1. Ino han̈ampy vahoakan’i Jehovah hahavita hanompo izy fo, nata iô problemo maro sarotro mety ho tôjy irô?

 “FOTOAN̈A sarotro tsy mora atrefin̈y” ikahian’ny Baiboly andra iain̈antsika iziôty. (2 Tim. 3:1) Atsika tôjy raha sarotro karaha raha sarotro tôjy olo jiaby amy donian’i Satana ty. Fa sôsoko zen̈y koa, atsika mbala toherin’olo ndreky injehin’olo. Fa ino han̈ampy atsika hahavita hanompo Jehovah fo, nata iô problemo aby zen̈y? An̈isan’ny raha araiky han̈ampy atsika amy zen̈y, mangala onon̈o fa Jehovah man̈ampy atsika, aviô izy “Zan̈ahary velon̈o.”​—Jer. 10:10; 2 Tim. 1:12.

2. Akôry hahaizantsika fa Jehovah mahavita man̈amia angôvo atsika?

² Jehovah mahita raha sarotro jiaby tôjy atsika, aviô izy vôn̈ono han̈ampy atsika fo. (2 Tan. 16:9; Sal. 23:4) Izikoa atsika mangala onon̈o fa Zan̈aharintsika io ten̈a mikarakara atsika ndreky vôn̈ono fo han̈ampy atsika, atsika hahazo angôvo hahavitantsika hiaritry zay raha sarotro mandalo. Karaha zen̈y nataon’ny Mpanjaka Davida. Atsika handiniky tantaranany.

3. Ino ma raha tian’i Davida havian̈a, tamin’izy nivolan̈a fa “Jehovah velon̈o”?

³ Davida nahay Jehovah tsarabe, aviô nilampy taminazy. Nisy fotoan̈a izy nitadiavindrô fahavalonany aby io hivonen̈a. An̈isan’ny fahavalonany io Mpanjaka Saoly. Davida nivavaka tamy Jehovah nangataka fan̈ampian̈a taminany. (Sal. 18:6) Ke Zan̈ahary koa fa namaly vavakanany ndreky namonjy izy, karaha ty ho Davida: “Jehovah velon̈o!” (Sal. 18:46) Ino ma raha tian’i Davida havian̈a amy zen̈y? Karaha ty volan̈in’ny boky araiky momba izio: “Tian’i Davida haboaka fa izy ten̈a natoky fa Jehovah io Zan̈ahary velon̈o, ke vôn̈ono han̈avotro vahoakanazy fo. Ten̈a hain’i Davida tsarabe fa Zan̈aharinazy io velon̈o, ke izy nahaitapa-kevitry hanompo ndreky hidera Jehovah fo.”​—Sal. 18:28, 29, 49.

4. Ino aby hatsaran̈a azontsika baka amy fahaizantsika fa Jehovah io Zan̈ahary velon̈o?

 ⁴ Atsika izikoa ten̈a matoky fa Jehovah io Zan̈ahary velon̈o, hazoto hanompo izy fo atsika. Hanan̈a angôvo hahavitan̈a hiatriky raha sarotro koa atsika, ke hifen̈y fo hanohy fanompoan̈a. Atsika koa hahaiho tapa-kevitry hifandray marikitry amy Jehovah fo.

HAN̈AMIA ANGÔVO ANAO ZAN̈AHARY VELON̈O

5. Ino han̈amia toky atsika lera miatriky raha sarotro? (Filipianina 4:13)

⁵ Ho vitantsika hiatriky zay raha sarotro mety handalo, na maventy zen̈y na madiniky, izikoa atsika mangala onon̈o fa Jehovah io velon̈o sady iô fo han̈ampy atsika. Tsisy problemo sarotro amy Zan̈aharintsika io foeky baka! Izy Faran’ny Mahery, ke vitany han̈amia atsika angôvo hahavitantsika miaritry. (Vakia Filipianina 4:13.) Ke zen̈y man̈amia toky atsika fa ho vitantsika fo hiatriky zay raha sarotro mandalo. Aviô izikoa hitantsika fa Jehovah nan̈ampy atsika tamy raha sarotro madinidiniky tôjy atsika, atsika hahaihatoky fo fa izy han̈ampy atsika koa amy raha sarosarotron’izen̈y.

6. Ino raha niain̈an’i Davida tamin’izy mbala hely, ke nahavy izy nahainatoky Jehovah fo?

⁶ Diniha baka raha aroe niain̈an’i Davida ke nahavy fatokisany Jehovah nahainitombo fo. Tamy Davida mbala hely, izy mpiambin̈y ôndrikôndriky. Nisy orsy ndreky lion handeha hihina ôndrikôndrikin’ny babany. Tamy raha aroe io, vitan’i Davida nan̈ian̈a irô biby aby io, ke nan̈avotro ôndrikôndriky tamy vavandrô. Fa Davida tsy nieritreritry foeky fa baka tamin’ny angôvonany tômpiny nahavitany zen̈y. Hainy fa baka tamy Jehovah angôvo nahavitany zen̈y. (1 Sam. 17:34-37) Tsy nadin̈an’i Davida foeky raha jiaby zen̈y. Izikoa izy fa nisaintsain̈y zen̈y, izy nahainatoky fo fa Zan̈ahary velon̈o io han̈amia angôvo izy amin’ny hoavy.

7. Azôvy ten̈a nizahavan’i Davida, aviô nan̈ino ma raha zen̈y nan̈ampy izy niady tamy Goliata?

⁷ Tafaran’izin̈y, Davida tamy zen̈y mbala tsy ampy 20 taon̈o, izy nandeha nizaha irô maramila israelita aby io. Izikoa fa navy tan̈y, zahavany irô maramila aby io navozo mare. Nisy maramila filistiny fatatra be zay baka, Goliata an̈arany, ‘nitady ady tamindrô Israelita aby io.’ (1 Sam. 17:10, 11) Navozo mare irô maramila israelita aby io, fôtony jerindrô tamin’ny hafataran̈an’i Goliata ndreky raha nivolan̈iny fo. (1 Sam. 17:24, 25) Davida ndraiky tsy karaha zen̈y. Taminany baka, Goliata koa fa nitady ady tamindrô maramila israelita aby io, nira ‘nitady ady tamy Zan̈ahary velon̈o.’ (1 Sam. 17:26) Jehovah fo nizahavan’i Davida. Izy natoky fa Zan̈ahary nan̈ampy izy tamin’izy niambin̈y ôndrikôndriky in̈y, mbala han̈ampy izy koa amy diany araiky ty. Ke nohon’ny fatokisany fan̈ampian̈an’ny Zan̈ahary nahavy Davida niady tamy Goliata, ke nandresy ankitin̈y izy!​—1 Sam. 17:45-51.

8. Ino raha han̈ampy atsika hahaihatoky Jehovah fo lera miatriky raha sarotro? (Zahava koa sary.)

⁸ Ho vitantsika koa hiatriky raha sarotro, izikoa atsika mangala onon̈o fa Zan̈ahary velon̈o io vôn̈ono han̈ampy atsika. (Sal. 118:6) Hatoky raha zen̈y atsika izikoa mandiniky raha nataony taloha tan̈y. Ke mamakia tantara amy Baiboly han̈ampy anao hangala onon̈o karakôry nan̈avotan’i Jehovah mpanomponany. (Isaia 37:17, 33-37) Baka iô diniha koa irô tatitry amy jw.org man̈aboaka karakôry nataon’i Jehovah nan̈ampy irô rahalahintsika ndreky ranabavintsika aby io, amin’ny andra iziôty. Ankoatran’izen̈y, tsarova akôry fomba nan̈ampian’i Jehovah anao manokan̈a. Anao mety hieritreritry fa Jehovah mbala tsiary nisy raha niavaka nataony taminao, karaha nataony nan̈ampy Davida nahavita niady tamy lion ndreky orsy in̈y. Kanefa, aza adin̈a fa efa maro  raha nataon’i Jehovah nan̈ampian̈a anao. Izy nitaon̈o anao hanjary kamaradinany. (Jaona 6:44) Aviô, baka aminany fo koa mahavy anao mbala manompo izy firaka iziôty. Ke angataha izy han̈ampy anao hahatsiaro fomba namaliany vavakanao ndreky fomba nan̈ampiany anao tamy fotoan̈a nilanao izy tsarabe, na koa fomba nan̈ampiany anao tamin’ny anao niatriky raha sarotro. Mieritreritry raha aby zen̈y hahavy anao hahaihatoky fo fa Jehovah mbala vôn̈ono han̈ampy anao fo.

9. Ino raha mila tsaroantsika lera miatriky raha sarotro? (Ohabolana 27:11)

⁹ Ndray ino raha atrefintsika, ho tsara fo eritreritrintsika, izikoa atsika tsy man̈adin̈a fa Jehovah io velon̈o. Fôtony nan̈ino? Ho lôso tsapantsika fa raha sarotro atrefintsika io mbala an̈isan’ny adihevitry maventy manoloan̈a Jehovah ndreky Satana. Mivolan̈a baka Devoly fa izikoa atsika miatriky raha sarotro zen̈y, atsika hiala Jehovah edy. (Joba 1:10, 11; vakia Ohabolana 27:11.) Fa kanefa, izikoa atsika miaritry fo ke tsy mivadiky amy Jehovah ndray miatriky raha sarotro, aboakantsika amy zen̈y fa atsika tia Jehovah, ndreky man̈aporofo fa Devoly io mpavandy. Ke manohitry anao ma fanjakan̈a, sa anao sahiran̈a amy tady vola, sa olo amy faritaninarô tsy nahefa mitandren̈y anao, sa misy raha sarotro hafa andalovanao? Izikoa zen̈y raha mahazo anao, tsarova fa raha andalovanao io hahavitanao man̈aboaka amy Jehovah fa anao tihamparavoravo fônany. Aleva onon̈o koa fa Jehovah tsy han̈ambela anao hiatriky raha sarotro mandilatran’ny din̈inao. (1 Kor. 10:13) Izy han̈amia angôvo anao hahavitanao miaritry.

HITAHY ANAO ZAN̈AHARY VELON̈O

10. Ino raha mbala hamian’ny Zan̈ahary velon̈o irô olo manompo izy?

¹⁰ Jehovah mitahy fo lan̈iany olo manompo izy. (Heb. 11:6) Iziôty izy man̈ampy atsika hanan̈a fiadan̈ana ndreky ho ravoravo, baka iô izy han̈amia atsika fiain̈ana tsisy farany amin’ny amaray. Atsika matoky tsarabe fa tian’i Jehovah hitahy atsika, baka iô izy  manan̈a angôvo han̈anaovan̈a zen̈y. Zen̈y mahavy atsika mifen̈y fo erakan’ny angôvontsika amy fanompoan̈a, karaha nataondrô mpanomponany taloha tan̈y. Ambaka zen̈y nataon’i Timoty, tamy taonjato voanalohany.​—Heb. 6:10-12.

11. Ino raha nandrisiky Timoty hiasa mare han̈ampian̈a fiangonan̈a? (1 Timoty 4:10)

¹¹ Vakia 1 Timoty 4:10. Timoty ten̈a natoky Zan̈ahary velon̈o. Zen̈y nahavy izy nifen̈y mare nanompo Jehovah ndreky nan̈ampy olo. Ino ma raha nataony? Apostoly Paoly nandrisiky izy hankatsara fahaizany mampianatra fo, izy koa fa manompo ndreky man̈ano kabaro. Apostoly Paoly koa nivolan̈a taminany fa izy mila mifen̈y ho modelindrô mpiara-manompo taminany, na tanora na matoe. Timoty koa nirahan̈a nan̈ano asa sarotro, an̈isan’izen̈y nan̈amia torohevitry mentitry lan̈iany olo nila zen̈y, kanefa nan̈ano zen̈y tam-pitiavan̈a fo. (1 Tim. 4:11-16; 2 Tim. 4:1-5) Natoky Timoty fa Jehovah hitahy izy fo nata tsy hitan’olo asa nataony aby zen̈y, aviô nata nisy olo tsy nankasitraka izio.​—Rom. 2:6, 7.

12. Nan̈ino ma anti-pan̈ahy aby io miasa mare amy fiangonan̈a? (Zahava koa sary.)

¹² Mahazo matoky koa irô anti-pan̈ahy amin’ny andra iziôty fa Jehovah mahita ndreky mankasitraka asa tsara ataondrô. Ankoatran’ny asa fiambesan̈a ôndrikôndriky, fampianaran̈a ndreky fitorian̈a, maro amindrô anti-pan̈ahy aby io koa man̈ampy amy tetikasa fan̈oren̈ana, aviô man̈ampy olo tatran’ny antambo. Sasany ndraiky an̈isan’ny Antokona Mpamangy Marary, na Komity Mifandray Amin’ny Hopitaly. Irô anti-pan̈ahy aby io mahay fa Jehovah tômpin’ny fiangonan̈a io fa tsy olombelon̈o. Ke zen̈y mahavy irô mifen̈y mare man̈ano eraka angôvondrô, man̈ampy fiangonan̈a. Baka iô irô matoky tsarabe fa Jehovah koa hitahy irô, amin’ny asa ataondrô zen̈y.​—Kol. 3:23, 24.

13. Karakôry fahitan’i Jehovah ezaka vitantsika amy fanompoan̈a?

¹³ Tsy atsika jiaby mety ho voatendry  anti-pan̈ahy, fa atsika jiaby ndraiky mety man̈amia raha Jehovah. Izikoa atsika man̈ano erakan’ny vitantsika amy fanompoan̈a Jehovah, ten̈a mankasitraka zen̈y Zan̈aharintsika io. Hitany atsika mifen̈y fo man̈ano fan̈amezan̈a hanohan̈ana asa eran-tany, ndray atsika tsy afaka man̈amia be. Ravoravo koa izy mahita atsika mifen̈y mandresy hen̈amasontsika ke mananga-tan̈ana hamaly teny amy fivorian̈a, baka iô lera atsika mamela helokon’olo nan̈ano raha nampameloko atsika. Aviô ndray tsy arakan’ny itiavanao izy raha vitanao amy fanompoan̈a, matokisa fa Jehovah ten̈a mankasitraka raha ataonao. Anao mbala tiany fo ke izy hitahy anao.​—Lioka 21:1-4.

MIFEN̈A FO HIFANDRAY MARIKITRY AMY ZAN̈AHARY VELON̈O

14. Nan̈ino tsy hivadiky amy Jehovah atsika izikoa mifandray marikitry aminany? (Zahava koa sary.)

¹⁴ Izikoa atsika mifandray marikitry amy Jehovah, ho moramora amintsika tsy hivadiky aminany. Karaha zen̈y nataon’i Josefa. Izy nifen̈y mare tsy hijanganjanga fôtony hainy fa zay raha ataony misy vokany amy fifandraisany amy Zan̈ahary aby, ke izy tsy tihampalahelo Zan̈ahary. (Gen. 39:9) Izikoa tiantsika hifandray marikitry amy Jehovah, atsika mila manokan̈a fotoan̈a hivavahan̈a aminany, ndreky hianaran̈a Volan̈anany. Raha aby zen̈y hankafatatra fifandraisantsika aminany. Ke izikoa atsika tsara fifandraisan̈a aminany karaha Josefa, atsika tsy tihan̈ano raha hampalahelo Jehovah foeky.​—Jak. 4:8.

15. Ino raha ianarantsika tamy raha nandalo tamindrô Israelita tamy tany paiky tan̈y? (Hebreo 3:12)

¹⁵ Lan̈iany olo man̈adin̈a fa Jehovah io Zan̈ahary velon̈o, mora mivadiky aminany. Diniha baka raha nandalo tamindrô Israelita aby io, tamin’ny irô tamy tany paiky tan̈y. Irô nahay tsarabe fa Jehovah io misy, fa irô ndraiky nanomboko nisalasala tsao izy tsy hikarakara irô. Ndray irô aby nan̈ontany: “Amintsika eto ma Jehovah sa tsy eto?” (Eks. 17:2, 7) Ke vokany, irô lôso nanohitry Zan̈ahary. Azo antoko fa tsy tiantsika han̈araka ohatra ratsindrô zen̈y.​—Vakia Hebreo 3:12.

16. Ino raha mety hitsapa finoan̈antsika?

 ¹⁶ Donia ty tsy vôly man̈ano raha hampasarotro tsy fivadihantsika amy Jehovah. Maro olo tsy mino fa Zan̈ahary misy. Baka iô, matetiky karaha tsara fo fiain̈anan’olo aby tsy man̈araka fitsipikin’i Jehovah. Ke izikoa atsika fa mahita zen̈y, mety mitsapa finoan̈antsika raha zen̈y. Ke ndray atsika efa mino fa Zan̈ahary misy, atsika mety hanomboko hisalasala tsao izy tsy han̈ampy atsika. Mira zen̈y koa raha navoa mpanoratra Salamo faha-73. Izy koa fa nahita fa irô olo tsy man̈araka fitsipikin’ny Zan̈ahary aby io karaha ravoravo fo mankafy fiain̈ana, izy nisalasala tsao tsy mahatsara izy manompo Zan̈ahary.​—Sal. 73:11-13.

17. Ino han̈ampy atsika hifandray marikitry amy Jehovah fo?

¹⁷ Ino ma raha nan̈ampy mpanoratra Salamo io han̈ova toe-tsain̈inany? Izy nangala onon̈o han̈ano karakôry hiafaran’olo aby tsy manompo Jehovah aby io. (Sal. 73:18, 19, 27) Nidinihiny koa ino aby hatsaran̈a azo baka amy fanompoan̈a Zan̈ahary. (Sal. 73:24) Ke atsika koa mety mangala onon̈o irô hatsaran̈a namian’i Jehovah atsika. Miniminia karakôry fiain̈anantsika hôtrizay izikoa atsika tsy nanompo Jehovah. Fan̈anaovantsika raha zen̈y han̈ampy atsika tsy hivadiky amy Jehovah. Ke karaha mpanoratra Salamo in̈y, atsika koa hahavita hivolan̈a karaha ty: “Fa zaho ndraiky, man̈aton̈o marikitry Zan̈ahary ten̈a tsara aminaka.”​—Sal. 73:28.

18. Nan̈ino atsika matoky fa ho vitantsika hiatriky ny hoavy?

¹⁸ Ho vitantsika hiatriky zay raha sarotro tôjy atsika amin’ny andra farany ty, fôtony atsika “mpanompon’ny Zan̈ahary velon̈o sady ten̈a Zan̈ahary.” (1 Tes. 1:9) Zan̈aharintsika mikarakara atsika, baka iô izy mbala han̈ampy atsika fo koa. Izy nan̈ampy mpanomponany taloha tan̈y. Karaha zen̈y koa ataony amintsika amy ziôty. Teteky iô atsika hiatriky fahorian̈a be ho avy ambony tany eto, fa atsika ndraiky tsy hiady manokan̈a. (Isaia 41:10) Ke irarian̈a atsika jiaby ‘hisy korazy hivolan̈a karaha ty: “Jehovah mpan̈ampy zaho, ke tsy havozo foeky zaho.”’​—Heb. 13:5, 6.