1. Ino raha sarotro tsy maintsy ataon’olo jiaby?

 ISAN’ANDRA atsika tsy maintsy manapa-kevitry. Sasany aminany io tsy sarotro, karaha ataon’ny manapa-kevitry momba hanin̈y hoanin̈y na lera handrian̈a. Fa sasany ndraiky sarotro man̈ano izy. Izio baka mety hisy vokany amy fahasalaman̈antsika, na amy fahasambaran̈antsika na amin’olo tiantsika, na amy fanompoan̈a ataontsika. Tiantsika han̈ano fanapahan-kevitry mahatsara atsika ndreky fianakavian̈antsika. Fa mbala beben’izen̈y, tiantsika izikoa fanapahan-kevitry ataontsika hamparavoravo Jehovah.​—Rom. 12:1, 2.

2. Ino aby dingana han̈ampy anao hangala fanapahan-kevitry tsara?

² Hahavita hangala fanapahan-kevitry tsara anao izikoa 1) hainao ino aby raha tafiditry amizio, 2) mandiniky ino hevitrin’i Jehovah momba izio, aviô 3) mandiniky tsara safidy misy. Lahatsoratra ty hikoran̈a irô dingana aby zen̈y, aviô izy ty koa han̈ampy atsika hahita akôry hampiofan̈antsika fahaizantsika mandiniky.​—Ohab. 2:11.

ATAOVA RAHA HAHAIZAN̈A INO ABY TAFIDITRY AMIZIO

3. Hazavà amin’ny ohatra, nan̈ino anao mila mahay ino aby raha tafiditry amizio alohan’ny anao hanapa-kevitry momba raha araiky.

³ Raha voanalohany atao baka hangalan̈a fanapahan-kevitry tsara, mila hainao ino aby raha tafiditry amizio. Nan̈ino ma zen̈y ten̈a raha maventy? Miniminia hely baka izikoa misy olo araiky marary mare mandeha man̈aton̈o dokotera. Dokotera io ma efa direkty hanapa-kevitry han̈amia aody kanefa tsendriky nizaha izy ndreky mbala tsy nan̈ontany izy aby? Ehe, izy tsy han̈ano karaha zen̈y. Anao koa mila mizaha antsendriky ino aby raha tafiditry amizio, baka hahavitanao han̈ano fanapahan-kevitry tsara. Akôry mety han̈anaovanao zen̈y?

4. Eraka Ohabolana 18:13, ino raha mety hataonao baka ho hainao ino aby raha tafiditry amizio? (Zahava koa sary.)

 ⁴ Matetiky raha hahaizan̈a ino aby raha tafiditry amizio, anao mila man̈apetraka fan̈ontanian̈a. Ohatra, anao nikahin’olo han̈aton̈o fety. Anao ma tôkony handeha? Akôry izikoa tsy hainao olo mandamin̈y izio na raha handeha hataony amizio? Anao mila man̈ontany izy: “Aia ndreky ombian̈a fety io hatao? Akôry hamarozan’olo an̈y? Azôvy han̈ara-maso izio? Azôvy aby han̈aton̈o izio? Ino aby raha hatao an̈y? Ho hisy toaka ma an̈y?” Fahaizanao valin’ny fan̈ontanian̈a aby zen̈y han̈ampy anao han̈ano fanapahan-kevitry tsara.​—Vakia Ohabolana 18:13.

5. Ino koa raha mbala tôkony hataonao, izikoa efa hainao raha aby tafiditry amizio?

⁵ Izikoa efa hainao raha tafiditry amizio, diniha tsarabe amy zay raha jiaby. Ohatra, akôry izikoa hainao fa ho hisy olo tsy man̈araka torolalan̈an’ny Baiboly an̈y, na hisy toaka koa an̈y, kanefa tsy ho hisy mpan̈ara-maso? Asa hitanao fa fety io mety hivadiky tsy voafehy? (1 Pet. 4:3) Baka iô koa, akôry izikoa lera han̈anaovan̈a izio mifandia amy lera fivorian’ny fiangonan̈a na fanompoan̈a? Izikoa anao efa nandiniky tsarabe raha jiaby zen̈y, ho moramora aminao hangala fanapahan-kevitry tsara. Fa mbala misy dingana hafa koa mbala tôkony hataonao. Anao iziô efa manan̈a fomba  fahitanao izio; fa akôry ndraiky fomba fahitan’i Jehovah izio?​—Ohab. 2:6.

DINIHA HEVITRIN’I JEHOVAH

6. Eraka Jakoba 1:5, nan̈ino atsika tôkony hivavaka ke mangataka fan̈ampian’i Jehovah?

⁶ Mivavaha amy Jehovah ke angataha izy han̈ampy anao hahay hevitrinany. Jehovah mampan̈anten̈a fa han̈amia fahendrena, baka hahavitantsika mahay fanapahan-kevitry hamparavoravo izy. Izikoa izy man̈amia fahendrena io, izy “tsy matity amin’olo jiaby sady tsy mba man̈amia tsin̈y.”​—Vakia Jakoba 1:5.

7. Akôry ahaizanao hevitrin’i Jehovah? Hazavà amin’ny ohatra.

⁷ Anao koa fa nivavaka nangataka tari-dalan̈a tamy Jehovah, diniha tsarabe akôry hamaliany vavakanao io. Ty baka misy ohatra: Izikoa anao iziô very lalan̈a amy tany tsy hainao, anao mety han̈ontany olo tômpin-tany. Fa anao ma direkty fa handeha, kanefa olo io mbala tsendriky nivolan̈a taminao? Ehe, anao tsy han̈ano zen̈y. Anao tsy maintsy hitandren̈y izy tsarabe han̈ambara anao lalan̈a himboanao. Karaha zen̈y koa, izikoa anao efa baka nangataka fahendrena tamy Jehovah, mifen̈a handiniky valiny baka aminany, ke tadiava lalàn̈a na torolalan̈an’ny Baiboly mety harehan̈a amy raha misy anao io. Ohatra, lera anao hanapa-kevitry handeha sa tsy handeha amy fety nikoran̈intsika in̈y, anao mety handiniky raha koran̈in’ny Baiboly momba fety tsy voafehy, naman̈a ratsy, aviô Fanjakan̈an’ny Zan̈ahary mila atao amy toeran̈a voanalohany alohan’ ny raha tianao.​—Mat. 6:33; Rom. 13:13; 1 Kor. 15:33.

8. Izikoa anao mila tahitahin̈a hitady fan̈azavan̈a tadiavinao, ino raha mety hataonao? (Zahava koa sary.)

⁸ Ndray zen̈y, ndraikindraiky anao mbala mila fan̈ampian̈a fo baka hahita fan̈azavan̈a tadiavinao. Anao mety mangala torohevitry amy rahalahy na ranabavy araiky matotro. Kanefa, tsara koa izikoa anao tômpiny man̈ano fikarohan̈a. Misy fan̈azavan̈a maro amy fitaovan̈a fianaran̈antsika, karaha ataon’ny Fitaovana Fikarohana ho An’ny Vavolombelon’i Jehovah ndreky Andininy Man̈ampy amy Fiain̈anan’ny Kristianin̈y. Fa aza adin̈a tanjon̈o ty: Han̈ano fanapahan-kevitry hamparavoravo Jehovah.

9. Akôry hazahoantsika antoko fa hamparavoravo Jehovah fanapahan-kevitry hataontsika? (Efesianina 5:17)

⁹ Akôry hazahoantsika antoko fa hamparavoravo Jehovah fanapahan-kevitry hataontsika? Voanalohany, atsika mila man̈ano raha hahaizantsika izy tsarabe. Baiboly mivolan̈a fa “lan̈iany mahay Araiky Faran’ny Masin̈y, maran̈i-tsain̈y.” (Ohab. 9:10) Marin̈y zen̈y, fôtony olo ten̈a maran̈i-tsain̈y zen̈y mahay toetrin’i Jehovah, fikasan̈anany, aviô mahay raha tiany na raha halany. Ke man̈ontania ten̈a: ‘Eraka raha haiko momba Jehovah, ino fanapahan-kevitry hataoko baka izy ho ravoravo?’​—Vakia Efesianina 5:17.

10. Nan̈ino ma torolalan̈an’ny Baiboly raha ten̈a maventy, fa tsy fomban’ny fianakavian̈a na fomban’olo amy tany misy atsika?

¹⁰ Ny raha matetiky misy, atsika mety tsy maintsy hampalahelo havantsika na kamaradintsika, baka hahavita hamparavoravo Jehovah. Ohatra, mety hisy raimandreny tsy man̈eky izikoa zanany tsy manambady lelahy mpan̈arivo baka mahavelon̈o izy tsarabe, ndray izio olo tsy matanjaka ara-pan̈ahy. Marin̈y ndraiky fa tsy tiandrô hijaly zanakandrô. Fa lelahy io ma han̈ampy zanakandrô io handroso ara-pan̈ahy? Akôry fahitan’i Jehovah raha karaha zen̈y? Ahitantsika valin’izen̈y amy Matio 6:33. Ao Jesosy mandrisiky Kristianin̈y han̈ano Fanjakan̈an’ny Zan̈ahary amy toeran̈a voanalohany fo. Ke atsika ndray man̈aja raimandrenintsika ndreky olo tanàna araiky amintsika, hamparavoravo Jehovah raha ten̈a tôkony maventy amintsika.

DINIHA TSARA SAFIDY MISY

11. Ino toetry koran̈in’i Filipianina 1:9, 10, ke han̈ampy anao hahay handiniky tsara amy safidy mety hataonao?

¹¹ Anao koa fa baka nandiniky torolalan̈an’ny Baiboly momba fanapahan-kevitry hiraisinao io, anao mila mizaha ino aby safidy mety hataonao. (Vakia Filipianina 1:9, 10) Fahaizan̈a mandiniky han̈ampy anao himenimeny ino mety ho vokatran’ny safidy tsiaraikiaraiky. Ndraikindraiky fanapahan-kevitry sasany mety mora atao, fa tsy jiaby ndraiky handeha hoazy karaha zen̈y. Ke fahaizan̈a mandiniky io han̈ampy anao hangala fanapahan-kevitry tsara fo, ndray amy raha faran’ny sarotro.

12-13. Akôry hahavy fahaizan̈a mandiniky han̈ampy anao hangala fanapahan-kevitry tsara, izikoa fa mitady asa?

¹² Diniha baka ohatra ty. Anao mitady asa hamilomanao fianakavian̈anao, ke anao nahita asa aroe aby hisafidianan̈a. Dinihinao raha jiaby tafiditry amizio, an̈atin’izen̈y karazan’ny asa io, fotoan̈a lany amizio ndreky lera laninao ivizivizianao mandeha an̈y, ndreky raha hafa koa. Samy tsy mifanohitry amy torolalan̈an’ny Baiboly asa hitanao io. Mety araiky amindrô io fidinao fôtony tianao karazan’ny asa io na koa bebe karama. Fa mbala misy raha hafa tôkony hidinihinao koa, alohan’ny anao hanapa-kevitry.

¹³ Tôkony hidinihinao, ohatra: Lera han̈anaovan̈a asa aby io ma mifandia amy lera fandihananao mivory? Izio ma hahavitanao mikarakara fianakavian̈anao ara-pihetseham-pô ndreky hahavitanao mankafatatra fihavan̈andrô amy Jehovah? Fan̈apitrahan̈a  fan̈ontanian̈a karaha zen̈y han̈ampy anao hahay “raha ten̈a maventy”, dikan’izen̈y fanompoanao Jehovah ndreky raha ilain’ny fianakavian̈anao, fa tsy fitsakarahan̈a vola ndreky fanan̈ana. Izikoa anao fa baka mandiniky zen̈y, anao hahavita han̈ano fanapahan-kevitry hazahoanao fitahian’i Jehovah.

14. Nan̈ino fahaizan̈a mandiniky ndreky fan̈aboahan̈a fitiavan̈a, han̈ampy atsika tsy hanafintohin̈y olo hafa?

¹⁴ Fahaizan̈a mandiniky io koa handrisiky atsika handiniky ino mety ho vokatran’ny fanapahan-kevitrintsika io amin’olo hafa, baka tsy ‘hanafitohin̈y irô.’ (Fil. 1:10) Ten̈a raha maventy raha zen̈y izikoa atsika fa mangala fanapahan-kevitry momba fiain̈anantsika manokan̈a, karaha ataon’ny raha momba lamba ndreky sanjy. Ohatra, mety hisy sanjy ten̈a tiantsika. Fa akôry izikoa misy olo an̈atin’ny fiangonan̈a na ambelan̈a fiangonan̈a mahinihiny aminany io? Fahaizan̈a mandiniky han̈ampy atsika han̈aja fihetseham-pôndrô. Fitiavan̈a mandrisiky atsika hizaha raha mahatsara “olo hafa” ndreky hanetry ten̈a. (1 Kor.  10:23, 24, 32; 1 Tim. 2:9, 10) Ke atsika baka iô amy zay hangala fanapahan-kevitry ahitan̈a fa atsika tia ndreky man̈aja olo hafa.

15. Ino raha tôkony hidinihinao, alohan’ny anao han̈ano fanapahan-kevitry maventy araiky?

¹⁵ Izikoa anao han̈ano fanapahan-kevitry maventy araiky, diniha ino raha mila hataonao baka hahavitan̈a izio. Jesosy nivolan̈a fa atsika mila mipetraka antsendriky ‘mikônty ôtrino depansy.’ (Lioka 14:28) Dikan’izen̈y, diniha hamarozan’ny fotoan̈a, vola, aviô ezaka handeha hataonao baka hahavitanao man̈atanteraka fanapahan-kevitrinao io. Ndraikindraiky anao mila mikoran̈a amy fianakavian̈anao, misy hahaizan̈a ino raha mila ataon’olo tsiaraikiaraiky, baka hampahômby fanapahan-kevitrinao. Nan̈ino ma ten̈a mety fan̈anaovan̈a zen̈y? Zen̈y hahitanao asa fanapahan-kevitrinao io mila hamboarin̈y hely na misy hevitry hafa tsara mare koa baka amindrô. Izikoa anao mikoran̈a amy fianakavian̈anao ndreky mitandren̈y tsara raha volan̈indrô, irô ho vôn̈ono han̈ampy anao hampahômby fanapahan-kevitry io.​—Ohab. 15:22.

MANGALÀ FANAPAHAN-KEVITRY HAHÔMBY TSARA

16. Ino aby dingana han̈ampy anao, baka hahômby fanapahan-kevitrinao? (Zahava koa efajoro “ Karakôry Atao Man̈ano Fanapahan-kevitry tsara?”)

¹⁶ Izikoa anao man̈araka irô dingana aby voakoran̈a tan̈abo tiô in̈y, anao ho vôn̈ono han̈ano fanapahan-kevitry tsara. Efa nizahavanao ino raha aby tafiditry amizio ndreky torolalan̈a han̈ampy anao han̈ano fanapahan-kevitry hamparavoravo Jehovah. Iziô amy zay anao afaka mangataka Jehovah han̈ampy anao, baka hampahômby fanapahan-kevitrinao.

17. Ino raha ten̈a maventy han̈ampy anao han̈ano fanapahan-kevitry tsara?

¹⁷ Anao ndray efa impirimpiry nahavita nan̈ano fanapahan-kevitry tsara, aza mitôron̈o fahaizan̈anao na raha efa niain̈anao, fa mitavandrà fahendrena baka amy Jehovah. Aleva onon̈o fa zen̈y ten̈a raha maventy han̈ampy anao hangala fanapahan-kevitry tsara. Izy zaraiky fo afaka man̈amia anao fahaizan̈a, fahiratan-tsain̈y ndreky fahaizan̈a mandiniky. Irô io an̈isan’ny raha maventy azahoan̈a fahendrena. (Ohab. 2:1-5) Jehovah mahavita man̈ampy anao han̈ano fanapahan-kevitry mamparavoravo izy.​—Sal. 23:2, 3.