1. Nampiran̈in’i Davida amin’ino ma Jehovah, izikoa Salamo 18:46 io zahan̈a?

 NDRAIKINDRAIKY misy problemo mandalo, ke mety hampasarotro fiain̈anantsika mare na hampiova fiain̈anantsika foeky. Ravoravo atsika fôtony manan̈a Jehovah Zan̈aharintsika han̈ampy atsika! Tamy lahatsoratra talohan’ity, nampatsiarôvin̈y atsika fa Jehovah io Zan̈ahary velon̈o, aviô izy vôn̈ono fo han̈ampy atsika. Atsika koa mahita fa izy manohan̈a atsika, mahaimatoky fo atsika fa Jehovah io “Zan̈ahary velon̈o” ankitin̈y. (Vakia Salamo 18:46.) Fa kanefa, tafaran’ny nivolan̈an’i Davida raha zen̈y, “lampimbatonaka” koa nivolan̈any Zan̈ahary. Nan̈ino ma Jehovah Zan̈ahary velon̈o io ampiran̈iny amy lampimbato tsy manam-pahin̈ana?

2. Davida nivolan̈a fa Jehovah “lampimbatonaka.” Ke ino raha handeha hianarantsika baka amy volan̈an’i Davida io?

² Amy lahatsoratra ty, atsika hikoran̈a nan̈ino ma Jehovah koran̈iny fa karaha lampimbato, aviô ino raha ianarantsika momba izy baka amy zen̈y. Hianarantsika koa akôry hahavitantsika hatoky izy tsarabe ke han̈ano izy Lampimbatontsika. Aviô amy farany atsika handiniky, akôry hangalantsika tahaka toetrin’i Jehovah aby karaha lampimbato io.

NAN̈INO MA JEHOVAH VOLAN̈INY FA LAMPIMBATO?

3. Karakôry matetiky ampiasan’ny Baiboly volan̈a “lampimbato” zen̈y? (Zahava amy fôn̈ony.)

³ Amy Baiboly ao, izikoa fa mampiasa volan̈a “lampimbato” zen̈y, irô toetry anan̈an’i Jehovah aby io raha tiany koran̈iny. Matetiky izikoa fa misy mpanompon’ny Zan̈ahary midera izy ao, irô mampiasa volan̈a “lampimbato” io ivolan̈ana Jehovah. Amy Deoteronomia 32:4 voanalohany ahitan̈a zen̈y. Hana koa nivolan̈a tamy vavaka nataony fa “tsisy lampimbato karaha Zan̈aharintsika.” (1 Sam. 2:2) Aviô Habakoka koa nivolan̈a fa Jehovah ‘Lampimbatonany.’ (Hab. 1:12) Baka iô koa, mpanoratra Salamo faha-73  nivolan̈a fa Zan̈ahary ‘lampimbaton’ny fônany.’ (Sal. 73:26) Aviô koa Jehovah foeky nivolan̈a fa izy lampimbato. (Isa. 44:8) Atsika iziôty handiniky toetry telo ivolan̈ana fa Jehovah mira “Lampimbatontsika”, aviô akôry hangalantsika tahaka toetrinany aby zen̈y.​—Deot. 32:31.

4. Ino ivolan̈ana fa Jehovah io fialofan̈a? (Salamo 94:22)

⁴ Jehovah io fialofan̈a. Izikoa fa misy mahaleny be in̈y, olo mandeha milefa amy tany misy lampimbato, misitriky ao baka tsy ho azon’izio. Karaha zen̈y koa ataon’i Jehovah amintsika izikoa fa mandalo raha sarotro. (Vakia Salamo 94:22.) Ampiany atsika baka tsy ho robaka fihavan̈antsika aminany, aviô man̈amia toky atsika izy fa mbala hisy farany jaly mahazo atsika io fa tsy hitohy mandrakizay. Aviô koa izy mbala mampan̈anten̈a fa tsy ho ela, hadosony raha jiaby mahavy atsika mijaly ndreky miasaloha io.​—Ezek. 34:25, 26.

5. Akôry tôkony hataontsika, baka Jehovah hanjary lampimbato Fialofantsika?

⁵ Fomba araiky han̈anaovantsika Jehovah Fialofantsika, atsika mivavaka aminany. Atsika koa man̈ano zen̈y, izy man̈amia atsika ‘fiadan̈ananany’ hiaro fôntsika ndreky sain̈intsika. (Fil. 4:6, 7) Diniha baka tantaran’ny rahalahy Artem, nigadrain̈y baka amy finoan̈anany. Tamin’izy tamy prizon tan̈y, nisy mpan̈ano ankety natetiky nan̈ano ankety izy, ke nampijaly izy ndreky nampitahotro izy foeky. Nivolan̈iny karaha ty: “Isaka zaho natao ankety, niasaloha mare zaho. ... Fa zaho nivavaka tamy Jehovah fo. Zaho nangataka izy hiaro fônaka, ndreky han̈amia zaho fahendrena. Tsy niasa taminaka foeky tetikadin’ny mpan̈ano ankety io. ... Jehovah nan̈ampy, ke zaho nira olo nialoko tambadikin’ny riba vato in̈y tamy zen̈y.”

6. Nan̈ino ma atsika mety matoky Jehovah fo? (Isaia 26:3, 4)

⁶ Jehovah io atokisan̈a. Karaha ataon’ny lampimbato tsy mihetsiky fa iô fo, haintsika koa fa Jehovah iô fo han̈ampy atsika. Matoky izy atsika, fôtony izy “Lampimbato mandrakizay.” (Vakia Isaia 26:3, 4.) Izy velon̈o fo, ke izy mahavita man̈atanteraka fampan̈antinan̈anany fo. Izy maharen̈y vavaka ataontsika, aviô izy man̈ampy atsika amy raha ilaintsika. Milampy amy Jehovah koa atsika, fôtony izy tsy mivadiky amin’olo manompo izy. (2 Sam. 22:26) Izy tsy man̈adin̈a raha ataontsika foeky, ke izy tsy maintsy hitahy atsika.​—Heb. 6:10; 11:6.

7. Izikoa atsika milampy amy Jehovah, ino raha ho hitantsika? (Zahava koa sary.)

⁷ Man̈ano Jehovah lampimbatontsika atsika, izikoa milampy aminany tsarabe. Matoky baka atsika fa izikoa atsika man̈araka volan̈anany nata amy raha faran’ny sarotro, izy hitahy atsika. (Isaia 48:17, 18) Izikoa amy zay hitantsika fa izy mitahy atsika, hahaihatoky izy fo atsika. Ke atsika manjary ho vôn̈ono hiatriky fitsapan̈a mbala ho avy, firaka amy fitsapan̈a faran’ny sarotro, ke tsisy hahavita han̈ampy atsika izikoa tsy Jehovah amy zen̈y. Matetiky amy fotoan̈a karaha zen̈y atsika mahatsapa tsarabe fa Jehovah ten̈a mety atokisan̈a amin’ny ankitin̈y. Karaha zen̈y nivolan̈in’i Vladmir ty: “Fotoan̈a nidohako tamy prizon tao fotoan̈a ten̈a nifandraisako tamy Zan̈ahary mare eky. Nianatra natoky Jehovah tsarabe zaho tamy zen̈y, fôtony zaho zaraiky  fo tao, ke efa Jehovah edy nahavita nan̈ampy zaho hiaritry.”

8. a) Nan̈ino atsika matoky fa Jehovah io tsy miovaova? b) Ino hatsaran̈a azontsika nohon’ny atsika manan̈a Zan̈ahary mira Lampimbato io? (Salamo 62:6, 7)

⁸ Jehovah io tsy miovaova. Karaha ataon’ny lampimbato maventy be in̈y, Jehovah tsy miovaova sady tsy voahozonkozon̈o. Toetrinany ndreky fikasan̈anany koa mbala tsiary niova. (Mal. 3:6) Adama ndreky Eva koa fa nivadiky, Jehovah tsy nan̈ova fampan̈antinan̈anany foeky. Karaha nisoratin’ny apostoly Paoly, Jehovah “tsy mivadiky foeky.” (2 Tim. 2:13) Dikan’izen̈y, na ino na ino raha mandalo, na ino na ino raha ataon’olo, Jehovah tsiary ndraiky man̈ova toetrinany, fikasan̈anany ndreky fitsipikinany. Jehovah io tsiary ndraiky niova, ke haintsika fa izy han̈ampy atsika an̈atin’ny fotoan̈a sarotro, ndreky tsy hivadiky amy fampan̈antinan̈anany momba ny amaray foeky.​—Vakia Salamo 62:6, 7.

9. Ino raha ianaranao baka my tantaran’i Tatyana?

⁹ Izikoa atsika mangala onon̈o toetrin’i Jehovah aby io ndreky fikasan̈anany momba tany ty ndreky momba olombelon̈o, hatoky izy atsika, ndreky han̈ano izy lampimbatontsika. Ke atsika koa fa mandalo raha sarotro, raha zen̈y han̈ampy atsika ho kalma fo, ndreky tsy hivadiky aminany koa. (Sal. 16:8) Karaha zen̈y nataon’ny ranabavy araiky, Tatyana an̈arany. Nambesan̈a tamy tran̈onany tao izy, fôtony tsy nan̈eky hivadiky. Karaha ty nivolan̈iny: “Tsisy naman̈a foeky zaho tamy zen̈y, ke natetiky zaho nahatsiaro kivy.” Fa izy baka tiô nangala onon̈o Jehovah ndreky fikasan̈an’i Jehovah momba olombelon̈o, ke hainy fa ten̈a raha maventy izikoa izy miaritry amy raha sarotro andalovany io. Raha zen̈y nan̈ampy izy ho kalma ndreky nahazo angôvo tsy hivadihan̈a tamy Jehovah. Karaha ty nivolan̈in’i Tatyana: “Ten̈a nan̈ampy zaho nangala onon̈o nan̈ino zaho navoa raha karaha io. Lôso tsaroako fa nohon’ny fitiavako Jehovah fo iaretako raha jiaby io, ke tsy mieritreritry be momba ain̈inaka tompiny eky zaho.”

10. Akôry han̈anaovantsika Jehovah ho Lampimbatontsika rango iziôty?

¹⁰ Mbala handalo raha faran’ny sarotro atsika teteky iô, ke ten̈a mila milampy amy Jehovah atsika mandilatran’ny taloha. Ziôty fotoan̈a tôkony hankafatarantsika fatokisantsika fa izy han̈ampy atsika tsy hivadiky, na ino na ino raha mandalo. Akôry han̈anaovantsika zen̈y? Mamakia tantaran’olo aby amy Baiboly ao, ndreky tantaran’ny Vavolombelon̈on’i Jehovah amin’ny andra iziôty. Zahava akôry nan̈aboahan’i Jehovah fa izy nanohan̈a irô mpanomponany aby io, ke nira lampimbato in̈y tamindrô. Fan̈anaovanao raha zen̈y hahavy anao han̈ano Jehovah hanjary Lampimbatonao.

ALEVA TAHAKA IRÔ TOETRIN’I JEHOVAH ABY IO

11. Nan̈ino ma atsika tihangala tahaka toetrin’i Jehovah aby mira lampimbato io? (Zahava koa efajoro “ Tanjon̈o Mety Takarin’ny Rahalahy Tanora.”)

¹¹ Efa nidinihintsika toetrin’i Jehovah mahavy izy koran̈iny karaha lampimbatontsika in̈y. Iziôty ndraiky, diniha akôry hangalantsika tahaka irô toetrinany aby io. Izikoa atsika man̈ano erakan’ny vitantsika mangala tahaka toetrin’i  Jehovah aby io, hankahery irô rahalahy ndreky ranabavintsika aby io atsika. Ohatra, Kefasy (na “Petera”) nataon’i Jesosy an̈aran’i Simona. Ke dikan’i Kefasy zen̈y, “Silaka Lampimbato.” (Jaona 1:42) Jesosy nivolan̈a fa Petera hankahery olo tamy fiangonan̈a ndreky hankafatatra finoan̈andrô. Volan̈in’ny Baiboly fa irô anti-pan̈ahy aby io mira alokon’ny lampimbato maventy amy tany paiky in̈y. Izio sarin-teny ivolan̈ana fa irô io miaro olo jiaby an̈atin’ny fiangonan̈a ao. (Isaia 32:2) Ny marin̈y aminany, olo jiaby an̈atin’ny fiangonan̈a hahazo hatsaran̈a, izikoa samy mifen̈y man̈aboaka toetrin’i Jehovah karaha lampimbato io.​—Efes. 5:1.

12. Akôry aby mety han̈ampiantsika namantsika an̈atin’ny andra sarotro?

¹² Mifen̈a hanjary fialofan̈a. Matetiky atsika mahavita man̈ampy irô rahalahy ndreky ranabavintsika aby io izikoa fa misy antambo mandalo, na misy korontan̈a na lagera. Hahairatsy fo “andra farany” misy atsika ty. Ke matoky atsika fa ten̈a mila mifan̈ampy mandilatra amy ziôty atsika amin’ny hoavy. (2 Tim. 3:1) Mila man̈ampy namantsika amin’ny ara-pihetseham-pô ndreky amin’ny ara-pan̈ahy koa atsika. Fomba araiky han̈anaovantsika zen̈y, atsika mikoran̈a amindrô lera avy amy Tran̈o Fivorian̈a an̈y, ndreky mankahery irô. Tiantsika han̈ano fiangonan̈a io ho tany misy fitiavan̈a ndreky fankahirezan̈a. Maro amin’olo iziôty tsy mifankatia foeky, ke raha zen̈y mahavy rahalahy ndreky ranabavintsika ho kivy ndreky mahatsiaro tsisy olo tia foeky. Ke izikoa irô avy mivory, tiantsika han̈ano raha hahatsapandrô fa irô misy naman̈a mankahery ndreky ten̈a tia irô.

13. Akôry ataon’ny anti-pan̈ahy aby io mankahery olo an̈atin’ny andra sarotro? (Zahava koa sary.)

¹³ Anti-pan̈ahy aby io mankahery irô rahalahy ndreky ranabavy aby io amy fotoan̈a sarotro, ke mira tany fialofan̈a in̈y fo irô. Lera misy antambo, na misy aretin̈y mila fitahan̈a meky, tsy mirekireky irô mandamin̈y fan̈ampian̈a irô rahalahy ndreky ranabavy aby io. Irô koa man̈amia  tari-dalan̈a ndreky fankahirezan̈a baka amy Baiboly. Rahalahy ndreky ranabavy aby io hazoto han̈aton̈o anti-pan̈ahy izikoa irô anti-pan̈ahy aby io tsara fan̈ahy amindrô izikoa fa mivolan̈a, aviô mitandren̈y irô tsarabe ndreky mahatakatra raha mahazo irô. Irô toetry aby zen̈y hahavy irô hahatsapa ho tian̈a, ke ho moramora amindrô man̈araka tari-dalan̈a azondrô baka amy Baiboly, amezan’ny anti-pan̈ahy irô.​—1 Tes. 2:7, 8, 11.

14. Akôry mety han̈aboahantsika fa atsika olo mety atokisan̈a?

¹⁴ Ataova raha hatokisan’olo anao. Tiantsika izikoa atsika atokisan’olo, intsaka eky izikoa olo io an̈atin’ny andra sarotro. (Ohab. 17:17) Akôry ataontsika baka atsika atokisan’olo? Mifen̈y atsika hangala tahaka toetrin’i Jehovah isan’andra. (Mat. 5:37) Ohatra, mifen̈y atsika man̈atanteraka raha volan̈intsika amin’olo, ndreky mifen̈y man̈aja fotoan̈a. Aviô izikoa misy olo mila fan̈ampian̈a, mifen̈y atsika man̈ampy irô. Baka iô koa, mifen̈y atsika man̈ano tsarabe anjarantsika, mifan̈araka amy toromariky azontsika.

15. Ino aby hatsaran̈a azon’ny fiangonan̈a, izikoa irô anti-pan̈ahy aby io mafatoky?

¹⁵ Ino aby hatsaran̈a ho azon’ny fiangonan̈a izikoa anti-pan̈ahy aby io mafatoky? Ho kirikiry asalohan’ny rahalahy ndreky ranabavy aby io izikoa irô anti-pan̈ahy aby io, karaha ataon’ny mpiandraikitrin’ny andiam-pitorindrô, mora kahin̈y lera misy raha manahiran̈a irô. Mahatsiaro ho voakarakara koa irô mpitory aby io, izikoa haindrô fa anti-pan̈ahy aby io vôn̈ono han̈ampy  irô. Aviô izikoa torohevitry amiandrô baka amy Baiboly, ndreky baka amy boky ndreky gazetintsika by io, fa tsy baka amin’ny hevitrindrô tompiny fo, hatokisan’ny rahalahy ndreky ranabavy aby io irô. Aviô anti-pan̈ahy aby io koa tsy man̈ambara amin’olo sekiren’ny rahalahy ndreky ranabavy aby io ndreky mitana fampan̈antinan̈andrô, hahaihatoky irô fo rahalahy ndreky ranabavy aby io.

16. Izikoa atsika man̈ano raha volan̈in’i Jehovah fa marin̈y, ino aby hatsaran̈a ho azontsika?

¹⁶ Mifen̈a tsy hiovaova. Hanjary modely tsara harehan’olo hafa atsika izikoa man̈araka volan̈an’i Jehovah amy raha jiaby, aviô izikoa mangala fanapahan-kevitry miôrin̈y amy Baiboly. Izikoa atsika mianatra volan̈an’ny Zan̈ahary ndreky mankafatatra finoantsika izy, tsy hivadiky aminany ndreky amy fitsipikinany atsika. Ho haintsika koa amy zen̈y irô fampianaran̈a diso aby io ndreky hevitry aby tsy mifan̈araka amy fisain̈anan’i Jehovah. Tsy ho voataon̈o han̈araka irô io koa atsika. (Efes. 4:14; Jak. 1:6-8) Atsika koa mino Jehovah tsarabe ndreky mino fampan̈antinan̈anany, tsy ho taitaitry atsika izikoa fa maharen̈y vaovao ratsy. (Sal. 112:7, 8) Ho vitantsika koa han̈ampy irô olo miatriky raha sarotro.​—1 Tes. 3:2, 3.

17. Akôry ataon’ny anti-pan̈ahy aby io han̈ampy irô rahalahy aby io ho kalma ndreky ho fatatra finoan̈a fo?

¹⁷ Anti-pan̈ahy aby io tsy tôkony ho hisy raha hivolan̈ana irô, fa tôkony handiniky tsarabe, tia raha milamin̈y ndreky mpandefitry. Irô ‘man̈araka tsarabe volan̈a azo antoko’, ke man̈ampy olo hafa ho kalma ndreky ho fatatra finoan̈a fo. (Tit. 1:9; 1 Tim. 3:1-3) Irô anti-pan̈ahy aby io koa man̈amia ohatra tsara ndreky man̈ano fitsidihan̈a ôndrikôndriky, ke raha zen̈y man̈ampy irô mpitory aby io tsy ho tapatapaka amy fivorian̈a, amy fanompoan̈a ndreky amy fianaran̈a manokan̈a. Irô rahalahy ndreky ranabavy aby io koa fa andalovan’ny problemo mahavy irô miasaloha mare in̈y, irô anti-pan̈ahy aby io mampatsiaro irô fa irô tôkony hatoky Jehovah, ndreky tsy han̈adin̈a fampan̈antinan̈an’i Jehovah foeky.

18. Nan̈ino atsika tihidera Jehovah ndreky tihifandray marikitry aminany? (Zahava koa efajoro “ Fomba Ifandraisan̈a Marikitry amy Jehovah.”)

¹⁸ Atsika koa fa baka nandiniky toetrin’i Jehovah maro tsara aby in̈y, atsika mety mivolan̈a karaha nataon’ny Mpanjaka Davida ty: “Irarian̈a hiderain̈y Jehovah Lampimbatonaka.” (Sal. 144:1) Jehovah mety atokisan̈a fo. Ndray firaka atsika matoe, atsika matoky fa Jehovah mbala han̈ampy atsika hifandray marikitry aminany fo. Ke atsika mety mivolan̈a karaha ty: “Izy Lampimbatonaka.”​—Sal. 92:14, 15.