Tsy koran̈iny Baiboly valinizen̈y. Fa Baiboly fo mikoran̈a tsipiriandraha sasany mety nahavy iro mbala tsy direkty nody ta Nazareta.

Nisy anjely araiky nivolan̈a tamy Maria fa izy havesatra, baka io hiteraka. Tamy fotoan̈a nivolan̈any anjely io hafatra zen̈y, Maria ndreky Josefa nipetraka ta Nazareta, tamy faritry Galilia tan̈y. Tao tanànany Josefa. (Lioka 1:26-31; 2:4) Tafara tatỳ, iro koa fa baka ta Ezipty, iro nody ta Nazareta. Tan̈y Jesosy tombo, ke zen̈y nahavy izy nikahian̈a Nazareanin̈y. (Mat. 2:19-23) Zen̈y mahavy atsika koa fa mikoran̈a momba Jesosy, Josefa, avio Maria, direkty Nazareta avy an̈aty jerintsika.

Maria nanan̈a havan̈a araiky nipetraka ta Joda. Elizabeta an̈arany. Elizabeta io vadiny Zakaria pisoron̈o sady mamany Jaona Pan̈ano Batisa. (Lioka 1:5, 9, 13, 36) Maria nandeha namangy Elizabeta ta Joda, ke nidoko tan̈y telo fanjava, baka tio izy nody ta Nazareta. (Lioka 1:39, 40, 56) Zen̈y nahavy Maria nahay tsara faritry Joda.

Tafara tatỳ, Josefa niala ta Nazareta baka io nandeha ta Betlehema, fotony fanjakan̈a romanin̈y nan̈iraka olo jiaby ‘hisoratra an̈aran̈a amy tany faviany.’ Avio eraka faminanian̈a, Mesia ho teraka a Betlehema. (Lioka 2:3, 4; 1 Sam. 17:15; 20:6; Mika 5:2) Tafarany Jesosy teraka, Josefa tsy nitondra Maria nandeha nody ta Nazareta fotony lavitry lalan̈a sady tsaiky io koa mbala zazamena. Iro nidoko ta Betlehema, kadiriny sivy kilometara niala Jerosalema. Ke ho moramora amindro hitondra tsaiky io amy tempoly an̈y, baka han̈ano fan̈atitry nitakiny Lalàn̈a.​—Lev. 12:2, 6-8; Lioka 2:22-24.

Anjely in̈y nivolan̈a tamy Maria fa zanany io handova ‘sezy fiandrianan̈any Davida’ ke ‘hanjary Panjaka.’ Ke Josefa ndreky Maria mety nieritreritry fa Jesosy tôkony ho teraka amy tanànany Davida. (Lioka 1:32, 33; 2:11, 17) Iro mety nieritreritry fa tsaratsara amindro nidokodoko hely tan̈y mandrapahaizandro ino koa raha hirahiny Zan̈ahary hataondro.

Tsy haintsika firaka ombian̈a iro nidoko ta Betlehema parapaviandro moasy aby in̈y tan̈y. Fa tan̈aty fotoan̈a zen̈y, fianakavian̈andro efa tantran̈o, avio zanakandro efa tsy zazamena eky. (Mat. 2:11) Iro nety tsy nanan̈a eritreritry hody ta Nazareta, fa iro mbala nidoko ta Betlehema ke nipetraka tao elaela.

Nirahiny Heroda nivonen̈a ‘tsaiky lelahy jiaby taon̈o aroe mijotso, ta Betlehema tao.’ (Mat. 2:16) Nisy anjely nampitandrin̈y Josefa momba raha zen̈y, ke nindesindro roeny Maria nilefa ta Ezipty tan̈y Jesosy, avio iro nidoko tan̈y parapifatesany Heroda. Tafara tatỳ, nindesiny Josefa ta Nazareta fianakavian̈anany. Nan̈ino ma iro tsy nimpody ta Betlehema? Fotony tamy fotoan̈a io, Arkelaosy, zanakany Heroda, nanjaka ta Jodia. Izio olo ratsy fan̈ahy mare. Ke nisy anjely nimpody nampitandrin̈y Josefa baka iro tsy himpody an̈y. Ta Nazareta tsisy raha natahoran̈a tamy Jesosy, ke nety hitarimian̈a izy tsarabe.​—Mat. 2:19-22; 13:55; Lioka 2:39, 52.

Josefa naty talohany Jesosy nan̈abian̈a lalan̈a hafahanolo mandeha andan̈itry. Ke dikanizen̈y, Josefa hatsangana ambony tany eto. Amy zen̈y, maro olo hifanojy aminany ke ho afaka han̈ontany izy tsarabe nan̈ino iro roeny Maria nidoko ta Betlehema, Jesosy koa fa teraka.