Tsy maintsy manan̈a finoan̈a atsika, baka hamparavoravo Zan̈ahary. Fa Baiboly mivolan̈a fa ‘tsy olo jiaby manan̈a finoan̈a aby.’ (2 Tes. 3:2) Tamin’ny apostoly Paoly nivolan̈a izio, irô olo ‘ratsy fan̈ahy ndreky kafiry’ nan̈enjiky izy ny tiany koran̈iny. Fa volan̈anany momba finoan̈a io ndraiky handeha amin’olo jiaby. Misy baka olo sasany tsy man̈eky porofo fa misy Zan̈ahary Mpamôron̈o. (Rom. 1:20) Sasany ndraiky mivolan̈a fa irô mino raha iritriretindrô fa manan̈a angôvo mahery. Fa zen̈y fo mbala tsendriky ten̈a finoan̈a.

Mila resy lahatra atsika fa Jehovah io misy ankitin̈y, aviô izy mitahy lan̈iany olo ten̈a mino izy amin’ny ankitin̈y. (Heb. 11:6) Finoan̈a io mbala an̈isan’ny vokatran’ny fan̈ahy masin̈in’ny Zan̈ahary. Ke izikoa misy olo tihahazo fan̈ahy masin̈y io, izy mila mivavaka, mangataka izio amy Jehovah. (Lioka 11:9, 10, 13) Mamaky Baiboly koa fomba araiky maventy hazahoantsika fan̈ahy masin̈y, fôtony baka tamy fan̈ahy masin̈y nahavitan’olo nanoratra izio. Atsika koa mety mieritreritry raha nivakintsika ndreky mifen̈y man̈araka raha nianarantsika tao. Amy zen̈y fan̈ahy masin̈in’i Jehovah io hisy heriny amy fiain̈anantsika, ke hanjary hanan̈a finoan̈a araiky ten̈a mamparavoravo Jehovah in̈y atsika.