 39) Vitan’i Jehovah nisakana olo tsy han̈ano zen̈y. Ohatra, tamin’ny irô vahoaka aby io nivolan̈a karaha ty: “Izikoa izy tian’ny Zan̈ahary, ambilà Zan̈ahary han̈avotro izy”, vitan’i Jehovah nan̈avotro izy. (Mat. 27:42, 43) Kanefa izikoa Jehovah nisakana izy tsy hofoaty, tsy ho voahefa foeky vidim-pan̈avotan̈a io, ke atsika tsy hanan̈a fan̈antinan̈a foeky. Ke Jehovah nan̈ambela Zanany hiaritry jaly jiaby zen̈y firaka izy naty.
8. Jehovah ma mba nalahelo izy koa fa nahita Zanany nijaly? Hazavà. (Zahava koa sary.)
8 Haintsika fa Jehovah faran’ny mahery, fa ndray zen̈y, atsika tsy tôkony hieritreritry fa izy tsisy fihetseham-pô foeky! Izikoa izy fa namôron̈o olombelon̈o, nataony misy fihetseham-pô. Karaha zen̈y koa Jehovah, fôtony izy koa fa namôron̈o atsika, atsika nataony mira toetry aminany. Baiboly mivolan̈a fa Jehovah ‘naratra fô’ ndreky ‘nalahelo.’ (Sal. 78:40, 41) Aleva onon̈o koa baka tantaran’i Abrahama ndreky Isaka. Asa tsaroanao Abrahama nirahin’ny Zan̈ahary han̈amia zanany tokana hatao sôron̈o in̈y? (Gen. 22:9-12; Heb. 11:17-19) Miniminia baka alahelon’i Abrahama, izikoa izy fa handeha hamono zanany io. Diniha baka amy zen̈y koa alahelon’i Jehovah nahita Zanany nijaly mare, nivonendrô olo tsy mavozo Zan̈ahary aby io!—Zahava amy jw.org video Aleva Tahaka Finoan̈andrô—Abrahama, Fizaran̈a 2.
Nangôtsoko mare Jehovah nahita Zanany nijaly (Zahava fehintsoratra 8)
9. Nan̈ino ma Romanina 8:32, 38, 39 man̈ampy anao hahita fa Jehovah ten̈a tia anao, aviô tia irô rahalahy ndreky anabavinao aby io?
9 Hitantsika baka amy vidim-pan̈avotan̈a io koa fa ten̈a be ankitin̈y fitiavan’i Jehovah atsika, mbala beben’ny fitiavan’ny havantsika na kamaradintsika atsika. (Vakia Romanina 8:32, 38, 39.) Jehovah koa tiantsika mandilatra fitiavantsika ain̈intsika. Anao ma tihiain̈y tsisy farany? Mbala beben’izen̈y koa fitiavan’i Jehovah anao hiain̈y tsisy farany. Tianao ma anao ho voavela heloko? Mbala mandilatran’izen̈y koa fitiavan’i Jehovah anao ho voavela heloko. Fa ny raha angatahiny amintsika, atsika han̈eky kadô valera namezany atsika io, ke hino izy ndreky han̈araka volan̈anany. Vidim-pan̈avotan̈a io porofo maventy fa Jehovah tia atsika ankitin̈y. Amy donia vaovao, atsika mbala hianatra raha maro momba fitiavany atsika.—Mpito. 3:11.
INO MA RAHA IANARANTSIKA MOMBA JESOSY BAKA AMY VIDIM-PAN̈AVOTAN̈A?
10. a) Ino ma raha ten̈a nampiasaloha Jesosy, izy koa fa hivonen̈a? b) Karakôry nataon’i Jesosy nankamasin̈y an̈aran’i Jehovah? (Zahava efajoro “ Tsy Fivadihan̈an’i Jesosy Nankamasin̈y An̈aran’i Jehovah.”)
10 Jesosy miasaloha mare amy lazan’ny Babany. (Jaona 14:31) Jesosy nivolan̈indrô fa olo ratsy ndreky nanihitihy Zan̈ahary. Ten̈a nampiasaloha izy raha zen̈y, fôtony tsao fo hangala baraka an̈aran’ny Babany. Zen̈y nahavy izy nivavaka karaha ty: “A Babako ô, izikoa mety, adosoa aminaka kôpy ty.” (Mat. 26:39) Jesosy tsy nivadiky tamy Jehovah firaka izy naty, ke zen̈y nan̈aboahany fa izy nankamasin̈y an̈aran’ny Babany. Ke raha zen̈y nan̈aboaka tsarabe fa vandy irô raha jiaby nivolan̈in’i Satana momba Babany.
11. Karakôry nan̈aboahan’i Jesosy fa izy ten̈a tia olo? (Jaona 13:1)
11 Vidim-pan̈avotan̈a in̈y koa ahitantsika fa Jesosy ten̈a tia olo, intsaka eky mpianatranany. (Ohab. 8:31; vakia Jaona 13:1.) Ohatra, hain’i Jesosy fa ho sarotro aminany han̈ano fanompoan̈anany sasany, an̈isan’izen̈y lera izy hivonen̈a. Fa ndray zen̈y, nataony tsara fo fanompoan̈anany tambony tany teto. Tsy nohon’ny adidy fo nahavy izy nitory ndreky nampianatra tamy fônany jiaby, fa nohon’ny fitiavany olo. Aviô ndray fa tamin’ny andra hifatesany, Jesosy mbala nanasa vitindrô apostolinany aby io ndreky nampianatra irô, baka iô nan̈amia korazy ndreky nankahery irô. (Jaona 13:12-15) Baka iô, izy koa fa nahanton̈o tamin’ny hazofijalian̈a, izy mbala nan̈amia fan̈antinan̈a olon-dratsy araiky efa hofoaty, aviô mbala nan̈ano raha hahavy mamany ho voakarakara tsara. (Lioka 23:42, 43; Jaona 19:26, 27) Ke tsy tamy nifatesan’i Jesosy in̈y fo nahitan̈a habezan’ny fitiavany olo, fa tamy raha jiaby nataony tamy fiain̈ananany tambony tany teto koa.
12. Karakôry ataon’i Jesosy man̈ampy atsika amy ziôty?
12 Marin̈y ndraiky fa Jesosy naty “indraiky fo,” baka hamonjian̈a atsika olombelon̈o. Fa ndray zen̈y, izy mbala man̈ano raha han̈ampian̈a atsika fo. (Rom. 6:10) Ino aby raha ataony? Nohon’ny vidim-pan̈avotan̈a, izy mbala man̈amia atsika raha maro tsara amy ziôty. Diniha baka ino aby raha ataony. Izy Mpanjakantsika, Mpisôron̈obe, baka iô lohan’ny fiangonan̈a. (1 Kor. 15:25; Efes. 5:23; Heb. 2:17) Izy koa man̈ano raha hamorian̈a irô voahosotro aby io ndreky vahoaka be, aviô raha zen̈y tsy ho vita, izikoa tsy alohan’ny hifaran̈an’ny fahorian̈a be. b (Mat. 25:32; Mar. 13:27) Izy koa man̈ano raha baka mpanomponany tsy mivadiky hahazo hanin̈y ara-pan̈ahy fo, an̈atin’ny andra farany ty. (Mat. 24:45) Baka iô, amy Fanjakan̈a Arivo Taon̈o, izy mbala han̈ano raha hikarakaran̈a atsika fo. Jehovah ten̈a nan̈amia Zanany atsika ankitin̈y!
AZA VÔLY MIANATRA
13. Akôry hahavitanao hanohy hianatra momba fitiavan’ny Zan̈ahary ndreky Kristy atsika?
13 Anao mbala mety manohy fo mianatra momba fitiavan’i Jehovah Zan̈ahary ndreky Kristy Jesosy atsika. Ho vitanao han̈ano zen̈y, izikoa anao tsy vôly misaintsain̈y momba fitiavandrô atsika io. Ohatra, lera vanim-potoan̈an’ny Fahatsiarovan̈a, anao mety mamaky tsarabe boky araiky na maromaro amy Filazantsara. Aza man̈ian̈a mamaky toko maro an̈atin’ny fotoan̈a araiky, fa vakia miadan̈a. Mifen̈a koa hitady antony hafa mahavy atsika tôkony ho tia Jehovah ndreky Jesosy, baka iô koràn̈a amin’olo hafa raha nianaranao.
14. Eraka Salamo 119:97 ndreky lamariky amy pazy ambany, nan̈ino fan̈anaovan̈a fikarohan̈a han̈ampy atsika tsy ho vôly hianatra momba vidim-pan̈avotan̈a ndreky fampianaran̈a hafa? (Zahava koa sary.)
14 Izikoa anao efa taon̈o maro tan̈atin’ny fahamarin̈ana, anao mety hieritreritry fa efa tsisy raha vaovao mety hianaranao eky momba fan̈anaovan’i Jehovah ny rariny, fitiavan̈anany ndreky vidim-pan̈avotan̈a. Fa ny marin̈y aminany, mbala misy raha vaovao fo mety hianaranao momba raha aby zen̈y ndreky raha hafa koa. Ke ino raha mety hataonao? Vakia ndreky ianara irô fan̈azavan̈a maro tsara baka amy Baiboly, amy bokintsika aby io. Ke izikoa anao tôjy andininy tsy ten̈a mazava aminao tsarabe, man̈anaova fikarohan̈a. Ke pari-pitsiforan’ny andra, saintsain̈a raha vaovao hitanao io, ndreky raha koran̈in’izio momba Jehovah ndreky Zanany, baka iô fitiavandrô anao.—Vakia Salamo 119:97 ndreky lamariky amy pazy ambany.
Ndray atsika efa tan̈atin’ny fahamarin̈ana tan̈atin’ny taon̈o maro, atsika mbala mety mampitombo fankasitrahantsika vidim-pan̈avotan̈a io fo (Zahava fehintsoratra 14)
15. Nan̈ino atsika tsy tôkony ho vôly hitady valera ara-pan̈ahy?
15 Izikoa anao tsy mety mahita raha vaovao ndreky raha mahavarian̈a isaka anao mamaky Baiboly na man̈ano fikarohan̈a, aza kivy. Anao baka miran̈a olo mitady volamena in̈y. Irô mandany fotoan̈a ndreky andra isivan̈ana izio, vo mahita potiky volamena hely. Fa irô mbala tsy vôly fo mitsakaraka izio, fôtony ndray hely fo hitandrô, efa ten̈a valera amindrô izin̈y. Fa mbala lombolombon’izen̈y zay raha vaovao ho hitantsika baka amy fianaran̈a Baiboly. (Sal. 119:127; Ohab. 8:10) Ke mahareta, baka iô areha fo programon’ny famakianao Baiboly.—Sal. 1:2.
16. Akôry mety hangalantsika tahaka Jehovah ndreky Jesosy?
16 Ke izikoa anao fa mianatra, diniha akôry fomba mety han̈arehanao raha ianaranao io amy fiain̈ananao. Ohatra, aleva tahaka fan̈anaovan’i Jehovah ny rariny, ke mifen̈a tsy han̈avakavaka olo. Aleva tahaka koa fitiavan’i Jesosy Babany ndreky olo hafa, ke mivon̈osa hiaritry jaly nohon’ny an̈aran’i Jehovah ndreky fitiavan̈a han̈ampy olo. Aleva tahaka koa Jesosy, ke mifen̈a hitory amin’olo, baka irô hahay raha maro tsara nataon’i Jehovah nin’olombelon̈o ndreky han̈aboaka fa irô mino vidim-pan̈avotan̈a.
17. Ino raha hianarantsika amy lahatsoratra fan̈araka?
17 Arakaraka hahaizantsika tsarabe raha momba vidim-pan̈avotan̈a ndreky hankasitrahantsika izio, hahaiho tiantsika fo koa Jehovah ndreky Zanany. Ke arakarakan’ny itombosan’ny fitiavantsika irô, hahaiho tiandrô fo koa atsika. (Jaona 14:21; Jak. 4:8) Ke irarian̈a atsika tsy ho vôly hampiasa raha jiaby amian’i Jehovah atsika hianaran̈a momba vidim-pan̈avotan̈a. Lahatsoratra fan̈araka hikoran̈a fomba hazahoantsika hatsaran̈a baka amy vidim-pan̈avotan̈a io ndreky fomba han̈aboahantsika fa atsika mankasitraka fitiavan’i Jehovah atsika.
HIRA 107 Tahafo ny Fitiavan’Andriamanitra
a FAN̈AZAVAN̈A: Dikan’ny “misaintsain̈y” zen̈y, mifantoko na mampifantoko jerintsika amy raha araiky ndreky mandiniky lalin̈y izio.
b Famorian̈a “raha an-dan̈itry an̈y” koran̈in’i Paoly amin’ny Efesianina 1:10, tsy miran̈a amy famorian̈a irô olo “voafidy” koran̈in’i Jesosy amy Matio 24:31 ndreky Marka 13:27. Paoly iô mikoran̈a momba fotoan̈a ifidianan’i Jehovah irô zanany ara-pan̈ahy, ke han̈isaorany fan̈ahy masin̈inany irô. Fa Jesosy ndraiky mikoran̈a fotoan̈a hamorian̈a irô zanany mbala tavela ambony tany eto handeha an-dan̈itry an̈y, an̈atin’ny fahorian̈a be.
