1. Eraka 1 Petera 5:2, ino andraikitry maventy mila ataony antipan̈ahy?

 TEN̈A valera amy Jehovah ondrikondrikinany, ke izy nanendry antipan̈ahy hikarakara iro. Ten̈a ravoravo iro lelahy mahafoe ten̈a aby io nahazo tombontsoa hanompo rahalahy ndreky ranabavindro. Ke iro mifen̈y mare miambin̈y ondrikondrikiny Zan̈ahary. (Jer. 23:4; vakia 1 Petera 5:2.) Sambatra atsika manan̈a iro an̈atiny fiangonan̈antsika!

2. Ino raha sarotro mety ho tojy antipan̈ahy sasany?

² Maro raha mety hanahiran̈a iro antipan̈ahy aby io lera iro man̈ano andraikitrindro. Maro, ohatra, asa mila ataondro lera mikarakara fiangonan̈a. Tsy maintsy nianatra nanetry ten̈a iziô Tony, antipan̈ahy baka Etazonỳ, ke nipezipezy asa ikeny hatao. Karaha ty hoizy: “Tamy valan̈aretin̈y COVID-19 vo nanomboko, maro asa nataoko tamy fandaminan̈a fivorian̈a ndreky fanompoan̈a. Fa ndray zaho efa nifen̈y nan̈ano raha maro, mbala maro fo raha tsy vita. Ke nanjary tsy zarizary vaky Baibolinaka ndreky fianaran̈a manokan̈a avio vavaka.” Hafa koa raha tojy Ilir, antipan̈ahy araiky baka a Kosovo. Taminizy mbala tamy faritry araiky nisy ady, hitany fa ten̈a sarotro man̈araka toromariky amezany fandaminan̈a. Karaha ty hoizy: “Nisy fotoan̈a zaho nirahiny birony sampan̈a nan̈ampy iro piaramanompo tamy faritry araiky mampavozo mare. Nila korazy mare zaho tamy zen̈y, fotony zaho navozo. Avio, karaha hitako tsy aminany loatra toromariky namezandro.” Tim ndraiky misionera an Asie. Maro loatra raha nila nataony isanandra ke sahiran̈a izy. Hoizy: “Ndraikindraiky sain̈inaka ndreky fonaka lonja.” Ke ino raha mety han̈ampy iro antipan̈ahy miatriky raha karaha zen̈y?

3. Nan̈ino mahatsara atsika jiaby mandiniky ohatrany Gideona Pitsara?

 ³ Antipan̈ahy afaka mangala fianaran̈a baka amy raha nataony Gideona Pitsara. (Heb. 6:12; 11:32) Izy piaro sady piambin̈y vahoakany Zan̈ahary. (Mpits. 2:16; 1 Tan. 17:6) Karaha Gideona, iro antipan̈ahy aby io namian̈a andraikitry hikarakara vahoakany Zan̈ahary, an̈atiny fotoan̈a ten̈a sarotro. (Asa. 20:28; 2 Tim. 3:1) Gideona ten̈a nanetry ten̈a sady nan̈araka volan̈a Zan̈ahary. Atsika afaka mangala fianaran̈a baka amy raha nataony zen̈y. Nila nanan̈a faharetan̈a mare koa izy lera nan̈ano andraikitrinany. Na antipan̈ahy atsika na tsy antipan̈ahy, atsika jiaby samy afaka mifen̈y hahaihankasitraka iro antipan̈ahy aby io. Tsy hitanaro man̈eva tohan̈ana iro lelahy miasa mafy mikarakara atsika aby io?​—Heb. 13:17.

4. Akory nan̈aboahany Gideona fa izy nanetry ten̈a?

⁴ Gideona lelahy ten̈a nanetry ten̈a. b Nisy fotoan̈a Midianita aby io nampijaly mare iro Israelita aby io. Nisy anjeliny Jehovah nivolan̈a tamy Gideona fa izy navoafidy han̈avotro iro Israelita aby io. Hoizy taminy anjely io: ‘Fianakavian̈anaka kony ten̈a tsisy dikany amy fokony Manase! Avio zaho farany tsisy dikany amy fianakavian̈any babako.’ (Mpits. 6:15) Izy nihevitry fa izy tsy vain̈y han̈ano raha nan̈irahany Jehovah izy io. Jehovah ndraiky nahay fa izio vitany. Jehovah nan̈ampy Gideona, ke vitany fo nan̈ano raha nampan̈anaovin̈y izy io.

5. Lera karakory mety ho sarotro aminy antipan̈ahy araiky hanetry ten̈a?

⁵ Mifen̈y erakany vitandro antipan̈ahy aby io baka hanetry ten̈a amy raha jiaby. (Mika 6:8; Asa. 20:18, 19) Iro, ohatra, tsy mivantara raha haindro ndreky raha vitandro. Iro koa tsy man̈ameloten̈a loatra lera iro sendra nan̈ano hadisovan̈a. Fa ndraikindraiky, mety ho sarotro aminy antipan̈ahy araiky koa hanetry ten̈a. Izy, ohatra, mety man̈eky han̈ano andraikitry maro loatra, kanefa sahiran̈a izy han̈ano raha io baka io. Na koa mety ho sarotro aminany hanetry ten̈a lera misy olo man̈amia tsin̈y izy na midera izy amy fomba fan̈anaovany raha. Lera anaro antipan̈ahy tojy raha karaha zen̈y, ino raha mety ianaranaro baka amy Gideona?

6. Ino raha mety ianarany antipan̈ahy baka amy fanetrenten̈any Gideona? (Zahava koa sary.)

⁶ Mangataha fan̈ampian̈a. Olo manetry ten̈a mahay fa misy erany raha vitany. Akory  nan̈aboahany Gideona fa izy nanetry ten̈a? Izy nangataka fan̈ampian̈a taminolo. (Mpits. 6:27, 35; 7:24) Hendry antipan̈ahy koa man̈ano karaha zen̈y. Ho Tony, araiky nikoran̈intsika taloha tarỳ in̈y: “Nikeko fo zay asa nampan̈anaovin̈y zaho, ndray efa tsy ho vitako, fotony karaha zen̈y fomba nitarimian̈a zaho. Ke zaho nanapakevitry hianatra momba fanetrenten̈a tamy fotoampivavahan̈any fianakavian̈anay. Avio, nan̈ontaniako vadiko karakory fahitany zaho. Nimpody nizahavako ndraiky tamy jw.org koa video Karaha Nataony Jesosy, Ampiofana, Atokisa, Ameza Andraikitry Olo Hafa.” Tony baka tio nanomboko nitady olo han̈ampy izy taminy andraikitrinany. Ino vokany? Ho Tony: “Loso nandeha tsara asa an̈ivony fiangonan̈a, avio zaho nanan̈a fotoan̈a tsara hankafatarako fifandraisako amy Jehovah.”

7. Izikoa misy olo man̈amia tsin̈y anaro antipan̈ahy, akory angalanaro tahaka Gideona? (Jakoba 3:13)

⁷ Aza meloko izikoa misy olo man̈amia tsin̈y anao. Mety ho sarotro aminy antipan̈ahy hanetry ten̈a izikoa misy olo man̈amia tsin̈y iro. Afaka han̈ampy iro amy raha zen̈y koa modeliny Gideona. Hainy Gideona fa izy tsy lavorary. Izy tsy nan̈adary foeky izikoa iro Efraimita aby io fa nivolambolan̈a ndreky nan̈ady izy. (Mpits. 8:1-3) Gideona tsy neloko tamindro. Naboakany fa izy nanetry ten̈a ke nitandrin̈esiny tsarabe tarain̈indro, avio tsara fan̈ahy fo izy koa fa namaly volan̈andro. Ke nalemy iro Efraimita aby io. Hendry antipan̈ahy izikoa mangala tahaka Gideona, ke mitandren̈y tsarabe fa tsy meloko izikoa misy olo man̈amia tsin̈y anaro. (Vakia Jakoba 3:13.) Izikoa anaro man̈ano zen̈y, hiray sain̈y fo fiangonan̈a.

8. Akory tôkony hataony antipan̈ahy izikoa fa misy olo midera izy? Hazavà aminy ohatra.

⁸ Jehovah fo ameza dera. Gideona koa fa nandresy iro Midianita aby io, maro olo nidera izy. Fa akory nataony Gideona? Natodiny tamy Jehovah olo aby io. (Mpits. 8:22, 23) Akory mety angalany antipan̈ahy tahaka Gideona? Iro tôkony hidera Jehovah amy zay raha vitandro. (1 Kor. 4:6, 7) Ohatra, izikoa misy olo midera antipan̈ahy araiky amy fahaizany mampianatra, izy afaka mivolan̈a fa baka amy Volan̈a Zan̈ahary aby raha jiaby nampianariny, na koa nohony fampiofan̈ana baka tamy fandaminany Jehovah fo nahavitany izio. Ndraikindraiky antipan̈ahy mila misaintsain̈y tsao fomba fampianarany efa misariky sain̈inolo aminany fa tsy amy Jehovah. Diniha baka tantarany antipan̈ahy araiky kahian̈a Timothy. Taminizy vo voatendry antipan̈ahy, tiany mare nan̈ano kabaro natao ninolo jiaby. Hoizy: “Zaho tia nan̈ano teny fampidiran̈a lava ndreky ohatra tsy foren̈y in̈y. Ke zaho nahazo teny fideran̈a maro baka tamy pan̈atriky. Fa izy fo, olo loso nifantoko taminaka, fa tsy tamy Baiboly na tamy Jehovah.” Koa fa nandeha fotoan̈a, tontohitry Timothy fa nila namboariny fomba fampianarany baka olo tsy hifantoko aminany. (Ohab. 27:21) Ke ino vokany? Hoizy: “Amy zioty, maro rahalahy ndreky ranabavy mivolan̈a aminaka fa kabaro nataoko nan̈ampy iro hiatriky problemo, hiaritry fitsapan̈a, na koa hifandray tsarabe tamy Jehovah. Raha nivolan̈indro aby zen̈y ten̈a namparavoravo zaho mandilatrany dera namian̈a zaho taloha aby in̈y.”

9. Nan̈ino sarotro tamy Gideona nan̈araka volan̈a Jehovah ndreky nanan̈a korazy? (Zahava sary amy fon̈ony gazety ty.)

⁹ Gideona koa fa voatendry ho pitsara iro Israelita aby io, izy nila nan̈araka volan̈a Jehovah ndreky nanan̈a korazy. Nan̈ino? Nisy raha sarotro baka nirahiny Jehovah nataony. Tsy ino zen̈y, fa handravan̈a alitarany babany. Taminy alitara io babany nanompo Bala. (Mpits.  6:25, 26) Tafara tatỳ koa, Gideona koa fa baka namory olo hatao maramila, indroe aby Jehovah nan̈iraka izy hampihen̈y isany maramilanany. (Mpits. 7:2-7) Tsy zen̈y fo, Jehovah koa nan̈iraka izy hanafiky tobiny fahavalondro, tamy misasakalin̈y.​—Mpits. 7:9-11.

10. Lera karakory mety ho sarotro aminy antipan̈ahy han̈araka volan̈a?

¹⁰ Antipan̈ahy tôkony ho “von̈ono han̈araka volan̈a.” (Jak. 3:17) Zatra man̈araka volan̈a antipan̈ahy araiky izikoa tsy mirekireky man̈araka raha volan̈iny Soratra Masin̈y ndreky taridalan̈a baka amy fandaminan̈a. Modely tsara izy izikoa man̈ano zen̈y. Fa raha zen̈y ndraikindraiky mety tsy ho mora. Mety ho maro baka, ohatra, toromariky azony, avio betibetiky fo koa efa miova, ke mety tsy harakany eky. Ndraikindraiky koa izy mety hieritreritry fa karaha tsy aminany loatra toromariky sasany. Na koa misy andraikitry han̈irahan̈a izy kanefa mety hahavy izy hisamborin̈y. Akory mety angalany antipan̈ahy tahaka Gideona lera iro miatriky raha karaha zen̈y?

11. Ino han̈ampy antipan̈ahy ho von̈ono han̈araka volan̈a?

¹¹ Tandrin̈esa tsara avio areha taridalan̈a. Nivolan̈iny Zan̈ahary tamy Gideona akory handravan̈ana alitarany babany. Nambarany izy koa aia han̈oren̈ana alitara vaovao niny Jehovah, avio ino biby atao soron̈o. Gideona tsy niahiahy tsao tsy mety taridalan̈a namezany Jehovah io, fa izio direkty narehany. Mahazo toromariky baka amy fandaminany Jehovah koa iro antipan̈ahy aby io amy zioty. Mety ho baka amy taratasy izio, na amy filazan̈a, na koa iro mahazo taridalan̈a hafa hiarovan̈a ndreky han̈ampian̈a atsika hifandray tsarabe amy Jehovah. Atsika tia iro antipan̈ahy aby io mare fotony iro mifen̈y man̈araka taridalan̈a baka amy fandaminan̈a. Ke samy mahazo hatsaran̈a olo jiaby an̈atiny fiangonan̈a.​—Sal. 119:112.

12. Akory mety an̈arehany antipan̈ahy Hebreo 13:17, izikoa misy taridalan̈a vaovao baka amy fandaminan̈a?

¹² Mifen̈a han̈araka toromariky vaovao. Aleva onon̈o fa hely tsy ho maramilany Gideona jiaby nirahiny Jehovah nalefa nody. (Mpits. 7:8) Izy mety nieritreritry: ‘Mba mety edy zen̈y va? Raha mba hahomby ndraiky?’ Fa ndray zen̈y, narehany Gideona fo toromariky Jehovah. Antipan̈ahy amy zioty koa mangala tahaka Gideona, ke mifen̈y man̈araka fan̈ovoan̈a ataony fandaminan̈a. (Vakia Hebreo 13:17.) Taminy 2014, ohatra, Filankevipitantan̈ana nan̈ova fomba azahoany fiangonan̈a Tran̈o Fivorian̈a ndreky Tran̈o Fan̈anaovan̈a Fivoriambe. (2 Kor. 8:12-14) Fiangonan̈a efa tsy mila man̈efa vola laniny fandaminan̈a tamy fan̈amboaran̈a Tran̈o Fivorian̈a eky. Fa amy zioty, fan̈amezan̈a baka amy fiangonan̈a man̈erantany ampiasainy fandaminan̈a han̈oren̈ana Tran̈o Fivorian̈a ndreky Tran̈o Fan̈anaovan̈a Fivoriambe. Ke zay tany mila han̈oren̈ana Tran̈o Fivorian̈a afaka mahazo aby, na misy vola fiangonan̈a io na tsisy. José koa fa naharen̈y  fiovan̈a zen̈y, izy nihevitry fa zen̈y tsy ho posibla. Hoizy: ‘Tsisy Tran̈o Fivorian̈a ho vita nata araiky. Tsy karaha zen̈y fan̈anaovan̈a raha aminay atỳ.’ Ino nan̈ampy José hanohan̈a taridalan̈any fandaminan̈a io? Hoizy: “Raha volan̈iny Ohabolana 3:5, 6 nampatsiaro zaho fa zaho mila matoky Jehovah. Ke tsy nampoizin̈y foeky vokany! Tsy vitany nahainaro fo Tran̈o Fivorian̈a voaorin̈intsika, fa loso mahazo hatsaran̈a baka amy fomba an̈anaovantsika fan̈amezan̈a io koa fiangonan̈a erantany, fotony loso mitovy raha misy an̈ivony fandaminan̈a.”

13. a) Ino raha natokisany Gideona? b) Akory mety angalany antipan̈ahy tahaka Gideona? (Zahava koa sary.)

¹³ Manàn̈a korazy han̈ano sitrapony Jehovah. Gideona nan̈araka volan̈a Jehovah fo, ndray izy navozo tsao hahafaty izy raha nan̈irahan̈a izy. (Mpits. 9:17) Jehovah koa fa baka nan̈amia toky izy, Gideona resy lahatra fa Zan̈ahary han̈ampy izy hiaro Vahoakanany. Mangala tahaka Gideona koa iro antipan̈ahy mipetraka amy tany mandrova asantsika. Iro misy korazy ke mitariky fivorian̈a ndreky fanompoan̈a fo ndray iro mety ho voasambotro, havoa ankety, ho afaka asa, na koa ho voabomabomaka. c Amy fahorian̈a be, mila manan̈a korazy iro antipan̈ahy aby io han̈araka toromariky azondro, ndray mety hampadiranandra. Atsika amy zen̈y mety hahazo toromariky mikasiky fomba hitorian̈a didipitsaran̈a mira havandra, ndreky raha mila atao baka atsika ho avotro amy fan̈afihany Goga baka Magoga.​—Ezek. 38:18; Apok. 16:21.

14. Nan̈ino tsy nora tamy Gideona niaritry?

¹⁴ Tsy somasoma asany pitsara zen̈y, ke ndraikindraiky Gideona mety naharen̈y kajo. Ohatra, izikoa fa nitafihiny Gideona iro Midianita aby io, iro nilefa. Fa nata efa alin̈y mare andra, mbala nian̈iny fo iro. Izy nan̈ian̈a iro rango tamy Vavasahany Jezirela firaka tamy Ten̈aranony Jordana, kanefa mety feno kakazo tamorony ten̈arano io. (Mpits. 7:22) Nijanon̈o ma Gideona koa fa navy tiô? Ehe.  Izy ndreky maramilanany 300 lahy nitsaka fo, nan̈ian̈a olo aby io nata efa kajo. Tamy farany, takandro fo iro Midianita aby io, ke resindro.​—Mpits. 8:4-12.

15. Nan̈ino ndraikindraiky mety tsy mora aminy antipan̈ahy hiaritry?

¹⁵ Ndraikindraiky mety hahatsiaro kajo mare antipan̈ahy araiky, fotony izy sady mikarakara fiangonan̈a ndreky fianakavian̈anany. Amy fotoan̈a zen̈y, akory mety angalany antipan̈ahy tahaka Gideona?

16-17. Ino nan̈ampy Gideona hiaritry, avio ino raha mety atokisany antipan̈ahy? (Isaia 40:28-31) (Zahava koa sary.)

¹⁶ Matokisa fa Jehovah han̈amia angovo anao. Gideona natoky fa Jehovah han̈amia angovo izy. Zen̈y ankitin̈y nataony Jehovah. (Mpits. 6:14, 34) Nisy fotoan̈a, ohatra, Gideona ndreky maramilanany aby io nan̈ian̈a panjaka midianita aroe. Iry Gideona nilomoay, fa iro panjaka aby io ndraiky mety nitenginy samô. (Mpits. 8:12, 21) Fa Zan̈ahary nan̈ampy iro Israelita aby io, ke takatrandro ndreky resindro panjaka aby io. Antipan̈ahy koa afaka milampy amy Jehovah. Izy baka “tsy mety kajo na lany angovo foeky.” Ke izy han̈amia angovo iro, lera iro mila zen̈y.​—Vakia Isaia 40:28-31.

¹⁷ Diniha baka tantarany Matthew. Izy an̈isany Komity Mifandray amy Lopitaly. Ino raha nan̈ampy izy hiaritry? Hoizy: “Hitako fa ten̈a tanteraka taminaka raha volan̈iny Filipianina 4:13. Matetiky zaho koa fa matsiaro kajo ndreky tsisy angovo foeky, zaho mivavaka mare amy Jehovah. Zaho miangavy Zan̈ahary han̈amia zaho angovo ndreky han̈ampy zaho hatanjaka sain̈y, baka ho vitako han̈ampy iro rahalahiko aby io. Tan̈atiny fotoan̈a aby zen̈y, tsapako fan̈ahy masin̈y Jehovah nan̈amia angovo zaho ndreky nan̈ampy zaho hiaritry.” Karaha Gideona, iro antipan̈ahintsika aby io mahafoe ten̈a mikarakara vahoakany Jehovah, ndray tsy mora raha zen̈y ndraikindraiky. Mazava hoazy fa iro tôkony hanetry ten̈a ndreky han̈eky fa tsy raha jiaby tiandro hatao zay ho vitandro aby. Ndray zen̈y, iro afaka matoky fa Jehovah hitandren̈y iro ndreky han̈amia angovo hahavitandro hiaritry izikoa iro mangataka fan̈ampian̈a aminany.​—Sal. 116:1; Fil. 2:13.

18. Izikoa fintin̈iny, akory mety angalany antipan̈ahy tahaka Gideona?

¹⁸ Maro raha mety ianarany antipan̈ahy baka amy modeliny Gideona. Antipan̈ahy mila manetry ten̈a, ke mipezipezy hamarozany andraikitry ikendro hatao. Mila manetry ten̈a koa iro lera misy olo man̈amia tsin̈y na midera iro. Arakaraka han̈aton̈any farany donia ty, iro mila mifen̈y mare hanan̈a korazy ndreky han̈araka volan̈a. Baka io, iro mila matoky fa, na ino na ino raha miboaka, Zan̈ahary afaka man̈amia angovo iro. Atsika mankasitraka mare iro piambin̈y miasa mafy aby io, avio ‘tsy voly han̈aja olo karaha iro.’​—Fil. 2:29.