1. Ino raha tsy maintsy ataontsika baka atsika ho tafitsaka velon̈o aminy andrany Jehovah?

 INO ma “andrany Jehovah” zen̈y izikoa Baiboly zahavan̈a? Izio fotoan̈a handripahany Jehovah fahavalonany ndreky hamonjiany vahoakanany. Taloha tan̈y, Jehovah efa navy nan̈asazy firenena. (Isaia 13:1, 6; Ezek. 13:5; Zef. 1:8) Ombian̈a ma “andrany Jehovah” io hanomboko, aminy andrantsika zioty? Izio hanomboko lera iro pitondra fanjakan̈a aby io handravan̈a Babylony Be. Ady Aramagedona amy zay mamaran̈a izio. Ke izikoa atsika tsy mioman̈a rango zioty, atsika tsy ho tafitsaka velon̈o aminy ‘andra’ zen̈y. Jesosy nampianatra, fa atsika tsy vitany mila mioman̈a amy “fahorian̈a be” fo fa mila ‘von̈ono lalandava’ hiatriky izio koa.​—Mat. 24:21; Lioka 12:40.

2. Nan̈ino mahatsara atsika mandiniky 1 Tesalonianina?

² Tamy taratasy voanalohany nisoratiny apostoly Paoly tamindro Tesalonianin̈y aby io, izy nampiasa fan̈oharan̈a maromaro han̈ampian̈a Kristianin̈y ho von̈ono lalandava aminy andra maventy han̈anaovany Jehovah didipitsaran̈a. Hainy Paoly fa andra io tsy ho avy tamy fotoan̈a zen̈y. (2 Tes. 2:1-3) Fa ndray zen̈y, izy nandrisiky iro rahalahiny aby io hioman̈a amy faviany andra io, ke hihevitry izio karaha raha efa ho avy amaray. Tsara man̈araka torohevitry zen̈y koa atsika. Alo hizahavantsika zioty fomba nan̈azavany raha aby ty: 1) Akory fomba haviany andrany Jehovah io? 2) Azovy ho tsafitsaka velon̈o aminy andra zen̈y? Avio, 3) akory hioman̈antsika baka atsika ho tafitsaka velon̈o?

3. Nan̈ino andrany Jehovah ampiran̈iny amy pangalatra avy aminy alin̈y? (Zahava koa sary.)

³ “Karaha pangalatra aminy alin̈y in̈y.” (1 Tes. 5:2) Io voanalohany amindro fan̈oharan̈a telo an̈azavan̈a faviany andrany Jehovah. Malaky asa mare pangalatra matetiky, avio aminy alin̈y  tsy ampoizinolo in̈y iro avy. Tampoko mare koa faviany andrany Jehovah, ke tsy ho ampoiziny ankamarozanolo. Ndray ten̈a Kristianin̈y koa mety tsy han̈ampo fa tampotampoko fo raha jiaby efa miova. Fa atsika tsy miran̈a aminolo ratsy fan̈ahy, fotony atsika tsy an̈isanolo ho ripaka.

4. Nan̈ino andrany Jehovah ampiran̈iny amy tehotehoko amy man̈angy pitihiny tsaiky?

⁴ “Mira tehotehoko amy man̈angy pitihiny tsaiky in̈y.” (1 Tes. 5:3) Man̈angy araiky miambin̈y andra hitirahany tsy mahay kelera marin̈y izy ho teraka. Hainy ndraiky fa izy tsy maintsy ho teraka, fa izio ho tampoko, hanehotehoko, avio tsisy raha mahasakana izy. Karaha zen̈y koa, atsika tsy mahay na andra na lera hanombohany andrany Jehovah. Fa atsika ndraiky mahazo antoko fa raha zen̈y tsy maintsy ho avy. Andra fitsarany Jehovah io ho tampoko mare amindro ratsy fan̈ahy aby io, sady izio tsy ho azondro hilifasan̈a foeky.

5. Amy karakory fahorian̈a be io miran̈a andra ho kiaka?

⁵ Miran̈a andra ho kiaka. Mbala momba pangalatra mangalatra aminy alin̈y fo koa fan̈oharan̈a fahatelo nampiasainy Paoly. Fa indraikiny ty, andrany Jehovah io karaha tihampiran̈iny Paoly aminy andra ho kiaka. (1 Tes. 5:4) Mety ho varian̈a mare olo mangalatra aminy alin̈y, ke tsy azondro onon̈o lera mandeha. Iro mety ho tratrandra ke ho tatranolo. Mira pangalatra midoko an̈aty hiziky fo koa olo man̈ano raha tsy tiany Jehovah sady tsy mety miova. Hibaribary asa ratsindro amy fahorian̈a be. Fa atsika ndraiky afaka ho von̈ono fo hiatriky zen̈y, fa tsy karaha iro. Amy fomba akory? Atsika tsy man̈ano raha tsy tiany Jehovah. Avio mifen̈y atsika hanan̈a ‘hatsarantoetry amy karazany jiaby, ndreky fahitsian̈a avio fahamarin̈ana.’ (Efes. 5:8-12) Nikoran̈a fan̈oharan̈a aroe hafa koa Paoly baka tio. Iro io man̈azava azovy tsy ho tafitsaka velon̈o amy fahorian̈a be.

6. Nan̈ino atsika mivolan̈a fa mandry ankamarozanolo? (1 Tesalonianina 5:6, 7)

⁶ ‘Lan̈iany mandry.’ (Vakia 1 Tesalonianina 5:6, 7.) Ampiran̈iny Paoly aminolo mandry lan̈iany olo tsy ho tafitsaka velon̈o aminy andrany Jehovah. Nan̈ino? Fotony olo mandry tsy mahazo onon̈o raha mandalo man̈odidin̈y iro ndreky fotoan̈a mandeha. Ke tsy arakandro raha maventy mandalo avio tsy vitandro raha tôkony hatao. Mandry aminy lafiny arapan̈ahy aby ankamarozanolo aminy andra zioty. (Rom. 11:8) Tsy hinoandro foeky iro famantaran̈a man̈aboaka fa atsika io efa miain̈y aminy “andra farany”, ndreky efa marikitry fahorian̈a be. Fa lera misy raha maventy miova amy donia ty, taitry hely olo sasany ke mba mitandren̈y hely hafatra momba Fanjakan̈any Zan̈ahary. Fa baka io, maro amindro mimpody mandry ndraiky. Misy amindro koa mba mino fa ho avy andra fitsaran̈a io, fa iro fo tsy mino izio ho avy atoato. (2 Pet. 3:3, 4) Atsika ndraiky mila mifen̈y fo mifoha arapan̈ahy isanandra. Ten̈a raha maventy fan̈anaovan̈a zen̈y.

7. Nan̈ino iro olo aby handeha han̈amparany Zan̈ahary helokonany mira olo mamo?

⁷ ‘Iro mamolava.’ Nampiran̈iny apostoly Paoly aminolo mamolava iro olo handeha haripaka Zan̈ahary. Karakory ma ataonolo mamo? Iro dindindindery koa fa misy raha mandalo, ke tsy mahay manapakevitry tsara. Karaha zen̈y koa, iro olo ratsy fan̈ahy aby io tsy mijery fampitandreman̈a baka amy Zan̈ahary. Iro mifidy fomba fiain̈ana hahavy iro ho ripaka. Fa Kristianin̈y ndraiky ampirisihin̈y hisain̈y tsarabe. (1 Tes. 5:6) Misy manampahaizan̈a araiky momba Baiboly mivolan̈a fa olo araiky misain̈y tsara zen̈y “kalma fo fa tsy mora taitaitry. Izy mahavita mandiniky tsara, ke tsara fanapahankevitry ataony.” Nan̈ino atsika tôkony ho kalma fo fa tsy halaky hialamboetry? Amy zen̈y atsika tsy hidikiditry amy politiky ndreky aminy adihevitry amy problemo amy fiarahamonin̈y. Arakaraka han̈aton̈any andrany Jehovah, hahaihitirenolo han̈ano raha aby io fo atsika. Fa ndray zen̈y, atsika tsy mila miasaloha mare amy volan̈a handeha havalintsika iro. Fan̈ahy masin̈iny Jehovah afaka man̈ampy atsika hilamintsain̈y fo, ke atsika hahavita han̈ano fanapahankevitry tsara.​—Lioka 12:11, 12.

8. Koa 1 Tesalonianina 5:8 zahan̈a, ino aby toetry mila anan̈antsika baka atsika hifoha ndreky hisain̈y tsara fo? (Zahava koa sary.)

⁸ Sikìna fiarovan̈a tratra ndreky fiarovan̈a loha. Atsika ampiran̈iny Paoly amy maramila von̈ono hiady sady efa misikiny raha jiaby ilainy amy zen̈y. (Vakia 1 Tesalonianina 5:8.) Maramila amperinasa zen̈y mila von̈ono lalandava hiady. Karaha zen̈y koa atsika. Von̈ono lalandava aminy andrany Jehovah atsika, ke finoan̈a ndreky fitiavan̈a ataontsika fiarovan̈a tratra, avio fan̈antinan̈a ataontsika fiarovan̈a loha. Tsy ho sahiran̈a atsika izikoa manan̈a toetry aby zen̈y.

9. Nan̈ino hiaro atsika fanan̈ana finoan̈a?

⁹ Miaro fony maramila fiarovan̈a tratra. Ho voaro koa fontsika an̈ohatra izikoa atsika manan̈a finoan̈a ndreky fitiavan̈a. Toetry aby zen̈y han̈ampy atsika tsy ho voly hanompo Jehovah ndreky han̈aradia Jesosy. Finoan̈a han̈ampy atsika hatoky fa Jehovah mbala hamaly hatsaran̈a atsika, fotony atsika mitady izy amy fontsika jiaby. (Heb. 11:6) Izio koa han̈ampy atsika tsy hivadiky amy Jesosy, Pitariky atsika, ndray mafy raha iaretantsika. Ino raha han̈ampy atsika hanan̈a finoan̈a hahavitan̈a hiaritry raha sarotro? Atsika afaka mandiniky modelinolo tsy mivadiky aminy andra zioty. Iro miaritry fo ndray injehin̈y mare na sahiran̈a amy velonten̈a.  Tsy ho voafandrikiny fitiavambola koa atsika izikoa mandiniky ohatranolo nan̈atsotra fiain̈ana, ke nan̈ano voanalohantoeran̈a Fanjakan̈any Zan̈ahary. b

10. Nan̈ino fitiavan̈a Zan̈ahary ndreky olo man̈ampy atsika hiaritry?

¹⁰ Mila manan̈a fitiavan̈a koa atsika baka hahavita hifoha arapan̈ahy ndreky hisain̈y tsara fo. (Mat. 22:37-39) Nohony fitiavantsika Zan̈ahary, atsika mitory fo ndray izio mety hampiditry problemo amintsika. (2 Tim. 1:7, 8) Tiantsika koa firaka aminolo tsy panompony Jehovah. Zen̈y mahavy atsika tsy voly mitory amindro ndreky miasa tsara faritanintsika. Mitory amy telefaony ndreky amy taratasy koa atsika. Atsika man̈anten̈a fa andra araiky an̈y olo aby io mbala hiova, ke han̈ano ny tsara.​—Ezek. 18:27, 28.

11. Nan̈ino han̈ampy atsika fitiavantsika piaramanompo? (1 Tesalonianina 5:11)

¹¹ Tiantsika mare koa iro rahalahy ndreky ranabavintsika aby io. Zen̈y mahavy atsika “mifen̈y fo hifankahery ndreky hifan̈ampy.” (Vakia 1 Tesalonianina 5:11.) Iro maramila aby io mifan̈ampy fo koa fa an̈atiny lagera. Atsika koa mifankahery ndreky mifan̈ampy. Marin̈y ndraiky fa lagera koa fa manjofo, maramila aby io mety tafandratra namandro. Fa raha zen̈y tsy kiniandro. Karaha zen̈y koa, tsy mety atsika koa kinia han̈ano raha handratra iro rahalahy ndreky ranabavintsika aby io, na hamaly faty iro. (1 Tes. 5:13, 15) Tiantsika mare koa iro rahalahy mitariky an̈ivony fiangonan̈a, ke hajaintsika. (1 Tes. 5:12) Mbala tsy ampy taon̈o araiky niforon̈any fiangonan̈a ta Tesalonika, tamy Paoly nanoratra taratasy tamindro. Mety mbala tsy zadraharaha ndreky nan̈ano hadisovan̈a iro rahalahy voatendry tao. Fa ndray zen̈y, iro mbala nila najain̈y fo. Arakaraka han̈aton̈any fahorian̈a be, mety hahaihitavandra taridalan̈a baka amindro antipan̈ahy aby io fo atsika, lombolombony amy zioty. Atsika baka mety tsy ho afaka hifandray amindro rahalahy aby amy foibe ndreky amy birony sampan̈a. Ke rango zioty atsika efa mila mifen̈y mare ho tia ndreky han̈aja iro antipan̈ahy aby io. Na ino na ino raha miboaka, atsika mila misain̈y tsara fo, ke tsy  hifantoko amy tsy fahalavorarian̈andro. Mila alaintsika onon̈o fo, fa Jehovah mampiasa Jesosy mitariky iro rahalahy tsy mivadiky aby io.

12. Nan̈ino fan̈antinan̈antsika miaro eritreritrintsika?

¹² Fiarovan̈a loha miaro lohany maramila tsy ho voa raha. Karaha zen̈y koa, fan̈antinan̈a ho voavonjy miaro jerintsika ndreky man̈ampy atsika hieritreritry tsara. Izikoa matanjaka tsarabe fan̈antinan̈antsika, loso tsapantsika fa tsisy dikany raha amy donia ty. (Fil. 3:8) Fan̈antinan̈antsika koa man̈ampy atsika tsy ho taitaitry fa ho kalma fo. Karaha zen̈y iziô raha tsapany Wallace ndreky Laurinda. Iro fivadiany manompo an Afriky. Tan̈atiny telo herin̈iandra fo, samby naty araiky tamy raimandrenindro. Kanefa mbala naresaka mare valan̈aretin̈y COVID-19 tamy zen̈y, ke iro tsy afaka nody baka hifankahery niaraka tamy fianakavian̈andro. Nivolan̈iny Wallace: “Zaho matoky mare fa iro hitsangana amy maty, ke zaho efa tsy nieritreritry karakory jalindro taminiro niala fahin̈ana fa han̈ano akory iro aminy andra hamiloman̈a iro, amy donia vaovao. Zaho koa fa malahelo iro havako naty aby io, fan̈antinan̈a zen̈y man̈ampy zaho hilamintsain̈y.”

13. Izikoa atsika tihahazo fan̈ahy masin̈y, ino raha mila ataontsika?

¹³ ‘Aza vonen̈a motrony fan̈ahy.’ (1 Tes. 5:19) Nampiran̈iny Paoly amy motro an̈atintsika ao fan̈ahy masin̈y. Izikoa atsika mahazo fan̈ahy masin̈y, atsika manjary mazoto ndreky mafana fô mare man̈ano ny tsara sady hanan̈a angovo han̈anaovan̈a asany Jehovah. (Rom. 12:11) Ke ino raha mety ataontsika baka atsika mahazo fan̈ahy masin̈y? Atsika mila mangataka izio amy vavaka, mianatra Volan̈a Zan̈ahary, avio tsy miala an̈atiny fandaminan̈a taritiny fan̈ahy io. Fan̈anaovan̈a zen̈y han̈ampy atsika hanan̈a “vokatrany fan̈ahy.”​—Gal. 5:22, 23.

14. Ino raha mila tandremantsika baka atsika mahazo fan̈ahy masin̈y fo? (Zahava koa sary.)

¹⁴ Atsika koa fa mahazo fan̈ahy masin̈y baka amy Zan̈ahary, mila mitandrin̈y atsika tsao ‘mamono motrony fan̈ahy.’ Azovy ma amezany Zan̈ahary fan̈ahy masin̈inany? Lan̈iany olo mifen̈y hanan̈a eritreritry madio ndreky tsara fitondranten̈a fo. Izikoa atsika tsy voly mieritreritry  raha ratsy sady man̈atanteraka zen̈y, atsika tsy hahazo fan̈ahy masin̈y eky. (1 Tes. 4:7, 8) Ino koa raha mila tandremantsika izikoa atsika tihahazo fan̈ahy masin̈y fo? ‘Tsy ataontsika raha tsisy dikany faminanian̈a.’ (1 Tes. 5:20) “Faminanian̈a” koran̈intsika eto io hafatra jiaby amezany Jehovah baka amy fan̈ahy masin̈inany. Tafiditry amy zeny, faminanian̈a momba andrany Jehovah ndreky faminanian̈a aby mivolan̈a fa efa ten̈a marikitry farany. Ke atsika tsy hieritreritry foeky fa andrany Jehovah io, na Aramagedona, mbala ho ela, ke tsy ho avy aminy andrantsika. Fa ataontsika raha mampalakilaky izio. Amy fomba akory? Tsy adosontsika amy jerintsika foeky fa izio efa marikitry. Ke atsika mifen̈y fo ho tsara fitondranten̈a avio mifen̈y man̈ano raha an̈aboahan̈a ‘fahafoizanten̈a amy Zan̈ahary’ isanandra.​—2 Pet. 3:11, 12.

15. Akory hahavy atsika tsy ho voafitakany vaovao tsy marin̈y ndreky hevitry diso haparitakandro demony aby io? (1 Tesalonianina 5:21)

¹⁵ Tsy ho ela, iro fahavalony Zan̈ahary aby io han̈ano fan̈ambaran̈a karaha ty: “Fiadanan̈a ndreky filaminan̈a!” (1 Tes. 5:3) Hiparitaka amy tany jiaby vandiny demony aby io, ke ankamarozanolo ho voafitaka. (Apok. 16:13, 14) Atsika ke? Atsika tsy ho voafitaka izikoa ‘mangala antoko raha jiaby.’ (Vakia 1 Tesalonianina 5:21.) Volan̈a griky ‘mangala antoko raha’ io ivolan̈ana raha fataonolo izikoa fa mitesty volamena na volafotsy. Ke mila alaintsika antoko tsarabe koa raha ren̈intsika ndreky raha vakintsika tsao fo tsy marin̈y. Ten̈a nila nan̈ano zen̈y iro Tesalonianin̈y aby io. Arakaraka han̈aton̈any fahorian̈a be, mahaimila man̈ano karaha zen̈y fo koa atsika. Tsy raha jiaby ren̈intsika zay hinoantsika aby. Fa atsika mila mandiniky tsara, ke alaintsika antoko tsao raha vakintsika ndreky ren̈intsika aby io tsy mitovy amy raha volan̈iny Baiboly ndreky fandaminany Jehovah. Izikoa atsika man̈ano zen̈y, atsika tsy ho voafitaka na ino na ino vandy haparitakandro demony aby io.​—Ohab. 14:15; 1 Tim. 4:1.

16. Ino fan̈antinan̈a azo antoko anan̈antsika, avio tapakevitry han̈ino atsika?

¹⁶ Haintsika fa vahoakany Zan̈ahary ho tafitsaka velon̈o amy fahorian̈a be. Fa ndray zen̈y, atsika tsisy mahay ino raha handalo amintsika aminy amaray. (Jak. 4:14) Ke na maty alohany fahorian̈a be atsika na tafitsaka velon̈o amizio, izikoa atsika tsy mivadiky, atsika hahazo fiain̈ana tsisy farany. Iro voahosotro aby io hiaraka amy Jesosy andan̈itry an̈y, fa ondrikondriky hafa ndraiky hiain̈y mandrakizay amy Paradisa ambony tany eto. Irarian̈a atsika hifantoko amy fan̈antinan̈a tsara miambin̈y atsika, ke ho von̈ono fo aminy andrany Jehovah!