1-2. Ino problemo itovizantsika amy Lota?

 MIRA raha tsapany Lota tsapantsika izikoa atsika fa mahita fitondranten̈a ratsinolo amy zioty. Izy ‘nalahelo mare koa fa nahita fitondranten̈a tsisy hen̈atra nanan̈anolo pandika lalàn̈a aby io’, fotony hainy fa halany Babantsika andan̈itry an̈y fitondranten̈a karaha zen̈y. (2 Pet. 2:7, 8) Lota navozo Zan̈ahary sady ten̈a nan̈aja izy, ke halany mare fitondranten̈a ratsinolo nan̈odidin̈y izy aby io. Man̈odidin̈y atsika koa feno olo tsy mijery ndreky tsy man̈aja fitsipikiny Zan̈ahary momba fitondranten̈a. Ndray zen̈y, afaka hadio fitondranten̈a fo atsika izikoa mifen̈y fo ho tia Zan̈ahary ndreky mavozo izy.​—Ohab. 14:2.

² Matoa Jehovah mandrisiky atsika han̈ano zen̈y amy bokiny Ohabolana ao, dikanizen̈y izy von̈ono han̈ampy atsika. Tsara mare torohevitry an̈atiny bokiny Ohabolana. Ke hahazo hatsaran̈a aby atsika jiaby, na lelahy na man̈angy, na tanora na matoe, izikoa mandiniky torohevitry an̈atinizio ao.

3. Ino, ohatra, mahavy atsika tôkony hiaro fontsika, izikoa zahan̈a Ohabolana 17:3? (Zahava koa sary.)

³ Jehovah mandiniky fontsika, ke zen̈y antony araiky maventy tôkony hiarovantsika fontsika. Dikanizen̈y, tsy raha hitany masonolo fo zahavany fa ten̈a toetrintsika koa. (Vakia Ohabolana 17:3.) Ho tiany mare atsika izikoa tsy voly mandiniky torohevitrinany. Ary raha zen̈y hahavy atsika hiain̈y mandrakizay. (Jaona 4:14) Tsy vitanizen̈y fo fa atsika koa tsy ho voafandrikiny fitondranten̈a ratsy avio vandiny Satana ndreky ninolo amy donia ty. (1 Jaona 5:18, 19) Arakaraka han̈aton̈antsika Jehovah, hahavy atsika hahaiho tia ndreky han̈aja izy fo. Tsy tiantsika foeky han̈ano raha hampalahelo Babantsika, ke na mieritreritry hanota zen̈y fo efa mampangaroharo atsika. Ke izikoa atsika efa tojy fakampan̈ahy han̈ano raha ratsy,  atsika mila man̈ontany ten̈a karaha ty: ‘Fitiavany Jehovah zaho zay, ke mbala ho sakiko fo han̈ano raha hampalahelo izy?’​—1 Jaona 4:9, 10.

4. Nan̈ino favozoan̈a Jehovah niaro ranabavy araiky tsy ho resiny fakampan̈ahy?

⁴ Tojy fakampan̈ahy haloto fitondranten̈a Marta, ranabavy araiky baka Krôasỳ. b Hoizy: “Zaho kalikaly tsy hahavita handiniky tsara. Efa saiky tsy vitako koa hiady tamy fan̈irian̈a han̈ano raha tsy manjary. Fa favozoan̈a Jehovah niaro zaho.” Tamy fomba akory ma favozoan̈a Zan̈ahary niaro izy? Marta nivolan̈a fa niritriretiny ino aby vokadratsiny izikoa izy maloto fitondranten̈a. Afaka man̈ano karaha zen̈y koa atsika. Ino vokany farany ratsy? Atsika hampalahelo Jehovah sady tsy ho afaka hanompo izy mandrakizay.​—Gen. 6:5, 6.

5. Ino raha ianaranao baka amy tantarany Leo?

⁵ Izikoa atsika mavozo Jehovah, atsika tsy minaman̈a aminolo man̈ano raha ratsy. Zen̈y zioty leson hitany Leo baka Congo. Efatra taon̈o tafarany batisanany, izy nanomboko ninaman̈a taminolo man̈ano raha tsy manjary. Tan̈aty dinikinany, izikoa izy mbala tsy man̈ano raha ratsy, izy mbala tsy manota amy Jehovah. Fa tsy ela aby, izy efa voatarikindro kamaradiny aby io higiaka toaka ndreky haloto fitondranten̈a. Izy baka tio nanomboko nieritreritry raha nampianarindry olobeny izy, ndreky hasambaran̈a tsapany taminizy mbala nanompo Jehovah. Ke ino vokany? Tontohitry Leo. Nampiandro antipan̈ahy aby io izy ke tafimpody ndraiky tamy Jehovah. Izy amy zioty antipan̈ahy salakady pisava lalan̈a manokan̈a.

6. Azovy aby man̈angy an̈ohatra handeha hidinihintsika?

⁶ Alo amy zay atsika zioty handiniky Ohabolana toko faha-​9. Mikoran̈a man̈angy an̈ohatra  aroe toko io. Araiky ampitovisin̈y amy fahendrena, fa araiky ndraiky aminy hadalan̈a. (Ampiràn̈a amy Romanina 5:14; Galatianina 4:24.) Atsika koa fa mandiniky toko io, aleva onon̈o fa doniany Satana ty adalany firaisan̈a ndreky boky na video na sary vetaveta. (Efes. 4:19) Zen̈y mahavy atsika mila mifen̈y mavozo Zan̈ahary ndreky miala amy raha ratsy. (Ohab. 16:6) Na lelahy na man̈angy, atsika jiaby samby afaka mahazo hatsaran̈a baka amy raha koran̈iny toko io. Iro man̈angy an̈ohatra aroe io samby mikaiky olo ‘tsy ampy sain̈y’, tsy azovy zen̈y fa iro olo mbala tsy ten̈a nandia fiain̈ana. Iro roe samby mivolan̈a karaha ty: ‘Mavia mihina antran̈onaka.’ (Ohab. 9:1, 5, 6, 13, 16, 17) Fa samby isany ndraiky raha ho azonolo man̈aton̈o kaikiny man̈angy aroe io.

7. Izikoa Ohabolana 9:13-18 zahan̈a, ino raha hahazo olo man̈aton̈o kaikiny man̈angy tsisy jery io? (Zahava koa sary.)

⁷ Zahava karakory ataony ‘man̈angy tsisy jery’ io mikaiky olo. (Vakia Ohabolana 9:13-18.) Mandronton̈o mare izy mikaiky olo mbala tsy ten̈a nandia fiain̈ana aby io karaha ty: ‘Mavia atỳ’ hihina fa masiro izy ato ay! Nan̈ano akory iro olo nan̈aton̈o kaiky io baka tio? Lan̈iany ‘olo maty tsisy raha vita fo an̈y.’ Mety azonao onon̈o fa mikoran̈a raha miramiran̈a amy zen̈y toko voanalohandohany amy bokiny Ohabolana ao. Izio ao mampitandrin̈y atsika amy ‘man̈angy maditry’ ndreky ‘ratsy fitondranten̈a.’ Ambara atsika ao fa ‘tran̈onany milentiky amy fahafatesan̈a.’ (Ohab. 2:11-19) Mampitandrin̈y atsika amy ‘man̈angy maditry’ hafa koa Ohabolana 5:3-10. Vitiny man̈angy io ‘mijotso mandeha amy fahafatesan̈a.’

8. Ino safidy tsy maintsy ataontsika?

⁸ Lan̈iany olo maharen̈y kaikiny man̈angy tsisy jery io tsy maintsy mifidy na han̈eky kaikinany na tsy han̈eky. Mety ho tojy safidy karaha zen̈y koa atsika. Akory, ohatra, ataonao izikoa misy olo mitaon̈o anao haloto fitondranten̈a? Izikoa ndraiky anao sendra mahita sary vetaveta, ino raha hataonao?

9-10. Ino aby antony sasany mahavy atsika tsy tôkony haloto fitondranten̈a?

⁹ Misy antony tsara mahavy atsika tsy tôkony haloto fitondranten̈a. Karaha ty raha nivolan̈iny ‘man̈angy tsisy jery’ io: ‘Mamy rano nangalarin̈y.’ Ino ma ‘rano nangalarin̈y’ zen̈y? Ampiran̈iny Baiboly amy rano mamelombelon̈o, firaisan̈a ataonolo fivadiany. (Ohab. 5:15-18) Lelahy ndreky man̈angy vita mariazy aradalàn̈a ambelany Zan̈ahary han̈ano firaisan̈a. Fa ‘rano nangalarin̈y’ ndraiky hafa foeky. Izio mety firaisan̈a ataonolo aroe tsy fivadiany. Iro mira olo mangalatra, fotony matetiky  iro misitrisitriky. Mety karaha mamy oe fahitandro raha ataondro, izikoa iro mieritreritry fa tsisy olo hahay raha nataondro. Diso hevitry iro, fotony tsisy raha tsy hitany Jehovah, ke tapaka fifandraisandro amy Jehovah. Tsisy raha ratsiratsiny zen̈y! Ino raha ‘mamy’ amy raha karaha zen̈y? (1 Kor. 6:9, 10) Fa tsy zen̈y fo vokany.

¹⁰ Baka amy fijangajangan̈a io mahavy olo mety ho voabaraka, na hahatsiaro ten̈a ho tsisy dikany, hahazo vesatra tsy nirin̈y, ndreky ho robaka tokantran̈o. Tsy hitanaro baka amy zen̈y fa hendry atsika izikoa tsy man̈aton̈o kaikiny man̈angy tsisy jery io? Ankoatrany tapaka fifandraisan̈a amy Jehovah, maro aminolo ratsy fitondranten̈a koa tatrany aretin̈y baka amy firaisan̈a ke loso maty bonera. (Ohab. 7:23, 26) Karaha ty volan̈a mamaran̈a Ohabolana 9:18: ‘Olo nikahiany man̈angy io latsaka an̈aty Fasan̈a.’ Nan̈ino fo mbala maro olo man̈aton̈o kaiky mampiditry lagin̈y karaha zen̈y?​—Ohab. 9:13-18.

11. Nan̈ino ten̈a ratsy mizaha sary vetaveta?

¹¹ An̈isany fandriky fohita mila tandremantsika mare sary ndreky boky avio video vetaveta. Misy olo mivolan̈a fa tsy mampan̈ino mizaha izio. Kanefa ny marin̈y aminany, sary vetaveta io ten̈a mandrobaka fotony olo pizaha izio loso tsisy hajany sady tsy man̈isy hajany olo. Izio koa man̈andevo olo. Sary aby io farandraha sarotro adoso an̈aty jery eky. Ankoatranizen̈y, izio tsy man̈adoso fan̈irian̈a ratsy fa mahaimampiaho izy fo. (Kol. 3:5; Jak. 1:14, 15) Ke matetiky olo mizaha sary vetaveta loso maloto fitondranten̈a.

12. Akory an̈aboahantsika fa atsika mitandrin̈y tsy hizaha sary mety hahavy atsika hieritreritry raha ratsy?

¹² Akory tôkony hataony Kristianin̈y izikoa sendra mahita sary vetaveta? Atsika tôkony hitodiky antany hafa direkty. Ho moramora amintsika han̈ano zen̈y izikoa valera amintsika ankitin̈y fifandraisantsika amy Jehovah. Misy sary iziô tsy ten̈a vetaveta kanefa mety hahavy atsika hanan̈a fan̈irian̈a ratsy. Nan̈ino atsika mila mitandrin̈y amy sary na video karaha zen̈y? Fotony tsy tiantsika foeky hieritreritry han̈ano raha vetaveta zen̈y, ndray ny hely. (Mat. 5:28, 29) Nivolan̈a karaha ty David, antipan̈ahy araiky baka Tailandy: “Zaho man̈ontany ten̈a karaha ty: ‘Ndray tsy ten̈a sary vetaveta sary aby io, mba ho ravoravo edy Jehovah izikoa zaho mizaha izio fo?’ Firitriretan̈a raha karaha zen̈y man̈ampy zaho hitandrin̈y amy raha ataoko.”

13. Ino raha han̈ampy atsika hitandrin̈y amy raha ataontsika?

¹³ Hitandrin̈y tsara amy raha ataontsika atsika, izikoa mavozo tsao tafan̈ano raha mampalahelo Jehovah. Favozoan̈a Zan̈ahary io ‘fanombohany’ na fototrony ‘fahendrena.’ (Ohab. 9:10) Zen̈y raha koran̈iny fanombohany Ohabolana toko faha-​9. Mbala ampiran̈iny amy man̈angy koa ‘ten̈a fahendrena’ amizio ao.

14. Ino koa kaiky hafa koran̈iny Ohabolana 9:1-6?

¹⁴ Vakia Ohabolana 9:1-6. Hitantsika aminy andininy aby io kaiky baka amy Jehovah Pamoron̈o atsika sady Loharanony fahendrena jiaby. (Ohab. 2:6; Rom. 16:27) Andininy aby io koa mikoran̈a tran̈o araiky maventy misy poto fito aby. Zen̈y man̈aboaka fa Jehovah tsy matity sady von̈ono handray lan̈iany olo tihahazo ten̈a fahendrena.

15. Ino raha irahiny Zan̈ahary ataontsika?

¹⁵ Ino raha ianarantsika baka amy man̈angy ampitovisin̈y amy ‘ten̈a fahendrena’ aminy Ohabolana toko faha-​9 io? Jehovah tsy matity salakady man̈amia atsika raha tsara isankarazany. Aminy andininy faha-2 mivolan̈a fa man̈angy io nandoky hanin̈y masiro,  nan̈amboatra divain, avio efa nataony pare latabatra ihinanan̈a. (Ohab. 9:2) Baka io, aminy andininy faha-4 ndreky faha-5: ‘Izy [ten̈a fahendrena] mivolan̈a karaha ty aminolo tsy ampy sain̈y: “Avia hihina mofo namboariko.” ’ Nan̈ino ma atsika tôkony han̈aton̈o kaikiny man̈angy io? Tiany Jehovah hanan̈a fahendrena ndreky ho voaro atsika zanany. Atsika tsy tiany handrobaka fiain̈anantsika ke han̈ano raha mety hanin̈enantsika. Zen̈y mahavy ‘izy mikajy fahendrena hamian̈a olo marin̈y.’ (Ohab. 2:7) Izikoa atsika mavozo Jehovah, atsika loso man̈iry han̈ano raha mamparavoravo izy. Ke ravoravo atsika man̈araka torohevitry feno fahendrena baka aminany.​—Jak. 1:25.

16. Nan̈ino favozoan̈a Zan̈ahary nan̈ampy Alain han̈ano fanapahankevitry tsara, avio ino vokany?

¹⁶ Alain ten̈a navozo Zan̈ahary. Diniha nan̈ino raha zen̈y nan̈ampy izy han̈ano fanapahankevitry tsara. Alain antipan̈ahy avio asanany papianatra. Karaha ty hoizy: “Maro aminolo fiasan̈a araiky aminaka mizaha filma vetaveta, fotony izio zen̈y, ho iro, mampianatra momba firaisan̈a.” Hainy Alain fa raha zen̈y tsy marin̈y. Hoizy: “Zaho mavozo Jehovah, ke tsy mety zaho han̈eky hizaha filma karaha zen̈y. Nazavaiko tamy piaramiasa taminaka koa antony tsy hizahavako izio.” Alain nan̈araka torohevitriny ‘ten̈a fahendrena’, ke ‘nambelany hitariky izy fahiratantsain̈y.’ (Ohab. 9:6) Gaga iro papianatra aby io fa tsy voahodinkodin̈y foeky jeriny Alain. Ke amy zioty, sasany amindro efa mianatra Baiboly sady man̈aton̈o fivorian̈a.

17-18. Ino aby hatsaran̈a ho azonolo man̈aton̈o kaikiny ‘ten̈a fahendrena’, avio ino raha afaka antinaindro? (Zahava koa sary.)

¹⁷ Nampiasa ohatra momba man̈angy aroe io Jehovah baka han̈aboahan̈a amintsika akory fomba hanan̈ana hoavy tsara. Olo mankafy fitondranten̈a maloto man̈aton̈o kaikiny ‘man̈angy tsisy jery’ in̈y. Kanefa tsy haindro aby fa misy vokany amy fiain̈anandro aminy amaray raha ataondro. Aia hiafarandro? Hivarin̈y ‘ampasan̈a.’​—Ohab. 9:13, 17, 18.

¹⁸ Fa tsy karaha zen̈y ndraiky hiafaranolo man̈aton̈o kaikiny ‘ten̈a fahendrena.’ Iro ravoravo fotony iro mahazo raha jiaby ilaindro han̈ampy iro hifandray tsara amy Jehovah. (Isaia 65:13) Karaha ty raha nirahiny Jehovah nisoratiny paminan̈y Isaia: ‘Tandrin̈esa tsara zaho, ke mihinàna hanin̈y ten̈a tsara amy zen̈y anaro hankafy hanin̈y masiro mare.’ (Isaia 55:1, 2) Atsika hampianarin̈y ho tia raha tiany Jehovah ndreky tsy ho tia raha halany. (Sal. 97:10) Ravoravo atsika fotony afaka mikaiky  olo baka iro hahazo hatsaran̈a baka amy ‘ten̈a fahendrena.’ Atsika miran̈a panompo mitsangana ‘amy toeran̈a araiky an̈abo amy tanàna, ke mandronton̈o karaha ty: “Mavia atỳ lan̈iany olo mbala tsy ten̈a nahita fiain̈ana.” ’ Hatsaran̈a ho azontsika ndreky iro olo mitandren̈y atsika aby io tsy zisty amy zioty fo fa mahadin̈y ela. Ho afaka ‘hiain̈y’ mandrakizay atsika izikoa ‘ambelantsika mitariky atsika fahiratantsain̈y.’​—Ohab. 9:3, 4, 6.

19. Eraka Mpitoriteny 12:13, 14, tôkony ho tapakevitry han̈ino atsika? (Zahava koa efajoro “ Miaro Atsika Favozoan̈a Zan̈ahary.”)

¹⁹ Vakia Mpitoriteny 12:13, 14. Irarian̈a favozoan̈a Zan̈ahary hiaro fontsika ndreky han̈ampy atsika hadio fitondranten̈a, avio hifandray marikitry amy Jehovah fo, aminy andra farany efa mahairatsy misy atsika zioty. Favozoantsika Zan̈ahary zen̈y handrisiky atsika hifen̈y hikaiky olo farany maro hitady ‘ten̈a fahendrena’, amy zen̈y iro hahazo hatsaran̈a baka amizio.