Taminy Ady Lehibe II, raimandreniko niala ta Estonie nandeha tan Allemagne. Ke tan̈y zaho teraka. Tafara heliny zaho teraka, raimandreniko nioman̈a hifindra ta Kanada. Tran̈o nipitrahanay voanalohany narikitry Ottawa. Izio tran̈o hely salakady rovany akoho. Masikiny mare zahay tamy zen̈y. Fa nakiry izy, zahay nisy antody natao hanin̈y maraindrain̈y.

Tandraraiky, nisy Vavolombelon̈o Jehovah namaky Apokalypsy 21:3, 4 tamy mamako. Ravoravo mare izy koa fa nahita andininy io ke latsaka foeky ranomasonany. Mamako ndreky papako nanohy nianatra Baiboly, avio tsy ela, iro efa nahafeno fepetra tamy batisa edy.

Raimandreniko tsy ten̈a nahay teny angiley, fa ndray zen̈y iro nazoto nanompo Jehovah mare. Papako tamy zen̈y niasa tamy lozìny fandravan̈ana nickel, ta Sudbury, ta Ontario. Papako niasa alin̈y. Fa ndray zen̈y, zahay ndreky Sylvia zandriko nindesiny nandeha nanompo fo, hely tsy isaka sabotsy. Avio isaka herin̈iandra zahay jiaby niaraka nianatra Tilikambo Fiambesan̈a. Zaho nampianariny papako ndreky mamako ho tia Jehovah. Zen̈y nahavy zaho nanokanten̈a tamy Jehovah, taminy 1956. Zaho tamy zen̈y folo taon̈o. Zaho koa fa mieritreritry fitiavandro Jehovah, zaho mahaitihanompo izy fo.

Loso varimbarian̈a hely zaho koa fa vita fianaran̈anaka tamy lise. Nieritreritry baka zaho fa zaho koa man̈ano pisava lalan̈a, tsy ho tanteraka nofinofinaka. Fotony zaho tsy havory vola handihanako avion hitety tany. Zaho nahita asa tamy radio tantanànanay tiô. Asanaka tao pandefa lamoziky. Tiako mare raha io, fa problemo fo, zaho niasa alin̈y ke matetiky zaho tsy afaka nivory. Avio zaho ninaman̈a taminolo tsy tia Jehovah. Farany tsy nilamin̈y eritreritrinaka, ke zen̈y nandrisiky zaho hiova.

Nifindra ta Oshawa ta Ontario zaho. Tan̈y zaho nifanojy tamy Ray Norman ndreky Lesli anabaviny, avio pisava lalan̈a hafa koa. Zaho niraisindro tsarabe. Hitako iro ravoravo oe, ke zaho nandiniky ndraiky raha tiako hatao amy fiain̈ana. Iro nampirisiky zaho han̈ano pisava lalan̈a, ke nan̈ano pisava lalan̈a zaho tamy Septambra 1966. Zaho ravoravo, tiako fiain̈ananaka. Fa nisy raha tsy nampoizin̈y niboaka baka tio. Izio ten̈a nan̈ova fiain̈ananaka.

Rango zaho tamy lise, zaho efa nangataka hiasa tamy Betela ta Toronto, ta Kanada. Tafara tatỳ, tamy zaho nan̈ano pisava lalan̈a, zaho voakaiky hiasa efatra taon̈o tamy Betela. Fa zaho tamy zen̈y efa tia Lesli mare, ke zaho navozo tsao tsy hahita izy eky izikoa  zaho mandeha amy Betela. Ke zaho nivavaka mare tamy Jehovah. Zaho baka tio tapakevitry handeha hanompo amy Betela fo. Ten̈a tsy nora taminaka nan̈ano veloma Lesli.

Tamy Betela tao, zaho niasa tamy fanasandamba. Avio tafara tatỳ, zaho nan̈ano sekretera. Tan̈atinizen̈y, Lesli loso pisava lalan̈a manokan̈a ta Gatineau, ta Quebec. Natetiky zaho nieritreritry momba Lesli: ‘Asa ino eky raha ataony an̈y zay? Asa nety edy fanapahankevitry nataoko in̈y?’ Fa baka tio nisy raha araiky ten̈a tiako salakady tsy nampoiziko mare niboaka. Navoakaiky tamy Betela i Ray, anadahiny Lesli! Zahay roe foeky tran̈o araiky, ke zahay ndreky Lesli afaka nifandray ndraiky. Nan̈ano mariazy zahay tamy 27 Fevrie 1971. Tapitry taminy andra io iro efatra taon̈o nanompoako tamy Betela.

Zahay ndreky Lesi navoatendry tamy fiangonan̈a araiky miteny fransay, ta Quebec. Taon̈o vitsivitsy tafara tatỳ, taitry mare zaho koa fa navoatendry han̈ano asany faritry. Zaho tamy zen̈y 28 taon̈o. Zaho hitako mbala tanora loatra, sady mbala tsy ampy traikefa han̈ano asany faritry. Fa volan̈a amy Jeremia 1:7, 8 ten̈a nan̈amia korazy zaho. Problemo koa, Lesli efa indroe tatrany aksidan tamy tomabily, ke sarotro nahita toromaso. Ke zahay nieritreritry fa sarotro aminay han̈ano asany faritry. Fa ndray zen̈y, Lesli nivolan̈a karaha ty: “Izikoa zen̈y raha irahiny Jehovah ataontsika, nan̈ino atsika tsy man̈ohatra man̈ano antsendriky?” Ke nataonay fanendrena io. Ravoravo zahay nan̈ano asany faritry tan̈atiny 17 taon̈o.

Feno mare fandaharampotoan̈anaka tamy zaho nan̈ano asany faritry. Ndraikindraiky, tsy ten̈a nahampy fotoan̈a niarahako tamy Lesli. Ke nisy leson araiky maventy hafa koa nila nianarako. Tandraraiky, tinainy maraindrain̈y be tamy zen̈y, nisy olo nampan̈ena sonnerie tamy tran̈o nipitrahanay. Zaho tsy nahita olo tantany tao. Fa ino raha hitako tiô? Tanty araiky findesin̈y man̈ano pikiniky. Tan̈atinizio tao nisy lomboko latabatra, voankazo, fromazy, mofo, divain, avio vera. Nisy taratasy nisy soratra karaha ty koa tao: “Indesa man̈ano pikiniky vadinao.” Fa tsisy an̈aranolo foeky taminany io tao. Tsara mare andra tamy zen̈y. Fa nivolan̈iko Lesli fa zahay tsy afaka handeha fotony maro kabaro nila nomaniko. Nan̈eky ndraiky izy fa nalahelo hely fo. Zaho baka tio nipetraka tamy bironaka tiô, fa eritreritrinaka tsy nilamin̈y. Zaho nandiniky Efesianina 5:25, 28. Andininteny io nan̈ampiany Jehovah zaho hihevitry fihetsehampony vadiko. Zaho baka tio nivavaka, avio zaho nivolan̈a tamy Lesli karaha ty: “Alo atsika!” Ke ravoravo izy. Zahay baka tio nandeha tamy pilasy araiky tsara, amorondrano. Nivilarinay tamy tany lomboko latabatra in̈y. Io an̈isany fotoan̈a ten̈a nankafizinay. Mbala vita fo koa fan̈omanan̈a kabaro aby in̈y!

Naro faritry nitsidihinay, baka ta Kolombia Britaniky firaka ta Terre-Neuve, fa izy ndraiky ten̈a namparavoravo. Tanteraka nofinofinaka hitety tany in̈y. Zaho tihan̈ano Sekoliny Gileada, fa zaho tsy tiho voatendry misionera antany hafa. Taminaka baka misionera zen̈y tsy olo karaha zaho ty foeky. Tsapako fa zaho  tsy nahafeno fepetra tamy zen̈y. Fa ny marin̈y aminany, zaho navozo tsao zahay halefa an Afriky. An̈y baka misy ady avio feno aretin̈y. Efa namparavoravo zahay fanompoan̈a nataonay ta Kanada.

Taminy 1992, nanomboko tsy voasakantsakan̈a asantsika tamindro firenena an̈isany Firaisan̈a Sovietiky taloha. Ke zahay nan̈ontanian̈a tsao afaka man̈ano misionera a Estonie. Lany fan̈ahy zahay! Fa zahay baka tio nivavaka momba zen̈y. Nieritreritry karaha ty ndraiky koa zahay: ‘Izikoa zen̈y raha irahiny Jehovah ataontsika, nan̈ino atsika tsy man̈ohatra man̈ano antsendriky?’ Ke nikenay fanendrena io, avio zaho nieritreritry karaha ty: ‘Nakiry izy tsy an Afriky handifasan̈a zahay!’

Niaraka tamy zen̈y, zahay efa nianatra teny estoniain edy. Afaka fanjava aroe navianay tan̈y, zahay nirahin̈y nan̈ano asany faritry. Zahay tamy zen̈y nitsidiky fiangonan̈a mandeha 46 ndreky antokopitory ta Estonie, Letonia ndreky Litoania, avio Kaliningrad ta Russie. Dikanizen̈y zahay nila nianatra teny letonianin̈y ndreky litoanianin̈y, avio russe. Zay raha sarotro ankitin̈y! Fa ravoravo iro rahalahy ndreky ranabavy aby io nahita zahay niezaka nianatra volan̈andro. Avio iro nan̈ampy zahay koa. Nanjary nisy birony sampan̈a ta Estonie taminy 1999. Ke zaho voatendry ho an̈isany Komitiny Sampan̈a niaraka tamy Toomas Edur, ndreky Lembit Reile, avio Tommi Kauko.

Zahay nanjary nahay piaramanompo maro baka nalefa sesitany ta Sibérie. Nampijalin̈y mare iro tamy prizon salakady nisarahin̈y tamy fianakavian̈andro, fa iro tsy neloko sady tsy nitana heloko ampo. Iro mbala ravoravo ndreky nazoto tamy fanompoan̈a fo. Modelindro nampianatra zahay, fa zahay afaka miaritry ndreky ravoravo fo ndray miatriky raha sarotro isankarazany.

Zahay niasa mare tan̈atiny taon̈o maro, fa tsy dia nisy fotoan̈a nangalan̈a kajo. Ke nanomboko naharen̈y kajo mare Lesli. Zahay tsy nahazo onon̈o fa kaiky hakajoan̈anany io efa niaro aretin̈y. Izy voany fibromyalgie (karazan̈a aretinkozatra), ke zahay efa tseky hody ta Kanada foeky. Zahay koa fa voakaiky han̈aton̈o Sekoliny Komitiny Sampan̈a ta Patterson ta Etazonỳ, zaho tsy nieritreritry fa zahay ho afaka. Fa zahay koa fa nivavaka mare, zahay nan̈eky nandeha fo. Nitahiny Jehovah fanapahankevitrinay io. Tan̈atiny zahay nan̈ano sekoly io, Lesli nahazo fitahan̈a nety tsara taminany. Ke zahay mbala afaka nanohy fanompoan̈anay fo.

Taminy 2008, nisy rahalahy araiky baka tamy foibe nikaiky zaho. Efa hariva andra tamy zen̈y. Zahay taminio efa tafimpody ta Estonie. Izy nan̈ontany tsao zahay afaka mifindra a Congo. Taitry mare zaho tamy zen̈y, fotony amarainizin̈y fo iro efa nila valiny. Tamy voanalohany raha io tsy nivolan̈iko tamy Lesli, fotony zaho navozo tsao izy tsy hahita toro. Fa natao, zaho ndraiky ny tsy tafandry. Zaho nivavaka tamy Jehovah, nivolan̈iko taminany aby antony nampavozo zaho handeha an Afriky.

Amarainizin̈y, zaho koa fa nikoran̈a raha io tamy Lesli, zahay nivolan̈a karaha ty: “Jehovah man̈iraka atsika handeha an Afriky. Akory ahaizantsika fa atsika  tsy mahavita zen̈y ndreky tsy ho tia zen̈y izikoa atsika tsy man̈ohatra antsendriky?” Ke nifindra ta Congo Kinshasa zahay, tafarany 16 taon̈o nanompoanay ta Estonie. Birony sampan̈a tan̈y nisy zaridain tsara sady nangin̈y ndreky nilamin̈y. An̈isany raha voanalohany napetraka Lesli tan̈atiny tran̈onay, karty araiky tsiary niala taminany rango zahay niala ta Kanada. Karaha ty raha nisoratra tamizio: “Miravoravoa fo ndray aia misy anao.” Zahay koa fa nifanojo tamy rahalahy isankarazany ndreky nitariky fampianaran̈a Baiboly, avio nahita karakory haravoan̈a man̈ano asany misionera, fanompoan̈a Jehovah nahainamparavoravo zahay fo. Koa fa nandeha fotoan̈a, zahay nahazo tombontsoa hitsidiky sampan̈a mandeha 13 tan Afriky. Raha zen̈y nahavy zahay nahay kolontsain̈y ndreky karazanolo samihafa. Nihataka tan̈y asalohanaka in̈y! Zahay ten̈a nankasitraka Jehovah nandefa zahay nanompo tan Afriky.

Nihinan̈a karazan̈a hanin̈y vaovao taminay zahay ta Congo, karaha ataony karazany bibibiby madiniky tsiary niritriretiko hoanin̈y. Fa zahay koa fa nahita iro rahalahy aby io nankafy raha io, zahay mba nan̈andran̈a ke nanjary tia koa.

Zahay nandeha tamy faritry antin̈ianany Congo, nankahery iro rahalahy tan̈y ndreky nitondra raha nilaindro. Tan̈y baka nisy dahalo nanafiky tanàna avio nampijaly man̈angy ndreky tsaiky. Ankamarozany piaramanompo tan̈y masikiny mare. Fa ten̈a nanohin̈y fonay nahita iro nan̈anten̈a mare fitsanganan̈a amy maty salakady ten̈a tia Jehovah, avio tsy nivadiky tamy fandaminan̈a foeky. Modelindro nan̈ampy zahay handiniky ino ma ten̈a antony anompoanay Jehovah, ndreky nandrisiky zahay hankafatatra finoan̈anay. Sasany tamindro rahalahy aby io nanjary tsisy tran̈o, avio robaka koa tsabondro jiaby. Raha zen̈y nampatsiaro zaho fa betibetiky fo mety ho ravan̈a fanan̈anantsika. Ke tsisy raha valera mandilatra fifandraisantsika amy Jehovah. Iro rahalahy aby io tsy be tarain̈y, ndray mafy raha niaretandro. Toetsain̈indro nan̈amia korazy zahay hiatriky problemonay, an̈isanizen̈y tsy fahasalaman̈a.

Nisy raha hafa tsy nampoizinay koa niboaka. Zahay nirahin̈y nifindra tamy sampan̈any Hong Kong. Zahay tsiary nieritreritry hipetraka an Asie zen̈y foeky! Fa zahay nan̈eky handeha tan̈y fo, fotony Jehovah  nan̈ampy zahay fo tamy fanendrena jiaby nazonay. Taminy 2013, nalahelo mare zahay niala namanay ndreky niala Afriky, tany tsarabe io. Sady aminio mbala tsy hainay raha hiambin̈y zahay.

Saova mare zahay koa navy ta Hong Kong, fotony tanàna io maresaka avio ahitan̈a olo baka amy tany jiaby. Sarotro mare nianatra teny sinoa. Fa iro rahalahy aby io nandray zahay tsarabe, avio tianay mare hanin̈inolo tan̈y. Nandroso mare asantsika tan̈y, fa nanonga mare koa vidiny tran̈o ndreky tany. Ke ten̈a nety fanapahankevitry nataony Filankevipitantan̈ana nandafo ankamarozany tany ndreky tran̈ony sampan̈a tan̈y. Tsy ela tafaranizen̈y, taminy 2015, zahay nafindra ta Kore Atsimo. Mbala atỳ fo zahay manompo firaka iziô. Tsy maintsy nianatra volan̈a araiky sarotro koa zahay koa fa navy teto. Zahay mbala tsy ten̈a mahay fivolan̈ana koreain, fa iro rahalahy ndreky ranabavy aby io man̈amia korazy zahay mare. Iro mivolan̈a fa zahay zen̈y nahainahay fo.

Tsy voatery ho mora fo mahazo naman̈a. Fa ny raha hitanay, izikoa atsika man̈ano raha voanalohany ke mikaiky olo antran̈ontsika, malakilaky amintsika hahay olo maro. Hitanay koa fa ndray tsy mitovy iro piaramanompo aby io, mbala maro koa raha itovizandro. Avio atsika efa nataony Jehovah afaka man̈abian̈a fontsika baka hahavita hinaman̈a aminolo maro.​—2 Kor. 6:11.

Hitanay koa fa atsika mila mangala tahaka Jehovah ke tia olo jiaby. Atsika koa mila mangala onon̈o porofo ahitan̈a fa Jehovah tia atsika salakady mitaridalan̈a atsika. Zahay koa fa kivy na misalasala tsao tsy tiany piaramanompo, mimpody vakinay ndraiky iro karty ndreky taratasy mankahery baka tamy kamaradinay. Hitanay tsarabe koa fa Jehovah namaly vavakanay. Zahay namezany toky fa zahay tiany ankitin̈y, avio zahay namezany angovo.

Tan̈atiny taon̈o maro zay, hitanay ndreky Lesli fa ten̈a raha maventy manokan̈a fotoan̈a hiarahanay roe, ndray zahay maletry karakory. Hitanay koa fa ndraikindraiky mila itokizan̈a fo izikoa sendra tafan̈ano raha diso, intsaka eky izikoa fa mianatra volan̈a vaovao. Avio isaka hariva, zahay mifen̈y mangala onon̈o raha namparavoravo zahay, ke man̈ano mersy Jehovah amy zen̈y.

Tsoriko ny marin̈y fa, zaho tsiary nieritreritry han̈ano misionera zen̈y na hipetraka antany hafa foeky. Hitako tamy raha niain̈ako fa tsisy raha tsy posibla zen̈y foeky izikoa anten̈a ampiany Jehovah. Tsaroako paminan̈y Jeremia nivolan̈a: ‘Nifitahinao zaho Jehovah e.’ (Jer. 20:7) Ke tsy nampoizinay foeky fa maro raha tsara namezany zahay. Tio koa fitahian̈a tsy niritriretinay foeky, firaka tamy nofinofinaka handeha avion in̈y nitantirahiny. Maro tany nititezinay, maromarony lay tamy nofinofinaka tamy zaho mbala hely. Zahay nitsidiky sampan̈a tan̈atiny kontinan dimy! Zaho koa ten̈a mankasitraka Lesli, fotony izy von̈ono hanohan̈a zaho fo tamy fanendrena jiaby nazoko.

Tsy adosonay an̈atiny jerinay foeky fa raha jiaby ataonay, ataonay nohony fitiavanay Jehovah. Hatsaran̈a jiaby ankafizintsika amy zioty mbala tsendriky izy fa man̈etsabe mbala ho avy, lera atsika hiain̈y mandrakizay. Amy zen̈y Jehovah ‘han̈abian̈a tan̈anany, ke raha jiaby manampahin̈ana ho afapo amy raha irindro.’​—Sal. 145:16.